هل يستمر الحب؟؟

[a_tantawy7]

استكمالا لمواضيع الزواج, هسأل سؤال للي أتجوزوا عن حب, هل الحب ده استمر بعد الجواز بنفس القوة؟ مخبيش عليكم كنت بحب واحدة جدا بس محصلش نصيب عشان كنا مختلفين أوي- هي كانت"أوبن ميندد" و أنا كنت ترباس صعيدي أصلي, ساعات بندم أني متمسكتش بيها, على أساس أننا كنا بنحب بعض جدا والحب هيخلينا نتغلب على أخلافاتنا وكده, بس لما أسأل أصحاب التجارب في الزواج يقولولي حب قبل الجواز مش بيستمر ومش كفاية عشان زواج ناجح؟ شاركوني حيرتي و النبي

[Macaronaa]

على حسب

أنا مش متجوزه لكن بشوف ناس وتجارب و الحقيقه مفيش حاجه تقبل التعميم على كل الناس يعنى فيه ناس اتجوزت عن حب ومازالوا بيحبوا بعض ويحافظوا على بعض وفيه ناس تانيه حب فظيع قبل الجواز وبعد الجواز حياه ممله وبارده ومفيهاش مشاعر خالص

وأما بقى رأييى الشخصى فى الموضوع ده بعيدا عن تجارب الناس ان الحب قبل الجواز بدون تحكيم العقل والاستسلام للقلب وبس هو ده سبب الفشل الحقيقى لأى علاقه واللى أفضله ان المشاعر تيجى واحده واحده يعنى مقابله بعلم الاهل طبعا ووجودهم ويقعدوا سوا ويرتاحوا لبعض ثم ارتباط فالاعجاب يزيد حبتين وعقبال ما يتم الفرح يكونوا حبوا بعض بس هنا الحب بيكون عاقل وراسى ومتاخد بالراحه مش زى الحب اللى بيتم على اساسه الارتباط بعد قصص حب بالسنين بيكون حب أهوج كده ولاغى العقل تماما

[ashekwalaa]

عن تجربة شخصيا .... أنا تعرضت لكلا الموقفين
قصة حب دموية رهيبة ... وعند أول تحكيم للعقل والدخول في مرحلة المسؤوليات ... فشل البطة بعيد عنك
وبعدين خدتها من قصرها وجربت زواج الكافيهات ... اللي هو الصالونات بس مودرن شوية
بصراحة أجمل حاجة فيه إن مفيش ارتباط قبل التأكد إنك قادر تتواصل مع البنت دي العمر كله ، وبعد ما تتقبل كل مميزاتها وعيوبها بتلاقي حاجة كده على 2 ونص بالليل بتخبط على بابك
افتحله بسرعة هتلاقيه الحب
أولا وأخيرا توفيق ربنا هو اللي بيحكم تجاربنا
بس مادام ربنا ادانا نعمة العقل والاختيار
دقق قوي لحد متختار صح
هتعيش صح
إن شاء الله

[Mohamed_Hamid]

أولا : بلاش تقول " والنبى " :)
ثانيا: اياك والتسرع. مفتاح الطلاق السريع. فكر كويس واتأنى وبلاش تتغاضى عن سلوك انت مش حابه الا اذا كنت تقدر تعيش معاه فى الانسانة اللى ممكن تعيش معاها
ثالثا: ربنا يوفقنا جميعا :)

[4fun14]

لا انت صح
وانتوا بتحبوا بعض وهى مرضتش تتغير عشانك امال بعد الجواز هتعمل ايه باه

[amr011111]

النقطه اللى هعلق عليها ان انت اللى هتتقبله قبل الجواز مستحيل تتقبله بعد الجواز
فاحسن انها راحت لحالها ولا تندم خالص

[ramymechanics]

اللهم لا حسد وربنا يكفينا شر العين
أنا اتعرفت على المودام فى أول أسبوع فى هندسة يوم ال 13 من اكتوبر 97 يعنى من 15 سنة وارتبطنا منذ هذا اليوم ... واتخطبنا بعد ما اتخرجت ب 3 شهور على ما ظبطت أمورى واتجوزنا بعدها بسنة ونص والحمد لله فى 2005 ... تقييمى للرحلة دى هو امتياز طبعا رغم بعض عيوبى وانا معترف بيها منها العصبية الزايدة وغيره لكن هى بتعرف ازاى تتعامل مع العيوب دى وازاى تمتصها (وتاخد حقها بردو عند اللزوم ) .. أنا باعتبر المدام هى وش السعد عليا وبحس ساعات إن ربنا بيكرمنى عشانها ولو رجع بيا الزمن 10 مرات هختار نفس الإختيار ... عدت علينا ظروف صعبة كتير منها وفاة أحد أبنائنا بعد ولادته بيومين بس ربنا الحمد لله عوض علينا .. رغم كل مطبات ومصاعب الحياة تبقى الزوجة (والأم طبعااااااا) أروع النعم فى الحياة دى

[S O P H O S]

الاختيار السليم فالاول بيستمر
والعكس صحيح

[ahmedteam]

حب ايه اللى انت جاى تقول عليه

الحب بيستمر طبعا بعد الجواز بتاع اسبوعين تلاته كده و بعد كده الحوارات بتبدأ

بص من الاخر مفيش حاجه بتبين الطباع الا المعاشره

لو فضلت تدرس فيها 100 سنه

و تذكر دائما اغنيه عمرو دياب : كلهم بيقولو كده ف الاول

ولا تحزن اذا فاتك قطر الزواج فأن يفوتك القطار خير من ان يدهسك

[طارق _عبد السلام]

استكمالا لمواضيع الزواج, هسأل سؤال للي أتجوزوا عن حب, هل الحب ده استمر بعد الجواز بنفس القوة؟ مخبيش عليكم كنت بحب واحدة جدا بس محصلش نصيب عشان كنا مختلفين أوي- هي كانت"أوبن ميندد" و أنا كنت ترباس صعيدي أصلي, ساعات بندم أني متمسكتش بيها, على أساس أننا كنا بنحب بعض جدا والحب هيخلينا نتغلب على أخلافاتنا وكده, بس لما أسأل أصحاب التجارب في الزواج يقولولي حب قبل الجواز مش بيستمر ومش كفاية عشان زواج ناجح؟ شاركوني حيرتي و النبي

الاختلاف قوى قبل الزواج لن تتحمله مطلقا بعد الزواج ده لانك بتقول كمان انك صعيدى الطباع
يعنى دمك حامى فهمتنى

بص ياسيدى انا الحمد متزوج من 18 سنه
وكلنا تقريبا مر علينا موقفك قبل الزواج
لكن انا من فضل الله اتبعت طريق اظفر بذات الدين تربت يداك
والحمد لله الحمد لله الحمد لله

فان شاء الله ربنا سيعوضك من ينسيك تجربتك الاولى وان شاء الله يجعل بينكم الموده والرحمه

[yasser_0339]

توعديني بالمطر ، ولا اطولش غير حبة ندي .
توعديني بالقمر وانا وسط ضلمة في الفضا

توعديني وتسبيني وترجعيلي وانتي عارفة ان انا علشان حنيني قلبي برضه اكيد هيصفي

وابقي حالف اني عمري في يوم ما اسامح وابقي ناوي عمري ما اصفي لقلب جارح

وتشوفيني تغلبيني بالمدامع توعديني وقلبي قبل نداكي سامع تسكتي ارجع واقولك توعديني