مش شغال إلا فى تخصصى.....!!!!

[أشرف فتحى]

بناء على المناقشات اللى جرت فى الموضوع القديم حديث تخرج..!!!!!!!!!!!!!!

وكم التباين الفكرى الى ظهر وقد أيه فى شباب يفرح.. بيجرى على لقمه عيشه ومهتم بمستقبله وأمثله لناس بدأت صغيره وبقت دلوقتى حاجه كبيره ..ماشاء الله...

هفضفض معاكوا بحاجه تانيه....

دلوقتى أيه رأيكم يا شباب فى اللى ينشف دماغه ويقول انا مشتغلش غير فى تخصصى....!!

يعنى لو خريج أداب قسم تاريخ مثلا...هيشتغل أيه فى تخصصه؟

لو مهندس ميكانيكا باور أو إنتاج....ومش متوفرله دلوقتى شغل.....يشتغل حاجه تانيه ولا يقعد لما يلاقى شغل؟

بصراحه انا فعلا محتار...ساعه أقول يشتغل اى حاجه والشغل بيجيب شغل وياخد خبره حياتيه فى التعامل مع الاصناف المختلفه من البشر ..!!

وساعه أقول لو إشتغل أى حاجه هيخسر وقت كان ممكن يكتسب فيه خبره فى مجاله وهينشغل بمجال تانى....

لكن لما نحلل الموضوع هنلاقى اننا معندناش حاجه اسمها فى تخصصه...!!!

ليه؟

99% مننا داخل الكليه او المعهد بمجموعه فقط....

بمعنى...

دماغنا مترتبه طالما المجموع كبير يبقى أحط كليات القمه بالترتيب وأدخل اعلى كليه فى الكليات المتاحه بمقياس درجه القبول....

أنا عن نفسى كان مجموعى فى ثانويه عامه 87 %..وده فى وقتها كان مجموع هايل جدا...

طبعا عملت زى كل الناس ورصيت الرغبات بالكربون زى كل بيت مصرى..طب بكل فروعه وبعدين صيدله بكل فروعها وبعدين هندسه وهكذا...

والنتيجه كانت انى سبت الكليه العمليه من أول كام يوم ورحت حولت تجاره....لأنى دماغى مكانتش جايه مع الكليه العمليه وادوات التشريح والبالطو....

كذلك معظمنا...

بيدخل الكليه اللى مجموعه يسمح انه يخشها...بدون بقى الالتفات لما قد يكون من حب للمجال او كره ليه....!!

يعنى ابقى صيدلى او دكتور حبا فى الوجاهه الاجتماعيه وإستخسار للمجموع العالى....!!

فكده محدش يقولى مجالى وتخصصى...!!

لأنك كيفت نفسك على المجال ده...فلو ربنا كرمك بشغل فى تخصصك يبقى زى الفل ولو مش متوفر ...أشتغل حاجه تانيه لغايه ما الاقى تخصصى....!!

والاهم انك تتميز فى المجال اللى تشتغل فيه...!!

يعنى فى حوار مع صديقى احمد كمال قاللى ان ال store manager فى فرع من فروع فودافون طبيب أسنان..يعنى مؤهله يشتغل طبيب أسنان لكن تميز فى المبيعات لغايه ما بقت وظيفته المؤقته شغله الأساسى ودخله منها بقى اضعاف دخله من مهنه الطبيب...

ليه؟؟

عشان اتميز فيها .....ومقالش انا دكتور هقف فى محل ابيع موبايلات وخطوط!!

ولا قال هيدونى كام يعنى انا لو سافرت الخليج هقبض قدهم 5 أضعاف....!!


ولا قال منظرى قدام أصحابى وزمايلى شكله أيه..!!

