أنت ممكن تتجوز واحده مش جامعيه وأنت خريج جامعه؟

[a_samy]

سؤال بيطرح نفسه وممكن تقابل حاله زى كده،يعنى لو أنت خريج جامعه وقابلت بنت كويسه جدا وتصلح أن تكون زوجه وبتحبك أوى بس هيا مش خريجة جامعه ممكن تتجوزها؟
والعكس لو أنتى خريجة جامعه وهو مش جامعى وأنتى شايفاه راجل وبيحبك ممكن تقبلى تتجوزيه؟
دعوه لمناقشه وإبداء وجهات النظر.

[bondokk]

للأسف المجتمع بتاعنا بقى مظهري اوي
علشان كده الموضوع مش هايكون سهل وهاتقابل مشاكل كتيييير
بس لو انت متأكد ان في توافق بينك وبينها يستاهل التضحيه (من وجهه نظري) توكل على الله
والعكس صحيح مع البنات طبعا

[ams]

يكفينى ان يكون قلبها ابيض و عقلها نضيف
و التعليم مش بالضرورة بيعلى العقل

[شريف]

لسة كان السؤال دة بيردد فى ذهنى

هو التوافق الثقافى مهم جدا بس علشان
1- تكون افكاركم قريبة من بعض
يعنى تكونوا فاهمين بعض كويس و كل واحد عارف التانى عايز اية قبل ما يتكلم
بس التقارب الثقافى هيسهل العملية دى فى الاول بس بعد كدة العشرة هى اللى هتكمل عملية التوافق دى
2-تبقى مطمئن انها بديل كفؤ ليك فى غيابك و قراراتها هى هى قراراتك
يعنى مثلا تروح المدرسة علشان العيال و تتناقش هناك مع المدرسين و كأنك انت اللى كنت بتتناقش طبعا لو فى توافق ثقافى متقارب هيسهل العملية دى
بس لو الحب كان موجود و كل فرد عايز يرضى شريكة و يتقرب منة هيحاول يفهمة و يتطبع بطبعة و هى دى الخلاصة
3-فضل البرستيج و دة بيختلف حسب المستوى الاجتماعي
يعنى المدارس الانترناشونال و البرتش كلها لازم انترفيو للابوين و لازم يكونو خريجين جامعة و مستوى الانجلش عالى و كدة

و فى الاخر الحب و الحنان هو اللى هيقوى علاقة الفردين ببعض مش الشهادات

وَمِنْ آيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجًا لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةً ۚ إِنَّ فِي ذَٰلِكَ لَآيَاتٍ لِقَوْمٍ يَتَفَكَّرُونَ (21)

[mrwho1982]

يكفينى ان يكون قلبها ابيض و عقلها نضيف
و التعليم مش بالضرورة بيعلى العقل

الراجل ده بيتكلم كلام زي الفل

قلت اللي كنت عايز اقوله

ياما في بنات او رجالة وشباب بيكونو خريجي هندسة او طب

ومن بره هلا هلا ومن جوه يعلمه الله والله لو شفتو تقول مافيهوش غلطة ولكن تعيش معاه يكرهك في الدنيا

المثل مش بيعم الكل ولكن جزء

[crazylambada]

الفكره مش جامعيه او جامعيه
الفكره ان دماغها تبقى قريبه منك و عندها ثقافه في الحياه لان معظمنا بيكتسبها و هو في الجامعه
بس فلو هي عندها خبره في الحياه و التصرف متبقاش عيله او طفله
قد المسؤليه و دماغها قريبه منك يبقى خلاص

[SeaShark]

طبعا سواء ولد او بنت هيكون في عدم توافق في المستوي الاجتماعي و الفكري و العلمي

ده بيعمل مشاكل طبعا بعد الجواز ااجلا او عاجلا.

محدش قال حاجة طبعا في بنات مش خريجي جامعة و افضل بكتير من بنات خريجي جامعة و العكس برضه لكن ده مش معناه اني اكون مثلا مهندس او دكتور او محامي واتجوز واحدة معاها ثانوية عامة او دبلوم

و لكل قاعدة شواذ يعني ممكن واحد خريج جامعة يتجوز واحدة خريجة جامعة و برضه الجوازة متنجحش بتحصل كتير

[Sameh]

ممكن جداً مافيش مشكلة
أعتقد معظم أمهاتنا معاهم شهادات غير جامعية والحمد لله كانوا أفضل أمهات لينا واتعلمنا كويس

[mrmohamedragab]

لو مش جامعيه بناء على ظروف مفيش مشكله ادام فى توافق ثقافى و اجتماعى و زكيه يقدروا يتواصلوا يعنى و يشوف فيها البنت اللى تقدر تربى عياله بس لو كان لتقصير منها لدلع منها مثلا او انشغالها بامور اخرى فلا

