موقف في منتهي الاحراج

[aif]

من كام يوم كنت ماشي من البيت متجه للمكتب سيرا علي الاقدام ولقيت راجل كبير في السن ولابس جلابية بسيطة جدا وماسك في ايده ورقة و متجه نحوي مباشرة وبيقوللي " ممكن لو سمحت .. "
طبعا انا من واقع الخبرة العملية بشوارع القاهرة البهية توقعت التمثيلية المكررة ..ح يقوللي انا جيت من بلاد واق واق وفلوسي ضاعت وعاوز اروح ياريت تساعدني باللي تقدر عليه .... أو المسلسل التاني .. انا عندي مرض الإستبحس وبآكل مشابك الغسيل وبوز اللحاف وانا نايم وعاوز اجيب العلاج ده من منظمة الصحة العالمية بالسنبلوين وآدي الروشتة معايا .. ودي طبعا عينة من الأفلام اللي بتتقال وافتكرت اخونا سبعاوي لما كان بيتكلم علي الهبوط بالبراشوتات .. وانا في العادة في هذه الاحوال باتصرف كأني مش سامع حاجة ومن غير تفكير قلتله .. الله يسهلك يا حاج .. الله يعطيك
لقيت الراجل وقف اتسمر في مكانه كأني ضربته بسكينة وبصلي بمنتهي الحزن واللوم والعتاب وعينه مرغرغة بالدموع وقاللي " لية بس كدة يا إبني ... " وهنا اتضحت لي الحقيقة .. الراجل معاه ورقة مكتوب فيها " مكتب السجل المدني بجوار قسم الوايلي .. بالعباسية "ويظهر انه رايح يطلع شهادات ميلاد عشان يضيف احفادة علي بطاقة التموين ... ولما لاقاني ملتحي اختارني من بين الناس اللي ماشية عشان يسألني عن العنوان ...
انا طبعا حسيت اني اندلق عليه جردل مياه باردة وبقيت في نص هدومي بس الحمد لله تداركت الامر بسرعة واعتذرتله و طبطبت علي كتفة ودليته علي العنوان بس بصراحة زعلت من نفسي جدا لتسرعي في الحكم علي الامر
علي رأي المثل
.... ولاد الحرام ما خلوش لولاد الحلال حاجة

[fahd_628]

انا برضة مرة حصلى موقف محرج جدا

كنت واقف بركب واحد صاحبى تاكسى و لقيت راجل كبير و لابس لبس بيسط برضة و لقيتة جاى عليا و منغير ما يتكلم مدلى ايدة قولتلة ربنا يسهلك يا حج و ساعتها بجد مكنش معايا فكة فا لقيتة بيبصلى برضة و لسة ماددلى ايدة و انا قولتلة تانى ربنا يسهلك يا حج لقيتة زعل قوى و قالى انت يابنى مش عاوز تعدي راجل كبير الشارع :(:( ساعتها بجد اتكسفت من نفسى جدا جدا جدا :(:( و قولتلة انا اسف انا مكنتش فاهم و عديتة الشارع

[CryptonX]

فعلا موقف محرج بس المهم انك اعتذرتله .

انا حصل حاجة مشابهة كنت في احد شوراع العباسبة و لقيت واحدة ست عجوز جدا ! لابسة اسود في اسود و ماشية بالعافية و بتتاكل علي كل كل حاجة و هي ماشية لا تقع .

معرفش ليه لما لقيت ايديها ممدودة ... فهمت انها محتاجة فلوس
رحت مطلع مبلغ من المال و الله ماشفته حتى
وجريت وراها .. حطيتهم في ايدها .. و مشيت لفيتها بتناديني !

بقتولي ايه ده يبني ؟؟
انا بفيت في نص هدومي !

معرفتش اتصرف بصراحة ! طلعت كدبة بيضا مني ! قلتلها دول وقعوا منك يا حجة وانت ماشية ! و طلعت اجري !

