ذكريات تهم مواليد السبعينات

[OlaOsman]

فعلا اللي يبص علي برامج الكارتون و البرامج العادية بتاعة زمان يلاقي المبادئ و القيم متنطورة في كل حتة .. حتي الحاجات القائمة علي القتال و الحرب زي مازنجر و جريندايزر .. لازم الحلقة يبقي وراها هدف و تخلص بحكمة .. مش معمولة كدة و خلاص .. إنما كارتون دلوقت للإبهار فقط .

الإسبوع اللي فات كانت قناة OTV مستيضفين ماجد عبد الرازق (بابا ماجد) ما شاء الله عليه، شكله ما اتغيرش أوي ولا بان عليه العجز للدرجة. كان جايب معاه رسومات راسمينها أطفال من أيام البرنامج بتاعه و كان بيستعرضها قدام الكاميرا، منهم رسمة من سنة 70.. يعني الطفل ده دلوقتي معدي ال40 بالراحة. ساعتها حسيت فعلا بقيمة برامج الأطفال بتاعة زمان.

[نور القمر]

بمناسبة الاخ جرينديزر ده مش فاكراه خالص غالبا هيكون مكنتش بحبه ومش متبعاه
المهم الحلقات دي كانت هتموت طفلين زمان ولد وبنت
الحكاية ايه بأه !!!
واحدة صحبتي حكتهالي
قالت لي هي وجارها قرروا يركبوا جناحات ويطيروا زي جرينديزر
وطلعو فوق السطوح وقرروا الولد يطير الاول وهي بعده منه
على اعتبار boys first
الحمد لله السطوح كان 3 ادوار بس والولد اتكسر وربنا كاتب له عمر
وبتقولي لغاية دلوقت كل ما يشوفها يقولها انتي السبب ههههههههههههه كانت فكرتها والمفروض هي تنط الاول ......... بنات ناصحة من يومها:wacko:

[human]

برج السعاده لحسن عابدين من اروع المسلسلات الكوميديه السباك كان نجاح الموجى الله يرحموا و كان دايما يقول هتسلك

فاكرين برضه

سنقر الكلبى والمقدم دليله وحسن راس الغول و حبظلم و عباد النار ---- يقى اكيد على الزيبق :)

حد فاكر التتر؟

بالنسبه لغرندايزر فده كان اختراع --- دووووك فليد الرزه المزدوجه


حد فاكرجونجر؟؟

[TaoTao]

برج السعاده لحسن عابدين من اروع المسلسلات الكوميديه السباك كان نجاح الموجى الله يرحموا و كان دايما يقول هتسلك

فاكرين برضه

سنقر الكلبى والمقدم دليله وحسن راس الغول و حبظلم و عباد النار ---- يقى اكيد على الزيبق :)

حد فاكر التتر؟

بالنسبه لغرندايزر فده كان اختراع --- دووووك فليد الرزه المزدوجه


حد فاكرجونجر؟؟

أظن المسلسل كان اسمه "أهلاً بالسكان" والله يرحم نجاح الموجي (السباك) وحسن عابدين (عصفور افندي) ونبيلة السيد (زوجته) وبدر الدين نوفل (والد عصفور).. ويدي الصحة للعايشين منهم محمد فريد (العمدة) وميمي جمال (سوسو طرب) ومحيي الدين عبد المحسن إمممم دول اللي فاكرهم دلوقتي.

مسلسل علي الزيبق برضه جمييييييييل .. أغنية التتر أنا فاكر الختام بس مش فاكر المقدمة (حكموكي ما حكموكي .. برضه المصري مصري والمملوك مملوكي) وفاكر كويس "حمدي أحمد" في دور (القاضي حلاوة) وكان "محمد الشويحي" من الصعاليك وبيألف أغاني يغسل بيها الحكام كان دمه خفيف جداً

[mohamed_kta]

السلام عليكم

و كمان فيه حد كان ممكن ينسى برنامج العلم و الإيمان اللى كان مخلى الناس اللى متعلموش يفهموا العلم ويسبحوا ويحمدوا .

و كمان كان فيه برنامج بتاع هند أبو السعود على القناة الاولى كان بيجب الحاجات الغريبة فى العالم وبالأخص الحلقة بتاعت الست الصينية اللى معندهاش دراعين .

