نقدر نعمل ايه؟

[OlaOsman]

النهاردة لسه راجعة من زيارة لدار مسنين.. اليوم منظماه جمعية روح الخيرية التنموية.. الناس دي حست ان اليوم ده هو اكتر يوم الناس اللي في دار المسنين محتاجين فيه انهم يخرجوا من جو الدار الرتيب و يغيرو جو و يشموا هوا.. فظبطوا مع نادي نقابة المهندسين اللي على النيل و اتفقوا معاهم على وجبة عدا و قعدة حلوة ع النيل. الحمد لله الناس انبسطوا و اليوم كان جميل.. انا بأه خارجة من اليوم ده بكم من المشاعر و الخواطر هحاول أرتبها على أد ما أقدر في السطور التالية.

طبعا حسيت أد ايه بنعمة ربنا اننا في وسط أهلنا اللي بيرعونا و نعمة اننا بنرعى أهلنا و ربنا مدينا القدرة و الصبر اننا نخدمهم و نبقى خدامين تراب رجليهم كمان بدون مبالغة.. الناس اللي قضينا معاهم النهاردة الحزن ماليهم على رميتهم في الدار كده و كتير من السيدات كانوا بيحاولوا ينسوا ان بكرة عيد الأم :(

حسيت كمان بنعمة ربنا اني مش لما ابقى عايزة أشرب مش بحتاج حد يفتح لي غطا إزازة المية.. لما بانزل او باطلع مش باستنى حد يساعدني و ياخد بإيدي.. و اهم حاجة احساس الانسان بإن العمر قدامه مش وراه.. النهاردة حسيتها اوي.. حسيت بإحساسهم اوي مش عارفة ازاي.. بس فعلا وصلني احساسهم و همه بيبصوا لنا و احنا رايحين جايين نشوفهم عايزين ايه و نجيبهلهم و كلنا نشاط و صحة و حيوية.. شافونا و العمر قدامنا و الحياة فاتحة لنا دراعتها.. في حين انهم الدنيا خلاص مديالهم ضهرها و مش قادرين حتى يسقوا نفسهم كباية مية :(

معلش يا جماعة الموضوع كده بأه نكد اوي.. بس خلونا نبص لنفسنا و نسأل نفسنا نقدر نعمل ايه و احنا بصحتنا و شبابنا و حيويتنا و الجياة قدامنا.. اكيد نقدر نعمل كتير و كتير اوي كمان.. طيب.. فاصل و نرجع تاني نكمل كلام؟ :)

[OlaOsman]

عدنا :)

النهاردة فعلا يا جماعة حمدت الله كثيرا على نعمه.. و مش هاتصدقوا حمدت ربنا على ايه كمان
حمدت ربنا اني في مصر :)
آه و الله.. حمدت ربنا اني في مصر و قادرة أدي من وقتي و مجهودي لناس محتاجة.. يمكن لو كنت في بلد تانية سواء عربي او غربي كان زماني محرومة من نعمة ان ربنا يستخدمني لمساعدة الناس.. الناس في مصر محتاجانا اوي يا جماعة.. و الحكاية مش حكاية فلوس بس.. فيه حاجات كتير بتبقى المساعدة المادية فيها لا تساوي قدر المساعدة المعنوية زي اليوم بتاع النهاردة ده.. الناس دي مش عايزة فلوس.. دول عايزين يحسوا انهم لسه عايشين و انهم ليهم لازمة.. همه النهاردة حسوا بكده.. حسوا انهم همه كمان مصدر سعادة لينا زي ما كنا مصدر سعادة ليهم بالظبط و الحمد لله :)

حاجة بس أختم بيها.. يا ريت كل اللي يتضايق اوي من البلد و أوضاعها و اللي حاصل فيها و الناس و الحال اللي بأوا فيها انهم يشوفوا نفسهم يقدروا يساعدوا الناس بإيه و يبدأوا يدوروا ازاي ممكن يساعدوهم.. مافيش حد فينا مافيش في ايده حاجة يساعد بيها حد.. كلنا كلنا كلنا بنعرف نعمل حاجة.. عنده مهارة في حاجة معينة.. لحد ربة البيت اللي آخرها بتعرف تقرا و تكتب ممكن تعلم مرات البواب او بنته او ابنه القراءة و الكتابة.. و لو كل واحد بدأ بإصلاح نفسه و محاولة إفادة الناس اللي هو بيشتكي منهم و من سلوكياتهم دول حالنا ان شاء الله هايتصلح كتير.. ده غير ان اللي بيحاول يفيد غيره ده ربنا بييسر له أمور حياته و يفتح عليه من رزقه من حيث لا يحتسب.. يعني هو كمان هايستفيد مش هايفيد و بس

