هل العرب و المصريين من ضمنهم مش مقتنعين بنفسهم ؟؟ و ليه ؟؟

[احمد ابراهيم]

سبحان الله

امبارح قاعد فى شغلى و بطبيعة الحال بتعامل مع عملاء و ممكن يكون فيهم مصريين او عرب او اجانب من اى دولة ... كل ده عادى

الغريب لما يدخل عليك واحد عربى ( اسمه الثلاثى عربى تماما ) و من دولة عربية شقيقة بس معاه جنسية امريكية و باسبورت امريكى .. عامل نفسه امريكى و مبيتكلمش غير انجليزى بس

لحظه السئ انه قابل واحد من بلده و قعدو يتكلمو عربى ( و الله م بهزر وده حصل فعلا صدفة غريبة جدا )
المهم رجعلى تانى و قاعد بيتكلم انجليزى بردو و انا عمال اكلمه مع انى عارف انه بيتكلم عربى كويس جدا

فى الاخر كنت هقوله انى عارف انه بيتكلم عربى و انجليزى و انا بتكلم زياده عليهم لغة كمان و لغة رابعة مكسر كده
بس قولت لا و كنت عايز اقوله ان فى مثل المانى ( ناس بتحترم لغتها و بتعتز بيها ) بيقول duetsh un duetshland يعنى اتكلم المانى فى المانيا

طب ليه منتكلمش بلغتنا يا جدعان دا احنا فى بلدنا و لا هل ده نوع من الفذلكة او ان الواحد بيرسم نفسه
و لا كان فاكر انه لما يبقى اجنبى هياخد حاجة زيادة مثلا

المشكلة انك تلاقى ناس بتتكلم و فى نص الكلام يقوم خاطف كلمة انجليزى .. قال يعنى ملهاش معنى فى العربى ..
لغة القرأن و الدين اللى المفروض نتشرف بيها بقى الناس بيهربو منها و مش عايزين يتكلموها اعتقادا منهم ان اللى بيتكلم انجليزى ده كده الفريكيكو اللى مجابتهوش ولادة

هو ان الواحد يتكلم بلغة تانية حاجة كويسة بس مع حد مبيعرفش يتكلم بلغتك فعلا مش زى الاهبل عمال على بطال ( الشوز مقاس كام -- اللون البينك ده تحفة __ ولا يا سلام على اللون البربل -- بس احلاهم الجراى )

لغتنا يا جماعة لازم نحترمها و نعتز بيها و نقدرها و نحييها لان دى لغتنا

و اذا كنا مش مقتنعين ولا بنحترم لغتنا يعنى مش مقتنعين بنفسنا و لا بنحترم نفسنا .. يبقى منقولش عايزين الدول التانية تقتنع بينا و تحترمنا

هل فى حد مبيحترمش الالمان .. او الايطاليين ؟؟؟ اعتقد دول اكتر دولتين بيتمسكو بلغتهم و مش بيكلموا حد انجليزى غير فعلا لو مش عارف هما بيقولو ايه

يا ريت كل الناس تتكلم اللغة الجميلة .... اللى هى اصلا اصعب لغة للى عايز يتفذلك

[ahmed1981]

اللغة العربية أعظم لغة

المستعمر الفرنسي حاول محو اللغة العربية من الجزائر وتونس وإستطاع بنسبة معينة
ولكن الإنجليز لم يستطيعوا إضعاف اللغة العربية في مصر بأي حال
لدرجة أن الخواجات الأجانب أيام الإحتلال تعلموا اللغة العربية وكانوا بيتكلموا عربي مكسر عشان يقدروا يعيشوا في مصر

الإحتلال العسكري زال
وبدأ الإحتلال الفكري

ربنا يستر على لغتنا
ويفظها لنا

[BomBom]

عقدة الخواجة !

[احمد ابراهيم]

عقدة الخواجة !

