وائل عباس العميل

[sasasony]

بصراحة الراجل ده استفزني اوي فتحت المدونة بتاعته (مدونة الوعي الصهيوني) الشهيرة بالوعي المصري
دخلت لقيت اخباره كلها بتنقسم لتلت حاجات:
1)اخبار هات يتشويه في المصريين زي كليب عماد الكبير
2)اخبار بتوقع بين العرب زي الاغنية بتاعة فريق الراب السعودي المغمور جدااااا
3)اخبار بتمجد في نفسه وفي مدونته
تعالي بقي دور اخبار انتهاكات الجيش الامريكى والاسرائيلي مفيييييش
تعالي دور علي اخبار التطبيع مع اسرائيل والغاز المصري مفييييش
اللي شككني فيه حواراته مع قناة الحرة الامريكية و وقوف موقعي جوجل ويوتيوب الامريكيين بجواره بعد حذف فيديوهاته المليئة بالالفاظ البذيئة
الخلاصة ان احنا مانسقفش لكل واحد بيقول لأ ياحكومة
ملحوظة : انا ليس لدي اي اتنمائات سياسية

[ibrahimsaad]

بصراحه انا كنت معجب بيه فى الاول قبل ان يشتهر ولكن بعد ذلك وجدت انه بدأ يعك

واللى جننى منه بقى هو الفاظه البذيئه وسبه الدين علنا فى مدونته

شئ مقزز

[iunknown]

أتفق معك ولكن ما لا يدرك كله لا يترك كله.

[Ahmed Anwer]

أنا لا أكره فيه غير غروره ،،

و انا عملت كذا و سويت كذا و قلت كذا و ده حواري مع كذا ،،

بس أنا مع الحرية بلا حدود ،،،

[محمد عز]

أعتقد هو مهتم جدا بالحريات ومركز على حاجة واحده هى التعذيب والانتهاكات من قبل الشرطة المصريه وده بيقدر يجبها حصريا وليه مصادره
لكن انتهاكات الامريكان والاسرائيلين هيجيبها ازاى ولا هوا فى العراق ولا فى فلسطين
وده الاخبار بتنشرها علنا وكل الناس عارفينها لكن الدور والباقى على الحاجات الخفيه
لكن ياجماعه لا يحق لنا ان نصفه بالعماله او الصهيونيه

[Dr Ahmed]

أنا مش معاك فى تسميته بالعميل لأنى أظنه أبعد ما يكون عن كده ، وتسليط الأضواء عليه فى مصلحة القضايا اللى بيعرضها ، ومش مطلوب منه يكون وكالة أنباء عالمية ، الراجل مهموم بهموم مصر زى ما تكون ، ويوتيوب وياهو وجوجل كائنات تحاول الحفاظ على الحرية.

[حماده عزو]

؟؟؟؟؟؟؟؟؟؟؟؟؟؟؟؟؟؟؟؟؟
مين هوا وأئل عباس ؟؟؟
معلش سؤال
أذا كان السؤال ينم عن جهل فدى حدود معلوماتى
وأذاكان الؤال ليه معنى فهوا أن مش كل الناس تعرف وأئل عباس
يعنى موش الشخص المؤثر

[Dr Ahmed]

وائل عباس مواطن عادى عمل مدونة أسماها "الوعى المصرى" واكتسبت شهرة لما فيها من جرأة وتحدى للنظام الحاكم ، ومن الممكن أن تبحث فى جوجل بإسم المدونة وهتتطلع لك فورا.

[OlaOsman]

لحد الحرية في نشر الأخبار فعلى عيني و على راسي.. انما لحد البذاءات.. انا مش هنا.. في عدد من المدونات مش باعتبها برجلي.. ما دمت عارفة اني هاقرا فيها كلام يأذيني.. أدخلها ليه؟

اما موضوع عميل و مش عميل دي فماحدش يقدر يحكم عليها.

[دموع الثلج]

كنت لفتره طويله بتابع مندونه الوعى المصرى

يوميا لحد بعد فتره من المتابعه حسيت ان البلد دى اسوء مكان على الارض وان سكان البلد هما شياطين وبيولد عنك احساس رهيب بانك لازم تكرهه البلد
ولما بحب اتخنق وانكد على نفسسسسسى بدخل المدونه اشوف ايه الاخبار

مش عارفه هو صح ولا هو مزودها شويه فى اظهار السلبيات فقط ومخلى شكل مصر زفت

عموما بعيد عن السياسه يمكن هو معاه حق فى كثير من اللى بينشره لانه واقع اظن الكثير بيلمس الواقع ده فى حياته اليوميه

لكن هو فارض عضلاته حبتين وبيشتم الكبير والصغير وطبعا بالفاظ لا تليق اصلا بشخص بيطالب بالاخلاق والحريه وغيرها

