هل الصلاة فى مسجد القائد ابراهيم بالأسكندرية الأيام دى ...مكروهه بسبب الزحام

[ashouhdy]

مسجد القائد ابراهيم

جوايا شك رهيب ان صلاة المصلين فية بالذات فى العشر الاواخر مكروهة

بسبب

1) صفوف المصلين تعددت وتخطت الأمام
2) زحام عجيب و غريب بينما المساجد الأخرى خاوية
3) الشوارع مغلقة تماما واى حد وراة مصلحة ممنوع يتحرك بحجة فية صلاة واالى يعترض يبقى كافر

4) لو فى حد بيموت وعايز يتنقل مستشفى يبقى حيموت لأن الشوارع مقفولة 1 كم فى جميع الاتجاهات حتى الكورنيش ...ملحوظة المستشفى الميرى والمستشفى الجامعى لازقين فى الجامع!!

5) اذاى اصلى فى زقاق ضيق وسط البلاعات وفى مساجد تانية نضيفة جميلة فاضية دة الأسلام يأخى دين نضافة وشوية سماعة تفصل وتزن و تروح ومحدش سامع حاجة وبعدين تيجى
6) الزحام الغير مبرر للنساء والمكروة جدا قبل واثناء وبعد الصلاة يفسد كل شىء
7) حاسس انها موضة وخلاص

8) مش حصلى تانى فى القائد ابراهيم و حروح اى جامع (فاضى) مريح جمب البيت


أعتقد من الاسباب السابقة اعتقد والله اعلم ان الصلاة فية بالطريقة دى مكروها وباطلة

[Mostafa.Mahran]

انا كده كده مش بصلى فيه ولا هصلى فيه
لان على قد ما فى ناس ربنا يبارك لها فى ناس تانية بتقضى وقت رمضانى مش اكتر

[n_i_t_e]

سبقتك
بطلت أصلى فيه من سنتين تلاتة
بأكره الزحمة الشديدة و العربيات اللى راكنة مش سايبة مكان لحد بعد الشاطبي...
الصلاة أجرها مش أعلى عن بقية الجوامع
و لا صوت الشيخ اللى هيتحكم فى عمل دينى موجه لرضا الله

[shaddadfalcon1]

حضرتك ممكن تصلي في مسجد تاني وتكون بتستريح فيه
وفيه مساجد كتييييييييييير مش معرفه والائمه فيها اصواتها عزبه وجميله

انا كمان حاسس ان الموضوع بقي تقاليع وموضوع وكل واحد يقولك انا بصلي فين وانت صليت فين البارح - طيب ياعم انت هو موضوع فشخره وخلاص متصلي في اي حته

اوقات كنت ببقي رايح مع والدي جلسة العلاج الطبيعي وكنت اضطر الف من شارع تاني عشان قبل كل صلاه بعض الناس هداهم الله يفرشو الشارع كله عشان يصلو فيه مع ان الجامع بيبقي فاضي

عندنا في كفر الدوار في شيخ اسمه مصطفي خميس وممكن تلاقي 75% من كفر الدوار كلها بتصلي وراه مع ان صوته عادي بس الفكره ان الناس بتعمل ظيطه جامده وكل واحد يقولك انا بصلي ورا الشيخ فلان وهو اصلا ممكن بيكون بيركع ويسجد وهو مش عارف الشيخ بيقول ايه

مش فاهم الواحد ازاي هيخشع مع مرورا الناس والعربيات والبنات وكل حاجه في الشارع
ياناس هو في خشوع في الشارع !!!!!!!!!!!!!!!!!

[hosar]

انا مش اداة حكم دينى بس انا مقدرش غير اننى اقولك استفتى قلبك

[FunnyMickey]

انا صليت فيه السنه اللي فاتت اما كنت في اسكندريه
وعاوز اقولكو اني كنت حطلع اسكندريه عشان اصلي ورا الشيخ حاتم
مع اني كرهت نفسي في العيد

يعني اصلها اسكندريه مبتبقاش زحمه في الصيف ولو فيه واحد حيموت كده كده حيموت من زحمه المصيفيين

مع التحفظ طبعا علي حكايه قفل الشوارع والناس اللي بتعدي الامام واني كنت بصلي السنه اللي فاتت والستات قدامي اصلا

بس فعلا كله يهون عشان الختام بتاعه

بجد كان مشهد رائع والمصليين بتأمن وتبكي ورا الامام
ومش اي مسجد بيكون كده
المساجد الصغيره بتقلب صلاه التراويح ومبيكونش فيها خشوع

[MohssenRashed]

انا بروح اصلي كل سنة بقالي حوالي 6 سنين و بعدسن انا شايف ان الصلاة دي راحة نفسية يعني لا المكان و لا الناس هتفرق لو انت مبسوط. انا معاك ان في ناس اكيد بتروح عشان منظرة او كدة بس الاعمال بالنيات