[م. عصام مهنى]

اعتقد لو الفوارق مادية مش مشكله
لكن لو المستوى العلمى والفكرى طبعا هتبقى فيه مشكلة بعد الجواز خاصة فى مستوى التفكير لان المرحلة الجامعية مهمة جدا فى تكون الشخصية والفكر بالنسبة للراجل أو المرأة .
دا حتى مدارس اللغات بتطلب ان يكون الاب والام معاهم شهادة جامعية ودى معاهم حق فيها
أو لو مدارس عادية ومش هتطلب ان يكون الاب والام جامعيين بتفرق طبعا مع الطفل وطريقة توصيل المعلومة للطفل
لان اكتر واحدة بتقعد مع الطفل وتتابعه هى امه ولو الام مستواها التعليمى مش جامعى مش هتعرف توصل حتى المعلومة للطفل لو سالها عن اى حاجة ومش هتعرف تتابعه لذلك انا بفضل ان يكون الاب والام جامعيين

[n_i_t_e]

زي المشاركات ما قالت...
طالما انا و هى نفس الطبع و الثقافة و أهلى هيندمجوا مع أهلها
أصلا انا مش شايف فارقة لو دكتورة أو خريجة معهد .... هو مين المفروض اللى يصرف عالبيت؟

[bishoy02010]

ممكن جدا مفيش أى مشكلة

[Sherif Khalifa]

لو المستوى الثقافى و الاجتماعى متقارب مفيش مشكلة

انا كدة كدة مش همشى معلق شهادة البكالوريوس على صدرها

[Soma_Sooma]

فوجهة نظرى الشهادة مبقتش مقياس ابدا لأى شئ

ولكن ممكن تكون البنت دى او الولد دة لما تتكلم معاه تلاقية مثقف اكتر من اى حد معاه شهادة

لأن عدم اكمال تعليمة بيديلة الحافذ انة ميكنش اقل من حد فا بيطور و يثقف من نفسة

واهم صفات لازم تكون موجودة فى الشخص دة من ناحية التعليم

هى حبة للمعرفة

طريقة التحدث مع الناس

طريقة التعامل مع الأهل (ودى اهم حاجة)

لأن فى لو اتكلمت على انت البنت هى اللى مش متعلمة تعليم جامعى فا لو هى مش مثقفة او بتحب تطور نفسها هيبقى متعب جدا جدا جدا فى تربية الأولاد (من ناحية الفاظ معينة، تصرفات، عادات)

اما الرجل فا دة بردة ليه مشكلة تانية فى بعض الرجالة بعد مايتجوز بينفسنو قوى من زوجاتهم انهم تعليم عالى فدة بيأثر بردة عالأطفال و على العلاقة نفسها و اعتقد ان عدم تكملة تعليم الرجل اخطر كتير قوى من عدم تكملة المرأه تعليمها
لأنة بيكون صعب قوى السيطرة على تصرفاتة ...

[م. عصام مهنى]

الجامعة مش ثقافة بس دى بتفتح مدارك الانسان باحتكاك الطلبة مع بعض تلاقى واحد من الصعيد مع واحد من القاهرة مع واحد من اسكندرية دا بتفتح مدارك الطالب ويعرفوا على عادات وتقاليد ناس جديدة وبالتالى لما يروح لاى مكان يعرف يتكلم ويتعامل مع الناس غير لما تكون فى ثانوى حتى فى المعلومة فى الجامعة انت بدور عليها وبالتالى فمرحلة الجامعة مرحلة مهمة فى تكوين الشخصية مش موضوع شهادة .

وزى الاخ العضو الفاضل ما قال :
تبقى مطمئن انها بديل كفؤ ليك فى غيابك و قراراتها هى هى قراراتك
يعنى مثلا تروح المدرسة علشان العيال و تتناقش هناك مع المدرسين و كأنك انت اللى كنت بتتناقش طبعا لو فى توافق ثقافى متقارب هيسهل العملية دى
من الاخر بتبقى انسانة فاهمة ومدركة لانها احتكت بزميلاتها فى الجامعة وعرفت الكويس والوحش عكس تماما اللى قعدت بعد ثانوى او معاها دبلوم بتبقى محدودة فى تعاملاتها وتصرفاتها

انا مش بتكلم عن الراجل لان الراجل اللى بيبقى تعليمه ااقل من زوجته دا مشكلة لوحده والبنت الى توافق على انها تاخد واحد تعليمه متوسط وهى جامعية دى برضوا مشكلة كبيرة وهيكون عواقبها بعد الزواج