هل يمكن فعلا تقسيم مصر؟

[wael17]

أنا من زمان نفسي اسأل السؤال ده...هو ينفع نقسم مصر جزأ مسلم و جزأ مسيحي؟

طبعا علي خلفية الاحداث الاخيرة بدأت الحكاية دي تتسمع كتير
انا كنت بادخل كتير أقرأ في المنتدي الاجتماعي بس بصراحة بطلت و تقريبا كل المواضيع بتتجه في الاخر نفس الاتجاه و كلام كتير عن كلنا بنحب بعض و نعيش سوا و نموت سوا و بعدين يدخل واحد يهاجم من هنا و يرد الطرف الاخر بهجوم مضاد و بعدين يتحول الموضوع لجدال ديني من الطرفين و بصراحة زهقت من المتابعة لان الكلام شبهه بعضه و مكرر و في الاخر اللي جوه القلب هايفضل زي ما هو...ما علينا

انا دلوقتي عايز أفتح نقاش يا ريت مايتحولش لجدال ديني زي غيره من الموضوعات...انا عايز نتكلم بصراحة...هو لو فعلا مصر ينفع تتقسم زي ما ناس كتير عايزة...هاتتقسم ازاي؟؟؟ انا عايز كلام موضوعي عن كيفية التقسيم و الحدود و تقسيم الثروة....و بما ان اللي بيطالب بالتقسيم هم من الجانب المسيحي و ليس المسلم فانا اتوقع ان المسيحيين يشاركوا بايجابية في الحوار ده...طبعا مش عايز اللي يشارك معانا يفتكر ان بمشاركته بيؤيد فكرة التقسيم...احنا بس عايزين نعرف الافكار في الجانب الاخر شكلها ايه

يعني من ضمن الاسئلة الي مش عارف اجابة لها....لو افترضنا امكانية التقسيم..أكيد الدولة المسيحية هتكون في الصعيد

- ايه حدود الدولة دي؟ هل ستصل لحدود السودان ولا الاقصر و اسوان تبع الدولة المسلمة؟ أنا عمري ما رحت الصعيد باستثناء الاقصر و اسوان و ماحستش ان فيهم مسيحيين كتير و بالتالي عايز اعرف ايه الجزأمن الصعيد الي فيه نسبة عالية من المسيحيين و ينفع يكون مركز أو عاصمة الدولة المسيحية

- ايه نظام سيناء و القناة و البحر الأحمر؟

- هل ستكون الدولة المسيحية ذات حدود خارجية...يعني تاخد جزا من الصحراء الغربية لحد ليبيا أو السودان و لا هتكون دولة محصورة داخل الدولة المسلمة

- ما هو موقف المسيحيين في القاهرة و الاسكندرية و باقي الاجزاء التي ستكون تابعة للدولة المسلمة...خصوصا الاغنياء منهم...هيسيبوا حياتهم و تعليمهم و شركاتهم و كنائسهم و يروحوا يعيشوا في الصعيد؟

-طب ايه موقف المسلميين اللي هيكونوا داخل حدود الدولة المسيحية؟

-هل سيكون هناك ترحيل قسري من الجانبيين؟

-ما هي الموارد المتاحة للدولة المسيحية؟

- هل يوجد تفكير في اسم جديد لهذه الدولة أم ستكون مصر الشمالية و مصر الجنوبية؟
------------------------------------------------------------
قد تبدو الفكرة عبثية و لكن اصرار البعض علي المطالبة بها يستدعي ان تتم مناقشتها بجدية و الاجابة عن الاسئلة التي طرحتها...و اذا ثبت عبثية فكرة الدولتين و استحالة تنفيذها علي أرض الواقع فقد يكون من الافضل ايجاد صيغة تعايش مشترك بدلا من المطالبة بحل الدولتين
------------------------------------------------------------
منتظر ردودكم مع التأكيد ان المشاركة في الموضوع سواء مني او من غيري لا تعني تايييد فكرة التقسييم . الهدف من الموضوع مناقشة حالة افتراضية و البحث في جدواها من عدمه

