Decision Analysis

[n_i_t_e]

كل عام و أنتم بخير... :)
فى الموضوع اللى كنت طرحته قبل كده عن الأولويات فى الشغل
http://www.nilemotors.net/Nile/178461-a.html كنت فكرت انى أشارككم باللى أعرفه عن كورس كيفية اتخاذ القرار و ازاي انقل تفكيري فى المفاضلة بين خيارات متعددة على الورق بحيث أوصل لنتيجة منطقية بعيدة عن الميول و العواطف.
زي ما قلت الموضوع طويل شويه و هحاول أقدم فكرة بسيطة عنه للى مهتم يعرف. و هنلاقى فى النهاية أن دي الطريقة البديهية اللى أغلبنا بيفكر بيها بس مش مترتبة.

الموضوع أن أحيانا بتقابلنا خيارات المفترض نختار واحد من بينهم و بيحصل حيرة لأن كل خيار ممكن يقدم ميزة مش موجودة فى الخيار التانى.
مثال ممكن أبقى أبقى نفسي فى عربية سيدان و أوتوماتيك و معايا بس 70000 فبالتالى ممكن أحتار بين اللوجان اللى بلاقى فيها ميزة السيدان بس مش أوتو و البيكانتو اللى أوتو بس مش سيدان و هكذا.
نبدأ...و مش عايز دوشة فى الصف و اللى ييجي متأخر يقفل الباب وراه

الخطوة الأولى: تحديد الخصائص:
فى الخطوة دي أنا هصفى تفكيري عن الخيارات اللى قداى..لو قدامى كذا وظيفة محتار بينهم أو كذا عربية محتار أجيب مين فيهم هأوقف تفكير فى أي عربية على حدة و أشوف ايه خصائص أي شغل أو خصائص أي عربية..أبدأ أفكر و أكتب اللى يجي على بالى فى ورقة..بدون ترتيب ..
مثال: لو مهنة ممكن تكون الخصائص بتاعتها كالتالى:
1- المرتب اللى الشغل هيوفره.
2- الخبرة اللى باخدها من الشغل ده
3- العقد مؤقت و لا دائم
4- عدد ساعات العمل
5- الأجازات
6- البعد عن البيت (المسافة)
7- بيئة العمل داخل الشغل
8- التأمين الصحى
9- العلاوات و الأوفر تايم
10- أسم الشركة
طيب..لو عايز أشتري عربية ممكن تكون الخصائص كالتالى:
1- نوع العربية سيدان و لا هاتش باك و لا 4X4
2- حالة العربية جديدة و لا مستعملة
3- الشكل الداخلى و الخارجى للعربية من الناحية الجمالية و الشياكة
4- أستهلاك البنزين
5- رؤية الطريق و أبعاد العربية
6- الثبات على الطريق
7- جودة التقفيل
8- توافر و جودة مراكز الصيانة (أنا سامع حد بيجيب سيرة غبور)
9- قطع الغيار من ناحية السعر و الجودة و الوفرة
10- السعر
11- عمر العربية (معمرة كام سنة)
12- سعر اعادة البيع
ان شاء الله هأكمل الموضوع كمان شويه و أكتب الخطوات الجاية لو لقيت مشاركات و انه ممكن يكون مفيد ليكم و هو ان شاء الله مش هيطول بس ميبقاش موضوع محتل مكان فى المنتدي عالفاضى :)
تصبحوا على خير :)

[ashraf_msd]

موضوع جميل واسمحلي ازود بندين

بالنسبه للشغل: امكانية الترقي الوظيفي

وبالنسبه للسيارة: وسائل الأمان والسلامة

[n_i_t_e]

شكرا على مشاركتك يا أستاذ أشرف :)
و البندين فعلا مهمين خصوصا وسائل الأماااااان فى السيارة مهم جدا جدا. طبعا الخطوة الأولى دي المفروض الواحد بيفضل يكتب و يفكر مدة كافية مش موضوع دقيقة أو دقيقتين عشان يجيب كل الخصائص الممكنة
الخطوة التانية: تحديد Must objectives و Want objectives
Must objectives: بتسأل نفسك ايه هى الأهداف اللى لا يمكن تتنازل عنها و اللى لو متوجدتش فى خيار من خياراتك مش هتحطه فى الأعتبار.
مثال: لو قدامك خيارات شغل بمرتب 1000 و 3000 و 1500 و 2000 بدون النظر لباقى المميزات لكل خيار. لكن انت حاط لنفسك Must objective أن المرتب لا يقل عن 2000 معنى كده أن نصف الخيارات انحذفت بدون التطرق لباقى التفاصيل.

