ساعات بشتااااااااااق

[FunnyMickey]

طب شايف ايه جمال وحلاوه في مرحلتنا دي
؟

[tarekzein]

طب شايف ايه جمال وحلاوه في مرحلتنا دي
؟

شايف جمال

وعز

وشريف

ونظيف

وسرور

ها

كفايه وألا نقول كمان

[M.Yahia]

طب شايف ايه جمال وحلاوه في مرحلتنا دي
؟

انا مش شايف اى جمال بصراحة دلوقتى واللى شايف جمال فى الوقت الحالى اعتقد انه عايش فى كوكب تانى الحياة دلوقتى اصبحت سريعة و الاطفال لما حتى تبصلهم تحس انهم مش اطفال مفيش براءة مفيش طفولة الناس ماشية فى الشارع تكلم نفسها حتى فى الاجتماعيات الافراح بقت كل فين و فين و الناس مبقاش قلبها على بعض و لا بيحبوا بعض زى الاول الناس كلها ملهية فى اكل العيش و محدش مستقر فى حياته نهائى ربنا يرحمنا بقى برحمته الواسعة

[FunnyMickey]

شايف جمال

وعز

وشريف

ونظيف

وسرور

ها

كفايه وألا نقول كمان

انا مش شايف اى جمال بصراحة دلوقتى واللى شايف جمال فى الوقت الحالى اعتقد انه عايش فى كوكب تانى الحياة دلوقتى اصبحت سريعة و الاطفال لما حتى تبصلهم تحس انهم مش اطفال مفيش براءة مفيش طفولة الناس ماشية فى الشارع تكلم نفسها حتى فى الاجتماعيات الافراح بقت كل فين و فين و الناس مبقاش قلبها على بعض و لا بيحبوا بعض زى الاول الناس كلها ملهية فى اكل العيش و محدش مستقر فى حياته نهائى ربنا يرحمنا بقى برحمته الواسعة

ماهو عشان كده كل واحد فينا بيحن للماضي بغباء
ايام ما كان فيه فساد اه
فيه ناس وحشه اه
انما مكنش كله كده
مكناش كلنا جوانا وحش كده

زمان كان كل فين وفين تلاقي خناقه في الشارع وناس بتحوش
دلوقتي ممكن تلاقي الناس بتتخانق مع دبان وشها
وما بتصدق اصلا تتخانق
عشان تفش غلها وخلاص
ومتعرفش ايه اللي يستدعي الموقف ده كله

ربنا فعلا يرحمنا برحمته
يظل الماضي رائعا بكل ما تحمله الكلمه من معاني
حيث كانت مصر مصرا
حسبي الله ونعم الوكيل في كل من دمر براءه اطفالنا وعنفوان شبابنا وطيبه اجدادنا

[LORD.ADeL]

الله عليك يا صبحي والله كل اللى بتقوله دة فعلا عند الواحد وبجد ياريت الايام دي ترجع تانى بس ازي
قول للزمان ارجع يازمان
اهداء منى
[youtube]http://www.youtube.com/watch?v=Ihk5yaIzg2I&feature=related[/youtube]

[masrtamin]

استاذ funnymickey
لم انل شرف مقابلتك بس كنت واخد فكره عنك من اسمك انك شخصيه كرتونيه هزليه بس الموضوع ده كشف عن انساااااااااان رقيق جدا
به بقايا الفطره السليمه انا نفسى اقابلك

[KHALED AYMAN]

انا رأيى ان انا مثلا ...بما انى دلوقت مش كبير ...كمان عشرين سنه ..لما اتكلم مع ابنى بقى هقوله ياااااااااااه يا ابنى انا على ايامى كان الى يخبط واحد بيشتمه و يعوره اه ممكن يموته بس بأدب ..انما يبنى عمرنا ما شوفنا واحد بينزل بالرشاش يغربل الشارع كله كده ..
وبرده هستغرب اوى لما صاحب ابنى فى ابتدائى يعمل حادثه ...واقوله مهو ابوه مدلعه بردو ..على ايامنا مكنش حد يركب عربيه الا لو وصل لاعدادى وثانوى ..ابهات اخر زمن !!
ملخص الكلام ..البلد ماشيه الى الاسوأ ...معنى كده كل ما نبص ورانا ..هنلاقيه احسن من الى احنا فيه و احسن من الى جاى ..