شكرا

[al_qassam2003]

كلام فاضى مش هيقدروا يعملوا حاجة

[zyadahmed]

لو نظرنا للتاريخ القديم سنجد الرد واضح جلى ....
اولا مصر هى اقدم دولة متحدة واتحادها قائم الى الآن دونما انقطاع
فى كل العصور والحقب التاريخية والاحتلال الاجنبى ظلت مصر موحدة ( عدا فترة حكم الهكسوس الذين حكموا الدلتا ومصر الوسطى فقط )
فى عصر الغزو الفارسى والاشورى والمقدونى والرومانى كانت مصر ولاية واحدة ولم تجزأ الى ولايات فرعية لاستحالة ذلك

وفى العصر الاسلامى ايضا نرى مصر البلد العربى الوحيد الذى كان يمثل ولاية قائمة بذاتها عكس بلاد الشام التى قسمت الى ولاية دمشق ولاية حلب ولاية عكا وغيرها من الولايات المفتتة
و العراق الذى قسم تاريخيا الى ولاية البصرة وولاية الكوفة وولاية بغداد وولاية الموصل وغيرها او ليبيا التى كانت ولاية برقة وولاية طرابلس الغرب
والامثلة كثيرة

لكن يأتى السؤال لماذا لا يمكن تقسيم مصر ؟؟؟
فتاريخيا هى شعب واحد متجانس لا يتكون من اعراق مختلفة ولا قوميات متناحرة
وجغرافيا هى امتداد طولى لا ينقطع بمحاذاة النيل لا يوجد ما يقطع ذلك الامتداد للوادى الاخضر الذى يأوى معظم المصريين
وستبقى مصر اول بلد اتحد فى العالم موحدة الى اخر الزمان رغم كيد الكائدين وحقد الحاقدين من الصهاينة والامريكان

[Most_H]

السؤال دة ديما كان بيجى فى بالى

وتوصلت للنتجية السوداء دى

أولا لازم نبقى عرفين ان مينا ضم شمال مصر للجنوب، وعمل دوله، يعنى فى الأساس الجنوب كان دوله والشمال كان دوله

السينريو الأسود كتالى
النوبة فى الجنوب، ودولا هيكون دافعهم اهمال الدولة لهم ولمشكلتهم الأساسية (التهجير بسبب بناء السد) والمشكلة دى عمرها اكتر من خمسين سنة ولسة متحلتش + انهم ليهم ثقافة مختلفه ولغة عن بتوع الشمال

الجانب الغربيى عند مطروح والصحراء الغربي، أغلبهم بدو وتربطهم علاقات بالقبائل الليبية، ولهم عادتهم وتقاليدهم ولغاتهم، اللى مهما حولت متفهمهاش، ولو حد كان راح مرسى مطروح قبل كدة وأتعامل مع البدو هيفهم انا قصدى أية، وقد اية بيعتبروا انهم مش من سكان مصر

سيناء، والبدو اللى فيها، واظن اننا شيفين اللى بيجرى بين البدو والشرطة

هيتبقى الدلتا والصعيد ، ودة متشعب وداخل فى بعضة، ويأما هتقوم حرب أهلية، تنتهى أما بتداول السلطة او التقسيم صعيد ودلتا، مع التهجير

ولن تكون هذه نهاية القصيدة، فبعد ان تقصمت مصر إلى خمس اقسام، من الممكن تقوم حرب بين الأقاليم بهدف فرض السيطرة، والأستعانة بالخارج

من الأخر، عصر ملوك طوائف جديد، وأندلس أخرى



سينريو منيل بنيله، ويارب ما يجرى

[تامر.محمد]

أندلس أخرى صح

بس الواضح ان المخطط اشتغل و بعنف
انا شايف قدامي احداث جسام كتير اوي بدأت بتفجير

[wael17]

ولن تكون هذه نهاية القصيدة، فبعد ان تقصمت مصر إلى خمس اقسام، من الممكن تقوم حرب بين الأقاليم بهدف فرض السيطرة، والأستعانة بالخارج

