الصنايعيه والترامادول

[masrtamin]

قبل ما الترامادول ينتشر كان الصنايعى يعمل الشغلانه وياخد اجره ويبوس ايده شعر ودقن
انما من ساعه الزفت ده ما انتشر وكل صنايعى اروح له يحك فى شريط ولا حبايه و اول ما اجيبه له يسفه وتلاقى الدمويه ردت فى وشه وابقى حبيبه وصاحبه وكفاءه
طيب لو مجبتش الاقى الوش الخشب
تخيل فى صنايعيه بياخدوه وما ياخدش فلوس
طيب انا مش كل مره هعرف اجيبه حاجه تقرف


اللى عنده حل يقوله


وبالمناسبه الناس اللى بتعمل صيانه فى التوكيل برده بيمشوا امورهم بالترامادول هههههههه

[bakkarahmed]

للاسف بقت حاجه تكسف اوي.....اضف الي كلامك تخيل انك رايح لصنايعي وهو عارف انك دكتور وممكن تجيبه في الوقت او بالكميه اللي انت عايزها وانت ماترضاش علشان ده حرام هايعمل معاك ايه

[mohamed2002]

يا راجل حرام عليك تدي له الزفت دة خلص شغلك وخلاص

[kamalsalem]

طب على الاقل ده بياخده وبيشتغل... أمال الشباب اللي بتاخده روشنة كده دي ايه؟

يا ريت حد دكتور يقولنا الترامادول ده المادة الفعالة اللي فيه ايه وبيعمل ايه في الانسان... عشان انا مرة دخلت المستشفى (عندي صداع نصفي مزمن) والدكتور قاللي لو تعرف تجيب ترامادول خده... وخدت مرة حباية كنت مصدع جامد.. ومعملش معايا حاجة ولا كأني سفيت سكر

[khaled_sabry]

معلشى سؤال برئ
ايه الترامادول ده اصلا و ايه فوايده و عيوبه ... و لو كان ليه تأثير مخدر كان المفروض يتصرف بروشته
... اصلكم بتتكلمو عليه كأنه باكو شاى و كل الناس عارفينه

[Ahmed Mubarak]

متابع لانى باسمع عنة كتير وهل هو من الادوية الممنوعة اللى بتتصرف بروشتة فقط - جدول

[ecybrarian]

أنا سمعت من صديق صيدلي إن الترامادول دا اصبح اساسي عند الشعب المصري بمختلف فئاته وأعماره ومستواه العلمي والعملي..يعني مش صنايعية فقط

[hondaman]

معلشى سؤال برئ
ايه الترامادول ده اصلا و ايه فوايده و عيوبه ... و لو كان ليه تأثير مخدر كان المفروض يتصرف بروشته
... اصلكم بتتكلمو عليه كأنه باكو شاى و كل الناس عارفينه

انا هقولك...... بس اقولك الاسامى كلهم
ترامادول.. تراما جاك... تاادول...تااموول ... تراميدين..كونترمال... الاترادول... ومش فاكر الباقى اية دلوقتى
بس الاسم الحركى الحالى ليهم كلهم الباور .... منتشر قوى الباور بين الصنايعية او السواقين تاكسى او نقل او ميكروباص الطلبة ثانوى او جامعات الموظفين خاص او عام ممكن تلاقى موظف بنك باخدو عادى بردو او فى المطار مدرسين رجال كبار بعض السيدات بعض البنات
من الاسم الحركى باين الوظيفة البعض يعتقد انة بيدى للجسم طاقة اضافية لبذل الشغل المطلوب بدون الاحساس بتعب او عناء او ارهاق.... الاساس فى الادوية دية على حسب علمى انهم مسكنات الاام بعد العمليات الجراحية ومسكنات لوجع الضهر بعيد عنك
بستخدم بردو للنشاط الجنسى وانة مش بيساعد على النشاط الجنسى انما بعمل عملية تأخير بس مع الوقت الموضوع يقلب ب أدمان للاسف ويكون المتعاطى عايز اقوى من كدة يعنى انهاردة جرب ال 50 ملى يمشى علية اسبوغ او اتنين ياخد الجرعة الاعلى واعلى جرعة لحد الان فى القرص الواحد 225 ملى بعد كدة ممكن ياخد قرصين فى تلاتة لحد ما يضرب الشريط كلة ومش هيأثر معاة فى حاجة بردو يقوم متجة وبعيد عنك وعنى وعن كل الناس للبودرة بس دة مش فى كل الحلات بردو يعنى تلاقى فى ناس فاهمة ومش مقاضيها كدة على طول يوميا اعتقد كدة وصلت ....
انما حكاية الصنايعية
انا عندى السمكرى سألنى على انى اعمل معاة واجب حشيش واتضح بعد كدة ان بقت الحكاية بتاعت الكميا دى عادى بردو بنهم وزى متقولو انهم لازم يصبحو بعض بالكميا دلوقتى فا متشغلش بالك عشان العقل زينة فى البترينة

