طلب مساعدة من اللي اتجوزوا خلاااااااص

[ainshouka]

مش عارف هي مواضيع الجواز ملت الأجتماعي أوي كده ليه :)

فأنا كنت عاوز نصيحة الناس اللي اتجوزت في موضوع محيرني

دلوقتي في واحدة قدامي اهلي وأنا شايفين أنها كويسة وهما عاوزني أمشي في الموضوع

بس المشكلة هي إني داخل علي مصاريف كتير منها مصاريف دراسات وجزء من مصاريف شقة

فطبعا لقيت إنه بالعقل كده العملية مش نافعة

لكن هما شايفين إنها كويسة وخسارة إني ممشيش في الموضوع والفلوس يبقي ربنا يدبرها

زي ماالحديث بيقول ثلاثة حق علي الله عونهم

أنا الواحد كان لاغي الجواز من دماغي لغاية مقدر أقف علي رجلي شوية

إنتوا إيه رأيكم

أخليني ماشي بدماغي ولا امشي في الموضوع

وشكرا ليكم علي مساعدتكم

[m_car]

والله يا باشا تسمع كلامى ممكن يبقى صح او غلط

متدخل موضوع الجواز الا وانت شايف نفسك مؤهل اولا مديا ثانيا معنويا

وللاسف فى الزمن ده مديا اكتر لان الحب والمعانى بقت اشياء ثانوية ومهمة بردة بس متتجوزش الا لما تقف على رجلك

وصلى صلاة استخارة

[AlGazar2]

صلى استخارة و امشى فى الموضوع و لو فيه خير هاتلاقى الفلوس بتيجى لوحدها و الموضوع بيخلص بسرعة لو مافيش مش هايتم الموضوع و هاتلاقى عقبات كتير فى طريقك

[kangaro]

اعمل استخارة وتوكل على الله .. الغني بيتجوز والفقير بيتجوز
(انت عندك كام سنة ؟)

[pro_samir]

استخير وشوفها لو ارتاحتلها وعجبتك قولهم انك قدامك شوية وقت علي ما تجهز

[misoalex]

اقولك انا حصلى نفس الموقف لدرجه انى مكانش عندى شقه ولا معايا حق الشبكه او بمعنى ادق مش عامل حسابى على الكلام ده خاااااالص

والحمد لله كله بأمر الله وفضله واتجوزت


صدقنى طول مالنيه كويسه حتلاقى ربنا فرجها من حيث لا تحتسب

صللى استخاره واتكل على الله لان لو هى كويسه يبقى صعب فعلا تعوضها واهلك كلامهم مظبوط

[alaasaid]

السلام عليكم ,

أنا متجوز من سنتين و مكنش معايا لا فلوس و لا عندى شقة بس لما نويت و بدأت فى الموضوع بفضل الله الامور كلها مشيت و ربنا سبحانه و تعالى سهل الامور لدرجة انى مش عارف انا اتجوزت ازاى لحد دلوقتى .

من الاخر طالما انت ناوى على خير ربنا هيسهلك كل الامور من حيث لا تحتسب و هيرزقك و يوسع عليك ان شاء الله

[makka]

بص زى الناس ما بيقولولك كده انا دخلت بيت اخطب منه وانا مديون فى 5000 جنيه طلبوا منى شبكة 20 الف وانا اصلا مديون ؟! المهم فى قراية الفاتحة جبت دهب بـ5000 جنيه محبس وخاتم وتوينز وقلتلهم الشبكه مع كتب الكتاب وفعلا كتبت الكتاب بعد شهرين وجبت شبكه بـ15000 كملت للعشرين وشطبت شقتى وجبت الاثاث واتجوزت بعد كتب الكتاب بـ 6 شهور وبعد الجواز بشهر ببص لقيت معايا 6000 جنيه تقولى ازاى منين الله اعلم وعلى فكرة انا اتجوزت انسانة الحمد لله مفيش احسن من كده.
نصيحتى ليك طالما ان الانسانة دى كويسة ربنا هييسهلك امورك اولا لانك شاب وبالجواز هتبنى اسرة فهتعف نفسك عن نظرة كده ولا كده وكمان هتكون السبب فى ان فلانه اتجوزتك انت "على اساس انك شخص محترم" متجوزتش حد تانى ممكن يبهدلها او يهينها فربنا هيكرمك اوى.

[ashraf_msd]

انا اتجوزت من سنتين في ايجار جديد وما كنش عندي شقه وكل اللي عليا جبته قسط

والحمد لله عندي ابن دلوقتي واشتريت شقه وسديت ديوني بفضل الله

ربنا بيعين الساعي للزواج بجد

بس في حاجه.......

انا كنت عارف ان خلال سنتين هقدر انجز التزماتي ... و تعبت قوي بعد الجواز عشان اعرف اجيب الشقه الصراحة

الألتزمات دي سواء جبتها قبل الجواز او بعده هتفضل عليك عليك

انما لو مافيش خطه في دماغك ... وشايف انه من الصعب عليك تحقيق عوامل الاستقرار المادي كجواز ... فما ينفعش تربط بنت الناس معاك ... واصبر شويه لحد ما توصل لنقطه تعرف فيها انك هتقدر تقوم بالألتزمات الماديه تجاه جوازك و بيتك

[kamalsalem]

بص انا زي الناس دي كلها رحت اخطب وانا مديون ب 15000 جنيه وعاااادي اتجوزت ف شقة ملك وغيرت عربيتي

استخير ولو الموضوع فيه خير ربنا هيمشيها من عنده.. بس انا بصراحة بلوم عليك حاجة.. انك عارف الحديث الشريف وعارف انه رزقك على الله و بتسألنا احنا.. يعني كلام ربنا مش اتقل وزناً من كلامنا كلنا على بعض؟ انا بقول الكلام ده بابتسامة كبيرة على وشي وارجو انك تقبله بابتسامة برضه

[ainshouka]

متشكر ليكم جدا على نصايحكم ومساعدتكم
ومن مشاركاتكم وضحت المشكلة اللى انا فيها

بس في حاجه.......