أرجع وأسأل السؤال المهم تشتغل بتخصصك ولا اى شغلانه دخلها كويس ومحترمه؟

[محمد محمد]

ب
أرجع وأسأل السؤال المهم تشتغل بتخصصك ولا اى شغلانه دخلها كويس ومحترمه؟

مش شرط اشتغل بتخصصي بالذات لو ملاقتش نفسي فيه ومافيش قبول ..اي شغلانة الاقي نفسي فيها بطلع فيها مهاراتي وتكون مهارة مناسبة لطبيعة العمل اكيد هبقي في قمة السعادة في الشغل ده ويمكن معرفش اشتغل شغلانة غيرها وبالتالي هتبقي الخبرة نتيجة للكلام ده....اذن يبقي التخصص اللى مينفعش اشتغل غير فيه هو التخصص اللى اشتغلت فيه وفيه درجة عشق ما بيني وبينه مش التخصص اللى موجود في شهادتي.

ومن تفرغ لشيء اجاد فيه

[Ahmed_lol2007]

عن نفسى أشتغل شغلانه دخلها كويس ومحترمه لغاية لما الاقى تخصصى
لان قدر ملاقيتش تخصصى يبقى هفضل قاعد فى البيت لغاية أما ربنا يسهل بعد سنة ولا اتنين
ساعتها اقول كنت زمانى بقيت حاجة لو كنت قبلت الوظيفة دى ومش مهم المجال
وعلى فكرة لو حسيت إن الشغل الى مش فى تخصصى أحسن من تخصصى هفضل فيه مهما يكون
بس بشرط أنى أحاول اطور نفسى أولا ب أول عشان اعرف اعمل لنفسى كارير
وبعدين فى مصر معظم الناس مش شغالين بشهادتهم

[mr_vampire]

هقول كلمة واحدة او مقولة واحدة مقتبسة من مقولة ( حب ماتعمل حتي تعمل ماتحب ) عشان تلائم الوضع الحالي والظروف الصعبة والمقولة بعد التعديل ( حب ماتجد من العمل المحترم حتي تجد ماتحب ).

[shooter123]

يبقي مش ناوي تشتغل

يا عمونا انا بشتغل في بدون مؤهلي اللي اهلي صرفوا عليا لحد ما اتخرجت ودلوقتي بشتغل شغلانة لا تمت بصلة الي مؤهلي
والحمد لله دخلها كويس

سيبك انت من الكلام اللي ميأكلش عيش واشتغل

[SS]

أرجع وأسأل السؤال المهم تشتغل بتخصصك ولا اى شغلانه دخلها كويس ومحترمه؟

اعتقد أن الاجابة عند ناس كتير ...هتبقى الاختيار التانى

لأن فى ظل ظروف معيشية ما بتوفرش الحد الادنى لحياة آدمية بسهولة ...أصبح الدافع الاساسى للعمل

هو تحقيق ظروف معيشية مناسبة....و التى لو كانت متوفرة كان ممكن ساعتها يكون فى اسباب تانية لاختيار نوع العمل

زى ان انت تكون بتشتغل حاجة ممتعة بالنسبة لك او عندك شغف بيها....او رغبتك من انك يكون لك دور معين فى حياة الناس ...و عملك فى وظيفة تحقق ده من خلالها

او.....او.....و غيرها من الاسباب اللى تخليك توصل فى شغلك لدرجة الابداع...مش الاتقان بس

و متحولش الشغل بالنسبة لك لمجرد مصدر دخل فقط...."و يبقى على قد فلوسهم"

و بما ان الضروريات بقيت تتوفر بصعوبة ...ده اذا توفرت اساساً...فكده اصبح ما سبق ذكره يندرج تحت بند الرفاهية

و كلام ما بيأكلش عيش (الا فى ما ندر) ....و ما فيش مانع تعتبره سك عفش!!!