[bakkarahmed]

tramadol is considered as pain killer
هو مسكن قوي للالم وبيتاخد في حالات السرطان لاقدر الله ومشاكل ديسكات العمود الفقري وغيرها من الامراض المصاحبه لها الآم شديده وهو له تاثير مسكن شديد انما الناس بتاخده علشان بيعمل (sensation of self peace( يعني بيحسن المود بتاع الواحد ومابيخليهوش يحس باجوع او الالم او الزهق وبيبقي عقله صاحي وعنده قدره كبيره علي الكلام والاندماج وكمان فيه ناس بتستخدمه لبعض المشاكل الجنسيه............
نيجي بقي للاعراض الجانبيه...كل عقار في الدنيا لازم يبقي ليه اعراض جانبيه يعني تاني يوم صداع شديد وتغير عنيف في المزاج مع تغيرات في حركه الجهاز الهضمي يعني اللي بيعمله في اول يوم بيعمل عكسه تاني يوم بعد زوال مفعوله
وطبعا الناس بتزود الجرعه تدريجيا طمعا في الوصول لمرحله تفاعليه مع العقار بدون ما يحس بالتدريج وبالتالي بيدخل في مرحله الادمان وتاثيرات مضاعفه علي الكبد والكلي واضطرابات دائمه في الجهاز الهضمي ومع التعود علي المود الظريف اللي بيصاحب العقار يكون الاستغناء عنه امر مستحيل وكمان لانه مش قادر يعالج الاعراض الجانبيه المصاحبه ليه ومع مرور الوقت يؤدي الي ظهور مشاكل نفسيه مزمنه ويحتاج الي مصحه نفسيه للعلاج من الادمان واعراض الانسحاب........علشان كده في احلك الظرف ما تحاولش تخلص مصلحتك بالدوا ده علشان انت بتدي سم لواحد جاهل وانت عارف بقي مصير الجاهل ده ايه وربنا هايحاسبك علي كده
د.احمد

[MASERATI]

السلام عليكم و رحمة الله و بركاته

فعلا الترادادول ده بأه آآآآآآآآآآآآآآآآفه العصر اليومين دول, زى زمان لما كنا لسه فاتحين الصيدلية بتاعت والدتى جديد سنة 1992 و كان اللى رايح و جاى بيسأل على التوسيفان و النوفاسى ريتارد و الكوميتال و الكودايين و يقعد يحلفلى ميت يمين أنه واخده عشان الكحه عند جدته المسنة اللى مابتنامش بالليل من الكحه و لا عشان عنده ابنه اللى عنده الصرع .

من يومين تلاتة جالنا الصيدلية واحد ظريف و عامل نفسه طبيب و معاه روشته فيها Bilichol و Spasmodigestin و أمبول Nalufen , عادى ممكن يكون الدكتور كاتبه على أساس أنه لما ألم المرارة يشد أوى عليه أنه ياخده , بس الغريب, أن لما قريت اسم الدكتور لقيته, أحمد عبد العظيم ماجد , أستاد الأمراض الباطنية و جراحة!!!!!!المناظير بكلية طب المنصورة , مع أن أنا و أنا طالب فى طب المنصورة , عمرى ماسمعت عن دكتور بالاسم ده خالص و كمان كان دايما قسمى الباطنة و الجراحة فى مستشفى المنصورة الجامعى زى أميركا و روسيا بالظبط, لا يوجد بينهم خلط من أى نوع على الاطلاق. ده بأه كان مدمن محترم و فاهم و بيشتغل على أساس علمى.