انا كنت عارف ان خلال سنتين هقدر انجز التزماتي ... و تعبت قوي بعد الجواز عشان اعرف اجيب الشقه الصراحة

الألتزمات دي سواء جبتها قبل الجواز او بعده هتفضل عليك عليك

انما لو مافيش خطه في دماغك ... وشايف انه من الصعب عليك تحقيق عوامل الاستقرار المادي كجواز ... فما ينفعش تربط بنت الناس معاك ... واصبر شويه لحد ما توصل لنقطه تعرف فيها انك هتقدر تقوم بالألتزمات الماديه تجاه جوازك و بيتك

دا بالظبط نفس تفكيرى
لانى شايف انى لسه امامى مش اقل من سنتين عشان اقدر اقول ياجواز
وحتى ساعتها مش حتكون كل حاجة تمام
لأ ممكن نقول يعنى حقدر اقف شوية على رجلى وابقى عارف بالظبط فين راسى من رجلى
فأنا مش عاوز اخش فى موضوع مش عامل حسابه واربط بنت ناس فعلا معايا

استخير وشوفها لو ارتاحتلها وعجبتك قولهم انك قدامك شوية وقت علي ما تجهز

ودى بالنسبة لى مش حيكون حل عملى لانى مش حقدر اخليها جنبى كده مثلا سنتين على الاقل لانى بحب فترة الخطوبة تكون قصيرة يعنى اخرها مثلا 8 او 9 شهور بالكتير لكن سنتين مش حينفع اكون داخل وخارج عليهم كده لانى شفت تجارب ناس صحابى خللوا فى فترة الخطوبة لدرجة بقى منظرهم وحش وكانت المشاكل بتكتر باستمرار بين الاهل

بص انا زي الناس دي كلها رحت اخطب وانا مديون ب 15000 جنيه وعاااادي اتجوزت ف شقة ملك وغيرت عربيتي

استخير ولو الموضوع فيه خير ربنا هيمشيها من عنده.. بس انا بصراحة بلوم عليك حاجة.. انك عارف الحديث الشريف وعارف انه رزقك على الله و بتسألنا احنا.. يعني كلام ربنا مش اتقل وزناً من كلامنا كلنا على بعض؟ انا بقول الكلام ده بابتسامة كبيرة على وشي وارجو انك تقبله بابتسامة برضه

انا مش بزعل من اللى عاوز ينصحنى
بس يمكن انا معرفتش اوصل مرادى كويس

يعنى فيه حديث عن الرسول بيقول من استطاع منكم الباءة فليتزوج

يعنى معنى كده ان كل من اراد ان يتزوج لازم يشوف نفسه الاول وبعدين يتوكل على الله
فانا مقصدتش انى شاكك فى رزق ربنا

جوز اختى كان بيقوللى انه لما جه يتجوز اختى مكانش فى جيبه غير 3 الاف جنيه ودا من 12 سنة يعنى برضه مكانوش يعملوا حاجة بس ربنا اعانه
لكن هو كان طبيب وكان لسه بادئ عيادته وابتدى يجهز الشقة شوية فكان ممكن نقول قدر يقف على رجليه شوية

فكل اللى ردوا على كنت عاوز استفسر منهم فى النقطة دى
هل لما اتقدمتوا فعلا للجواز مكانش معاكوا اى حاجة او عاملين حسابكم على حاجة زى دلوقتى كده واتقدم وخلاص على اساس ان دى بنت ناس لا تعوض

ولا برضه ابعد احسن زى ماشرحتلكم ظروفى كده

والواحد شايف ان زى ماربنا حط دى قدامى من غير ما اتعب فى حاجة ممكن يرزقنى بواحدة تانية تكون ذات خلق

هل تفكيرى انتوا شايفينه صح ولا انا غلطان

لانهم فى البيت بيقولولى انى معقد الدنيا

[ainshouka]

اعمل استخارة وتوكل على الله .. الغني بيتجوز والفقير بيتجوز
(انت عندك كام سنة ؟)

25 يعنى بقيت شحط خلاص

[makka]

اقسم بالله انا داخل اخطب وانا مديون بخمسة آلاف جنيه كنت لسه شارى عربية
اشتريت شبكه بـ15 الف بعد شهرين من قراية الفاتحه وفى قراية الفاتحة جبت دهب بخمسة الاف المهم اللى عايز اوصلهولك ان ملكش دعوة ومتفكرش بس اهم حاجه تكون بنت كويسة وربنا هييسر الامور قوى.
انا مبعملش حاجه من غير تفكير ودراسة بس الامور دى بتمشى كده لانك لو بصيت على الحقيقة ان الجواز بيكلف اكتر من 100 الف لو هتستنى لحد متلمهم مش هتتجوز لانك مش هتعرف تلمهم علشان كده ملكش دعوه سيبها لربنا.

[otefa]

طبعا توكل علي الله صلي أستخارة والرزق علي الله .........المهم الصراحة مع أهل عروستك
وبعدين يعني لو مثلا معاك حتي كام مليون ولا قدر الله الواحد جاله مرض ولا.........أيه الحل ساعتها ...........توكل علي الله ولا تؤخر زواجك خوفا من المادة
وكلنا بشر وبيجي علينا لحظات قلق وربك ألي بيقسم الأرزاق.........تحياتي

[hemalotfy]

توكل على الله ربنا بيسهلها وبيفتح ابواب رزق مكنتش في الحسبان