دى عقدة منيلة للاسف

[moody1]

i realy agree with you

هههههههههههه

فعلا حاجة غريبة

يعنى انا عن نفسى خريج مدرسة لغات

انما عمرى ماتكلم بالانجلش مع حد مصرى

عشان هى مش فزلكة وخلاص

[Car's Sniper]

و لا كان فاكر انه لما يبقى اجنبى هياخد حاجة زيادة مثلا

للاسف..ايوة
احنا البلد الوحيدة اللى بتقدر الاجنبى عن ابن البلد

[abo_anas]

ممكن تقول عليها فشخره كدابه بس الراجل ده معاه جنسيه امريكاوى امال تقول ايه للى اخره ميت الحوفيين ومقضيها كلمتين عربى على حرفين انجليزى.

بصراحه اللغه العربيه متبهدله معانا

[M.Osman]

simply, because the west dominate almost everything, even the oil that's being extracted from the Arabian Gulf soil

:)

[mahmoud_afifi]

انا متفق معاك في موضوع لغتنا العربيه والاعتزاز بيها بس برضه اوقات لازم ننشط الانجليزيه بتاعتنا من وقت للتاني عشان ماننسهاش.
انا الاول كان معظم المصطلحات بتاعتي بالانجليزي مع صحابي بعدين لقيت ان الموضوع مش نافع فبقيت اتكلم كله بالعربي .
و اوقات لما ابقى في سيتي ستارز الاقي العيال الفرافير بتوع مامي وبابي مابيتكلموش ولا كلمه عربي زي مايكون عيب !!!!

الي اقصده.. ماينفعش نعمم قاعده على كل المواقف.

[A7MED_PHARMA]

all english all the time
بعتبرها هيافة إلي بيتكلم عربي على إنجليزي
بتبقا فزلكة عبيطة جداااااااااا..وبعتبر صاحبها عبيط

[fadod]

متهيألي هو معه باسبور أميركي بس مش عايش في أمريكا ، الواحد لو سمع حد في الغربه بيتكلم عربي بيبقي عايز يروح يبوسه ويحضنه .د أنا بنتي لو دخلت البيت واتكلمت كلمه إنجليزي بعلقها في النجفه ..علشان متفقين إن اللغه الأساسية في البيت عربي برة بقي ،ذي ماهي عايزه..الناس ده بتبقي عايزه تحط ضغط على إلي شغال قدمها وفذلكه من غير أي داع

[ahmed_afifi]

السلام عليكم ورحمة الله وبركاته

طبعا اللغة العربية هى لغتنا التى نعتز بها و المفروض ان مفيش حد يتعمد يتجاهلها ولكن اريد توضيح نقطة هامة وهى ان فى فعلا ناس بيكون الموضوع دا تلقائى عندها لو هو عايش بالخارج وكل تعاملاته بلغة اخرى او طبيعة شغله كده مثلا

لكن انا اللى بيغظنى شخصيا انك تقابل واحد خارج مصر وانت متاكد من شكله انه عربى فتقوم تسأله (طبعا بالانجليزى فى الاول) انت منين فتفاجأ انه يقلك امريكا او فرنسا او غيره ولما تقرره تعرف انه عربى اصيل.

د أنا بنتي لو دخلت البيت واتكلمت كلمه إنجليزي بعلقها في النجفه

والله نجرب الموضوع دا كده يمكن يجيب نتيجة . انا ولادى بيعدو يتكلموا يابانى و انا شخصيا مببقاش فهمهم

يلا ربنا يهدى

[احمد ابراهيم]

للاسف..ايوة
احنا البلد الوحيدة اللى بتقدر الاجنبى عن ابن البلد

للاسف انا بعامل كل الناس زى بعض فمش منتظر ان حد يقولى انا كذا وكذا و ينفخ نفسه عشان اهتم بيه لانى بهتم بكل الناس و الحمد لله حتى لو واحد داخل حافى

simply, because the west dominate almost everything, even the oil that's being extracted from the arabian gulf soil

:)

للاسف دى كارثة و مصيبة (( و يا سيدى الفاضل بنقول العربى و اللغة و البتاع و انت بردو مصر على الانجليزى على اساس اننا مبنفهمش يعنى ) شكرا