أنا اللى بيسألنى على الترامادول, بيبقى واحد معرفة , مش ناس غرب , بقوله , أنا مابجيبهوش عشان بيخلى مفتشين الصحة رجليهم تاخد كتير عالصيدلية , لكن بقوله , أنا أعرف ناس شغالة فى المستورد اللى هو 200مجم و ده سعر الشريط 76,85 جنيه, لو عايزه , قوللى و أنا أديك رقم تليفونه تكلمه يجيبهولك لحد عندك, يقوم مبرقلى و متنح و ماشى, لأنه عايزه ببلاش مش بفلوس و عايز المصرى أبو 9 جنيه مش المستورد الغالى , فأنا ببأى متأكد أنه مش هيهون عليه يدفع المبلغ ده فى شريط الترامادول لأنه بيبقى جاى و رابط دماغه على ال9 جنيه.

اللى أنا أعرفه أن اللى بياخده بياخده عشان يقوم بعمل الفياجرا و يأخر الوقت شويه.

بس حاجة غريبة , زمان فى سنة 1999-2000لما كانت الفياجرا الأميركى لسه نازله مصر و كانت بتدخل متهربة و القرص ال100مجم لسه ب40 جنيه , كنت ألاقى الراجل من دول ماشى فى الشارع لابس هدوم مبهدلة , بس داخل عليا الصيدلية عشان ياخد القرص اللى ب40 جنيه لأن أيامها كانت الفياجرا عزيزة و بتيجى متهربة و يمكن ال40 جنيه دول هما اللى فى جيبه, و لما بقت مترخصة و فى النور بدأت الرجالة تدور على الحاجة العزيزة اللى بتتباع فى السكرته زى الحاجات اللى زى الفياجرا بس أرخص و لما الحكومة رخصت الحاجات زى و بأه منها مصرى و فعال, زى الفايركتا و الكيماجرا و الحاجات التانية و بأت فى متناول الناس كلها و مش غالية خالص , الناس زهدتها و راحت تدور على الترامادول عشان ممنوع و بيتهرب , أنا متأكد أن الترادمادول ده لو اترخص عادى و بأه موجود فى الصيدليات و مش ممنوع , الناس برضه هتسيبه و تدور على حاجة تانية , هى مسألة نفسية فى المصريين, أن الحاجة اللى بتيجى بصعوبة و عزيزة , بتبقى هى الحاجة النظيفة و الفعالة و المحترمة .

أما بالنسبة لفئة الصنايعية , فدول فئة , الفقر ليهم دوا , أنا فاكر أن فى عيد الفطر اللى فات 1430 هجرية, كان العيد بيخلص يوم أحد تقريبا, الصنايعية فضلوا قافلين الورش بتاعتهم و مأجزين لحد يوم الجمعة اللى بعده ,ليه؟؟؟؟ , لأنهم فى الكام يوم اللى فى آخر رمضان اشتغلوا كويس و عملوا قرشين حلوين, فقعدوا فى بيوتهم لحد فلوسهم ماتخلص , يقوموا يرجعوا يفتحوا الورش تانى , ده مبدأ و النبى!!!!!!!!!!!! , و كدلك تلاقى عمال التوضيب اللى بيبقوا قاعدين فى الأماكن العامة عشان تيجى عربية نص نقل تلمهم , تلاقى الواحد فيهم , ادا اشتغل النهاردة و عمل يومية كويسة, يكسل يومين تلاتة بعد كده لحد مافلوسه تخلص , يقوم ينزل الشغل تانى و هلما جره, عشان كده , اللى بيمرض فيهم و يرقد بينكشف هو و أهله و بيشحتوا , فعلا , ناس استهلاكيين , بيجروا ورا شهواتهم آناء الليل و أطراف النهار .

شكرا و آسف للاطالة

[ahmedbasto]

شكرا على المعلومات

[A7MED_PHARMA]

ههههههههههههه
تاني..هوا كل يومين نفس الموضوع
هههههههههههههههههه
الترامادل..مادة لاتفنى ولا تستحدث من عدم

[moody1]

هما مش كانو مقضينها حشيش

ولا البرشام بقى ارخص

[AshTurbo]

طب والله فكرتك بتهزر في الأول ولما بدأت أقرأ ردود الأعضاء أتصدمت يعني أجيب صنايعي وأديله ترمادول حق الشغل اللي عملهولي ؟ طب وليه أصلاُ أدخل بيتي واحد بيبرشم ؟

[AshTurbo]

أنا سمعت من صديق صيدلي إن الترامادول دا اصبح اساسي عند الشعب المصري بمختلف فئاته وأعماره ومستواه العلمي والعملي..يعني مش صنايعية فقط

كارثة بكل المقاييس ... لا حول ولا قوة الا بالله .