هتقولى لخص و عايز ايه من الرغى الكتير ده ؟؟

هأقولك انه ببساطة فى الظل الظروف اللى احنا فيها ...الكل او المعظم بيدور ع المهنة اللى توفره حياة كريمة

و لما تتوفر ما فيش مانع ندور على وظيفة تخليها اكتر كرماً

حتى اللى بيبان فى اختياره لمجال معين انه مبنى على رغبة منه ....لو دققت فى اسباب رغبته سواء كان

مهندس او دكتور او ظابط او ...هتلاقى الدافع و ان ماكنش ظاهر هو التمتع بمميزات اى مهنة منهم و نظرة التقدير ليها

و ده مش عيب و لا غلط...بس الغلط انه يضحك ع نفسه و يصدق انه واخدها رسالة فى الحياة

لأن احياناً بعد ما تخيب توقعاته و ميحققش نجاح فيها....بيفضل متمسك بيها حتى لو توفرت فرص اخرى يحقق بيها اللى هو عاوزه

بالنسبة لموضوع التخصصات و ع ذكر ميكانيكا باور....و انتاج ...طيب ايه رأيك فى بتوع طيران؟؟

احتمال انه يشتغل فى مجاله كم %....و اعتقد فى قسم فلك فى كليه علوم...ده ايه موقفه؟؟

طبعاً غنى عن الذكر ان فى مجالات كتير التخصصات نفسها تشعبت ....و السوق بقى يخلق و يفرض تخصصات جديدة

و بالتالى التمسك المستميت بتخصص معين بدون توفر اسباب النجاح فيه...يعتبر خطأ

اسف على الاطالة و الكلام الملخبط...و تحياتى ليك ع الموضوع يا باشا

[M.Osman]

اشتغل شغلانة شايف نفسي فيها

انا كنت على وشك بل اشتغلت بالفعل business english instructor في شركة كبيرة ..
بس للأسف بعد فترة .. ملقتش نفسي في الشغلانة خالص
حسيت اني بضيع وقت

[A7MED_PHARMA]

أنا درست كيميا وذرات كربون .. لما دماغي ورمت ..وكنت بنام أحلم بأول فوكسيد الفوتاسيوم
هههههههههههههههه
وأديني واقف ببيع في محل إسمه صيدلية
............
وقريب أوي هجمع تمن أول عربية مستعملة .. وهتاجر فيهم
أي حاجة نزود بيها الدخل في الايام السودا دي

[احمد ابراهيم]

السلام عليكم
هقولكم على تجربتى و اعتقد ان ده حال كتير من الشباب
انا متخرج من كليه ادارة تخصص بنوك و الدفعة بتاعتنا فى السنة 150 واحد ... طبعا و احنا فى الكلية الناس عمالة تنفخ فينا و تفرشلنا الارض ورد و الواحد قال بس انا هتخرج اشتغل مدير بنك او على الاقل نائب مدير بنك (( بهزر طبعا )) .. بس الحقيقى ان فعلا كان فى حاجة فى ذهن كل الدفعة زى مسلمات كده ان اول ما هنتخرج البنوك هتجرى تخطفنا عشان نشتغل فيها

