تجارة الممنوعات في مصر او الكتب الخارجية

[ecybrarian]

ناس زمايلنا في الشغل عندهم عيال في المدارس وقعوا على سمسار ممنوعات..يعني كتب خارجية دراسية بيجيب لهم الكتب في الخباثة وفي الكتيمي وفي كيس اسود ملفوف اربع مرات!!!!!! المهم أنا قابلت السمسار دا وحكى لي عن العجب العجاب..قال لي إن بتوع المصنفات اصبحوا مقيمين في الفجالة..وتبقى وقعته سودا إللي يتظبط عنده كتب خارجية..وإن اصحاب المكتبات بيجوا الفجالة الفجر ياخدوا البضاعة..لا من شاف ولا من دري..والبيع اصبح للناس إللي بيثق فيهم فقط..لدرجة إنه مارضيش يديني رقم تليفونه!!!!! والطماطم بسعر التفاح والفاصوليا اغلى من الاتنين..بس الفراخ رخصت..والحمد لله رب العالمين

انت بقى جبت الممنوعات ولا خايف تروح ورا الشمس علشان معاك سلاح غير مرخص (سلاح التلميذ)

[hazoom2006]

انا عندى سؤال
لو مسكو ولى امر طالب بكتب خارجية هتبقضى قضية تعاطى ولا اتجاار !!!!!!

دى بقت حملات محاربة التعليم عينى عينك كدة مش كفاية المناهج وكمان بقت ممنوعه

[ecybrarian]

انا عندى سؤال
لو مسكو ولى امر طالب بكتب خارجية هتبقضى قضية تعاطى ولا اتجاار !!!!!!:u_thin1[1]:

بص يا باشا، لو الممنوعات اتظبطت مع ولي الأمر يبقى إتجار..لكن لو مع الطالب يبقى تعاطي..هو في ايه بيحصل في البلد دي!!! بيعملوا مشكلة من مافيش.. هي الناس ناقصة مشاكل

[zrzr1]

هههههههههههههههه ف سنه واحده كده يضربو دماغ الناس الكبيره ويمنعوا الحشيش
ويضربو دماغ العيال ويمنعو الكتب
الحمدلله لسه مش متزوج بس ياعالم الحال هيكون ازاي ف المستقبل
الطف بعبادك يارب d:

[Abo_Lina]

الواحد لو كان إحتفظ بالكتب دي من أيام الثانوي كنت نزلت بعتهم بالشيئ الفلاني في السوق السودا

[Donzi]

هههههههههههههههه ف سنه واحده كده يضربو دماغ الناس الكبيره ويمنعوا الحشيش
ويضربو دماغ العيال ويمنعو الكتب

d:

+1111111111111

حلوة قوي دي

الواحد لو كان إحتفظ بالكتب دي من أيام الثانوي كنت نزلت بعتهم بالشيئ الفلاني في السوق السودا

انا عندي كتاب bit by bit هاقوم ادور عليه دا يعمل ثروة دلوقتي ، خلينا نقب على وش الدنيا

[Donzi]

بس فعليا بقى انا نفسي افهم هما ليه عملو القرار دة ؟؟؟

مش يمكن دة لمصلحة الناس انو يشيل من عليهم عبء الكتب الخارجية و يكونو طوروا كتب الوزارة !!

بس على ايامي عمر الامتحان ما جه من كتب الوزارة ابداااااااااااااااااااااااا

.

[SkyBird]

الوزارة -والله اعلم- عايزة فلوس من مؤلفي الكتب الخارجية على اساس انهم ينقلوا من كتب الوزارة بدون اذن طبقا لقانون الملكية الفكرية (ولو ان ده لا ينطبق على كل الكتب الخارجية)
الحل الاسلم ان الوزارة تدخل منافس
يعني كفاية عليهم لو عملوا كتاب فيه امتحانات السنين السابقة وده اللي كان بيميز الكتب الخارجية
انا كانت طريقة مذاكرتي حل امتحانات وبس .............

[power]

عندي كراسه الاول رابعه ابتدائي علي 20000 الف حد يخلص

[ecybrarian]

فرجت..ابتدت تندع
===

http://www.akhbarak.net/articleview.php?id=2099366

وافقت وزارة التربية والتعليم على إجازة الكتب الخارجية لدارى نشر فقط من ضمن 5 دور نشر، على اعتبار أنهما استوفتا الشروط والمعايير الخاصة بإجازة الكتب الخارجية، من حيث سلامة المنهج وتوافقه مع المراحل العمرية المختلفة، مطالبة المؤسسة العربية الحديثة التى تصدر كتاب «سلاح التلميذ» بالاعتذار الرسمى للوزارة وسحب الكتب الخاصة من السوق، والتقدم من جديد للوزارة للموافقة على إجازة هذه الكتب.

وقال الدكتور عادل شكرى، مستشار الوزير للتطوير الإدارى، لـ«المصرى اليوم» إن الاختلاف مع دور النشر لم يكن ماديا فقط، وإنما على سلامة المنهج وفقا للمعايير التى حددتها الوزارة، رافضا الإفصاح عن القيمة المالية التى تم تحديدها لدارى النشر، اللتين ستبدآن فى طباعة الكتب الخاصة بهما خلال الأيام القليلة المقبلة، وفقا لمطالب الوزارة من قبل لسداد دور النشر مبالغ مالية نظير حقوق الملكية الفكرية.

[Migo123]

و الله منطق الوزير في منع الكتب الخارجيه من وجهة نظري مقبول جدا .... بس أكيد مختلف معاه في طريقة التطبيق ......... ليه ما اصدرش قرارته العنتريه قبل فتره مناسبه لتتمكن دور النشر من توفيق أوضاعها