ذكريات تهم مواليد السبعينات

[TaoTao]

ربنا يباركله لخص 40 سنة :)
بس فيه كام تعليق كدة:
- "زكي بدر" تولى وزارة الداخلية بعد "أحمد رشدي" كما ذكر أخونا الكبير :) ولكنه خرج من الوزارة على قيد الحياة (لا يوجد فيمن عاصرت وزير داخلية مات بالوزارة) وتولى من بعده السيد "عبد الحليم موسى" ومن بعده "حسن الألفي" وقام بدور بارز وتاريخي وفاصل ومجيد -كل دول- في محاربة الإرهاب وكسر شوكته ولكنه خرج عقب حادث الدير البحري وتولى من بعده الوزير الحالي "حبيب العادلي"

- برنامج "مساء الخير" كان مرحلة متأخرة من برنامج "صباح الخير" لنجوى إبراهيم .. وليس مرحلة مبكرة كما فهمت من البوست .

هادعبس تاني وارجعلكم :)

بس بصارحة كلام جميل وملخص كل ذكريات 3 أجيال (ستينات وسبعينات وتمانينات)

[TaoTao]

افتكرت أغنية جميلة جداً لقيت نفسي بادندنها مع نفسي (الأغنية يغنيها أطفال بالفصحى):
شكراً شكراً يا جد .. شكراً شكراً يا جد
نحن الأطفال عيون الغد
نحن الأجيال نظيفو اليد
نسعد بحكايات الأجداد
نأخذ منها العبرة والحكمة

مش فاكر هي كانت لإيه .. بس أظن كانت أغنية في وسط مسرحية مأخودة من قصص "كامل الكيلاني" كاتب الأطفال المصري الأشهر والأوحد بلا منازع حتى الآن (يعقوب الشاروني بيمرضني)

[TaoTao]

شوية نقط كدة هفوات بسيطة عدت في موضوع الراجل اللي كاتب موسوعة 40 سنة :)
"وكان نجوم المولونجست أيامها محمود شكوكو وشاهدته على الحقيقة وسيد الملاح وأحمد غانم وأحمد الحداد ونبيل فهمي"
ومن بعدهم حمادة سلطان :)

"أنا من جيل شهد تحويل السلام الجمهوري إلى بلادي بلادي بتوزيع لعبد الوهاب لم ينل إستحساناً في البداية"
بصراحة السلام الجمهوري على بعضه -لو تججاهلت أنه سلام جمهوري- مش عاجبني .. وحش جداً بس مايصحش اقول كدة لأنه سلام جمهورية مصر العربية .. اتمنى يتغير لحاجة أقوى ومعبرة.

"وقبل النزول كان برنامج طريق السلامة وكانت مقدمته الغنائية بصوت شادية تقول بالسلامة ياحبيبي بالسلامة وصوت المقدمة بصوت صفوت الشريف"
أظنها نجاح سلام .. شادية؟!.

" ومن الثامنة للتاسعة كانت برامج كلمتين وبس وهمسة عتاب وأخبارخفيفة تقديم آيات الحمصاني"
"كلمتين وبس" كان معاده دايماً 7:55 وكان معنى إني اسمعه دي إشارة الإنذار إني اتأخرت جداً
"آيات الحمصاني" كانت تقدم برنامج "طريق السلامة" بس مش متأكد من موضوع أخبار خفيفية.

[mohmd76]

الاتوبي الاحمر كان اسمة كارتر كان هدية الرئيس الامريكى كارتى عقب الاتفاقية اياها مع اسرائيل قام ادى حاجه الشعب المصرى يفتكره بيها ههههههههههه
اتوبيسات زبالة فاكر مرة وانا وعمىوجدتى واختى فى ميدان التحرير وفى اثناء ركوبنا الاتوبيس ولع هههههههههه والله حقيقة

[mohmd76]

مين الى فاكر الاهرام كان ب 10 قروش والتذكرة ب 5 قروش
ليت الزمان يعود

[Chicco]

"كلمتين وبس" كان معاده دايماً 7:55 وكان معنى إني اسمعه دي إشارة الإنذار إني اتأخرت جداً.