المهم اتخرجنا و محدش لا جرى و لا مشى و لا حتى بصلنا
طب اروح انا بقى اقدمفى البنوك عشان اشتغل و بصراحة كان تفكيرى فى الموضوع لسه مفيهوش النضوج لانى كنت لسه بفكر بعقلية واحد لسه خارج من الجامعة و طبعا مع النفخة الكدابة اللى شرحتها فى الاول
و لا حد اتصل و لا الدموع ... طب و بعدين
فضلت ادور ...ادور ... ادور
لغاية ما اشتغلت sales لكروت فيزا فى احد البنوك معجبتنيش الشغلانة و قولت لا مش انا و مش لاقى نفسى و حاجات كده
قعدت فىالبيت و قلت استفيد من الوقت و اخد كورسات و قد كان ... اخدت كورسات انجليزى و كمان كنت بدأت انى ادرس صينى (( اه و الله صينى )) فضا بقى
و اخدت كورسات فى التحليل الفنى للبورصات (( الحمد لله دخلت دماغى اوى الحكاية دى و نجحت بتقديرات عالية الحمد لله و بقيت عمال اخد كورسات اكتر تخصصا فى الموضوع ده و شهادات و كلام جميل اووى ))
ادور بقى لى شغل فى شركات الاوراق المالية... مفيش طبعا و ده العادى فى بلدنا ( ام الدنيا ) .. __ الدنيا من الدناوة __
و كل الفترة دى قاعد فى البيت
اوحش حاجة فى الفترة دى انى عندى الاحساس انى المفروض انى على الاقل اصرف على نفسى مش لسه باخد مصروف .. طبعا غير الجانب النفسى انى عايز احس ان ليا لزمة فى المجتمع (( انا بشتغل اذن بنتج اذن انا ذو قيمة )) .. غير ان معظم صحابى اشتغلو و شغل محترم
جالى احباط من كل العوامل دى كلها لما تكالبت عليا و كنت قاعد فى البيت حوالى 8 شهور دا بعد ما كنت شغلانة الفيزا الفقرية دى (( ممكن تكون مناسبة لناس تانية )) .. دى ارزاق
المهم فى واحد بتاع عطور فى الشارع بتاعنا و قعد يقولى تعالى اشتغل معايا محاسب فى المكتب و المصنع و قعد يقولى كذا مرة و انا اقول لا لا و اتهرب منه
لغاية ما طفح بى الكيل و مش قادر اقعد اكتر من كده و قولت لو قالى تانى هنزل اشتغل معاه .. و قد كان
فعلا نزل اشتغلت معاه و كان عنده شغل متاخر من 6 شهور فى الحسابات و حاجات ملخبطة و دفاتر رايحة و اوراق جاية .. لميت كل الشغل و عملته فى excel cheet و معادلات و الراجل مكانش مصدق اللى بيحصل الكلام ده خلص فى اول شهر و كان مرتبى 450 جنية ( الحمد لله ) بس قولت اهو ابقى بعمل حاجة
تانى شهر شغل الحسابات كان اتظبط فى الشهر الاولانى قالى تعالى بقى اشتغل مع العمال امسح اقزايز بتاعة البرفانات و املى كحول .... قولت و الله لو هضرب نفسى بالنار ما هعمل كده ((( مش تكبر و لكن مش اخر ان الواحد قعد يدرس و يتفحت سنين و ابحاث و كورسات و نيلة منيلة بطين انى فى الاخر اقعد امسح قزايز برفانات زيى زى عيل بيمسح منخيره فى كمه .. و بردو مش بقلل من شان حد ))
سيبته و دورت على شغل تانى ... و اشتغلت مندوب لبنك بردو فى قسم قروض السيارات و كانت شغلانة مش وحشة و لكن مع وجود بعض العيوب بس الحمد لله على كل حال
كل ده و انا مكمل فى الكورسات بتاعة التحيل الفنى زى ما انا
المهم واحد صاحبى قالى انت مش كنت مقدم عندنا فى البنك قولتله اه ... طب و ايه اللى حصل قولتله محدش اتصل .. قالى ابعت السى فى تانى و شوف ... و قد كان
بعد فترة لقيت الناس بتتصل بيا و من هنا لهنا ... الحمد لله انا شغال دلوقتى فى احد البنوك المحترمة و فى شغلانة محترمة

بجد من تجربتى مع انها بسيطة و لكن اتعلمت منها حاجات كتير

1 - ان لواحد يجتهد على قد ما يقدر فى حياته عموما و ميخليش الكبرياء يعميه بس فى نفس الوقت ميتساهلش اووى لدرجة انه يبقى عديم الكرامة
2 - ان الشغل مهما كان بسيط او اقل من امكانياتك فى كل الاحوال احسن من القعده فى البيت لانه بيحسسك ان ليك قيمة (( مش عشان الفلوس .. لانى كان معايا فلوس و بخرج و بصرف و مبرطع فى الدنيا زى الحمار الحصاوى ... لكن المقصود القيمة المعنوية ))
3 ان الواحد مييأسش و يحاول بدل المرة الواحدة الفمرة و مليون مرة كمان
4 - ان بلدنا دى بلد الكوسة و دى مش جديدة عليكو و ده انا شفته ( لان معايا واحدة فى الشغل بتشتغل فى بنك و هى كانت حقوق او اداب و متعرفش اى حاجة عن التجارة و لا الارقام ) .... حسبى الله و نعم الوكيل .. لان اللى المفروض يشتغلو و اكفأ منها قاعدين على القهاوى و مش لاقيين شغل
5 - اللى عيز يشتغل بسهولة يعمل حاجة من اتنين أ ) يكون معاه واسطة يضمن بيها انه يشتغل فى مكان محترم
ب ) يطلع من اوائل الدفعة بتاعته