بالنسبة لموضوع السيارة على أساس أن معاك 90000 جنيه و حاطط Must Objective أن العربية زيرو هتلاقى خياراتك انحصرت فى شريحة سيارات أغلبها كوري و ماليزي مع ماركات قليلة جدا من بلاد تانية

Want objectives: دي أهداف انت عايزها و المفروض تقارنها بالخصائص اللى انت كتبتها فى الأول بحيث تحدد فعلا ايه اللى الأهداف اللى عايز تحققها من الخيار اللى هتختاره.
باقى الخصائص ممكن تهملها طالما مش فى أعتبارك و ده للتسهيل بس فى الحقيقة أن أي واحدة من الخصائص دي المفروض تعمل فرق و لو بسيط.
يبقى من الخطوة دي المفروض نكون حددنا Must و Want للأهداف اللى عايزين نحققها بأختيارنا

الخطوة الثالتة: Set priorities
هتروح على الWant objectives اللى أنت طلعتهم و تبدأ ترتبهم من ناحية الأولويات.
يعنى مثلا فى مثال الشغل: تشوف رقم واحد و أهم حاجة عندك الخبرة يليها المرتب يليها ساعات العمل و هكذا
للسيارة: أهم حاجة قطع الغيار يليها الشكل الخارجي يليها التوكيل يليها اعادة البيع.
بعد ترتيبهم كأولوية يتم ترتيبهم بالعكس كدرجات أو نقاط قوي.
مثال:
لو هنكمل مع مثال السيارة ..الخصائص اللى كتبتها فوق فى أول مشاركة: لو فرضنا أن Must أن العربية زيرو ( كده رقم واحد "العربية جديدة و لا مستعملة هينحذف" و جديدة زيرو مش مستعمل "رقم 2" و ممكن مش فارق معايا أبعاد العربية , و عمرها أحذفها من حساباتى أصلا ...
اللى فاضل و اللى هو Want objective هرتبه حسب الأولوية و بعدها أعكس الترتيب بحيث يكون لكل جزئية درجة (الدرجة الأعلى يعنى أولوية عالية)

Points--------------------------Priority------------------------------------------Want Objectives

الشكل الداخلى و الخارجى-------------------------------------------3----------------------------------6
أستهلاك البنزين------------------------------------------------------8----------------------------------1
الثبات على الطريق--------------------------------------------------4----------------------------------5
جودة التقفيل---------------------------------------------------------6-----------------------------------3
توافر و جودة مراكز الصيانة----------------------------------------5----------------------------------4
قطع الغيار-----------------------------------------------------------2----------------------------------7
السعر----------------------------------------------------------------1----------------------------------8
سعر اعادة البيع-----------------------------------------------------7-----------------------------------2

و بعتذر الجدول ده كل لما أضبط الأرقام تحت بعض فى المشاركة بيبوظ فى المعاينة بس شكله كده مفهوم شويه
فاضل تقريبا خطوتين كمان هأكمل كمان شويه ان شاء الله :)

[Soma_Sooma]

جزاك الله خيرا عالتوبيك بجد مفيد جدا

واتمنى ان الموضوع دة يثبت لأنة مهم قوى فعلا

[ashraf_msd]

طيب يا استاذنا بالنسبه ل priorities أزي نقدر نحددها
وانا متهيئلي دي هتبقي اكبر معضله من خطوات اتخاز القرار
لاني هيبقي مطلوب مني اعمل relative weighted values بين كذا متغير ليس بالضروره انهم مشتركين مع بعض في نفس الخصائص

يا ريت حضرتك تزودنا بخطوات معينه او طرق علميه نقدر باتباعها من تحديد ال
Priority degrees او اي guide rules تساعد فالعمليه دي

وشكرا جزيلا لتعبك والموضع الرائع

[n_i_t_e]

طيب يا استاذنا بالنسبه ل priorities أزي نقدر نحددها
وانا متهيئلي دي هتبقي اكبر معضله من خطوات اتخاز القرار
لاني هيبقي مطلوب مني اعمل relative weighted values بين كذا متغير ليس بالضروره انهم مشتركين مع بعض في نفس الخصائص

