المجتمع المصرى الى اين

[m.aligamal]

شىء خطر ببالى حبيت اشاركم فيه
مصر النهارده غير مصر من 20 سنه طيب مصر كمان عشرين سنه هتبقى عامله ازاى
المستوى الاقتصادى بقا فظيع جدا 6% معاهم ثروه البلد
البلد اصبح فيها عشوائيات اكتر من المناطق العاديه داخل التنظيم
العشوائيات دى هتخرجلنا ايه ؟؟؟؟
مفيش طبقه متوسطه الى كانوا بيقولوا عليها دى حزام الامان بتاعه البلد
مثقفين مصر متهمين بالعماله لصالح الدول الاجنبيه و تنفيذ اجندات غربيه
الشعب مش لاقى ياكل و الناس بتبنى كل يوم كمبوندات
الناس بتنفصل عن بعضها يعنى الناس تعيش فى احياء شعبيه للغايه و مستوى متدنى و ناس تانيه عايشه فى كمبوند يعنى معزوله معقوله ممكن يحصل ده على ارض مصر البلد الى احيائها الشعبيه ملاصقه لاحيائها الغنيه ياترى ايه الى هيحصل فين الامن الاجتماعى ؟؟هل الدوله تقدر تعمل عسكرى لكل مواطن
فى ناس بتقول ثوره جياع من امتى مصر ممكن يكون فيها ثوره اساسا ولما تكون تكون من الجياع
فين قيم الشعب المصرى فين الشهامه فين الرجوله فين القدوه و المثل و الامانه
استبدلت تلك المفاهيم الاخيره بالانتهازيه و المصلحه و الامبالاه و الكذب و الغش و النفاق
تفتكروا الاجيال الجديده الى هتتربى على تلك المفاهم هيكون مصيرها ايه ؟؟
الغزو الغربى لكل ما هو عربى او اسلامى بدايه من لبس الشباب و طريقه الكلام لغايه طريقه الحياه نفسها
يا جماعه تفتكروا احنا جاهزين و هنقدر نتعامل مع الثقافات الجديده الى فى المجتمع الى الماده طغت على كل شىء فيه و اصبح هم الناس الماده فقط و كل واحد يتكلم يقول اصل فى مصلحه او عايز اعمل مصلحه
بقت المصلحه كل شىء
انتا بتجوز بنتك لمين ؟؟
الى يقدر يدفع و يشيل ولا ابن الناس المتربى الى ظروفه على قده وبيبدء السلم واحده واحده !!!!!؟؟
اضرب مثال بسيط (بالمناسبه اشمعنى لفظ ضرب ده مقترن بالمثال هوا احنا طول عمرنا مرتبطين بالعتف )
لو اخدنا فى بالنا زمان الفن الشعبى رغم ما له و ما عليه غير الفن الشعبى بتاع النهارده الى مليان ابتذال و ايمائات جنسيه و اصبح مقذذ و اتفرجوا على سعد الصغير و فرقته حاجه تقرف
انا اخشى على نفسى و عليكم من يوم نلاقى نفسنا منقدرش نخرج فى الشوارع بعد 9 مساء و بعض الاحياء تكون موطن للجريمه و تكون دى نهايه مصر بلد الامن و الامان
الحل ايه ؟؟؟

[mostafabakry]

انا طول الوقت بفكر في حال البلد و افضل اقارن بين الشخصية المصرية من 50 سنة و بين الشخصية المصرية دلوقتي
فرق كبير جدا

انهيار في كل حاجة و كل يوم بنزداد سوء عن اللي قبله

المشكلة ان اغلب الناس مش حاسس بالكلام دا او بمعني تاني اتعود عليه و اصبح طبيعي بالنسبة له

و ناس تاني تقولك ما تبقاش نكدي و خليك فريش و بطل تشاؤم و انظر للنص المليان من الكوب !!

