زلزال؟ طيب كنت فين في الأولاني؟

[OlaOsman]

بيقولوا في زلزال حصل امبارح الساعة 2 و نص الصبح و كان عنيف.. حد حس بيه؟

طيب بالمناسبة بأه.. انتوا كنتوا فين يوم زلزال 1992؟ اليوم ده صعب يتنسي بأي حال من الأحوال.

انا يومها كنت في البيت، كنت لسه في ثانوية عامة و رجعت من المدرسة و باحضر الأكل مع ماما فوجئنا الأرض بتتزلزل من تحتنا.. طبعا افتكرنا ان البيت بيقع.. و ماما على لسانها الشهادة و عمالة تقول لنا قولوا الشهادة ياولاد.. كله طبعا ساب اللي في إيده و جري على برة.. ماما لمانا تحت دراعها و بتخرج بينا من الشقة و انا داخلة جوه تاني.. رايحة فين يا علا؟ داخلة أجيب الإيشارب.. مش خارجة من غير حاجة على راسي.. ثواني و كنت حاطة الإيشارب على راسي و خارجة.. على ما كل ده حصل كان الزلزال بطل :o

لما لقينا الناس كلها هي كمان في الشارع عرفنا انه زلزال.. يااااااااااه.. ده كان يوم.

[OlaOsman]

معلش يا جماعة.. العنوان شكله عامل زي خناقة.. مش عارفة طلع مني كده ازاي.. لما جيت اقراه بعد كده لقيتني كإني بابكت فيكوا :o

[theking2690]

انا الصراحة ساعة الزلزال كنت بيبى كان لسه عندى سنتين و كل البيت نزل و نسيونى فوق و بعد كده ماما طلعت جرى جابتنى

[OlaOsman]

انا الصراحة ساعة الزلزال كنت بيبى كان لسه عندى سنتين و كل البيت نزل و نسيونى فوق و بعد كده ماما طلعت جرى جابتنى

اكيد اتخضيت اوي.. و لا ما لحقتش؟

[alaa_dash]

ههههههههههه احنا كنا برة مصر و انا فاكر انه كان عند قريب لينا بيت قديم اللي هوه الشقة متأجرة فيه بخمسة جنية و الحاجات ديه ...و لما قريبنا ده سمع عن الزلزال اول حاجة عملها سأل على البيت وقع ولا لاءة عشان السكان ما كانوش عايزين يسيبوه ....و للأسف (بالنسبالوا طبعا)البيت واقف وتد و لا كأنه حصل حاجة !!!

[aif]

انا كنت يوميها في جدة .... وكنت باكلم خطيبتي اللي هي زوجتي دلوقتي في التليفون ... عارفين كنت باكلمها لييه ؟
كنت بأخطبها ...... كنت باعرف رأيها ( مع اني كنت عارفه ومتأكد منه )لكن شكليات بقي :D
ولقيتها بتنهج وصوتها غريب قلتلها .. هو فيه ايه
قالتلي اصلنا لسة طالعين من تحت ... اصل كان فيه زلزال وسيبنا البيت كلنا ونزلنا
وطبعا بعدها كلمت بيتنا اطمنت .. رد عليا والدي وقال لأ مافيش حاجة احنا ما حسيناش باي حاجة وده طبعا لأن والدي كان سايق العربية وما شعرش باي حاجة ... وبالليل شوفت المناظر في التلفزيون وجالي حالة هلع وذهول
وبعدها قعدت 20 يوم 00 كل يوم اعمل اكتر من 100 محاولة عشان اكلم مصر في التليفون ولا يمكن .. حتي الساعة 3 الفجر وما فيش فايدة .. الخطوط كلها عطلانة وعليها ضغط رهيب .... لدرجة اني بقيت ابعت لهم برقيات عشان يطمنوني

بس المهم اني كنت اخدت الرد الرسمي في موضوع الخطوبة ... وده كان زلزال حبنا ;):p:D

[حماده عزو]

أنا كنت فى البيت باخد درس خصوصى
وبعدين لقيت المدرس نط من مكانو وطلع برا البيت
قمت فرحت أعدت أهيص
جت ولدتى سحبتنى من أيدى ف
انا خوفت ورحت معيط
ولأوستاذ كان شكلو وحش أوى ساعتها هههههههههههههههههههههههههههههههه

[MTAK]

انا فى الوقت ده كنت على جزيرة القطن بعد ما رجعت من المدرسة

و طبعا لم اس بأى حاجة

لما رجعت الناس قالولى

اما دا كان فى حتة زلزال

[emadkamel]