[OlaOsman]

موقف مؤلم فعلا.. بس الله يجازيهم اللي بيوقفوا الناس في الشارع و في إيدهم ورق و بيدعوا المرض عشان يشحتوا.. كذا مرة واحدة توقفني افتكرها بتسألني على حاجة الاقيها بتحكي لي حكاية من اياهم و عايزة فلوس.. في أول كام مرة كنت بادي فلوس، انما بعد كده بطلت أقف أصلا.. و آدي النتيجة.. ممكن فعلا أتعرض لموقف مشابه لموقفك.. بس هانعمل ايه؟ حاجة تزعل فعلا :(

[emadkamel]

موقف مؤلم فعلا.. بس الله يجازيهم اللي بيوقفوا الناس في الشارع و في إيدهم ورق و بيدعوا المرض عشان يشحتوا.. كذا مرة واحدة توقفني افتكرها بتسألني على حاجة الاقيها بتحكي لي حكاية من اياهم و عايزة فلوس.. في أول كام مرة كنت بادي فلوس، انما بعد كده بطلت أقف أصلا.. و آدي النتيجة.. ممكن فعلا أتعرض لموقف مشابه لموقفك.. بس هانعمل ايه؟ حاجة تزعل فعلا :(

القصص دى زادت قوى ... طبعاً غير جمعيه المتظاهرين بالصمم والبكم اللى ماشيين يشحتوا وساعات القى واحده قد الفيل وشايله عيل وتقوللى جنيه علشان ناكل انا والواد

على فكره وانا هنا فى السودان قابلت واحد من دول ... سودانى ... بيقوللى انا من اصل مصرى من قنا وابويا مات وعايز فلوس علشان ادفنه والسودانيين اللى هنا مش عايزين يساعدونى فقلت ادور على اهلى المصريين !!!! فاكرنى جاى عن طريق الجمرك !!

[OlaOsman]

فعلا موقف محرج بس المهم انك اعتذرتله .

انا حصل حاجة مشابهة كنت في احد شوراع العباسبة و لقيت واحدة ست عجوز جدا ! لابسة اسود في اسود و ماشية بالعافية و بتتاكل علي كل كل حاجة و هي ماشية لا تقع .

معرفش ليه لما لقيت ايديها ممدودة ... فهمت انها محتاجة فلوس
رحت مطلع مبلغ من المال و الله ماشفته حتى
وجريت وراها .. حطيتهم في ايدها .. و مشيت لفيتها بتناديني !

بقتولي ايه ده يبني ؟؟
انا بفيت في نص هدومي !

معرفتش اتصرف بصراحة ! طلعت كدبة بيضا مني ! قلتلها دول وقعوا منك يا حجة وانت ماشية ! و طلعت اجري !

طيب و الله دي سرعة بديهة تحسد عليها.. بجد :o

[Karim_Monir]

معلش يا استاذ احمد فعلا موقف سخيف وكويس انك اتصرفت بسرعة
بس لن انسى الراجل السوداني اللي بيشحت هو واتنين ستات وبيقولك عايز ارجع السودان ومعاييش حق تذكرة القطار
انا ومراتي اول مرة صدقتة وادتلة حاجة بصلي وقاللي انا بقوللك تذكرة قطار تديني جنية قولتلة اه ماخدتش باللي وقمت خدت من ايدة الجنية وقفلت ازاز العربية وكنت في عباس العقاد

قابلتة في نفس اليوم في روكسي وجاللي وطبعا مش بيفتكروا هو طلب من مين لكن انا مانستش
قابلتة بعدها في اسبوعين عند موول الكمبيوتر قولتلة اتلم على دمك بقي ده انت زي الشحط وحذرت كل اللي واقفين منه
خد بعضة والاتنين ال معاه ومشيوا من المنطقة
ربنا يرحمنا بقي

[دموع الثلج]

موقف لا تحسد عليه بصراحه

لو حصل معايا كان لازم اعاقب نفسى لانى هحس بالذنب جدا
لكن الاشكال الزفت اللى بنشوفها هى السبب
وخصوصا اللى بيعملوا نفسهم صم وبكم دووول ويمدلك ورقه اشارات وبعد ما تدفع المقسوم تديلوه ضهرك تلاقيه بيشتم مع صحبه عشان يقسموا سوا


مره حصلى موقف غبى برضوه كنت جمب مستشفى مصطفى محمود ولقيت وااااحد عجوووووز يعنى ميت تقريبا وبيمشى بصعوبه صعب عليا جدا راح قالى لو سمحتى يا بنتى انا ظروفى وظروفى والمرض والحوار وووووالدكتور كتب لى الدواااااء ده ومش هقدر اشتريه الدواء تقريبا كان ب 40جنيه

انا مكدبتش خبر ووورحت داخله الصيدليه اللى جمب المستشفى وطلبت من الصيدليه يدينى 5 علب من الدواء ده
الراجل اول ما شاف الروشششته بص لى بصه غريبه مش فاهمه هو بيستغرب ولا بصه بقرف ولا بيقول انى غبيه ولا ايه تفسير البصه دى .......:o:o
راح قايلى حضرتك عاوزه الدواء ده لمين ؟
جبتى الروشته دى منين !!!!