يا جماعة احنا بننهار و خلااااااااص هنقع لو ما فقناش و راجعنا نفسنا

[m.aligamal]

عندك حق يا باشا و الله البلد فعلا حالها بينهار ومن سىء الى اسوء

[amrnagy]

فعلا الحال بقي من سئ ال اسوا بكتير الله يكون في عون الاجيال اللي جاية

[X_MM_X]

للأسف انا شايف انه إلى الهاويه

[amir]

اضرب مثال بسيط (بالمناسبه اشمعنى لفظ ضرب ده مقترن بالمثال هوا احنا طول عمرنا مرتبطين بالعتف )

انت قصدك عنف
بس في اللغه المثل بيضرب
و مرجعي في كده القران
انت بس ضربت لنا مثل خطأ

غير كده انا معاك في الانهيار السريع اللي بيحصل لدرجه اني عندي قناعه ان موضوع 21 ديسمبر 2012 هيحصل و مستني التاريخ ده بفارغ الصبر علشان اشوف ايه اللي بعد كده

[ahmedelshahawy]

ربنا موجود و هو وحده اللى يقدر يغير كل شىء

[m.aligamal]

طيب ايه الحل ؟؟
هل البلد نسيبها لغايه متنهار ؟؟

[mfarag]

طيب ايه الحل ؟؟
هل البلد نسيبها لغايه متنهار ؟؟

للاسف الموشرات بتقول ان البلد بتتقدم بسرعة عجيبة

بس


لنقطة الانهيار او الانفجار

حسبنا الله ونعم الوكيل فى اللى كان السبب وولادة

[زينة الله]

غير كده انا معاك في الانهيار السريع اللي بيحصل لدرجه اني عندي قناعه ان موضوع 21 ديسمبر 2012 هيحصل و مستني التاريخ ده بفارغ الصبر علشان اشوف ايه اللي بعد كده

معلش فى السؤال .. هو ايه موضوع 21 ديسمبر 2012 اللى هيحصل دا ؟؟؟

[dr-mohamed]

انا بردو عايز اعرف ايه الل ىهيحصل 12 ديسمبر 2012 ويا ابو مريم ربنا يخلي لك مريم الاول يا سيدي كل اللى بتقوله والله الواحد بيفكر فيه وفي اوقات بفكر اخد ولادي وارجع بلدنا في الارياف اعيش فيها على الاقل هابقي مطمن على ولادي اكتر من القاهرة خلاص حاسس ان ممكن في لحظة تنفجر انتفاضة الجياع او المعتقدين انهم مضطهدين وللاسف الشديد الانتفاضة دي لن تصيب اصحاب الكومباوندات لانهم في امكانهم البعيدة محصنين لانفسهم وبعضهم طياراتهم جاهزة لنقلهم خارج البلد اللى هيحصل اننا احنا الطبقة اللى المفروض انها متوسطة وهي لم تعد كذلك اللى هنروح في الرجلين ما بين مطرقة الجياع من جهة وسندان الكومباوندات وساكنيها من ناحية اخري

[moody1]

المجتمع المصرى الى اين

اكيد الى الانحدار

[amro1965]

انا مش عارف ليه احنا بنتناقش فى موضوع انتى من زمان ثروة البلد بقت فى ايد 5 فى المائه بدلا من ان 5 فى المائه يعملوا ويجتهدوا فى رفعه معاناه ال 95% من الشعب المصرى المطحون اصبح فى مصر ال 95% بيعملوا ويقدحوا لرفع معاناه واشباع رغبات وتضخيم ثروات ال 5% يعنى نتعصر ونجوع ونمرض ونفضل فى قاع المجتمع علشان هما يعيشوا
رجعنا لايام البشوات والبهاوات والحرافيش امثالنا ملهمش مكان فى البلد
افضل تصريح سمعته من الدكتور البرادعى اذا لم توقع على تغيير المطالب السبعه فلا تشتكى غدا
ووضع حضراتكم ووضع زملاء عملى ووضع اصدقائى كلهم بيشتكوا الافضل لنا طالما رضينا بالوضع القائم مش قادرين نعمل حاجة نسكت احسن ونطبق المثل القائل
اذا كان كلامنا من فضه فى تلك المواضيع فسكوتنا هيكون من ذهب

[amir]

بالنسبه لموضوع 2012 فدي تنبؤات لا اكتر بس في مواضيع كتير عنها علي النت و في افلام وثائقيه و تسجيليه عن الموضوع و اعذروني مش عايز اخوض فيها في المنتدي اللي عايز يقرا عنها يدور عليها

[m.aligamal]

المجتمع المصرى الى التحرير لان الاوضاع دى كانت نتيجتها ثوره مباركه