ورشة تحت البيت

[M.Nasr]

فى محل فى العمارة اللى ساكن فيها فاتح ورشة وطبعا خبط ورزع وصوت كمبرسور عالى غير ان لما بيشتغل بيرج العمارة كلها واكتر من مرة نتكلم معاه بالذوق على الاقل يشوف حل لرجة الكمبرسور مفيش فايدة و الادب مش جايب معاه نتيجة.
السؤال دلوقتى المفروض نشتكى مين او نعمل ايه؟ بس نعمل حاجة تجيب نتيجة عشان فعلا الواحد تعب منه ومن الأذى ده

[mohamed2002]

بص ياباشا في طرق كتير
عندك ممكن تشتكي في التامينات وتقرفه
عندك الحي برضه
وزارة البيئة
بس الاول خد حد من جيرانك وكلموه
وفهموه انكم حتاخدو تصرف ممكن يدايقو

[M.Nasr]

عملنا كل حاجة صدقنى واتكلمنا معاه اكتر من مرة وفيه ناس الكلام معاها قلة قيمة

[أحمد كمال]

يبقى محضر بقى و تظبيط بقى

[mohamed2002]

بص ياباشا انا حنصحك بس دة لو قارفك اوي لانها حتبقي وجع دماغ له الاول انت ساكن في منطقة سكنية ولا شعبية بعض الشئ؟
انت عند الحي تروح وتقدم شكوي وهما حيشتغلو عليه
انت عندك القسم وتروح تعمل محضر وهما حيقرفوه
انت عندك المحافظة تروح تعمل شكوي وهما حيخنقوه
انت عندك وزارة البيئة وهما حيقفلوه
انت عندك التامينات الاجتماعية ودول حيعلقوه
انت عندك مامورية الضرائب اللي هوة تابع ليها ممكن يظبطوه
الكلام دة كله ممكن تعمله من علي النت وانت في البيت
بس نصيحة حاول حاول تكبر مخك وطبعا متعملش كل السابق ذكرة ده تبتدي بالحي بس لغاية ما يجيب ورا ساعتها برضه يعني الراجل مش حيقفل ممكن تظبطو مواعيده يعني يشغل الكمبروسر من 12 ال 6
كدة وربنا يكرمك ومتظلمش حد

[shaddadfalcon1]

مش عارف الناس اللي بتفتح ورش حداده وسمكره وحاجات اللي بيتطلع منها شوت جامد ازاي بتفتح في مناطق سكنيه

انا في وشي سروجي وبصراحه بتخنق منه لانه دايما موفق عربيات قدام العماره وبضطر اركن في مكان تاني واحيانا بعيد وده ساعات بيخلي العربيه تتخبط

[M.Nasr]

بص ياباشا انا حنصحك بس دة لو قارفك اوي لانها حتبقي وجع دماغ له الاول انت ساكن في منطقة سكنية ولا شعبية بعض الشئ؟
انت عند الحي تروح وتقدم شكوي وهما حيشتغلو عليه
انت عندك القسم وتروح تعمل محضر وهما حيقرفوه
انت عندك المحافظة تروح تعمل شكوي وهما حيخنقوه
انت عندك وزارة البيئة وهما حيقفلوه
انت عندك التامينات الاجتماعية ودول حيعلقوه
انت عندك مامورية الضرائب اللي هوة تابع ليها ممكن يظبطوه
الكلام دة كله ممكن تعمله من علي النت وانت في البيت
بس نصيحة حاول حاول تكبر مخك وطبعا متعملش كل السابق ذكرة ده تبتدي بالحي بس لغاية ما يجيب ورا ساعتها برضه يعني الراجل مش حيقفل ممكن تظبطو مواعيده يعني يشغل الكمبروسر من 12 ال 6
كدة وربنا يكرمك ومتظلمش حد

عايز اقول لحضرتك انى بقالى كتير مكبر مخى بس الموضوع زايد عن حده وهو فاكر ان كده لاوى دراع الناس اللى فى العمارة وبقا يفتح لحد الساعه 1 و2بالليل وتخيل حضرتك حجم الاذى ده.
معلش ممكن تقولى ازاى اشتكى على النت ؟ وعلى فكرة انا ساكن فى مدينة نصر

[mohamed2002]

طيب بص ياباشا ابداء بمحضر اطلب فيه بتحديد مواعيد لتشغيل الكمبروسور وانكم كلمتوه بالذوق وهوة رفض
http://www.moiegypt.gov.eg/Arabic/complaints/showComplains/

[human]

اشتكى ربنا لو مش فاضى للبهدله و القرف

[ahmed1981]

أولاً تنزل تكلمه بالذوق وتعرفه إنها آخر مرة هتكلمه

لو منفعش

تروح الحي تكتب شكوى فيه بكل ما تستطيع حشره في الشكوى

وتاخد رقم الشكوى
المفروض المحافظة تيجي تعمل عليه شغل جامد

لوحاول يعمل فيها جدع وإتعرضلك
تاخد شكوى الحي وتطلع على القسم ومعاك محامي جدع وتعملوله محضر تمام التمام
والقسم برضه هيعمل عليه شغل تمام

