جبت ايه لست الحبايب

[Abonora]

بسم الله الرحمن الرحيم

ياترى كل واحد جاب هديه لوالدته ولا لسه بيفكر يجيب ايه
تفتكر ايه اجمل هديه ممكن تقدمها لست الحبايب
وايه اجمل الكلمات التى يمكن كتابتها لأغلى وأعز الناس الى قلبك
وانا بعتذر الى كل شخص افتقد والدته فقد تكون غائبه عنك بجسدها ولكن روحها دائما معك فى كل مكان
فشارك معنا فان حبك ودعائك يصلها اينما كانت

[Xpert]

جبتلها الضغط ههههه

[Noha.M]

^^^^^
هههههههههههه دة طبيعي !!
طب ايه تانى غير الضغط ؟؟؟

انا و اختى اشتركنا في ميكروويف عشان كان نفسها فيه اوى و جبنلها كمان جزمة و شنطةِِ

[cpt_shawky]

فين الهدايا يا رجال

[Mahmoud Saloum]

مع ان عندى تحفظ على موضوع يوم الام بس انا بصراحة كنت بجيب لامى قبل ان يتوفاها الله هدية رمزية فى هذا اليوم وماعرفش اخر مرة جبتلها حاجات منها طقم ملائة سرير وهيا نفسها الملاية اللى اتحطت تحتها فى النعش لما ماتت وهيا كانت بتحب الطقم ده اوى.(اللهم ارحمها واغفر لها واحسن اليها ولكافة اموات المسلمين اللهم آمين)
المهم حاليا انا بجيب لحماتى و المرة دى جبتلها كبة مولينكس طبعا لسة كمان علبة حلاوة المولد انا ناوى اقولهم الحاجات دى بدعة بس هيقولوا عليا بخيل وهشوف فى البيت ايام اغمق من قرن الخروب :)

[goodwave]

والله لسة بفكر .... بس حماتي خلاص إختارت هديتها وهي عبارة عن شنطة وجزمة...... اما أمي الغالية فهي تترفع على أن تطلب منتي شئ لكي لا ترهقني ولكن بفكر أجيب لها موبايل شاشتة كبيرة علشان نظرها..... بس لسة مش عارف!

الجديد في الموضوع إن المدام كمان عاوزة هدية عيد أم .... قال إية طالما أصبحت أم يبقى لازم هدية عيد أم وطالما الأمورة بتاعتنا ل(كنزي هانم) لسة صغيرة ومش بتاخد مصروف في إيدها ..... وخلوا بالكم من "في إيدها" لان سيادتها ليها مصروف شهري زي مصروف البيت وده وازم البامبرز ومتابعة الدكتور والملابس لزوم الدلع وخلافة ..... وبناء علية فقد صدر فرمان بأني يجب أن أتحمل هدية عيد الام لمراتي :(

الرحمة من عندك يا رب:(

سؤال على الماشي........ مين فينا مش بيسأل على أمه خالص ولا بيدخل عليها بأي حاجة إلا في عيد الأم؟؟؟؟؟؟؟؟؟ لو فية....... إتكسف على دمك وإتق الله.

[Karim_Monir]

الجديد في الموضوع إن المدام كمان عاوزة هدية عيد أم .... قال إية طالما أصبحت أم يبقى لازم هدية عيد أم وطالما الأمورة بتاعتنا ل(كنزي هانم) لسة صغيرة ومش بتاخد مصروف في إيدها ..... وخلوا بالكم من "في إيدها" لان سيادتها ليها مصروف شهري زي مصروف البيت وده وازم البامبرز ومتابعة الدكتور والملابس لزوم الدلع وخلافة ..... وبناء علية فقد صدر فرمان بأني يجب أن أتحمل هدية عيد الام لمراتي :(

الرحمة من عندك يا رب:(
.