فى النهاية لنا الله جميعا .. و الحمد لله .. مش هقول لو كان معايا واسطة كانت قصرت عليا المدة اللى اتبهدلت فيها .. لكن انا شايف انى لما دخلت بتوفيق ربنا و بدون واسطة احسن فى نظرى من ناحية الكرامة مش اكتر لانى بصراحة شديدة ضد الواسطة و المحسوبية و الكلام الفاضى ده ... و حسبى الله فى اللى بيستغل منصبه او وضعه فى اهدار حقوق الناس اللى تستاهل

اسف انى طولت عليكم .. بس بجد الموضوع شدنى انى اتكلم فيه .. مع انى مش بحب احكى كتير عن الحكاية دى و خصوصا الجزء بتاع البرفانات ده

لكم جميعا التحية
و بحييك يا ا/ اشرف على الموضوع الجميل ده

[moudy88]

استاذ اشرف ..فيه ناس بتتدخل كليات القمه زي ماحضرتك بتقول علشان الوجاهه الاجتماعيه واستخصار المجموع

بس برضه فيه نسبه كبيره ..بتدخل الكليات دي علشان تحقق احلامها وطموحها وعلشان الكليات دي متفصله عليهم ..فيه ناس بيبان عليهم من وهما صغيرين هما هيبقو ايه ..الضابط بيبان انه ضابط من وهو صغير والدكتور والمهندس والمحاسب والمحامي وغيرهم... .بيبقى مرسوم عليهم من وهو صغيرين .. (انا بتكلم على فئه معينه )
والفئه دي حرام تدفن نفسها في شغل غير تخصصها

انا مش بقول انهم يقعدو في البيت ويستنو الفرج !!!
لا طبعا
لو الظروف اضطرتهم للعمل في غير تخصصهم ..يشتغلو ..ولكن يكون الشغل بصفه مؤقته لحين تيسر الحال ولما ربنا يأذن بانه يشتغل في تخصصه ويبتدي يحقق احلامه ..واللي بيدور وبيتعب اكيييييييييد ومليون في الميه بمشيئة الله هيحقق حلمه

[magyver]

والله هو دة الموضوع اللي شاغلني اليومين دوول
وعملي قلباان في البيييت
انا لسة متخرج السنادي من اكاديمية كنت بدرس فيها محااسبة
يعني معايا دلوقتي بكالريوس محاااسبة
وانا طبعا معرفش اي حااجة في البطيييخ
انا معدي كدة بظروفهاااااا
فجينا بقي في حوار الشغل انا والدي والجماعة ف البيت
احنا اساسا تجاار كاوتش وانا شغال مع واالدي بس انا عايز حااجة الاقي نفسي فيها وهيا (تجارة العربيااات)
انا الحمد الله غاوي الكلام دة من زمااان ومعارفي كتير دايسين في الحوار دة من زماااان والحمد الله مكسبها حلو
الحاج بقي بيقلي خد كورسااات والحاجات دة وشفلك شغلانة في اي حتة
وانا مش بتاع كورساات ومذاكرة والكلام دة دة اولا
ثاانيا والله الشغل كتيير
قدااامي شغلانة في المينا بتاعت اسكندرية ومرتبها 2000 جنية في الاسبوعين وبتنزل اسبوع اجااازة والاكل كلة عليهم والنوم عليهم وفي فندق كمااااااااان
بس هاتعمل اية بقي في الشغل هاتشيل حاجات يبعتك مشااوير
شغلانة من الاخر متلقش بواحد معاة بكالريووس تجااارة
فربنا يكرمنا انشاء الله ... وكل وحد يحقق كل اللي هو عايزة