تبلغ عنه الساعة 12 ليلاً القسم بالتلفون شكوى إزعاج
هيجوا وهياخدوا منه على الأقل ألف جنيه
ووو...
إبدأ بس وربنا هيكرمك

[wa7d]

بصراحة الله يكون فى عونك , دا بقى الشئ الطبيعى فى مصر الازعاج ليل نهار , انا قدامى محل بلايستيشن وحاطط طرابيزه بنج بونج قدامه وطول اليوم شباب صيع اخر قله ادب وزعيق ومش بيقفل الا الساعة 2 بالليل
المشكلة انه الجار دا متربين مع بعض وكويس معايا ومش قادر ازعله فمستحمل القرف

[yascro]

من الاخر اتصل ب بوليس النجده وقلهم ان الارتجاج الناتج عن تشغيل الكمبروسر بياثر على اساسات المنزل
واعملهم البحر طحينه

[DreAmO]

انا هقولك الخلاصة

انا بعاني من نفس المشكلة .. بس بقى حوالي ثلاث ورش .. منهم ورشة نجارة .. فيها مكن تقطيع خشب من اللي قلبك يحبه

وواحدة مش فاهم بيعملوا ايه لكن طول اليوم شغالين بصاروخ في حديد .. والتالتة والله ما اعرف بردو بس بيطلع منها اصوات غريبه

وكلهم في شارع مينفعش يبقى فيه ورش .. بس هما من زمان كان الشارع دة لسه فاضي ماتبناش فيه بيوت

دلوقت بقى عمارات


المهم .. انا جربت وزارة البيئه .. اخد رقم للشكوى من اربع شهور .. ولحد دلوقت .. الرد ( جاري مخاطبة الحي وبحث الشكوى )

اشتكيت في الحي .. راحولوا بالفعل اتنين موظفين .. قالولوا فلاان اللي ساكن في البيت الفلاني مقدم فيك الشكوى دي .. ومعاهم اصل الشكوى

وحصلت مشكلة بيني وبين الراجل .. وعملتله محضر في القسم .. ومفيش اي اجراء اتاخد ضده لحد دلوقت

بالعكس انا والله اللي اتبهدلت واتحرق دمي


بالنسبة للنجدة .. ليه معاهم موقف قديم .. وبقولها صريحة .. النجدة مابتنجدش حد .. محدش عبرني .. ولا كأني اتصلت بنجدة


كان نفسي اطلع بلطجي .. بس للأسف طلعت محترم


ربنا معانا

[M.Nasr]

انا هقولك الخلاصة

انا بعاني من نفس المشكلة .. بس بقى حوالي ثلاث ورش .. منهم ورشة نجارة .. فيها مكن تقطيع خشب من اللي قلبك يحبه

وواحدة مش فاهم بيعملوا ايه لكن طول اليوم شغالين بصاروخ في حديد .. والتالتة والله ما اعرف بردو بس بيطلع منها اصوات غريبه

وكلهم في شارع مينفعش يبقى فيه ورش .. بس هما من زمان كان الشارع دة لسه فاضي ماتبناش فيه بيوت

دلوقت بقى عمارات


المهم .. انا جربت وزارة البيئه .. اخد رقم للشكوى من اربع شهور .. ولحد دلوقت .. الرد ( جاري مخاطبة الحي وبحث الشكوى )

اشتكيت في الحي .. راحولوا بالفعل اتنين موظفين .. قالولوا فلاان اللي ساكن في البيت الفلاني مقدم فيك الشكوى دي .. ومعاهم اصل الشكوى

وحصلت مشكلة بيني وبين الراجل .. وعملتله محضر في القسم .. ومفيش اي اجراء اتاخد ضده لحد دلوقت

بالعكس انا والله اللي اتبهدلت واتحرق دمي


بالنسبة للنجدة .. ليه معاهم موقف قديم .. وبقولها صريحة .. النجدة مابتنجدش حد .. محدش عبرني .. ولا كأني اتصلت بنجدة


كان نفسي اطلع بلطجي .. بس للأسف طلعت محترم


ربنا معانا

ربنا يطمنك
شكلى كده هدخل نفسى فى متاهات وقلق وفى الاخر مش هاخد لا حق ولا باطل فى البلد دى

[M.Nasr]

بصراحة الله يكون فى عونك , دا بقى الشئ الطبيعى فى مصر الازعاج ليل نهار , انا قدامى محل بلايستيشن وحاطط طرابيزه بنج بونج قدامه وطول اليوم شباب صيع اخر قله ادب وزعيق ومش بيقفل الا الساعة 2 بالليل
المشكلة انه الجار دا متربين مع بعض وكويس معايا ومش قادر ازعله فمستحمل القرف

ربنا يعيننا

من الاخر اتصل ب بوليس النجده وقلهم ان الارتجاج الناتج عن تشغيل الكمبروسر بياثر على اساسات المنزل
واعملهم البحر طحينه

والله انا خايف يطلع الكلام ده حقيقى اصل انت مش متخيل الرجة عاملة ازاى