عزاء و اجب بعد حادث الاسكندريه

[yaserbasha2000]

يا جماعه كلنا طبعا متاثريين جدا بعد اللي حصل امبارح ليله راس السنه في الاسكندريه و طبعا فيه من المصابين و القتلي مسلمين مع المسيحيين لكن كلنا عارفين الرساله اللي مطلوب توصل من استهداف كنيسه (حتى لو اقدمها جامع ) في الوقت ده من اليوم و الوقت ده من السنه

وطبعا انا مش داخل اعزي الضحايا واهاليهم لان ده شئ مفروغ منه

لازم يكون لينا موقف علشان المسحيين في مصر يحسو ان المسلمين معاهم بجد و مش مجرد كلام و تعازي وخلاص وممكن يكون الحادث ده تجميع للمسلمين والمسحيين بجد و تكون ضاره نافعه و بدل ما تعمل فتنه و انقسام بين المسلمين و المسيحيين يكون الحادث ده عامل تجميع و ترابط

طبعا المسلمين ليهم ماخذ علي المسيحيين او اداره الملفات المسيحيه بمعني ادق
و كمان المسيحيين ليهم ماخذ علي المسلمين

لكن ده مش وقت الكلام ده و الحاجات دي اعراض لمرض اكبر بمجرد زواله ستنتهي هذه الاعراض تلقائيا

انا بأقترح ان اداره المنتدي تعمل بانر عزاء

وياريت كل حد عنده اقتراح يقوله

كده الموضوع دخل في مراحل خطيره و لازم كلنا نفكر احنا مش عايزين نكون زي العراق او السودان

[tamertamer]

هناك فراغ بداء بالاتساع مع الاسف الشديد
وهناك تهديدات بقيام تفجيرات يوم 7/1 كمان

انا عايز اعرف الامن عارف ان الدنيا ممكن تحصل فيها كدة ومع ذالك وقع الانفجار ماذا سيمنع الجماعات التى تستهدف العلاقة بين الاخوة المسلمون والاخوة المسيحيون من تكرار ما حدث وذيادة الرعب الذى ينتاب المصرين الان

[yaserbasha2000]

احنا كمان كشعب مسلمين ومسيحيين لازم نعرف ان اصلنا واحد واننا حاجه واحده
يعني انا مسلم ممكن جدي السابع و لا العاشر يكون كان مسيحي و فيه فروع ليا دلوقتي والمفروض قرايبي مسيحيين
وكمان المسيحيين لازم يفكروا كده ان المسلمين قرايب ليهم قرابه دم مش اخوة وطن و كلام الانشاء ده

[gebreel]

انا مش عارف اللي عمل كدة ده بيفكر ازاي!!! ده لو مسلم و عارف دينو صح كان قرأ القران و عرف ان قتل النفس بدون وجه حق حاجة محرمة

بسم الله الرحمن الرحيم
( مِنْ أَجْلِ ذَلِكَ كَتَبْنَا عَلَى بَنِي إِسْرائيلَ أَنَّهُ مَنْ قَتَلَ نَفْساً بِغَيْرِ نَفْسٍ أَوْ فَسَادٍ فِي الْأَرْضِ فَكَأَنَّمَا قَتَلَ النَّاسَ جَمِيعاً وَمَنْ أَحْيَاهَا فَكَأَنَّمَا أَحْيَا النَّاسَ جَمِيعاً وَلَقَدْ جَاءَتْهُمْ رُسُلُنَا بِالْبَيِّنَاتِ ثُمَّ إِنَّ كَثِيراً مِنْهُمْ بَعْدَ ذَلِكَ فِي الْأَرْضِ لَمُسْرِفُونَ) ).
صدق الله العظيم

و لو كان مسيحي بردو كان عرف نفس الرسالة و لو كان يهودي شرحوا لأن الديانات كلها بتجتمع على قواعد واحدة لأن مصدرها واحد

انا مسلم و بحترم كل ديانة حتى اليهودي منها لأني امرت بده و مش متخيل اني فيوم مثلا انزل اصلي الجمعة و وانا خارج من الجامع عربية تنفجر قدامه و يموت اهلي و اصحابي و جيراني واحنا اساسا معملناش حاجة

و كلنا كمسلمين ضد اللي حصل ده لكن هتلاقي ناس بقى بيبخوا السم في العسل و يقعدوا يشحنوا في اخوانا المسيحين علشان الدنيا تولع ليه لأن من مصلحتهم ده

و تلاقي المسلمين بردو فيهم نفس العينة اللي بتقعد تشحن و الدنيا تولع اكثر

[M.Mosaad]

اعتقد كل مسيحي عاقل و اي مسلم عاقل عارف اننا كلنا اخوة في وطن واحد عايشيين سوا و بناكل و بنشرب و بنحارب سوا و دايقيين المر كلنا سوا

ربنا يرحم اللي ماتوا و ينتقم من اللي كان السبب

[samo9992003]

ياريت الادراه تعمل شاره سودا لعزاء المصريين دول

[abogogo]

معروف مين اللى وراها الله يلعنهم الكلاب ولاد الكلاب .... طبعا الامن بتعنا نايم في العسل نوم واهتماماته الاولى حماية امن النظام والشعب يولع بجاز

[SonaSteel]

حسبي الله ونعم الوكيل ....... هو حصل ايه ؟؟
انا لسه صاحي وقريت الموضوعين اللي هنا دول
انفجار ايه ؟؟؟ وهو في اسكندرية ولا هنا ؟؟

[elrasy]

عزائى لكل الاخوة المسحيين والمصريين

[تامر.محمد]

عزائي لكل اهالي الضحايا
:(

[زينة الله]

البقاء لله

عزائى لكل أهالى الضحايا و لكل المصريين مسيحيين و مسلمين

ربنا يسترها و يحمى بلدنا من كل سوء

[motoxp]

عزائى لكل الاخوة المسحيين والمصريين

[mohamedfadel]

عزائى لكل الاخوة المسحيين والمصريين

[dr-mohamed]

خالص العزاء للاخوة المسيحيين في مصر
واؤيد الاقتراح بوضع لافتة سوداء على المنتدي حتي يوم 7 يناير

[Col. Eng. Khaled]

خالص العزاء لأسر الضحايا (مصابين / قتلى) مسلمين و نصارى من أبناء بلدي .