و الكميرا الخفية الحقيقة بتاعت فؤاد المهندس و فوازير عموا فؤاد أيام مين عارف بكره ولادنا يقولوا داه أنا أبويا من أيام الفيس بوك :k20:

[aif]

السلام عليكم

و كمان كان فيه برنامج بتاع هند أبو السعود على القناة الاولى كان بيجب الحاجات الغريبة فى العالم وبالأخص الحلقة بتاعت الست الصينية اللى معندهاش دراعين .

جولة الكاميرا ..... برنامج تحفة
كان من اجمل البرامج وقتها

[mazagngi2010]

تماااااااااااااام

[mazagngi2010]

مش قلت لكم شكلكم هتسخنوا ال 1 على المشاركه فى الموضوع الجامد ده

===============

عم شكشك اللى مكنش ليه شغلانه الا انه يقف فى الشباك وابوه اللى كانت دقنه سلك مواعين


- ياواد ياشكشك


- نعم يابابا؟؟؟


- عاوز زبادى!!!!!!!


- حاضر يابابا (كان بيعلمنا الطاعه الراجل ده بصراحه رغم ان ابوه كان خنيق)

الريس حنتيره

البلى او الضراريب حسب اختلاف الثقافات


فاكرين الجمله الشهيره(هنلعب مثلث ولا صينيه)


ارشق وبلوظ وعمود واقف وعمود نايم وقبل اللى يقصدنى وش** ام كلثوم (طبعا المخضرمين هما اللى عارفين مكان النقط ايه)

بعد ماافروديت تضرب الصاروخين اللى حيلتها


-انجدنى ياماااااااااااااااااااهير


-افروديت!!!!!!!!

انا عارف انها مكرره بس صورتها اتمسحت هنا

واخيرا تحققت عداله السمااااااااااااااااااااااااااء

الدبوره اللى كان صوتها وهم طبعا-مش زى الصينى البلاستيك اللى بتنور اليومين دول وبتدور بزمبلك - كانت احسن من النحله اللى كنا بنقصها من علب فيليت العسكرى او البيرسول وكنا بنحط فيها تراب علشان بيكون ناعم فى الاخر طبعا شكلكم مش عارفين الكلام ده

اموت واعرف الكوره دى مكنتش بتقع ليه

مقلمه الوطن العربى الصفيح

المسدس ابو حبش


هييجى يوم كمان 20 سنه هيحط -اطفال اليومين دول -الشباب وقتها صور للمسدس الخرز وهيقولوا فاكرين لما كنا بنلم الخرز من الارض مش زى مسدسات الليزر بتاعت اليومين دول (على حسب اللى هيكون موجود كمان 20 سنه)

القلم ابو 4 الوان كان طفره بصراحه ولما الصين عرفت انه مشى فى السوق بداو انتاج ابو 12 لون وبريحه وكان زباااااااله

كوفرتينا الاصل ياجماعه متغيرتش وفضلت الهديه المفضله اللى بنشتريها لاى مريض
فاكرين اعلان كوفرتينا فى الصباحيه ..... تبقى جوازه هنيه
كوفرتينا فى مش عارف ايه ..... يبقى ....
كان اول حاجه بتيجى فى دماغى لما اسمع الاعلان ده
المعطيات......... النتائج
وفى اخر الاعلان ضحك كوميدى متواصل بين الستات
(وهو المطلوب اثباته)

[human]

كان فيه مره عبد المنعم مدبولى عمل حاجه اسمها جده عبده

جده عبده عامل ايه
زارع ارضه -- زارع ايه


مين فاكر القناه التالته و هى بتفتح فى 6 اكتوبر و كان موضوع كبير جدا
و مين فاكر لما القناه التانيه كانت بتقفل

و كمان التليفزيون كان بيقفل و يرجع يفتح تانى و فى رمضان كان بيقفل وقت الفطار

و كان هو مسلسل واحد بتفرج عليه كلنا --- فاكرين هو وهى و دموع فى عيون و (جوجو) انا كان قلبى بيهفهف بسبب جوجو ديه :)

و كان التليفزيون بيفتح الساعه عشره الصبح و قرآن كريم و بعدين برنامج دينى 5 دقايق كده و بعدين ما تقوله الصحافه ثم ماما نجو او ساميه شرابى و كرمبه او اى عك :)
و بعدين اى حشو من نوع ربات البيوت و الساعه 11 و ربع فيه مسلس عربى لغايه 12 عشان نشره الاخبار
و يوم مالريس يكون فى حته انسى بقى تشوف حاجه عشان الاولى و التانيه و الراديو والحنفيه و كل حاجه شغاله فى النقل