[kamalsalem]

الخشوع لا يقاس بكم البكاء

والشيوخ البكائين امثال محمد جبريل مش بحس وراهم بأي ورع او خشوع مع اني صليت الفجر ف جامع ف مصر الجديدة وفعلاً لم اتمالك نفسي مع انه الامام حتى لم يدعو

[ZALABANY]

أنا شايف ان الموضوع ده مش صح طبعا المساجد فاضية والائمة ما شاء الله ربنا يباركلهم والناس بتسيب المساجد وتروح وراء الشهرة او جمال الصوت وده في حد ذاته مش صح المقياس يكون صحة القراءة وتختار بعد كده ما بين اللي بيقصروا او بيطولوا

[ashouhdy]

يبىقى فعلا شعورى صح والله بجد انا بحس انى لما بتعامل مع الناس هنا انكم ناس تانية غير اللى فى الشارع والله ماشاء الله عليكم

[zyadahmed]

[QUOTE=ashouhdy;3873013451]مسجد القائد ابراهيم



4) لو فى حد بيموت وعايز يتنقل مستشفى يبقى حيموت لأن الشوارع مقفولة 1 كم فى جميع الاتجاهات حتى الكورنيش ...ملحوظة المستشفى الميرى والمستشفى الجامعى لازقين فى الجامع!!


ملحوظة مدخل الطوارئ للمستشفى الميرى بعيد جدا عن الصلاة وموجود فى شارع السلطان حسين ولو حد جاى من الكورنش بيدخل شارع صفية زغلول ومنه اول يمين يدخلك للطوارئ

عموما الزحام لو بيطفش الناس كان الاولى الناس تطفش من الحرم ( حاش لله ) لكن الموقف بيكون عظيم وكله خشوع و روحانيات ... مع العلم الزحام بيكون طبيعى مش شديد للدرجة اللى تخلينا نترك الصلاة هناك
وفى النهاية انا باحترم وجهة نظرك

[ashouhdy]

مدخل الميرى مفتوح من شارع ابوقير مقفول من الترام او البحر انا نائب جراحة هناك و عارفين ان الوقت دة وقت ميت .....

وبعدين ياباشا بتقارن الحرم ب مسجد عادى هى كلها بيوت الله بس دة الحرم ؟!!

[Islam_galal]

مسجد القائد ابراهيم

جوايا شك رهيب ان صلاة المصلين فية بالذات فى العشر الاواخر مكروهة


أعتقد من الاسباب السابقة اعتقد والله اعلم ان الصلاة فية بالطريقة دى مكروها وباطلة

لك وجهة نظر أنت حر فيها بطبيعة الحال و لكن الإفتاء بكراهة الصلاة و أنها مكوهة و باطلة زيادة جدا و مش من صلاحياتنا

من حقك إن متعجبكش مظاهر للمصلين هناك و هي موجودة فعلا و لكن لا ننكر التنظيم الشديد من مجموعه من الشباب المتطوع جزاهم الله كل خير بالإضافة لتعاون الأمن و المرور في سابقة فريدة و مستمرة من سنوات

أنا شخصيا قللت جدا من الذهاب هناك بس برضه كل دي اسباب مش كافية للإفتاء بكراهة الصلاة و بطلانها

كل سنة أنت بخير و رمضان كريم

[Abo_Lina]

كلامك صح يا باشا و يجب على المصلين مراعاة حقوق الطريق و إعطاء الطريق حقه .. حتى لو راحو للصلاة مواصلات أو حتى مشي ..
كلامك صح ١٠٠ %

[grumby78]

اولا عجبني ان حضرتك اتكلمن في موضوع قد يعتبره البعض جهلا محرما من المحرمات وانك كده خرجت عن المله ! يعني انا اتفق معاك وبشده في موضوع صلاة النساء في الشارع وانعدام التركيز والخشوع في الشارع بالاضافة الى ان الاسلام دين يعتمد على ان حقوق الناس لها اولويه عظمى يعني ماينفعش نسد الطريق لمستشفى او حتى محل تجاري او نعطل الناس عن اداء واجباتها او التزاماتها يعني اعطاء الطريق حقه ولا ضرر ولا ضرار . يعني المفروض الناس تتجه لمساجد اخرى او تسيب ممرات لسير الماره او العربيات ... ارضي ربنا وتقرب الى الله بدون ضرر او تعطيل للناس . يعني انا مثلا باعتير ان شادر العزاء اللي بيكون في الشارع ده وبيسده مش من الاسلام في شيء لان فيه استخدام لمكبرات الصوت وده ضرر للناس النايمه او اللي بتذاكر او المرضى والمسنين وكمان تعطيل للمصالح واغلاق للطرق . الاسلام دين حياه يراعي خدمة الناس وقضاء الحوائج وهو دين منطق ويسر ووسطيه ... وأخيرا الدين المعامله .