عاوز اطلع رخصه السواقه ب واسطه او بفلوس- أرجوا المساعده ( جبت اخرى )

[mxz911]

السلام عليكم

انا بقالى 10 سنين بسوق ومش هحسب اول سنتين عشان مكونتش بسوق اوى وكنت لسه بتعلم ... بسوق كويس من امتى ؟ حوالى 8 سنين ...من ال 10 سنين دول اول 4 تقريبا كانوا بره مصر ... وبعدها جيت مصر .. بعدين قعدت سنتين بسوق متقطع مش متواصل بعدها دلوقتى بقالى 4 سنين بالظبط بسوق متواصل فى مصر وفى شوارع القاهره الجميله وكل ده من غير رخصه و لولا ستر ربنا معاى غايت دلوقتى محصليش حاجه وكل ما يحصل ميبقاش فى ظابط او حاجه واقف والموضوع يعدى بالفلوس مع امناء الشرطه ومش بمشى فى حته فيها كماين بحاول اتجنبها يعنى .. ...

دلوقتى انا رحت امتحن سواقه بعد ما زاكرت كل حاجه ونجحت ف الاشارات وطبعا داخل على امتحان السواقه بالعربيه النوبيرا .. قلت بقى هناك الناس اذكياء هتشوف العربيه كبيره هيوسعوا الاقماع شويه

اول عربيه 128 خبط ووقع قمعين وهو راجع ..

تانى عربيه 127 دخل فى نفس وسع بتاع ال 128 وانا اقول عادى دخل على طول ورجع حته صغيره خالص والمهندس قاله اطلع قدام ( يطلع بره ا لتراك يستنى النتيجه ) واللى كان راكب 127 ده والله العظيم كان قدامى ف الاشارات وطلع موبايله وهو داخل للظابط جوه وسامعه بيقوله كلمته ولا لسه واللى فهمته ان اللى كان معاه على التليفون واسطه ..

تالت واحد انا دخلت ملقتش حد وسع اقماع ولا نيله ومستغرب قالى خش من غير ما يبصلى دخلت على طول خدتها عدل وقالى كمل للاخر خالص وبعدها ارجع وفضلت ارجع لكن فى اول لفه من رجوعى كان مستحيل انى اخدها على مره واحده نظرا لحجم العربيه فعديت لورا وانا بلف العجله القدامنيه اليمين وقعت قمع ( مع العلم انى برجع ناحيه الشمال ف العجله خبطيته راح واقع ) قالى امشى استنى نتيجتك .. طبعا مشيت بغلى ازاى وقع منى ومشوفتوش ( هو طبعا لازم اعترف بخطأى ولكنى كان لازم اعدل العربيه ده مستحيل تيجى مره واحده ف كده كده ساقط لان لازم اخدها مره واحده )

اللى بعدى بقى
بنت واخوها او معرفش مين صاحبها ولا مين بالظبط المهم معاهم راجل لابس مدنى .. ف امتحان الاشارات دخل للظابط بنفسه وهما مدخلوش .. كده عدوا من ا لاشارات
الولد داخل يمتحن طلع قدام خالص على طول ورجع سنه صغيره خالص موقعوش حاجه قالوا عدى
البنت طلعت قدام سليم وراجعه وقعت 3 اقماع قالها عدى ( تستنى النتيجه يعنى )

وباقى الناس حصل معاهم زى واحد بشاهين والتاني مش فاكر راكب ايه

واللى بعدنا ف الاخر خالص امتحن على موتوسسيكل ف نفس التراك بتاع العربيات مش عارف ازاى

المهم اللى عدوا
البنت واخوها
اللى راكب 127
وبتاع الموتوسيكل طبعا


انا دلوقتى شوفت كل حاجه قدامى وعرفت الدنيا ازى ماشيه ف المرور وعشان كده عملت الموضوع ده لو حد عنده واسطه فى المرور او يقدر يجيبهالى بالفلوس ياريت يقدر يساعدنى لانى مش هينفع استنى 3 شهور واروح امتحن تانى !

وطبعا من الاول لو اعرف انها كده كنت روحت الامتحان بعربيه ماروتى او اى حاجه صغيره !!

[MOUSTAFA_SAAD]

ادفع 250 جنيه فى مدرسة القياده التابعه للمرور وريح دماغك

[أبو صلاح]

باشا
انت في مرحلة متقدمة جدا
ونصيحتي ليك انت مش محتاج واسطة
ليه ؟
لانك عديت اصعب امتحان وهو امتحان الاشارات وهو ده في وجهة نظري اللي محتاج لواسطة
لانه امتحان غير طبيعي وبتواجه اسئلة غريبة اول مرة تشوفها او تسمعها

نصيحتي ليك معلش تعالى نفسك واتمرن شوية
روح المرور اللي كنت بتمتحن فيه واتفرج على الناس اللي بتعدي بتعمل ايه علشان تفادي الاقماع
وممكن بعد لما يخلص الامتاح او قبل ما يبدأ تظبط العامل اللي بيرص الاقماع ب 10-20 ج وتجرب بعربيته وقوله هجرب بس وانك مش داخل امتحان

لما تيجي ترجع بظهرك لو ركزت في أبعاد العربية كلها أكيد هتسقط لانك علشان تظبط ناحية هتلاقي ناحية تانية باظت

انا عن نفسي كنت داخل في مرور السلام بلادا وانت عارف اللادا عاملة ازاي دبابة بمعنى الكلمة

