استفسار بخصوص عقد ايجار شقة

[megamoudy]

السلام عليكم اخواني اعضاء نايل موتورز الكرام

عاوز استشيركم ف حاجة ويا حبذا لو حد ايده ف الموضوع خاصة من المحامين

من خمس سنين بحثنا عن شقة ف الزقازيق محل اقامتنا وربنا وفقنا ان احنا لقينا شقة صاحبتها استاذة ف الجامعه

اتفقنا على الايجار يكون 500 جنيه لمدة سبع سنوات بحيث ان اول خمس سنين يكونو بمبلغ قدره 500 وبعد الخمس سنين يزيد الايجار وفقا للنسبة القانونية

وده نص العقد بالظبط :

بند 1 : ان مدة الايحار هي ( سبع سنوات ) تبددأ من 1-1- 2006 م وتنتهي في 31-12-2012 م ( على ان يزيد الايجار بعد الخمس سنوات طبقا للقانون ) ويجوز تجديدها لمدة مماثلة


بند 2 : اذا رغب احد المتعاقدين انهاء العلاقة الايجارية في نهاية المده المتعاقد عليها وجب عليه ان يعلن الطرف الاخر بخطاب مسجل مصحوب بعلم الوصول قبل انتها مده التعاقد ( بشهر ) والا يعتبر مجدد لمدة ( مماثلة ) فقط لحين التنبيه من احد الطرفين

الى اخر العقد

المهم دلوقتي الدكتورة صاحبة الشقة النهارده باعته وصل الايجار ب 800 جنيه واتصلنا بيها قولنا ان ده مش موجود ف العقد

تقول مليش دعوه الايجارات غليت

فنا عاوز ايه هي الزياده القانونية

وهل الجأ لمحامي عشان ادفع ايجاري واكمل المدة سبع سنين ولا ايه

[megamoudy]

ياريت لو حد عنده خبره يا جماعه يرد عليا اذا تكرمتم

[shaddadfalcon1]

يعني كده فات 5 سنين ودلوقتي من حقها تذود الأيجار حسب العقد ولا لسه ال 5 سنين مفاتوش ولا ايه؟

[faragebraheem]

لايجوز لها زيادة الايجار بهذا الشكل انت مدة تعاقدك 7سنوات اول 5سنوات الايجار 500جنية ثم تزيد حسب النسبة المررة قانونا ودى فى الغالب بتكون من 10 الى 15% يعنى الزيادة من 50 الى 75جنية مش 300 جنية الااذا تم تحديدنسبة الزيادة فى العقد انصحك بمراجعة العقد مرة اخرى ولو مش محطوط نسبة الزيادة بكام فى المية بالظبط خليها تضرب دماغها فى الحيط ولو خايف على الحيطة بتاعتك ابعتها القليوبية عندنا الحيطان كتير

[megamoudy]

مدة الخمس سنوات خلصانة خلاص وبدأنا ف السنتين الاخيرتين

انا الكلام ناقله من العقد بالنص

دلوقتي الدكتور بتقول انا مش هاخد الايجار خالص الا 800 جنيه وقالت يا كدا يا تسيبو الشقة

التصرف دلوقتي اعمل ايه

هل ادفع الايجار ف المحكمة ولا لا لأنها دلوقتي مش متنازله عن المبلغ 800 جنيه

ايه التصرف

[faragebraheem]

انا قلتلك اتخن حيطة وتضرب دماغها فيها كل اللى هتعملوا انك هتدفع الفلوس فى المحكمة وهتاخد بيها وصل وهيا حرة تستلمعا ماشى متستلمهاش بردوا ماشى انت بكدة اخليت مسؤليتك القانونية ومتقدرش تاخد معاك حق ولا باطل والعقد شريعة المتعاقدين اسأل النسبة القانونية قد اية وهى دى اللى ممكن تطلع من ذمتك اية الجشع ده 300جنية زيادة

[megamoudy]

مممممممممممم يبقى احسن امشي بالنسبة القانونية عشان اكون مأخليتش بالعقد

[dr.hazem]

عزيزي
النسبة القانونيه كحد اقصى 10% عن كل سنه

يعني احسب 500
يعني زياده عن كل سنه 50 جنيه
اذن بعد 5 سنوات تكون الزياده المقرره 250
وبالتالي الايجار 750 جنيه
مش 800
لكن هل تفتكر ان ال 50 جنيه دي هتخليك تعمل مشكلة قانونيه؟؟
عموما
ده اللي انا اعرفه واعرف كتير بيأجروا بالشكل ده لكن في الواقع قبل الزياده بيتم اخطار المستأجر عشان يكون على دراية

حبيت افيدك مش اكتر باللي اعرفه

تحياتي

[د.أحمد سمير]

أخي العزيز .. لا يوجد ما يسمى بالنسبة القانونية .. حيث لم ينص قانون الإيجارات رقم 4 لسنة 1996 على وجود نسبة قانونية للزيادة ..
لكن جرى العرف على أن نسبة الزيادة تكون 10 % كل فترة
وعليه فإن البند الموجود لديك غير محدد ، ولا يمكن الاحتجاج به
كما أنها في الطرف المقابل لا يوجد لديها مثل هذا التحديد

وبالتالي فإن أي نسبة زيادة ينبغي أن تكون بالتراضي من جديد ..
ولو الموضوع وصل للنيابة لا حجة لك عليها ولا حجة لها عليك
وستحاول النيابة التوفيق بينكما
وأقصى الأمور أن يتم حساب الزيادة بنسبة 10 % عن كل سنة مضت لتصل الزيادة إلى 250 جنيهاً فوق الإيجار الأصلي ..
ولو اتحول الموضوع للمحكمة .. سيتم انتداب خبير لتقدير مدى الزيادة الواجبة ..

باختصار : انت نقطة قوتك إن العقد مدته سبع سنوات وهي لا تستطيع فسخ العقد قبل هذه المدة .
وهي نقطة قوتها إن الزيادة غير محددة وبالتالي بتحاول تطلع بأفضل مكسب من هذا الأمر ..

رأيي الشخصي هو التراضي بينكما على قيمة وسطى بين ال500 وال800 التي تطلبها وليكن مثلاً 650 جنيهاً ، على أن يكتب في العقدين الأصليين أن قيمة الإيجار تعدلت إلى كذا بتاريخ كذا
وربنا يوفقك

[megamoudy]

وهي ازاي يا جماعه الزياده بتتحسب على سنوات فاتت بالفعل

هي مش المفروض تتحسب على السنتين الجايين يعني السنة دي 50 يعني 550 واللي بعدها 600

يبقى ازاي احسب زياده على سنين تم دفع ايجارها بالفعل

حد يفهمني جايز انا مش فاهم القانون صح

[megamoudy]

يا جماعه انا كاتب ف العقد ان احنا هنزود بعد الخمس سنين مش ف الخمس سنين

يعني بعد الخمس سنين هيزيد الايجار طبقا للقانون يعني هو القانون بيحسب على السنين اللي فاتت ؟؟

[A.Saad]

العقد سبع سنوات
الزيدة ستطبق بعد خمس سنوات من العقد
الزيادة طبقا للقانون

[megamoudy]

يعني المفروض بقى خمسين جنيه على كل سنة فوق الخمس سنين

يعني اللسنة دي 550 وبعدها 600 صح ولا انا غلطان