طلب نصيحه

[Dr_Mido]

السلام عليكم دلوقتى انا محتاج رائيكم فى موضوع مصيرى بالنسبه ليا


انا حاليا 24 سنه وداخل على ال 25 سنه و بدرس فى صيدله احدى الجامعات الخاصه باجبار من الوالد و الوالدة حاولت كذا مرة انى احول بس رفض تام


المهم انا الفترة اللى فاتت من 3 سنين كدة فاتح شركه للاجهزة و المستلزمات الطبيه انا وواحد صاحبى والحمد لله ماشيه كويسه وليها سمعه طيبه وبرضه بتعامل دكاترة من معظم التخصصات وبحضر عمليات يعنى مش هفتح سايبر زى ماهم متخلين ان دة مصيرى بعد الكليه


انا خدت قرار نظرا لانى حاليا مخلص حوالى 100 ساعه من اصل 200 ساعه يعنى فى النص وصلت للنص ة فى حوالى 6 سنين وشويه و دة لانى مبحبش الكليه اساسا ومعنديش استعداد اكمل الكليه فى نفس الفترة


المهم علشان مطولش عليكو انا بفكر احول Misr University for Science & Technology

لانى بحب البرمجه تحديدا ادارة قواعد البيانات و التعامل معاها


ناس كتيرة بتخوفنى من الخطوة دى وبتقلى مجالات العمل مش كتير وكدة


حد عندة فكرة عن الكليات بتاعه Misr University for Science & Technology


فى عندنا ادارتين

• Information System
• Computer Science

بس مش عارف انهى الاصلح انا مبحبش الهارد وير خالص واساسا ناوى اخد كورسات اوركال فى اثناء الدراسه


فى حد ليه نصيحه بخصوص الخطوة دى او راى لانى محتاج ناس محايدةة ومش هلاقى احسن من الناس اللى هنا ورائيهم اكون شاكر ليهم جدا

[أحمد كمال]

Computer Science احسن بكتير طبعا من Information Systems

و توكل على الله .... المجال كويس جدا و مازال فيه ابواب مفتوحة كتير

[elmkaneeki]

لأ رأيي الشخصي إنك حرام تضيع اللي فات من عمرك
مشي لموضوع بالتوازي
صيدلة وجنبها أي كورسات إنت بتحبها
7 أو 8 سنين حرام يضيعوا كده

[زينة الله]

أنا رأى تكمل صيدلة الأول ثم تتابع فى نظم المعلومات

و طالما أنت عندك شغلك و الدنيا تمام لن يكون هناك فرق كبير

سنتين و يعدوا أعتبرهم دبلومة ......... و ما تزعلش أهلك

[Dr_Mido]

Computer Science احسن بكتير طبعا من Information Systems

و توكل على الله .... المجال كويس جدا و مازال فيه ابواب مفتوحة كتير

شكرا ليك ياباشا

[Dr_Mido]

لأ رأيي الشخصي إنك حرام تضيع اللي فات من عمرك
مشي لموضوع بالتوازي
صيدلة وجنبها أي كورسات إنت بتحبها
7 أو 8 سنين حرام يضيعوا كده

النظريه انى هخلص فى 5 زيهم مبحبش الكليه وبنجح بالعافيه و التقدير بتاعى ضعيف بسجل عدد ساعات صغير بالتالى هموت قبل مالكليه تخلص على العكس انى ممكن اخلص اللى بحبه اسرع

[Dr_Mido]

أنا رأى تكمل صيدلة الأول ثم تتابع فى نظم المعلومات

و طالما أنت عندك شغلك و الدنيا تمام لن يكون هناك فرق كبير

سنتين و يعدوا أعتبرهم دبلومة ......... و ما تزعلش أهلك

نفسى بس انا اقنعتهم بالموضوع ده


اولا مبحبش الكليه ولو حصلت معجزة واتخرجت منها هتخرج فاشل ومش متميز فى اى حاجه ويبقى ضعيت فلوس ووقت

[mahfouz1983]

بص يا باشا مدام انتا عاوز تحول كمبيوتر ساينس حول ومدام انتا بتحب الحاحجة دي هتنجح فيها جدآآآآآآآ هحكيلك حكايه صديق ليا كان في نفس حيرتك دي ( كان ليا صديق في كليه التجاره المهم هو داخل غصب عنه المهم دخل سنه اولي وعدي تانيه سقت علي ماده هنا بقي مربط الفرس كان حصل خلاف مبينه ةمبين واحد قريبه دكتور وكان في الكنترول بتاع الكليه المهم عاد السنه دي علي ماده وبعدين دخل تالته عينك متشوف الا النور مكنش بينجح نهائي عشان خاطر قريبه دا تسالني ازاي اخر سنه له وهيتفصل وكيل الكليه كان بيديلو ماده ادالو الامتحان قالو دي الاسئله الي هتيجي في الامتحان زكرها وهتلاقيه المهم زاكرها وحفظها صم ودخل الامتحان لقاها وحلها كما انزلت جه في اخر السنه لقي نفسه شايل السنه ومن ضمن المواد الماده الي كان حال وعارف امتحنها قبل ميدخل عرف ان مفيش فايده وكان وصل لمرحله من الاحبااااط المهم شاف انه يحول من الكليه بعد كااام سنه 7 سنين متواصلين في كليه التجارة المهم حول كليه الحقوق وكان بينجح بتقاديرات في الكليه وكر الاربع سنين بتقديرات والحمد لله بقي عال العال وزي الفل فانتا مدام بتحب شئ ومقبل عليه انسي الي يقلك انتا ضيعت سنين وكدا متخفش انتا مستفاد والله لانك في العلم دا هتقدر تبتكر لكن مدام مش بتحب الصيدله اخرج منها ومتخفش

[A7MED_PHARMA]

متأخر أوي صدقني
أنا حولت من طب القصر للعيني ..لصيدلة
بعد لما وصلت 3 طب
بس مكنتش إتأخرت أوي.
وماتتخيلش الحالة النفسية لما تلاقي نفسك أكبر من دفعتك بــ 4-5 سنين
تلاقي نفسك راجل داخل على التلاتينات ..ومعاك كتاكيت صغيرين..ويخلصوا ويبقوا معيدين عليك كمان
ههههههههههههههه
كمل في صيدلة...وإدرس إلي إنت بتحبه جمب الكلية
وصدقني..مجال الصيدلة..ممكن ماتشتغلش فيه أساسا وتبيع إسمك لحد تاني
وده هيضمن ليك على الاقل دخل ثابت..في الايام السودا الي احنا عايشينها دي