[fouady]

صور جوانا عايشة زي اسمينا

[A7MED_PHARMA]

بس ياريت
نعمل لاولادنا ذكريات وماضي

أهي دي نقطة مهمة
لما إبنك يكبر ..يقول بابا كان بيعملي كذا وكذا
تعرفوا
في أوائل التسعينات..كنت أنا يدوبك في إابتدائي
كان أيامها باخد مصروف ..شلن ورق ..ولو يوم القبض ..كنت باخد بريزة ورق
كانت الفرخة بتيجي البيت ..كان بابا وماما ياكلوا يدوبك حتة صغيرة ...وأنا وأخواتي البنات الاتنين ناكل باقي نص الفرخة
يعني الفرخة كانت بتكفي عيلة من 5 أفراد ..على يومين
واليوم التالت ..كان يوم الحوايج ..الكبد والقوانص
...................................
كنت بشتغل مع والدي
والدي حاليا مستشار هندسي على المعاش
زمان
كنت بخرج معاه أشتغل بإيدي في التكييف والتبريد..
كان يخلص الشغل الساعة 3 ...أقابله بالشنطة بتاعت العدة ..ونقف على الأسفلت نركب عربية
علشان نروح شغل بره
مرة في مطبخ بنصلح تلاجة
ومرة في محطة بنزين ..بنصلح طرمبة بنزين
ومرة في مصنع صغير..بنعمله لوحة تحكم كهربا
ومرة في حمام ..بنصلح غسالو أوتوماتيك
كانت أيام جميلة ..مع إنها كانت صعبة
بس تربية عملت راجل..والحمد لله

بعكس أخويا الصغير
أخر العنقود..محمود جه الدنيا أيام ماربنا فرجها
ماشافش إلي إحنا شوفناه وإحنا صغيرين.....علشان كده دايما صوته عالي ..وبيجعر على الفاضي والمليان
الطرق على الحديد..يزيده صلابة

[ecybrarian]

يااااااه..قلبك اسود قوي :-)) لسة فاكر يا راجل...دا انت ناقص تجيب لنا برامج الاكروبات الصينية إللي كان بيجي في الاستراحة بين الشوطين في ماتشات الكورة

[أبو إياد]

شيل المسئوليات والالتزامات والديون اللى علينا واحنا نعيد الزمن ده تانى

[wassim_nasser]

ياجماعه الزمن ماتغيرش ولا حاجه .. مازالت العيال الصغيرة بتلعب تحت البيت .. حد فيكم يكون الشارع بتاعه هادي يقف فى الاجازة و يتفرج .. المشكله اننا احنا اللي اتغيرنا عشان كبرنا .. زمان كان كل همك تخلص واجب العربي ولا الحساب عشان تتعشى قصاد مسلسل المال والبنون ولا بوابة الحلوانى .. دلوقت المسؤليات مش بتخلص وتلاقي نفسك ساعات بترجع بالليل بيتك مرهق مش شايف قدامك وساعات مش بتتعشا وتنام وانت بتحلم بالمال بس بلاش البنون عشان مانبقاش طماعين .. زمان كان الشتا له ريحة والربيع له ريحة عشان كنا رايقين وكل فصل نعلمه بعلامة .. ريحة النفتالين فى هدوم الشتا .. ريحة الورد وحبوب اللقاح ال طايرة فى الجو فى الربيع .. حاليا بنفكر علي شهر 4 اشتري عربية علي شهر 7 مش عارف اعمل ايه بطلنا نحس بتغير الفصول .. طب ماهى افلام اكتوبر والربيع لسه بتيجي لحد دلوقت فى التليفزيون .. حد بيشوفها؟ ابدا .. احنا بس اللي سمعنا تقل ومناخيرنا خدت علي ريحة التراب