من الأخر، عصر ملوك طوائف جديد، وأندلس أخرى



سينريو منيل بنيله، ويارب ما يجرى

مش ده السيناريو اللي بنتكلم عليه احنا بنتكلم علي تقسيم ديني
بالنسبة لمشاكل البدو و النوبة ما وصلتش انهم يطلبوا تكوين دولة مستقلة...لانهم لا يملكوا كوادر و مقومات بناء دولة. لا بدو سيناء و لا بدو الصحراء الغربية. بالاضافة لقلة عددهم و وجودهم في اماكن صحراوية فقيرة لا تسمح لهم بانشاء دولة حقيقية بالاضافة لغياب الدعم الخارجي لا اعتقد ان اسرائيل مثلا تحب يبقي في دولة علي حدودها مكونة من بدو تعتمد حياتهم علي التهريب و المخدرات ولا توجد كوادر بدوية في الخارج مثلا تدعم قضية البدو و تحفز الراي العام العالمي لمساندة قضيتهم
احنا عايزين نناقش بموضوعية فكرة اقامة دولة مسيحية مستقلة و هلي هي ممكنة أم لا

[TruthStrike]

كلها افكار سوداوية و سيناريوهات مستحيلة بسبب الاحداث الاخيرة و تزامنها مع تقسيم السودان.... و لكن للانفصال او التقسيم مقومات لا تنطبق نهائيا علي مصر بأي شكل من الاشكال..... و لو أني اتمني تقسيم مصر, 90% من المساحة للمصريين أجمعين, و 10% من المساحة (يفضل في الصحراء الغربية في منطقة الألغام) للمتطرفين من المسلمين و المسحيين يقضوا فيه وقت ظريف مع بعض...

[wael17]

.. و لكن للانفصال او التقسيم مقومات لا تنطبق نهائيا علي مصر بأي شكل من الاشكال..

انا مقتنع ان التقسيم ماينفعش...مش عشان بنحب بعض و نعيش سوا و نموت سوا و الكلام ده....علي ارض الواقع ماينفعش...انا بس عايز أعرف الناس اللي بتطالب بكده مقتنعه انه ينفع ولا كلام في الهوا....ولو شايفيين انه ينفع عايز أعرف ازاي

[medo2o1o]

كلها افكار سوداوية و سيناريوهات مستحيلة بسبب الاحداث الاخيرة و تزامنها مع تقسيم السودان.... و لكن للانفصال او التقسيم مقومات لا تنطبق نهائيا علي مصر بأي شكل من الاشكال..... و لو أني اتمني تقسيم مصر, 90% من المساحة للمصريين أجمعين, و 10% من المساحة (يفضل في الصحراء الغربية في منطقة الألغام) للمتطرفين من المسلمين و المسحيين يقضوا فيه وقت ظريف مع بعض...

[Bishoy.Girgis]

التقسيم = شرق اوسط جديد
و هو ده الي عايزاه امريكا و الغرب عشان متصرفش كتير زي ما صرفت في حروبها "العراق علي سبيل المثال"
و طبعا الفرصة ديه هتاخدها امريكا علي طبق من ذهب في اقرب وقت و ابتدأت من السودان
و اللعب كله في المستخبي و جاهزة لبناء قواعدها في اي وقت
الناس ديه بتبني لمئات السنين قدام مش عشيني النهارده و انام
ياريت نفوق بقي و نطلع من بينا الناس اللي بتساعد الغرب بدون ما تدري في انها تفرتك البلد الجميلة ديه
عشان شوية تهيئات بتتصورلها

[mahmoud_afifi]

استاذ وائل, حضرتك الموضوع ده بيبتدى بنقاش وغالبا بيقلب بخناق بين الاعضاء في الاخر.