يا ريت حضرتك تزودنا بخطوات معينه او طرق علميه نقدر باتباعها من تحديد ال
Priority degrees او اي guide rules تساعد فالعمليه دي

وشكرا جزيلا لتعبك والموضع الرائع

العفو ربنا يخليك :)
أنا أسف على التأخير
بالنسبة للأولويات مفيش قاعدة تحددهم...بتتحدد من خلال متخذ القرار نفسه.
و ده لأن القرار أصلا انت بتاخده حسب ميولك و حسب المناسب ليك و ده بيختلف عن ميول شخص تانى.
بمعنى: لو مثلا انا عايز أشتري عربية و امكانياتى محدودة هتلاقينى مركز جدا على ان قطع الغيار رخيصة و استهلاك البنزين عشان متعبش فى الRunning cost و كمان مهتم بسعر اعادة البيع و انى مخسرش فيها و هاديهم اولوية عالية.
لكن لو انا مثلا معايا مبلغ كويس و وضعى المالى كويس هركز زي ما حضرتك قلت سابقا على وسائل الأمان و معايير الجودة للعربية و الرفاهيات و الشكل و هحطهم فى اعتباري و هياخدوا أولويات هتأثر على القرار النهائي.
ملحوظة: مفيش مشاكل لو خاصيتين خدوا نفس الأولوية مثلا ممكن واحد يضع لشكل العربية أولوية رقم 4 و سعر اعادة البيع 4 برضه طالما الاتنين اهميتهم بيتساووا عنده

الخطوة الرابعة : Assigning points to the remaining choices

هحط ادامى الخيارات اللى فاضلة و لكل خيار مع كل خاصية ابدأ أعمل تقدير أو نقاط لقوة الخاصية دي فى الخيار ده.
مثلا: أشوف للعربية رقم واحد اللى قدامى: ادي سعر اعادة بيعها كام من عشرة؟
بعدين ادخل على الخاصية التانية مع الخيار الأول: أقدر جودة مركز الصيانة كام من 10؟ و هكذا لباقى الObjectives
و اكرر نفس الخطوة مع باقى الخيارات بس لو قيمت الخيار الأول من عشرة لازم نكمل تقدير باقى الأهداف لكل الخيارات من عشرة برضه.
ان شاء الله المرة الجاية هاكتب الخطوة الاخيرة و مثال توضيحى عشان الموضوع يبان اكتر

[Dewo]

الموضوع حقيقى مفيد
شكرا n_i_t_e
أتمنالك التوفيق

[زينة الله]

موضوع مفيد جدا .. شكرا ... Go on

[ashraf_msd]

ملحوظة: مفيش مشاكل لو خاصيتين خدوا نفس الأولوية مثلا ممكن واحد يضع لشكل العربية أولوية رقم 4 و سعر اعادة البيع 4 برضه طالما الاتنين اهميتهم بيتساووا عنده


تمام جدا ملاحظه جيدة



لو قيمت الخيار الأول من عشرة لازم نكمل تقدير باقى الأهداف لكل الخيارات من عشرة برضه.


معلش دي مبهمة عليا شويه ... ازاي هقيم باقي الخيارات من عشره برضو في حين انهم ممكن يكونوا مختلفين فالاهميه بالنسبة لي ..... يا ريت حضرتك مشكورا توضح النقطة دي

[n_i_t_e]

الموضوع حقيقى مفيد
شكرا n_i_t_e
أتمنالك التوفيق

شكرا Dewo , و يكفينى ان الموضوع عجبك :)

موضوع مفيد جدا .. شكرا ... Go on

شكرا تيفانا...تعرفت عليكى رغم التنكر
انا بهزر...انا فاهم انك غيرتى عشان الأسم القديم كان بيتفهم مذكر لبعض الأعضاء :)

معلش دي مبهمة عليا شويه ... ازاي هقيم باقي الخيارات من عشره برضو في حين انهم ممكن يكونوا مختلفين فالاهميه بالنسبة لي ..... يا ريت حضرتك مشكورا توضح النقطة دي

سؤالك حلو أوي أوي و أحييك على تركيزك و هيبان فى الخطوة الخامسة :)