انا حسيت انه فيه شى غلط اكيد فى الروشته وفكرت انها ممكن تكون اسم دواء مخدر او مدرج جدول وقلت ربنا يستر وميطلعش كده:(

راح واخدنى من ايدى وطلع بره الصيدليه وراح مشاور لى على الراجل العجوووووز وقالى مش ده اللى طلب منك العلاج قلت له ايوه
قالى ربنا يرحمنا الروشته دى بتجيلى يوميا كل نص ساعه تقريبا مع شخص غير اللى قبله والراجل بياخد الدواء يبيعه تانى
وانا مش هديكى الدواء:(:(:(

اناساعتها كان نفسىلارض تتشف وتبلعنى من الاحراج وكان نفسى اروح للعجوز اتخانق معاه واللى يغيظ ان الراجل لما طلعت من الصيدليه لقيته واقف مع مجموعه شحاتين وبيقولى جبتى لى كم علبه
قلت له ملقتش فى الصيدليه ورميت الروشته ومشيت قرفانه جدا

[emadkamel]

معلش يا استاذ احمد فعلا موقف سخيف وكويس انك اتصرفت بسرعة
بس لن انسى الراجل السوداني اللي بيشحت هو واتنين ستات وبيقولك عايز ارجع السودان ومعاييش حق تذكرة القطار
انا ومراتي اول مرة صدقتة وادتلة حاجة بصلي وقاللي انا بقوللك تذكرة قطار تديني جنية قولتلة اه ماخدتش باللي وقمت خدت من ايدة الجنية وقفلت ازاز العربية وكنت في عباس العقاد

قابلتة في نفس اليوم في روكسي وجاللي وطبعا مش بيفتكروا هو طلب من مين لكن انا مانستش
قابلتة بعدها في اسبوعين عند موول الكمبيوتر قولتلة اتلم على دمك بقي ده انت زي الشحط وحذرت كل اللي واقفين منه
خد بعضة والاتنين ال معاه ومشيوا من المنطقة
ربنا يرحمنا بقي

لأ .. ده انت كده متعاقد معاه بقى .... ده قرينك ده وللا إيه؟

[Karim_Monir]

شكله كدة فعلا كان مركبلي جهاز تتبع بال GPS
ها ها ها

[Noha.M]

موقف محرج جدا بس هنعمل ايه طيب دول بقو بيخبطوا على البيوت والله

انا مرة واحد ولد بتاع 11 سنة وقفني و انا داخلة مدخل العمارة لقسته بيقولى ممكن يا طنط اطلب منك طلب !!!

اصلا حرق دمي من طنط دى طبعا كنت عايزة اقوله طنط في عينك انا مكملتش لسه 23 !!!!

و بيقولى اصلى كنت في النادى و محفظتى وقعت و عاوز اكلم مامى من موبايلك تيجي تاخدني و معيش فلوس اتكلم
طبعا انا عارف حركة الموبايل دى و بياخدو و يجرو بعدين اديتو فكة يروح يكلم مامى بعيد عنى الواد بقا قام بص للفكة و مشي بعيد و بعدين لقيتو بيقولى و هو ماشي اة يا بنت اللئيمة !!!!!!

على اساس انى المفروض اسيبه يسرقني !!!

هي بقت عيني عينك كدة ؟

[Tamer-Ezzat]

المواقف المحرجة دى الواحد مش ممكن ينساها .. وكل ما بيفتكرها ضميرة بيتعبه ...