والغريب انه عارف ان مدوناته متركز عليها من جهاز امن الدول حتى الاشخاص اللى بترددوا كثير عليها وبيتفاعلوا معاه

بس برضوه بيششششتم ولا هامه ده اللى مخلينى مستغربه لما يشتك الرئيس ولا وزير الداخليه باسمائهم طيب فين العقاب ؟؟؟

[Ahmed Anwer]

والغريب انه عارف ان مدوناته متركز عليها من جهاز امن الدول حتى الاشخاص اللى بترددوا كثير عليها وبيتفاعلوا معاه

بس برضوه بيششششتم ولا هامه ده اللى مخلينى مستغربه لما يشتك الرئيس ولا وزير الداخليه باسمائهم طيب فين العقاب ؟؟؟

نفس السؤال بيتسأل علي صوت الأمة و الدستور و ابراهيم عيسي و وائل الإبراشي

سايبنهم ليه ؟؟؟

حرية و ديمقراطية ،،، دي الإجابة اللي استبعدها تماما

مبدأ خلي الناس تكلم اهو حتي يفضضوا و مينفجروش احتمال

توزيع ادوار متفق عليه في تمثيلية الديمقراطية و الحرية مقدرش افتي و اخاف اظلم حد

العالم اصبح قرية صغيرة و الصحفي او المدون اللي هيتقبض عليه النهاردة ، الست كوندي هتطلع تاني يوم بوشها العكر و تشخط في احمد ابو الغيط

بوشه السمح ،،،

يمكن ده الأرجح ،، و في كل الأحوال الصحفيين و المدونين بيستفيدوا مكاسب و شهرة بدون اتهام لهم بالعمالة

و النظام بيكسب برستيج و كده كده مفيش حاجة بتتغير

[faresbelagwad]

كنت أقرأ له لكن اسلوبه بدأ يتغير الفاظ نابية و سب لدرجة اننى اخر مرة قرات له فيها ,, قرأت نفس المقال ثلاث مرات لاتاكد ان نظري لا يخدعني ,, سب للاديان علني و صريح ,, بحب الحرية و أحلم بالديموقراطية ,, و ارى ان ابسط معالم الحضارة هي التحدث مع الاخرين باحترام و ادب و عدم خدش حياءهم بالفاظ لا داعي لها ,, للاسف و بصراحة حسيت اخر مرة قرات له فيها انه فقد الاحترام ما الفرق بينه و هو يقول انه الصحافة الحرة و بين اثنان من الهمج يتبادلان الشتائم او بينه و بين بعض من مدوناته ممن نجد فيها واحد يشتم او يضرب اخر,,

[sasasony]

أنا مش معاك فى تسميته بالعميل لأنى أظنه أبعد ما يكون عن كده ، وتسليط الأضواء عليه فى مصلحة القضايا اللى بيعرضها ، ومش مطلوب منه يكون وكالة أنباء عالمية ، الراجل مهموم بهموم مصر زى ما تكون ، ويوتيوب وياهو وجوجل كائنات تحاول الحفاظ على الحرية.

اهو ده اللي انا بكلم عليه اى واحد يشتم في الحكومة نقول عليه مهموم بالوطن
وهو يعني لازم يوقلك ان امريكا زي العثل عشان تقول عليه عميل
انا قولت عليه عميل لكذا سبب
1) لما جه يناقش موضوع غزة اتكلم علي ايه قلك السجاير خلصت من الاسماعيليه وكأن الفلسطنين مااشتروش غير السجاير
واكلم برده عن حماس واللي عملوه لكن ماجبش سيرة الحصار الاسرائيلي والازمة اللي الفلسطنين عايشينها
2)اذاعته للاغنية بتاعة فريق الراب السعودي اللي محدش منا سمع عنه وبعدين فيها ايه شوية شباب مخابيل بيقولوا علينا كده يجي هو يجبلك عنوان ان كل العرب مش رجالة (طبعا هو قال لفظ ابذأ من كده بكتير) ايه العلاقة بين واحد اماراتي ولا واحد مغربي وبين شوية شباب مخابيل
الا نه عايز يوقع بين العرب ويخلينا نفور ونقعد نشتم في بعض
3)ظهوره في قناة الحرة اللي معمولة اساسا لتجميل صورة امريكا في الشرق الاوسط وما اعتقدش هما هايستضفوه وهو بيعارض سياستها
4)حصوله على لقب شخصية العام من السي ان ان الامريكية
واخيرا احب اقول ان جوجل مصيطر عليها من الكيان الصهيوني مش كائنات تحاول الحفاظ على الحرية بدليل حذفه لصورة ابو تريكة

[Ghamrawy]

وائل عباس كل اهتمامه بالقضايا الداخلية بس عدا ذلك لا يتعدى 5% من اهتمامه و على فكرة هو اغلب الوقت مش فى مصر و ده اعتقادى الخاص