الخطوة الأخيرة: دلوقتى انا اديت لكا خاصية وزن حسب أولوياتى..و كمان قيمت كل خاصية لكل خيار تقدير معين من 10 أو 20 أو أي رقم يناسبك المهم يكون تقديرهم من نفس الرقم. السؤال لو انا مثلا مقيم قطع الغيار لخيار من عندي 7 من 10 و استهلاك البنزين 7 من 10...ازاي هأدخل فى حساباتى انى مفضل الهدف الأول (قطع الغيار) بوزن 4 عن التانى (استهلاك البنزين) بوزن 2 مثلا؟
ببساطة انا كنت عاطى لكل هدف وزنه القائم على تقديري و ميولى...عشان أصحح المعادلة هأضرب وزن كل objective عندي فى الدرجة اللى خدها و قيمت بيها كل خيار.كده قطع الغيار للخيار بتاعى اللى واخد 7 من 10 هتضيف له نقاط بمقدار (7*4) = 28 نقطة اما استهلاك البنزين فهيشارك بنقاط (7*2) = 14 نقطة بس و ده منطقى لأن أولويته ضعيفة بالنسبة لى.
هاكرر العملية دي لكل خيار...و أجمع نقاط كل خيار الناتجة من كل Objective هينتج فى النهاية النقاط اللى بيحققها كل خيار.
الخيار الأعلى فى النقاط هو أنسب خيار بالنسبة لك .
انا اسف كنت غبت شويه كنت بحضر مثال بسيط مش دقيق أوي هأختصر فيه على قد ما أقدر نطبق عليه الخطوات دي هأبدأ حالا..

[n_i_t_e]

هنبدأ بمثال العربية من الأول للأخر الخطوات متصلة...
عايز أشتري عربية ...أجيب ايه؟
لما أطبق الخطوة الأولى و أحدد الObjectives هنفترض للتسهيل أن النتائج كالتالى زي ما ذكرتها قبل كده
1- نوع العربية سيدان و لا هاتش باك و لا 4X4
2- حالة العربية جديدة و لا مستعملة
3- الشكل الداخلى و الخارجى للعربية من الناحية الجمالية و الشياكة
4- أستهلاك البنزين
5- رؤية الطريق و أبعاد العربية
6- الثبات على الطريق
7- جودة التقفيل
8- توافر و جودة مراكز الصيانة
9- قطع الغيار من ناحية السعر و الجودة و الوفرة
10- السعر
11- سعر اعادة البيع

انا حاطط لنفسي Must objectives كالتالى:
1- تمن العربية يكون 75000 فما فوق
2- تمن العربية لا يتعدي 85000
3- العربية لاوم تكون سيدان
4- العربية لازم تكون زيرو مش عايز أستعمال
و هأفترض أنى سواق محترف (ده فرض طبعا ) و مش هتفرق معايا رؤية الطريق و أبعاد العربية و كمان مش فارق معايا استهلاك البنزين
(ملحوظة: حذف خيار الأبعاد و البنزين ده تقريب و المفروض يدخلو احتى لو مش مهمين عشان النتيجة تكون دقيقة..لكن ده هيفرق بس لو الخيارات قريبة أوي أوي من بعضها فى المميزات و كل نقطة بتفرق)
بعد تطبيق الخطوة السابقة هيفضل Want objectives كالتالى:
1[S]- نوع العربية سيدان و لا هاتش باك و لا 4X4[/S]
2[S]- حالة العربية جديدة و لا مستعملة[/S]
3- الشكل الداخلى و الخارجى للعربية من الناحية الجمالية و الشياكة
4[S]- أستهلاك البنزين[/S]
5[S]- رؤية الطريق و أبعاد العربية [/S]
6- الثبات على الطريق
7- جودة التقفيل
8- توافر و جودة مراكز الصيانة
9- قطع الغيار من ناحية السعر و الجودة و الوفرة
[S]10- السعر[/S]
11- سعر اعادة البيع

بالنسبة للعربيات اللى بتنطبق عليها الشروط هنفترض ان الخيارات انحصرت فى 3 خيارات.
رينو سيمبول - هيونداي أكسنت - كيا ريو

الخطوة التالتة : الأولويات :