بس لو عاوز رأيي.. حتى لو ينفع مصر تتقسم على حسب الثروات والكلام ده, مفيش حد هيرضى يسيب بيته وشغله ويروح مكان تاني.
احنا بنتكلم عن انقسام دوله وظهور دوله من العدم !
يبقى اكيد هيحتاجوا مساعدات من الخارج وكلنا عارفين مين هي. ايوه الله ينور عليكم امريكا طبعا الي نفسها في فرصه زي دي واهي جاتلها على طبق من دهب عشان تدخل مصر.
تقسيم السودان كان سهل لأن كيان جنوب السودان موجود اصلا انما ان احنا نقسم مصر !!!

يا جماعه ما احنا طول عمرنا عايشين كويس ومشاكل البدو في سينا عمرها ماظهرت قبل كده وكانوا اكتر ناس بتعتز بمصر انما هيعتزوا بمصريتهم دلوقتي على خيبة ايه !

[wael17]

استاذ وائل, حضرتك الموضوع ده بيبتدى بنقاش وغالبا بيقلب بخناق بين الاعضاء في الاخر.

أنا مش عايز خناق ولا حاجة و قلتها من الأول....انا مش بسأل الناس عايزين انقسام ولا لأ....أنا كل اللي عايز أعرفه هو اصلا ينفع انقسام ولا لأ...و لو ينفع المفروض يبقي شكله ايه؟ و لو في ناس عايزة تنفصل هل فكرت في المكاسب قصاد الخسائر ...مجرد الكلام في الموضوع ده ممكن يكون سخيف س انا عايز الناس تحط عواطفها علي جنب و نناقش فرضية جدلية و نقول تنفع ولا ماتنفعش....يعني انا مثلا عايز أعرف ايه المحافظات اللي في الصعيد اللي فيها كثافة عالية من المسيحين و هل يوجد قري في مصر مسيحية بالكامل؟....صدقوني الموضوع مش هدفه حد يزعل من حد...مجرد مناقشة لتوضيح حقائق و معلومات ممكن ناس كتير ما تعرفهاش...أنا واحد من الناس...مصري اب عن جد و عندي 31 سنة و معلوماتي عن الصعيد صفر!!!

بس لو عاوز رأيي.. حتى لو ينفع مصر تتقسم على حسب الثروات والكلام ده, مفيش حد هيرضى يسيب بيته وشغله ويروح مكان تاني.

أنا مقتنع بكده بس عايز أعرف الناس اللي بتطالب بكده مش واخدة بالها من الحكاية دي....هل مثلا اللي نفسهم في دولة منفصلة هم اللي موجودين في الصعيد و اللي عايشيين في الشمال معارضين لها؟ حقيقي نفسي في نقاش موضووعي مع حد بيفكر في حكاية الانفصال و من غير زعل او حساسية

[M.Yahia]

يستحيل يا باشا الموضوع دا يحصل المصريين مش مختلفين الاختلافات الجذرية اللى ممكن تؤدى للانفصال احنا عرب و نفس الشكل و اللغة منفرقش غير فى الدين و دى حاجة بيحاول يظهرها الناس اللى بتصطاد فى الميه العكرة انما موضوع الانفصال دا انساه تماما دا مصر كلها سايحة على بعضها كل الناس ليها قرايب و فروع لعائلاتها فى كل حتة فى مصر انسى الموضوع دا تماما

[human]

انا عايز استقل برضه
من البلد كلها

[wael17]

يستحيل يا باشا الموضوع دا يحصل المصريين مش مختلفين الاختلافات الجذرية اللى ممكن تؤدى للانفصال احنا عرب و نفس الشكل و اللغة منفرقش غير فى الدين و دى حاجة بيحاول يظهرها الناس اللى بتصطاد فى الميه العكرة انما موضوع الانفصال دا انساه تماما دا مصر كلها سايحة على بعضها كل الناس ليها قرايب و فروع لعائلاتها فى كل حتة فى مصر انسى الموضوع دا تماما

موافقك في كل حاجة باستثناء ان كلنا عرب
في مسيحيين كتير مش بيعتبروا نفسهم عرب...و التحدث بالعربية مش سبب كافي انك تبقي عربي
يعني أنا لو باتكلم انجليزي و عايش في دولة بتتكلم انجليزي ماقدرش أعتبر نفسي انجليزي