ذكريات تهم مواليد السبعينات

[OlaOsman]

اليومين دول بيجى مسلسل البخيل وانا بتاع فريد شوقى ووائل نور (كابتن لطفى) والواد محمد هنيدى ايام ما كان عنده شعر
بجد مسلسل ملوش حل
ونفسى اشوف مسلسل بتاع عم صابر باردو بتاع فريد شوقى

برضه من مسلسلات الزمن الجميل.. جامد جددددددددددددا و السيناريو و الحوار مالهمش حل.

[emam]

بصراحة كل مسلسلات محمود مرسى كانت جميلة فعلا - بالاضافة للمسلسل الى بتقولوه عليه (مش فاكر اسمه) بتاع الحجار ومحمود الجندى وصابرين فى كمان مسلسل السمان والخريف ، لما كان صحفى وكانت معاه على ما اعتقد سهير رمزى ، ومسلسل الرجل والحصان لما كان صول فى الشرطة - لو تفتكرو
ومسلسل (ابراهيم الطاير) بتاع عادل امام والحريرى

[أبو إياد]

الرجل والحصان ده كان اسمه طلبه لكن مش متذكر اسم المسلسل
وطبعا ابو العلا البشرى
القط الاسود
العسل المر
الرحايا
ومازال النيل يجرى
البردعى (انا البردعى يارشدى)
عائله شلش

[OlaOsman]

البردعى (انا البردعى يارشدى)

المسلسل ده كان إسمه و توالت الأحداث عاصفة

[أبو إياد]

المسلسل ده كان إسمه و توالت الأحداث عاصفة

اول مره شوفته كان عمرى تقريبا 11 سنه وفضلت فتره كبيره جدا بعانى من حاله خوف ورعب بس الحمد لله

ولما شوفته وانا كبير كنت باضحك على نفسى وانا صغير
لان الخوف بقا ليه مفهوم تانى خالص خصوصا لما بداء التعامل والاحتكاك بالناس

[brown-eyes]

البردعى (انا البردعى يارشدى)

دلوقتي غيرو اسمه وبقي
انا البرادعي يا حسني :)

[mazagngi2010]

كانت اغنيه جميله جدا
كان طالع مع محمد منير و الحجار

الله يرحمه

http://www.youtube.com/watch?v=j1anw24ewjw

v=0gl2qzgbe_g[/url]

عمر فتحى كان نجم التمانينات كان واكل الجو من جيله كله لاتقللى منير ولا دياب ولا فؤاد الله يرحمه لو كان عاش وكمل كان زمانه اعظم مطربى مصر

[tamerelsoud]

شكرا ليكم كلكم

الف شكر يا جماعة على الرحلة الجميلة دي بس من فضلكم تكملوها

[TaoTao]

أنا لسة ماضي تعهد إن اللي هاكتبه "هام ومفيد"، مش عارف اللي هاقوله مفيد وللا إيه بس ياللا الأرزاق على الله،
المهم إلى ذمة التاريخ برنامج له ذكريات مع مواليد من أول الثلاثينات وانت جاي، "إلى ربات البيوت". بالصدفة سمعت الراديو لقيت برنامج اسمه "البيت السعيد" في نفس توقيت برنامج "إلى ربات البيوت" وبنفس المذيعة السمجة ونفس طريقة الإخراج مافيش أي فرق غير تغيير الاسم، وإلغاء الفقرة المسجلة بتاعة "صفية المهندس" ..
"ربات البيوت" كان بيقدم معلومات سريعة اجتماعية وثقافية مما يهم ربة المنزل لرعاية منزلها و أولادها (ولا أخفيكم سراً أنني كنت من عشاق الاستماع إليه كلما تيسر)، كان يبدأ بفقرة "صفية المهندس" التي تستعرض شكوى تردها بالبريد وكانت أغلب الأحوال بتحمل اللي بعتت لها الرسالة المسئولية وتديها على دماغها :) بس بصراحة منتهى الحكمة والوقار.
وبعدين ييجي المسلسل اليومي "عائلة مرزوق" وده يمكن أطول مسلسل في العالم حيث كانت أحداثه متوالية وتواكب المتغيرات الاجتماعية اليومية وقام بأدائه نخبة من النجوم مثل كريمة مختار وفؤاد المهندس ومحمود مرسي ومحمد توفيق وكانوا بيتغيروا بتغير العصور والأجيال في "عيلة مرزوق"
ومن الفقرات اللي افتكرها برضه "حاجة تفلق" الذي يستعرض مشكلة اجتماعية شائعة الحدوث وتنتهي بقول بطل العمل لزوجته "دي حاجة تفلق"
وكمان "خالتي بمبة" التي كانت تقوم بأدائها "ملك الجمل" -على حد ذاكرتي - وكانت تستعرض مغامراتها مع جاراتها من وجهة نظرها حيث تقوم بمواقف ساذجة تنتهي بـ "زعل" جاراتها منها لتختتم الفقرة بمقولة "يا عيني عليا" :) .. المهم إن "ملك الجمل" كان دمها خفيف جداً في الفقرة دي وانا كنت باخاف منها من ساعة ما قتلت فتحي في فيلم الشموع السوداء :) ماكنتش مصدق إنها هي اللي بتمثل الفقرة دي.
وكان فيه فقرة "النصائح المنزلية" كانت بتقدمها الفنانة (الجميلة الرقيقة جداً جداً) مديحة سالم، وكانت بتقدم نصائح في غاية الروعة عن حاجات مفيدة زي التخلص من بقعة صعبة أو طريقة التخلص من روائح الدهانات في المنزل.