[waelfarid]

magyver اقولك جرب الشغلانة ام 2000جنيه دي وصدقني انت الكسبان معرفة من تحت لفوق والدنيا ماشية ازاي يعني حتشوف الدنيا من زاوية تانية لحد ماتلاقي الزاوية اللي تكون فيها اكثر استقرارا وتحقق نفسك فيها
البني ادم كل يوم يعدي عليه متعلمش فيه حاجة جديدة يبقي راح عليه اليوم ده
وحتزود معارفك بالطبع واكتساب خبرات والدك بينصحك بالافضل وانت استثمر المتاح

[M.Mostafa80]

زى مااتكلمت فى الموضوع التانى يأشرف
انا معايا بكالوريوس تجاره جامعه القاهره
دخلت الكليه دى بمزاجى وبمحض ارادتى مش حسب التنسيق
كنت مخطط انى هخلص هشتغل مع والدى فى البنك اللى هو بيشتغل فيه
لكن دائما تأتى الرياح بما لا تشتهى السفن
بمجرد ماأتخرجت صدر قرار من مجلس اداره البنك بمنع تعيين الأقارب من الدرجه الأولى والثانيه لحد الخامسه عشر ههههههههههه فقرى
المهم قعدت فى البيت الفتره بتاعت التجهيز للتجنيد وما بين انى ادخل الجيش او اخد تأجيل
أخدت تأجيل وبدأت رحله البحث عن عمل عشان ماأمدش ايدى اول الشهر لبابا واقولو هات
مكنش فى توفيق زهقت وأكتأبت نفسيا لما ملقتش شغل فى مجالى اللى انا حابب ابقى فى حاجه من زمان
اول شغل قابلنى اشتغلتو واللى ممكن يشتغلو واحد حاصل على محو اميه مش بكالوريوس (موظف امن فى اأحد المصانع) والدى قالى يابنى الشغلانه دى مش من مقامنا ولا من مستوانا الأجتماعى قلتلو كلو بيبدأ صغير وهو أحسن من القاعده فى البيت على الأقل أجيب مصاريفى
المهم صاحب المكتب اللى كنت شغال معاه موظف امن قابلنى مره بالصدفه وانا بقبض اخر الشهر (كان اول شهر اقبضه)
لقيته بيقولى انت شغال ايه معانا قلتله موظف امن قالى بس انت شكلك مؤهل عالى قلتلو الشغل مش عيب عرف انى معايا بكالوريوس تجاره
قالى انا عايز حد بيفهم يمسكلى المكتب دا ويكون امين وانا متوسم فيك دا
قلتلو تحت امرك مسكتلو المتب شهرين وبعدين ظهر قدامى مطعم مجهز بعدده بكل احتياجاته قلت اخده ايجار واجرب حظى لكن فشلت فيه بسبب ان كل دخله كانه واكلينه الصنايعيه (لازم تبقى بتفهم المهنه كويس وتشتغل بأيديك كمان مطعم فول وطعميه )
قفلت المحل وبدأت ادور على شغل تانى
ملقتش قدامى غير مدرس محو أميه للعاملين بجامعه عين شمس مقولتشس لأ اشتغلت مع كم الضغط من انك تتعامل مع اشخاص ذو اعمار كبيره ولكن بعقل اطفال صغيره
وانا شغال فيها اتعمل اعلان فى الجرائد عن مكان طالب مندوبى مبيعات
رحت قدمت عملت انتر فيو وكانت شركه لتجاره الأدوات الصحيه والسيراميك المحلى والمستورد وكانت من تانى اكبر شركتين فى المجال ده (من الأخر بياع سيراميك وخلاطات ومستلزمات سباكه بس بشياكه شويه لابس يونيفورم والناس بتقولك يا بشمهندس )
الحمد لله نجحت فى الشغلانه دى وعملت فلوس حلوه
وكونت علاقات مع ناسي زو مستويات عاليه ورجال اعمال
وفى يوم من الأيام الكئيبه حزنى على انى مشتغلتش فى المجال اللى كان نفسى اشتغل فيه ظهرلى احد رجال الأعمال اللى كان من ضمن لسته العملاء بتوعى عرف بشكل او باخر انى تعبان فى شغلى وانى خريج تجاره طلب منى أنى اروح اشتغل معاه فى التسويق العقارى لأحد قراه السياحيه بشرم الشيخ قولت يافرج الله رحت واشتغلت فى الموضوع ده 6 شهور لكن بسبب اداره الشركه التسويق اتحول لشريك معاه وتولى هو التسويق فأصبحت بلا عمل مره أخرى ولكن لم يتركنى الرجل
عينى معاه محاسب فى احدى شركاته الأخرى العامله فى مجال تعبئه وتغليف البن (بن رانيا برازيليا )ومنها بدأت اتعلم الحسابات واخيرا اشتغلت فى مجالى وشويه واتغيرت أداره الشركه دى ومعجبنيش اسلوب التعامل فى الأداره الجديده فأكرم الله وجه الرجل تم نقلى للشركه التى كنت اعمل بها فى مجال التسويق ولكن فى اداره الحسابات واخدت منها خبره لمده خمس سنوات ومنها انتقلت مع احد الشركاء زو الحجم الكبير
بوظيفه مدير حسابات لشركه من ضمن مجموعه شركات أل علام والحازق للمقاولات اللى شغال فى المقاولات هيعرف ثقل الأسمين دول
والحمد الله على النعمه اللى انا فيها
خلاصه الرغى اللى رغيته ايه
انى مصممتش اشتغل فى مجالى واشتغلت حاجات بعيده كل البعد عن مجالى ومن الشغل دا خدت خبرات حياتيه وكونت علاقات ومن خلال العلاقات دى وصلت لمجالى وكبرت فيه والحمد لله