بس كده.. و لو جت على بالي خاطرة تانية هارجع تاني يعني و لا يهمني اني صدعتكوا و لا آآآآآآآآآآآآآي حاجة من دي

[SEATLOVER]

و الله يا عُلا قطعتى قلبنا ..بس هى دى الحقيقة
الناس دى للآسف مش محتاجين فلوس ...دول محتاجين مشاركة ووقت وُصحبة


كل واحد جاب عربية جديدة ..بدل ما يجربها و يتفسح بيها اول يومين لوحدة ... يعدى ياخد واحد او اتنين ..ذى والدة أو والدتة ...بيبقوا نفسهم يشموا هوا ويتفرجوا على الشوارع .... نص ساعة و يرجعهم تانى ..بس كدة

مؤثرة جداً جداً جداً ....... عن تجربة .

[OlaOsman]

معلش نسيت حاجة.. ده رد لية في موضوع دموع التلج.. باختصار الرد بيقول ان لسه فيه امل.. بينا ان شاء الله :)

يا جماعة كده الدنيا اسودت اوي اكتر ماهي.. بس لسه فيه امل.. انا لسه راجعة من زيارة لدار مسنين.. ده اكتر يوم مجتاجين فيه يشوفوا وشوش جديدة و يغيروا جو.. خدناهم و وديناهم يتغدوا ع النيل في نادي نقابة المهندسين.. الحمد لله قدرنا نسري عنهم و لو يوم.. شفت النهاردة شباب و بنات نازلين من بيوتهم بس عشان يسعدوا الناس دي.. كل واحد فيهم ليه مشاغله و متاعبه.. انما عند اللزوم همه تحت امر اي عمل خير.. و الله انا شفت شاب من الشباب دول النهاردة حاول ينزل راجل مسن منهم السلم.. و لما لقى الراجل ده مش قادر ينزل قام شايله على إيده زي الطفل و نزل بيه السلم.. الله عليك يا محمود.. يسلم دراعك و يا رب يبارك لك في صحتك :)

فيه امل يا جماعة طول ما احنا موجودين.. امال احنا بنعمل ايه في الدنيا دي؟

[OlaOsman]

و الله يا عُلا قطعتى قلبنا ..بس هى دى الحقيقة
الناس دى للآسف مش محتاجين فلوس ...دول محتاجين مشاركة ووقت وُصحبة


كل واحد جاب عربية جديدة ..بدل ما يجربها و يتفسح بيها اول يومين لوحدة ... يعدى ياخد واحد او اتنين ..ذى والدة أو والدتة ...بيبقوا نفسهم يشموا هوا ويتفرجوا على الشوارع .... نص ساعة و يرجعهم تانى ..بس كدة

مؤثرة جداً جداً جداً ....... عن تجربة .

تسلم أفكارك يا باش مهندس :)

اهو كده الكلام.. أبسط أفكار ممكن تطلع في ثواني.. كلنا لما تضيق بينا الدنيا اوي ليه ما نفكرش في حد نقدر نساعده؟ و الله بتفرق اوي و بيبدل الله بعد العسر يسرا.

[OlaOsman]

طبعا انا مش باقول ان الدنيا في العمل التطوعلي وردي خالص و الموضوع سهل و بيس اوف كيك.. انما مافيش حاجة في الدنيا دي من غير تعب.. من أول الصحيان لصلاة الفجر ممرورا بالسعي على لقمة العيش لحد ركنة العربية :D
فما بالكوا بأه بعمل ثوابه عظبم زي انك تعلم حد حاجة.. تساهم في الرقي بالناس.. و لو شايف نفسك أحسن من الناس دي في الأخلاق او التعليم او المستوى الاجتماعي.. فليه ما تمدش ايدك ليهم؟.. على أد إيدك ما تطول.. مش باقول لك ارفعهم لمستواك.. بس على الأقل ما تبقاش قعدت في السما و سبتهم في الوحل و بعدين نرجع نشتكي منهم.

[SEATLOVER]

متقلقيش ..عشان اظاهر هو يوم مش قوى فى فتح المواضيع الجديدة هه :D
انا بردو عامل موضوع ماحدش رد عليا من 55 إلا 3
ابو يوسف وLORINSER وteeka

الحقيقة مش عارف اشكرهم ازاى ... بفكر انزل اسلم عليهم واحد واحد ههههه :D

[ابو سيف]

ههههههههههههههههههههههههه انا قاعد مستنيك يا سيات باشا يا ريت بسرعه الله يكرمك و بعدين ابو سيف مش ابو يوسف كمان واحد من التلاته تنسى اسمه :@:@