انا متفق معاك في موضوع لغتنا العربيه والاعتزاز بيها بس برضه اوقات لازم ننشط الانجليزيه بتاعتنا من وقت للتاني عشان ماننسهاش.
انا الاول كان معظم المصطلحات بتاعتي بالانجليزي مع صحابي بعدين لقيت ان الموضوع مش نافع فبقيت اتكلم كله بالعربي .
و اوقات لما ابقى في سيتي ستارز الاقي العيال الفرافير بتوع مامي وبابي مابيتكلموش ولا كلمه عربي زي مايكون عيب !!!!

الي اقصده.. ماينفعش نعمم قاعده على كل المواقف.

يا باشا لازم نتعلم لغة و اتنين و اللى عنده المقدره يزود يكون افضل ... بالعكس ده بيدينا ميزة عليهم ان احنا بنتكلم لغتهم و هما ميعرفوش يتكلموا لغتنا (( حقيقة .. اللغة العربية هى اللغة اللى بيتكلمها اكبر عدد من سكان العالم ))

متهيألي هو معه باسبور أميركي بس مش عايش في أمريكا ، الواحد لو سمع حد في الغربه بيتكلم عربي بيبقي عايز يروح يبوسه ويحضنه .د أنا بنتي لو دخلت البيت واتكلمت كلمه إنجليزي بعلقها في النجفه ..علشان متفقين إن اللغه الأساسية في البيت عربي برة بقي ،ذي ماهي عايزه..الناس ده بتبقي عايزه تحط ضغط على إلي شغال قدمها وفذلكه من غير أي داع

و الله المفروض ان الاصول ان لما واحد مثلا عربى يشوف حد تانى عربى فى بلد اجنبية يعينوا بعض على الغربة مش يدبحوا بعض و يعملوا اجانب .. اما بالنسبة لحكاية الضغط دى فبفضل الله لو قعد يتكلم طول النهار هعرف ارد عليه بسهولة و يسر دا بفضل الله

السلام عليكم ورحمة الله وبركاته

طبعا اللغة العربية هى لغتنا التى نعتز بها و المفروض ان مفيش حد يتعمد يتجاهلها ولكن اريد توضيح نقطة هامة وهى ان فى فعلا ناس بيكون الموضوع دا تلقائى عندها لو هو عايش بالخارج وكل تعاملاته بلغة اخرى او طبيعة شغله كده مثلا

لكن انا اللى بيغظنى شخصيا انك تقابل واحد خارج مصر وانت متاكد من شكله انه عربى فتقوم تسأله (طبعا بالانجليزى فى الاول) انت منين فتفاجأ انه يقلك امريكا او فرنسا او غيره ولما تقرره تعرف انه عربى اصيل.


والله نجرب الموضوع دا كده يمكن يجيب نتيجة . انا ولادى بيعدو يتكلموا يابانى و انا شخصيا مببقاش فهمهم

يلا ربنا يهدى

المفروض نعتز بلغتنا فعلا .. لان ده اصلنا

[Ralliart]

حاجه مستفزه جداً وحتى الدكاتره في الكليه تلاقيهم منزلين الورق انجليزي وبيشرحو انجليزي ويمتحنوك بالعربي والاجابه بالعربي !!
كل ده عشان يعرفني انه بيعرف يتكلم انجليزي ،ويقولك الـbubble بتسموها ايه بالعربي اصل مش فاكرها!!

مع ان جالنا دكتور عايش في امريكا بقاله 20 سنه وورقه كله كان عربي ومنطقش ولا كلمه انجليزي طول السنه
هي عقده غبيه ولما حد بيتكلم معايا بالاسلوب ده بمسكه تريقه لحد ما يتكلم كله عربي

[calipha3]

مش فزلكه ولا حاجه دي هي ثمرات العولمه و الي يعرف يحكي انجليزي كويس يتكلم بس بلاش انجليزي فيومي هههههههههه