طبق الأصل يا باشا :D

[homme49]

مين الى فاكر الاهرام كان ب 10 قروش والتذكرة ب 5 قروش
ليت الزمان يعود

أنا حضرت اللأهرام بقرشان و تذكرة الأتوبيس درجة ثانية بقرش واحد و درجة أولى قرشان .
أتوبيس المطار 400 هو الوحيد الذى كانت تذكرته بأربعة قروش و كان لا يركبة عساكر الجيش حيث لم تكن متاح به نصف تذكرة.
و كان ركوب 400 من أمام جامعة عين شمس أوالنزول منه نوع من التباهى بين طلبة الجامعة فى السبعينات .
و كان الواحد منا يتكسف و يبقى فى نصف هدومه لو زميلة جميلة شافته راكب الأتوبيس أو المترو درجة ثانية .

[mazagngi2010]

طبعا كلنا فاكريت الكاسيت المعجزة ناشيونال 543 اللى كان فى كل بيت تقريبا والصوره دى من عندنا فى البيت وبسم الله ماشاء الله لسه شغال والكاسيت ده بيلاقى رواج رهيييييب فى سوق الجمعه عندكم فى القاهرة وسوق الثلاث فى الزقازيق :) وتقريبا باقى الاسواق وقطع غياره معمره جداااااااا

[TaoTao]

كان عندنا في البيت الكاسيت الناشيونال وهاي فاي .. لما تزوجت قلت اضرب على واحد فيهم قالولي خد الهاي فاي .. قلتلهم لأ أنا هاخد النشيونال حبيبي :)

ساعات بيبقى له شوشرة و "زنة" عجيبة كدة باحبها جداً .. وكمان له معايا ذكريات جميلة كتيييييييييييير

حلوة جداً الصورة وتسلم إدك يا باشا :)

[mohmet]

انا عايز حكاوي القهاوي يا جماعه بليز او علي اقل تقدير تتر المقدمه و النهايه
انا علي فكره مش جيل سبعينات خالص
انا لسه صغنن

[mazagngi2010]

ساعات بيبقى له شوشرة و "زنة" عجيبة كدة باحبها جداً

عندك حق ياريس الزنه دى عندنا برضه

[adhamsabry51]

افتكرت أغنية جميلة جداً لقيت نفسي بادندنها مع نفسي (الأغنية يغنيها أطفال بالفصحى):
شكراً شكراً يا جد .. شكراً شكراً يا جد
نحن الأطفال عيون الغد
نحن الأجيال نظيفو اليد
نسعد بحكايات الأجداد
نأخذ منها العبرة والحكمة

مش فاكر هي كانت لإيه .. بس أظن كانت أغنية في وسط مسرحية مأخودة من قصص "كامل الكيلاني" كاتب الأطفال المصري الأشهر والأوحد بلا منازع حتى الآن (يعقوب الشاروني بيمرضني)

الأغنية دي كانت بتيجي في برنامج اسمه كل اطفال العالم و كان بييجي يوم الأثنين بعد العصر علي القناة التانيه و كانت بتقدمه واحده اسمها بثينة تقريبا بس مش فاكر باقي الأسم

[TaoTao]

الأغنية دي كانت بتيجي في برنامج اسمه كل اطفال العالم و كان بييجي يوم الأثنين بعد العصر علي القناة التانيه و كانت بتقدمه واحده اسمها بثينة تقريبا بس مش فاكر باقي الأسم

أيوة برافو عليك .. كانت ست كبيرة وبشوشة كدة .. بس للأسف مش فاكر اسمها خااااااااااالص

[د.أحمد سمير]

أيوة برافو عليك .. كانت ست كبيرة وبشوشة كدة .. بس للأسف مش فاكر اسمها خااااااااااالص

هذه السيدة الفاضلة كان اسمها ليلى موسى .. وهي أول من فتح أعين جيلنا على ألمانيا ..
كانت لها لكنة محببة ، وكانت تأتي بألعاب تشرحها لنا تنمي الذكاء .. وكانت تتكلم عن ألمانيا كثيراً وتأتي بمواد فيلمية عنها في الوقت الذي لم نكن نعلم عن ألمانيا شيئاً سوى العربيات المرسيدس ، والمواد الدعائية من كتب ومجلات فاخرة توزع على رواد معرض الكتاب في جناح ألمانيا الشرقية عندما كان المعرض يقام بأرض المعارض بالجزيرة مكان دار الأوبرا المصرية حالياً

[TaoTao]

عندك حق ياريس الزنه دى عندنا برضه

بس إيه رأيك في الزنة؟ بتدي طعم تاني للإذاعة جامد :)
ده غير الـ 3 Band Radio اللي مالهومش أي لازمة غير الباند المتوسط MW اللي كان عليه كل المحطات المصري .
أيام :)