وانت راجع اوعى تبص في اي مراية كل اللي هتبص عليه هتخرج راسك من الشباك اللي على شمالك وتحاول تمشي موازي بالظبط للاقماع اللي على شمالك وسيبك من كل اتجاهات باقي العربية لانك لو ماشي موازي للاقماع اللي على شمالك ثق ان كل العربية ماشية معاك مظبوط

على فكرة انا نجحت في الامتحان ده من اول مرة
واللي عمل الحركة دي واحد كان داخل يمتحن بعربية جيب شروكي (مدرعة)


لكن حرام في المرحلة دي تروح لواسطة هتدفع فلوس حوالي 1000ج وملهاش لازمة خليها آخر حل

وربنا يوفقك

[أبو صلاح]

ادفع 250 جنيه فى مدرسة القياده التابعه للمرور وريح دماغك

على فكرة بناء على معظم آراء الناس اللي جربت الموضوع مش بسيط زي ما انت متخيل
لعدة اسباب
بتكون مواعيدك صباحا وده غير مناسب للموظفين
لازم تظبط المدربين لانهم من الاخر موظفين حكومة
بتمتحن لواحدك محدش بيساعدك الانادرا وآخرها المدرب بيقعد جنبك وانت بتمتحن لكن اكيد مش هيمتحن بدلا منك

[akramlail]

بص انا عن نفسى مطلعها بالفلوس وممتحنش اصلا اتصورت وبس وواحد صاحبى من اسبوع لسة داخل المدرسة وامتحن وظبط الراجل اللى قاعد جمبة ب 30 وعدى وكلة بيعمل كدة
يستحسن انك تمتحن بعربية المرور وبيبقى قاعد جمبك واحد عندة فى الدواسة زيك بالظبط هوة هبظبطك

[MOUSTAFA_SAAD]

على فكرة بناء على معظم آراء الناس اللي جربت الموضوع مش بسيط زي ما انت متخيل
لعدة اسباب
بتكون مواعيدك صباحا وده غير مناسب للموظفين
لازم تظبط المدربين لانهم من الاخر موظفين حكومة
بتمتحن لواحدك محدش بيساعدك الانادرا وآخرها المدرب بيقعد جنبك وانت بتمتحن لكن اكيد مش هيمتحن بدلا منك

انا جربت الموضوع مع اختى هى مارحيتش تتدرب ولا بتعرف تسوق وساعة الامتحان واحد كان قاعد جنبها وساق هو والموضوع كان كده مع كل الناس وبعد ماطلعت الرخصه وفضينا بدات تتعلم السواقه

[alaa99991111]

ادفع 250 جنيه فى مدرسة القياده التابعه للمرور وريح دماغك

+111111111111111111111

الكلام ده من الاخر

[wassim_nasser]

انا لسه مطلعها الشهر ال فات بس كنت دافع رسوم مدرسة القيادة وماروحتش ولا يوم بس رحت يوم الامتحان اديت العسكري عشره جنيه وقدام الظابط ودخلت امتحنت علي عربية المرور الربع نقل جبت قدام و ورا وخلص الامتحان علي كده وضربت الرخصه ف جيبي ومشيت .. بالمناسبه انا كمان يوم الأشارات ولا ذاكرت ولا يحزنون هى خمساية قامت بالواجب .. إبرز تنجز وأبجنى تجدنى

[tamertamer]

بص ياباشا الموضوع سهل جدا جدا جدا

اى واحد صحبك ابوة او اخوة او هو يكون ظابط يجى معاك وخلصت الموضوع
انا طلعت الرخصة بتاعت القيادة من مدة طويلة ومكنتش بعرف اسوق اصراحة بس كرت صغير كل حاجة مشيت
ولسة مطلع رخصة سواقة الموتسكل بتاعى عشان رخامة المرور الجديد جبت وسطة جمدة شوية بلاء مبلغة
حصل معاية الاتى
دخلت عملت امتحان الاشرات على الكمبيوتر امضاء رئيس المرور الورقة الصفرا تتقدم ورقى الست بتاعت الامتحنات بدون ولا كلمة هى امتحنت وخلصت وادتنى ورقة ختها ورحت لواحد جوة ادتلة الورقة ومشيت عشان كان وراية شغل وكنت مذوغ رحت لقيتة مطلعلى رخصة مؤقتة وروح اى وقت اتصور فى دقيقة وتطلع وفعلا هذا ما حدث لونى بسوق باحتراف اصلا بقالى سنين بسوق بس لازم عشان اخلص بسرعة

[Moustafa_Kamel]

بص انت تروح لمدرسه سواقه تابعه لمنطقتك
و هما بيبقوا عارفين السكك كويس

[Moustafa_Kamel]

اه نسيت اسالك
انت تبع مرور السلام مش كده؟؟

[Ralliart]

الناس كلها بتدفع في الاشارات وانت عديته
يبقى بلاش تدفع حاجه وامتحن تاني سواقة

انا لما رحت مكانش معايا واسطه ومدفعتش فلوس بس الراجل من نفسه شرحلنا الطريقه اللي نعدي بيها الاقماع (مش فاكرها حالياً للاسف) ومجرد اني عملت الخطوات اللي قال عليها عديت علطول

[M.Alaa92]

لص يا باشا من الاخر كدة اخدت تاجيل قد اية اسبوعين مثلا ؟؟؟ استناهم و روح امتحن تانى و ادى اللى جنبك 50 وخلصت على كدة اما لو لو مدة اكتر من اسبوعين دور على واسطة احسنلك