ها ها ها
هيا كنزي عندكم برضه
احنا عندنا كنزي وبيدو
وكنزي وبيدو بياخدو مصروف(شهري)
وكنزي وبيدو بيجيبو هدية لتيتة(لسه ما استقريناش)
غير هدية بابا طبعا
وكنزي وبيدو لازم يجيبو لماما هدية حلوة (ساعة جوشي)
وكنزي وبيدو لازم يجيب هدية لتيتة التانية(حماتي -لسه ماستقريناش)
وابو كنزي وبيدو لازم يجيب هدية لمامتة(غالبا تكييف شرك مع اخواته)
وابو كنزي وبيدو لازم يجيب هدية لحماته (لسه ماستقريناش)
ده غير لما كنزي وبيدو يدخلو المدرسة ويجييبوا هدايا لنص المدرسة

ماليش دعوة انا عايز ارجع قد كنزي وبيدو :(:(:(
مين اللي شار عليا اتجوز:o
كل ده في شهر مارس
ده غير عيد ميلاد المدام في شهر مارس:)
ده غير علب الحلاوة مع اني مابطيقهاش وبدعة وحرام وايام هاتبقي اغمق من لون التيشرت الكحلي اللي لابسه النهاردة لو فتحت بقي وقولت كدة

محدش معاه سلفة لاول الشهر الجاي:p:p:p

[goodwave]

ها ها ها ها
وإنت كمان يا كريم طالك الإستبداد والفلس.... كان الله في العون

بس ملحوظة...... هو يعني علب الحلاوة هي بس إللي بدعة وحرام........ طيب وعيد ميلاد المدام مش بدعه :) ؟؟؟ إظاهر عليك حافظ الدرس كويس وحريص حتى في المنتدى يمكن كلمة توصل كدة ولا كدة....... طبعا يا عم عاوز تعيش..... وبيني وبينك هوة دة الصح وإلا برة في الشارع دول 3 على واحد ياعم = فاااول :)

[Karim_Monir]

شششششششششششش
المنتدي مراقب من كل الجهات
وخاصة الاجتماعي
هو حد قاللك اني عايز اسيب مصر واجي اقعد عندك في اسكندرية
طب لما يصلحوا الشوارع الاول

[theking2690]

لسه و الله ما استقرتش هجيبلها ايه يا ريت لو حد عنده اقتراحات يقول هى بتحب حاجة المطبخ جدا بس للأسف الوالد مش مدينا فرصه نجبلها حاجه فى المطبخ تقريبا جايبلها كل الاجهزه فلو حد عند اقتراح يا ريت يقولوه لأنى بجد محتار

[احمدعبدالعزيز]

هو كل مصر عرفت ان اسكندريه شواريعها ادمرت ؟

[احمدعبدالعزيز]

كل عام وامهات مصر فى احسن حال ويبارك لنا فيهم يارب العالمين واتمنى من كل الاعضاء ان تجعل امك اغلى عندك من اى شىء وتذكر الرسول الكريم فى الحديث الشريف انه اوصانا بها ثلاث مرات .

[osama_alam]

والله انا كان نفسي اجبلها خاتم دهب بس مش ممكن يجدعان ايه اللي بيحصل ده الدهب ولع اوي مش من بريقه من سعره انا كنت لسه شاري خاتم قريب من اقل من سنة لمراتي وكانت الاسعار اقل من كده تصوره علشان تجيب حتة خاتم صغير محتاج 700- 800 جنيه :( لو حد عنده افكار تانية يريت يقول

[mohamed_rhem]

دفعت 200 جنيه وهي تجيب اللي هي عايزاه

[aif]

انا بادعيلها طبعا ( الله يرحمها )
اما حماتي ومدرسات الاولاد باجيبلهم ورد
تخيلو ان حماتي بتفرح بالورد اكتر من اي حاجة ؟؟؟
والنظام دة مريحني اوي ... مع ان الورد برضة بقي غالي جدا