نت لسه خارج من المدرسه فى ميدان الحجاز .... وحسيت الارض بتترجرج تحت رجلى افتكرته المترو اللى قدام المدرسه وبعدين حسيت بدوخه كده ... ولما اكتشفنا اننا كلنا "من باب المدرسه لحد جوه خالص" حسينا بالرجه دى عرفنا انه زلزال .....اللذيذ بقى ان عماره هليوبوليس اللى وقعت دى كنت باروحها على الاقل 4 مرات فى الاسبوع اكل مع اصحابى عند فانى بانى .... بس الحمد لله ربنا ستر

وطبعاً قعدنا فرحانين قوى بالاجازه اللى قعدت اسبوعين وكنا بنتمنى زلزال تانى فى اخر الأجازه :) :)

[ASD peugeot]

انتي لسه فاكره

[Powert]

اة واللهي فاني باني ده كان ليه عندي ذكريات جميلة الله يرحم المحل

انا ساعتها كنت عيل صغير في المدرسة وكنت لسه راجع البيت وقاعد على السفرة

وشوية لاقيت الشوربة بترقص وبعديها لاقيت العمارة كلها بترقص طلعت اجري في الشارع لقيت الناس كلها

في الشارع معنا االلي عريان واللي كان بياخد دش واللي ....<حذف من الرقابة>

[OlaOsman]

على ذكر فاني باني.. مين فاكر رسالة بريد الجمعة اللي كانت على أيام عبد الوهاب مطاوع الله يرحمه و كان مذكور فيها قصة مرتبطة بانهيار العمارة و المطعم ده بالذات؟

[Powert]

على ذكر فاني باني.. مين فاكر رسالة بريد الجمعة اللي كانت على أيام عبد الوهاب مطاوع الله يرحمه و كان مذكور فيها قصة مرتبطة بانهيار العمارة و المطعم ده بالذات؟

اقولك على حاجة انا كنت لسه صغير وماقرتش الجرايد غير على كبر :D

بس انا فاكر التليفزيون ماكانش ليه سيرة غير على العمارة دي

وكل ما يجبوا سيرت زلزال 92 لازم يجبوا قصة العمارة دي وفرق الانقاذ اللي جابوها من المانية مخصوص
وان كان فيها 24 واحد نصهم طلع حي ونص التاني توفى :( وقصة المطعم انه كان اشهر واحد في مصر الجديدة ومنطقة هليوبلس

بس سؤال هو ليه لحد دلوقتي الارض بتاعتها فاضية مافيش عمارة عايزة تطلع

[TaoTao]

أنا كنت نايم أصلي باحب القيلولة جدا، وكنت في تانية إعدادي
المهم يوم الاثنين ده كان أسود يوم بالنسبالي عشان كان 7 حصص والحصة السابعة رياضة مأساة والأستاذ بسيوني مابيعتقش يدينا واجب ومسائل واحنا في الحصة السابعة، يا عم ارحمنا ده احنا مفرهضين وهو ولا يفهم.
المهم الواحد بيرجع في اليوم ده هلكان ودماغه مبقللة وفيها دمل، وينام زي السطيحة.
ماما (زي ما قالتلنا) بقى كانت بتوضب الشقة والمكنسة شغالة وبعدين سمعت صوت الدربكة وبعدين صحيتنا عشان ننزل جري وطبعا كان يوم صعب وكلنا منهارين ومارضيناش نطلع تاني وفضلنا في حوش البيت.
لغاية ما بابا -ربنا يديله الصحة- جه ولقانا كدة وقعد يهزر معانا وطلعنا الشقة وكلنا، وبعدين بابا أخدنا نلف في الشوارع نتفرج ع الدنيا ورحنا المدرسة نطمن على المباني والطلبة اللي كانوا هناك (المدرسة فترتين والفترة التانية بنات وكانت فيه إشاعات إن المبنى وقع وفيه إصابات)
وهديت واتعودنا ع الزلازل والتوابع وبقينا نتسابق على مين اللي يحس بالتوابع أكتر :)
وكمان اتعلمت إن الرعب اللي بيحصل للناس من الزلزال بيكون أخطر من الزلزال نفسه !! عشان كدة بقيت لما أحس بزلزال افضل ثابت وساكت -طالما ماحدش حس بيه غيري- وبعدين اقول للي معايا "ياجماعة كان فيه زلزال وعدى" وبرضه الناس بتخاف.
كان يوم مفيد جداً لكل اللي عاشوه :)

[aif]

بس سؤال هو ليه لحد دلوقتي الارض بتاعتها فاضية مافيش عمارة عايزة تطلع

خايفين من زلازالوانزا الطيور :D