المهم الموضوع فعلا جميل جدا و تعرفي ان في ناس كتيـــر جدا اكلمها في القرف اللى شايفينه هنا في البلد و الاقيهم يقولك لأ انا مسيبش مصر مش عايز اسافر
و كانت احد اهم النقط اللى متمسكين بيها جدا هي انهم هنا بيقدروا يمارسوا نشاطات اجتماعيه و دينيه تخدم الناس اللى محتاجاهم هنا بدون قلق
مش عارف بصراحه في اول كام مرة نقاش مكنتش مقتنع خالص بالكلام من كتر الزهق و مرحله القرف اللى البلد وصلتني ليها لكن جايز بدأت على الاقل احترم وجه النظر دي
للأسف مليش نشاطات من هذا النوع و ان كنت انوي بشدة و متحمش جدا لمثل هذه الاعمال و لكن جايز لضيق الوقت او لقله التشجيع من المجتمع اللى الحكومه وصلت الناس كلها فيها ان محدش حتى عارف يكفي تفكيرة لنفسه و اسرته لما هيوجهها للمجتمع و الناس من حوله

على اي حال الف شكر على الموضوع الجميل

[SEATLOVER]

ههههههههههههههههههههههههه انا قاعد مستنيك يا سيات باشا يا ريت بسرعه الله يكرمك و بعدين ابو سيف مش ابو يوسف كمان واحد من التلاته تنسى اسمه :@:@

انا اسف و الله يا ابو سيف باشا ... والله انا عارف بس طلعت منى يوسف ...اصلى بحب اسم يوسف قوى ..(عشان القصة كلها و حب والدة لية ) علية السلام

ربنا يخليلك سيف باشا ..ويطلع ذى والدة كدة ..ان شاء الله ..
يا سيدى انا لو اعرف العنوان كنت جيت على طول هههه :D

هو لسة بردو ماحدش دخل على الموضوع دة لية ...حاجة غريبة ههه:D:D:D

[OlaOsman]

متقلقيش ..عشان اظاهر هو يوم مش قوى فى فتح المواضيع الجديدة هه :D

معذورين يا سيات.. الموضوع أصله ما يشجعش على الرد اوي.. المهم بس ان الرسالة المقصود منها الموضوع تكون وصلت

[دموع الثلج]

يا بختك يا علا والله نفسى اروح مشوار كده بس مش بعرف والله ايه الخطوات اللى بيعملوها

وانا متاكده انى لو رحت دار لرعايه المسنين مستحيل يسمحوا لى انى اخرج اتمشى مع اى ام من الدار يا ستى كل شى بشروط وانا نفسيا مش بستحمل كده بحس انه قمع وقرف ف مش بروح لانى هتخنق جدا لو شفت ناس محتاجه مساعده واهتمام لكن بشروط


فى مره رحت دار للايتام كان نفسى اوى اجيب بنت او ولد صغير يعيشوا معانا فى البيت ووويكبروا مع اخواتى

لو اقولك الشروط بئه اللى طلبوا منى توافرها عشان يسمحلوا لى بكده

حاجات تشششششل بصراحه خرجت من عندهم متعقده ومليش نفس اعمل اى حاجه

[Karim_Monir]

جزاك الله كل خير يا علا
انا كنت مظبط حاللي اننا نخرج مسنين الوفاء والامل بس التظبيتة باظت معلش هانعوضهالهم قريب
دموع لو عايزة تروحي لمسنين ومسنات ممكن تروحي الوفاء والامل ولو مش عارفة الطريق او محتاجة تظبيط هناك انا على علاقة ممتازة بادارة الدار وقوليلهم بس من طرف كريم منير
ولو عايزة تقضي اليوم مع اي مسنة هناك او تاخديها تخرجيها
او مع الاطفال المعاقين في مدرسة الرعاية الفكرية اعرف ادخلك واخليكي تقعدي اليوم كلة لو حبة
لكن الاطفال بتوع الرعاية الفكرية ماقدرش اخرجهم نهائي لانهم معاقين ذهنيا ومشكلة
اما المسنات لو اتصاحبتي على اي واحدة وعايزة تخرجيها كمان اعرف اخرجهالك يوم بعربيتك وممكن اخرج معاها عامل او عاملة تحركهالك صح او تشيلهالك وكدة يعني
لما تنوي بلغيني واديلك تليفون مدام عالية مشرفة الجمعية

[دموع الثلج]

ربنا يخليك يااااااارب يا كريم ويجزايك كل خير عن مساعداتك دى

ان شاء الله انا هرتب وضعى انه ااروح لهم فعلا باذن الله

انا عملت موضوع يمكن اللى يجب يشارك فى عمل كده نشترك وننفذه يارب

[Abonora]

فى بدايه زواجى كنت دايما بروح انا وزوجى لدور المسنين
وافتكر اول مره روحت فيها لدار المسنين قولت لزوجى (اخيرا الواحد حس انه بيعمل حاجه لها قيمه فى حياته)
لكن دلوقتى للاسف مش بقدر اروح علشان الاولاد:(