كل ده راح وانقضى وتبقت المذيعة السمجة وأغنية سخيفة بدلاً من الموسيقى اللطيفة وصوت صفية المهندس الحنون وهي تقول "إلى ربات البيوت".
والعاقبة عندكم في المسرات.

[aif]

الموضوع ده واحشني جدا جدا
من امتع مواضيع نايل موتورز

[wesam_salom]

الموضوع ده واحشني جدا جدا
من امتع مواضيع نايل موتورز

ايوه كده يا حاج احمد

هات لنا الكلام الحلو بتاع زمان

[pro_samir]

مسلسل "هند والدكتور نعمان" كان بيعملي حالة كآبه مش عارف ليه

حد فاكر "باقي من الزمن ساعه" ؟ برضو كان كئيب ولا المشكله فيا انا ولا ايه :))

[A7MED_PHARMA]

كويس إن الموضوع إتفتح تاني
فاكرين مسلسل بتاع ""العنكبوت""
بتاع عزت العلاليلي ... كان مسلسل مرعب وكئيب.
وفاروق الفيشاوي لما كان سندباد .. بيتعلق بحزامه في رجلين طائر الرخ ..والممثل القصير إبوشعر أبيض
إلي ضحك عليه وركب على إكتافه ومانزلش
.........
وكتاب المثالي بتاع الفيزياء
كتاب المثالي ده...ياسلام
كنت تشوف المسألة ..وإيدك الشمال عند نماذج الإجابة إلي ورااااااااا

[OlaOsman]

مسلسل "هند والدكتور نعمان" كان بيعملي حالة كآبه مش عارف ليه

حد فاكر "باقي من الزمن ساعه" ؟ برضو كان كئيب ولا المشكله فيا انا ولا ايه :))

هند و الدكتور نعمان اللي كان بيخوفني فيه جدا الممثل اللي كان عامل دور صاحب العربية النقل اللي قتل الست، كل لما يظهر في حلقة و يبرق فيها كده لهند و أبص ألاقيها مرعوبة و بتترعش ما كنتش أعرف أنام بالليل.

أما بأه لما كانت بتحاول تثبت لجدها و جيرانها و الظابط إنها شافت القاتل و ماكانوش بيصدقوها، كان بيبقى نفسي أنط جوه شاشة التليفزيون و أقول لهم آه هي بتتكلم صح صدقوها بأه

أما الباقي من الزمن ساعة فهو كان كفاية تتر البداية.. عصير كآبة

[OlaOsman]

كويس إن الموضوع إتفتح تاني
فاكرين مسلسل بتاع ""العنكبوت""
بتاع عزت العلاليلي ... كان مسلسل مرعب وكئيب.
وفاروق الفيشاوي لما كان سندباد .. بيتعلق بحزامه في رجلين طائر الرخ ..والممثل القصير إبوشعر أبيض
إلي ضحك عليه وركب على إكتافه ومانزلش

العنكبوت فاكراه طشاش و فعلا مش فاكرة منه غير طلاسم

أما السندبات فأنا كان اتمسح من ذاكرتي تماما لحد ما قريت رواية ليالي ألف ليلة بتاعة نجيب محفوظ، غير إنها رووووووووعة، بس فكرتني بالسندبات و طائر الرخ و الممثل القصير اللي كان حاكم ع السندبات إنه يفضل شايله على طول.