من حوالى 8 سنوات كان عندى محل تصوير فى الازاريطة والبنات اللى بتصور مشت وخلاص بأقفل ... لقيت واحد زى الشحط راكن العربية وبكل بجاحة بيمد ايدة من الشباك تقريبا ببطاقة أو رخصة وبس بس ... صورى دى صورتين ... بصورة لا شعورية أخدت البطاقة وصورتها وبعدين لقيته منزلش يأخدها مستننى اودهاله المهم رميتها على المكتب وقلته اهى قدامك عايز تأخدها تاخدها مش عايز غور فى داهية وكلام من دة... والشارع اتلم وبقت هيصه ....
المهم تانى يوم نفس الموقف عربية تانية .. بس بصراحة بطريقة شيك لوسمحت صورى الورق دة ... وواحدة مش واحد .. المهم علطول رحت هابد اللى فى ايدى على المكتب ومعلى صوتى قوى " المكان مفتوح عايزة تهزى طولك انزلى مش عايزة خدامين يخدموكى ... "
وأفاجأ بالباب يقتح وصاحبة السيارة تسحب عجاز وتنزل علشان تصور ورقها عندى برغم وقاحتى معها وهنا قمه الاحراج ... الأخت صاحبة السيارة معاقة وانا مشفتش البادج ولا أخدت بالى من حاجة ... فعلا حسيت انى عايز الارض تنشق وتبلعنى وكمية الاسف اللى اتأسفتها وشرحتهلها الموقف بس بجد قعدت شهر متضايق قوى من نفسى ...

[Noha.M]

المواقف المحرجة دى الواحد مش ممكن ينساها .. وكل ما بيفتكرها ضميرة بيتعبه ...

من حوالى 8 سنوات كان عندى محل تصوير فى الازاريطة والبنات اللى بتصور مشت وخلاص بأقفل ... لقيت واحد زى الشحط راكن العربية وبكل بجاحة بيمد ايدة من الشباك تقريبا ببطاقة أو رخصة وبس بس ... صورى دى صورتين ... بصورة لا شعورية أخدت البطاقة وصورتها وبعدين لقيته منزلش يأخدها مستننى اودهاله المهم رميتها على المكتب وقلته اهى قدامك عايز تأخدها تاخدها مش عايز غور فى داهية وكلام من دة... والشارع اتلم وبقت هيصه ....
المهم تانى يوم نفس الموقف عربية تانية .. بس بصراحة بطريقة شيك لوسمحت صورى الورق دة ... وواحدة مش واحد .. المهم علطول رحت هابد اللى فى ايدى على المكتب ومعلى صوتى قوى " المكان مفتوح عايزة تهزى طولك انزلى مش عايزة خدامين يخدموكى ... "
وأفاجأ بالباب يقتح وصاحبة السيارة تسحب عجاز وتنزل علشان تصور ورقها عندى برغم وقاحتى معها وهنا قمه الاحراج ... الأخت صاحبة السيارة معاقة وانا مشفتش البادج ولا أخدت بالى من حاجة ... فعلا حسيت انى عايز الارض تنشق وتبلعنى وكمية الاسف اللى اتأسفتها وشرحتهلها الموقف بس بجد قعدت شهر متضايق قوى من نفسى ...

اخــــــــــــــــــــــــص:D

موقف زفـــــــــــــــــــــــــــــــــت :(

[Karim_Monir]

ايه الاحراج ده
جامدة قوي يا تامر

[KarimAbulEla]

يا جماعة انا لا ارى ان فيه لوم عليكم جميعا بكل المواقف التى وصفتوها على انها محرجة نظرا لان كل الشعب يعلم جيدا ماذا يجرى فى الشارع المصرى اليومين دول ، يعنى من الاخر انت اذا تسببت بدون قصد فى موقف مشابه ، فواجب على الطرف الاخر تقدير هذا جيدا و خصوصا انه بالتاكيد يعلم ملابسات المواقف المشابهة ..

و طبعا لا تنسوا الطرف الاخر ( للاسف 90 % ) منتظرك كضحية و ليس كمقدم للعون

اما اذا سمحت الظروف للتاكد من صدق الطرف الاخر فلا مانع من تصحيح الوضع اذا كانت هناك فرصة مع شوية سرعة بديهة و حسن تصرف

اليومين دول الصراحة تخلى الواحد قليل الذوق مع الطرف الاخر حتى يثبت العكس
مع انى كنت صاحب المثل المعاكس لهذا المثل بس ولاد الحرام .....مخلوش......