[FunnyMickey]

قيس سنك بسن والدك من 15 سنه وشوف التصرفات هيا هيا ولا اتغيرت
ماهو كان في سنك دلوقتي
وشايل نفس المسؤليات
ومع ذلك كنت تلاقي ابتسامته في وشه
وضحكته ماليه البيت
ومامتك بتعمل شغل البيت من غير ما تتهد زي ما مراتاتنا بتعمل
تربيه الطفل دلوقتي بقت اصعب
مين فينا بيزعق ولا بيضرب دلوقتي
كنا بنضرب ونتهزق ونتشتم وطلعنا كويسين
ودلوقتي لا بتضرب ولا بتشتم ولا تهزق وطالعين شياطين
:)

مبقوش يمسكوا مصاصات ولا يتفرجوا علي كارتون
بقوا ماسكين اسلحه ورشاشات
واللي طالع عليهم

يقولك عليكم اللعنه جميعا
هااااااااااااااااااااااااااا
:)

[nonetta]

حرام عليك يا استاذ صبحي
طلعت المرارة اللي جوانا

وانا صغيرة .. في العيد ..
كان والدي ربنا يديله الصحة بياخدني بعد صلاة العيد نلف على بيوت قرايبنا
ابتداء ببيت جدتي مرورا بأعمامي انتهاء بعماتي
نرجع الظهر نتغدى ونرتاح شوية
بعد الظهر نمر على بيوت خالاتي

دلوفتي
ولا احنا بنروح لحد ولا حد بيجيلنا .. ونسيت شكل بيوت قرايبى
مش باشوف حد منهم الا لو في فرح او عزاء
ادي حال الدنيا
مفيش حد مش بيحن للماضي
من كان بلا ماضي فهو بلا مستقبل
يا ريت نحاول نبدأ بنفسنا .. نحاول نغرس في ولادنا اللي احنا مفتقدينه ..

والدي ربنا يخليهولي بيعمل مع ابني اللي كان بيعمله معايا واللي باباه مش فاضي يعمله علشان في الشغل ليل مع نهار
في الاجازة
ياخذه وهوة رايح لعماتي وخالاتي
ياخده ويروح بيه السيدة زينب و السيدة نفيسة وسيدنا الحسين والازهر وخان الخليلي و الغورية
يقعد يحكي له عن كل الذكريات القديمة
الاقي ابني بيحكي لي عن حكايات حكاهاله جده
سمعتها عشمنه عشرات المرات وكنت كل مرة باسمعها كأني باسمعها لاول مرة

كان نفسي ابقى زي والدي كدة
لكن لكوني سيدة مش رجل
ولايقاع الحياة السريع طبعا مش باعمل كدة

[FunnyMickey]

والله يانونيتا كل الكلام اللي انتي بتقوليه ده كلنا كنا بنعمله
واهالينا كانوا بيعملوه

هما هما نفس الاشخاص اللي كانوا بيعملوه عايشين معانا دلوقتي وبطلوا يعملوه
طب ليه بطلوا

عشان المرض المتفشي في مصر كلها اللي اسمه لقمه العيش
الناس اتلهت في لقمه العيش ونسيت ان ليها رب بيرزقها
نسيت اهاليها ونسيت صله الرحم

طب سؤال بقي
تفتكروا لو حال البلد بقي كويس والناس مستواها المعيشي ارتفع
حيفتكروا بعض ويزوروا بعض

يعني بمعني اصح
هل احنا بطلنا نزور اهالينا عشان احنا اللي بقينا وحشين ولا الظروف هيا اللي مش مساعدانا

ياريت الاجابات تكون من جوه القلب
يعني صادقه مش متزوقه