[yahyanaabil]

لو شغلانه مش تخصصى بس الاقى نفسى قيها مفيش مشاكل بس صعب اكون مهندس و أروح أشتغل فى أى حاجه
انا مثلا مهندس كهرباء دفعه 2008 قعدت سنه ونص شغال فى شركه اسما بس انا مهندس انما خبره مفيش حاليا كل مقابله بتدخلها بفشل فيها فشل ذريع موضوع اى شغل والسلام بالنسبالى فاشل وسيبت الشغل اللى انا فيه عشان حسيت انى بنفخ فى قفص ده غير انهم اصلا معندهمش شغل فيه خبرخ بربع جنيه ملخص الكلام كالأتى
اشتغل اى شغل تاخد فيه خبره بأى مرتب تحت أى ظروف انما شغل مفهوش خبره ولا فلوس ولا مستقبل يبقى تقعد فى البيت احسن

[viper911s]

واللة المسئلة بالنسبالى راحة نفسية وماديا يكون كويس
يعنى انا اتخرجت من جامعة خاصة بس للااسف مش تمام ومؤهلها مش حلو فا كان لازم اشتغل اول ما اخلص بأى شكل (المؤهل مراقب جودة ) جامعة عمالية
خلصت فترة انظار الجيش وتأجيل بس مقعدتش فى فترة الانتظار اشتغلت حاجات عجيبة
فى سايبر الصبح وفى السوق باليل يعنى على فرش فى الشارع بتتعامل مع بلطجية واشكال كويسة واشكال مش ولا بد بعدها واحد صاحبى عارفنى مجنون عربيات وكنت بقولة انى عاوز اى شغل تانى قالى انو ممكن يدخلنى توكيل بس الشغلة مش حلوة قلت ماشى وكان دخلت وبقيت مساعد فنى كهربائى وقعدت فيها 9 شهور يشاء القدر ان واحد من امناء المخازن يمشوا ويحتاجو واحد متعلم يكون مساعد لاامين المخزن
ودة يكون انا ودخلت وبعد كام شهر بقيت امين مخزن لتوكيلات تانية (الشركة الى انا فيها معاها 8 توكيلات ) وفى الكام شهر دول لقيت نفسى
امين مخزن لثلاث توكيلات وبقيت نسبيا فرد مهم فى الشركة مع ذالك عاوز امشى علشان الراتب مش شايفة مناسب بس
تقدر تقول انى ارتبط بالشغلة دى بسبب انى بقالى فيها 4 سنين وربنا يوفق الجميع وانا منهم والاقى شغل افضل