[نور القمر]

ههههههههههههه مزاجنجي جبت الصور دي منين
انا متهيألي منهج الانجلش ده اتغير ؟؟ ولا لسه هو هو
كنت بموت في عم شكشك طول اليوم يتخانق مع الناس في الشارع ههههههههه

هيومان قصدك جوجو في مسلسل دموع في عيون وقحة؟؟
بس لو هي قلبك يهفهف على ايه دي كانت وحشة ومنكوشة ههههههههههههه ازواق سبحان الله

[human]

انا ناتفرجتش على بوجى و طمطم اللى فيها عم شكشك عشان كنت بتابع على القناه التانيه سلاحف النينجا و الحج كرعون و الاستاذ فرام و هما بيضربوا من دوناتيللو و مايكل انجلو و بقيت الاخوه السلاحف



جوجو!!! منعكشه!!!
لا ماتقوليش عليها كده ده انا كنت انام واصحى و اقوم و انا بحلم بجوجو
و قلت هسافر ليفربول لما اكبر عشان ادور على جوجو


انا فاكر المقلمه الصفيح بتاعه الخريطه ديه كنا بنلعب ان كل واحد يجيب اسم حاجه على الخريطه و الجدع يعرف يطلعها هيه اصلا مكتوبه بخط ردئ جدا
فاكر بلد فى السودان اسمها واو!!
النتيجه ان احنا كنا حفظينها صم بعد كام مره لعب

و فاكر فى البلى الحكشه و التريانجل و الدنجل و الترنيب(بتاع البلى مش الكوتشينه) و كان فيه لعب كتييييير و النيكل الصينى و ربع جالون و النيكل الحديد و كله كله على الطروقه و سن تيكس :)

[aif]

و فاكر فى البلى الحكشه و التريانجل و الدنجل و الترنيب(بتاع البلى مش الكوتشينه) و كان فيه لعب كتييييير و النيكل الصينى و ربع جالون و النيكل الحديد و كله كله على الطروقه و سن تيكس :)

واضح انك كنت حرييييف بلي .....
يا تري كنت بتلعب نوق نوق ... بنوي المشمش
دي كانت لعبة موسمية في موسم المشمش .... وفي الآخر نحمصة ونعملة دقة ....

[human]

لا يا أحمد ماجربناش نوى المشمش
كنت باجيب بلى من مصروفى من عند عم حنا (هو مات و بقى فيه عم جرجس) عم محمود كان بيقول البلى حرام


بس بصراحه لما لقى الموضوع ماشى جاب نيكل الميه اللى من غير حاجه جواه و شفاف و الوان تهبل
و كان بيبيع الواحد ب شلن و الجالون بربع
طبعا ده كله ضحك على القون و احنا عبط و مش فاهمين
طبيعى اللى مافهوش خط يبقى ارخص بس احنا المنطقه بتاعتنا كانت ماشيه بالعكس

و كان الادان لما يدن نخش الجامع اللى بنلعب بلى ادامه عشان نصلى و نمشى نشخشخ و الشيخ يزغر لينا


و الله كانت ايام حلوه و طفوله مشرده

[نور القمر]

و الله كانت ايام حلوه و طفوله مشرده

كان ليا ابن عمتي من سني وكنا في مدرسة واحده
كنت بشوفه وهو في حالة الطفولة المشردة هههههههههههههه وبيلعب بلي ببأه هتجنن وعايزة انزل العب معاهم
لكن طبعا ممنوع البنات تنزل الشارع وكمان بلي دي فيها وئد على طول
اشمعنه البلي لأ بالنسبة لي وهو اه
وكنت بشتري بلي واخليه يلعب لي علشان اكسب
لكن هو كانت ذمته استك ههههههههههههههه ديما يخسر ليا ويكسب لنفسه

[human]

فاكرين Ninja Turtles
Ninja Ninhja Rap
go go go go go Ninja Go Ninja Go
Ninja Ninja Rap

كانت بتاعه Vanilla ICE

http://www.youtube.com/watch?v=GFLGRidfFo4