1- الشكل الداخلى و الخارجى للعربية (أولوية 4 من 6) = (وزن 3)
2- الثبات على الطريق (أولوية 1 من 6) = (وزن 6)
3- جودة التقفيل (أولوية 6 من 6) = (وزن 1)
4- توافر و جودة مراكز الصيانة (أولوية 3 من 6) = (وزن 4)
5- قطع الغيار من ناحية السعر و الجودة و الوفرة (أولوية 2 من 6) = (وزن 5)
6- سعر اعادة البيع (أولوية 5 من 6) = (وزن 2)

لهواة المعادلات : Weight = number of objectives - priority + 1

فاصل و نواصل

[n_i_t_e]

سوري انا مش عارف ازاي أرفع صورة من على جهازي فى المشاركة..كل اما أرفعها اللابتوب يكتب خطأ فى الرفع و خلاص...يعنى حتى مش لاقى حجة يقنعنى بيها المهم اتصرفت زي ما الجيش بيقول عشان ارفع الصورة

الخطوة الرابعة: المفروض أبدأ أقيم كل خيار من خياراتى و اديله رقم بيعبر هو حقق جودة بنسبة اد ايه



لسهولة تقييمك بتحط فى بالك ايه لعربية اللى بتحقق الدرجة النهائية بحيث تبقى reference أقيس عليه...يعنى مثلا لو انا هأبدأ التقييم من 10 و بصيت على أول Objective اللى واخد الأولوية الرابعة و هو الشكل الخارجى و شياكة التابلوه الخ...اكتر عربية شكلها عاجبك ايه؟ مثلا السيراتو دي شكلها أديله 10 من 10. طب نسبه جمال الأكسنت للسيراتو كام...الأكسنت فى نظري جمالها أقل من السيراتو بنسبة ممكن اديها 8 من 10 و الريو نفس الكلام لكن مثلا رأيي أن السيمبول تتفوق بتابلوه أفضل مع الشكل بحيث اديها 9.
بس ياريت متحطش الReference بتاعك فى الobjectives حاجات زي 320i و الا التلات عربيات هياخدوا أصفار
العربيات التلاتة تقييمهم عالى من ناحية الثبات و التقفيل لكن من ناحية مراكز الصيانة فماركة رينو تتفوق كجودة مركز صيانة يمكن يعتبر الأفضل على الأطلاق فى الفئة دي بحيث اديله 10 من 10 و كيا بيحقق برضه نسبة تقدير كويسة نسبيا فى حين ان مراكز صيانة الأكسنت ممكن تمثل نقطة ضعف فى العربية و أقدرها ب3 نقاط بس.
و ده على عكس قطع الغيار اللى الأكسنت هتتفوق فيه بلا منازع و هكذا...
التقييمات دي انت هتحطها من خلال خبرتك و تقييمك للعربيات دي و الأراء اللى سمعتها من ملاكهم بتقدر تعرف تدي العربية فعلا كام من 10 فى كل نقطة

[n_i_t_e]

أخيرا هأبدأ أشوف كل تقييم لكل عربية هيدي مقدار نقاط اد ايه فى التقييم العام للعربية دي

زي ما قلت قبل كده حاجة زي مراكز الصيانة حاططها بوزن 4 و تقييم 3 مع الأكسنت هتدي 3*4 = 12 نقطة بس مع الأكسنت
لكن لأن مركز الصيانة فى رينو كويس جدا بحيث قدرته ب10 فده هيضيف 4*10=40 نقطة لخيار السيمبول و 32 نقطة لخيار الريو.
يتم التكرار و أجمع كل النقاط اللى ضافتها Objectives لكل خيار هحصل فى النهاية على رقم بيمثل بالنقاط الخيار ده بيحقق اد ايه من أهدافى.
النتيجة النهائية خيار الأكسنت حقق 159 نقطة و تفوق على الخيارين التانيين و جت وراه السيمبول ب149 نقطة و الريو ب123 نقطة.
طبعا نلاحظ اللى رجح خيار الأكسنت هى أولوياتى فى النهاية فمثلا لأنى كنت مهتم بضرورة توافر قطع الغيار ده اداها 50 نقطة.
و بأعتذر مقدما لأصحاب العربيات دي التقدير بتاعى للمثال بغرض التوضيح فى شرح الموضوع مش التقرير بوجود فعلا التقدير ده فى العربية و الحاجات دي مكانها قسم المقارنات.

دي كانت فكرة مبسطة و سريعة عن DA و أتمنى أكون فدتكم بحاجة :)