ايه السؤال اللي ما تحبش تتسأله ؟ يالا نفضفض :)

[hazem_khidr]

السلام عليكم ورحمة الله وبركاته

حنعتبر انفسنا في مواجهة صريحة مع النفس ونكتب هنا بصراحة عن رأينا فيما يلي :

مــا هـــو السؤال الذي لاتـــحب ان يسالـــك به احد ؟؟

ولا تحب الاجابة علية؟؟؟

اريد تحديد السؤال !! وبدون احراج !!!!!!!

اي سؤال لا تحبون أن يسألكم احد به ... يلا ابتدوا ... من عنده الشجاعة ...

بعض النساء لا تحب ان يسالها احد عن عمرهااااااا؟؟؟ او هل انت على علاقة الآن ؟؟ ومن تفضلين ..الخ

وبعض الرجال لا يحبون ان يسالهم اي شخص مهما كان ( كم راتبك )!!!!!!! او هل تحب زوجتك ؟؟ او اسم زوجتك ؟؟؟ .....الخ

ارجو المشاركه وبصراحة

[Nile_Storm]

السؤال اللي يستفزني عندك اخوات ؟
اولا انت مالك
ثانيا لاني وحيد الناس بتبصلي كأني دلوعه مامي و بابي و حاجه قرف و ده شئ الحمد لله ابويا و امي خدوا بالهم منه وربوني صح ربنا يكرمهم يارب

و السؤال التاني لما يعرفوا اني في طب يقولولي ها تتخصص ايه اقولهم اللي ربنا يريده
متعجبهمش الاجابه يقوولولك طبعا طبعا اللي ربنا يريده بس ايه التخصص الي انت بتحبه عشان تتخصص فيه و انتو مالكوووووووووووووووووووووووووووووووووووو

بجد فيه اسله كتير بتحرق دمي

وفي مجال العربيات لقيت واحد في الشارع بيسالني علي عربيتي عامله ايه معايا رديت عليه عادي عادي و في نص ردي ليه الاقيه بيقولي بنفس اللفظ ( ألا العربيه دي كاش و لا قسط ) و انت مال اهلك حاجه تقرف
بجد فيه ناس فضوليه بشكل ممل

[Karim_Monir]

نيييييييييييييههههههههههههه
حلوة كاش ولا قسط دي
صحيح هو مال اللي جابوة
----------------
انا مابحبش الاسئلة الشخصية عموما
بتاخد كام
بتلبس بيكام
بتجيب لعيالك ايه ومنين وبيكام
موبيالك خط ولا كارت
كدة يعني

[OlaOsman]

بــــكـــــــام؟

[theking2690]

الا صحيح يا كريم موبايك خط و لا كارت:d

بص يا سيدى هى اغلبها بتكون اسئله شخصيه ولأنى مؤمن بمقولة من تدخل فيما لا يعنيه سمع ما لا يرضيه

يعنى تلاقى واحد جى يسألك مامتك اسمها تتوقع هترد عليه تقوله انت مالك هى تخصك فى ايه

و بعض الاسئله اللى بتحرجنى بقى هى الاسئله المتعلقه بالوزن و ده لأنى تخين فطبعا كل شويه واحد يستخف و يسألنى انت وزنك كام برضه هتكون الاجابه المعتاده انت مالك
عمرك قد ايه برضه بتحرج منها اولا لأنى تخين فشكل جسمى مش متناسب مع سنى فبكسف اقول على سنى الحقيقى و بكبر نفسى سنه و لا حاجه

[OlaOsman]

لأ و كله كووووووووووووم و السؤال الشهير لما واحدة تكون بقالها كتير ما شافتنيش و لما تقابلني بعد فترة: ايه؟ لسه ما فيش حاجة؟ (جواز طبعا)
- لأ لسه يا تانت
- معلش يا حبيبتي.. ان شاء الله نفرح بيكي عن قريب.

طيب هو حد قال لكوا اني زعلانة؟؟

انا مش فاهمة ايه لزمته السؤال؟ طيب ماهو لو فيه حاجة هاقول على طوووووووووول.. هي الحاجات دي بتستخبى؟

بس اهي أسئلة و خلاص

[aif]

اكتر سؤال مش باحبه .. اعتقد انه سؤال شائع وكلكم مش بتحبوه ... هو : " اعملكم أكل إيه النهاردة "
ياااااه سؤال مكرر ورزل ... وكل الزوجات دايما تسأله للأزواج.... مع فاصل من الزن ... لازم تفكر معايا انا زهقت من كتر التفكير ...
لكن عزائي الوحيد ان الرد بيكون ارزل من السؤال :" أي حاجة " :p


واللي يغيظ انك لما مرة تقوللها علي نوع معين .... تعمل حاجة تانية ... بصراحة الستات دول ...... زي العسسسسسسسسسسسل .... العسسسسسسسل .... فاهميني ;)
جررررررررررررررررررررررررررررررررررررررررر زي كريم

[Ghamrawy]

ايوووووووووه انت شغال فين يا ترى ؟؟؟؟ ياااااه دى شركة ممتازة و يا ترى مرتبك كام ؟؟؟ بصراحة برد بس باسأل نفس السؤال مع الانطباع انى باحسد
هو الفرق بينك و بين مراتك كام سنة ؟؟؟؟ مش فاكر بصراحة هى اتولدت سنة كام
دفعت مهر و شبكة كام ؟؟؟؟ ربع جنيه و ربع جنيه
ناس عاملة زى البقدونس عايزة تحشر نفسها فى اى حاجة و السلام

[ahmedateya]

اسخف سؤال بيكون على العربية : كاش ولا قسط؟
طب انت مال اهلك؟ هوة لو قسط هتدب ايدك في جيبك و تديني القسط؟
ولا لو كاش هتعمللي تمثال؟

ولا لما تلاقي واحد راكب معايا و يقولي : العدة دي بكام؟
و تلاقي علاقته بالتكنولوجيا واقفة عند جرس باب بيتهم..

اذا كان على السخافة فدي ممكن تكون هواية عند بعض الناس

[M_ashraf]

نفس مشكلة نايل ستورم
انا خريج طب و بقالي 6 سنين بتسأل انت اتخصصت ولا لسه
اقول لسه
طب عايز تتخصص ايه
اقول لسه مش عارف وهلم جرا
الا صحيح يا نايل ستورم انت هتتخصص ايه؟

[aif]

نفس مشكلة نايل ستورم
انا خريج طب و بقالي 6 سنين بتسأل انت اتخصصت ولا لسه
اقول لسه
طب عايز تتخصص ايه
اقول لسه مش عارف وهلم جرا
الا صحيح يا نايل ستورم انت هتتخصص ايه؟

اللي بيقوللك كدة اكيد بيبقي عاوز يفتح موضوع كلام وخلاص .. يعني بيناغشك عشان تتكلم ;)
لو عاوز تعقده قوله حاجة مكلكعة يكون اسمها مجعلص ومش مفهوم .. ح يتكسف يقوللك انه مش فاهم ويتكبس ويسكت ... اقولك قوله توقيع سبعاوي :D

[emadkamel]

هو بيعتمد على اللى بيسأل ... انا باضايق من اى حد يتعدى حدوده فى السؤال عن حاجه تخصنى .... بس بصفه عامه اى سؤال شخصى زى اللى مذكور فوق بيبقى ممل

[mohamed_88sk]

سؤال بسمعه في التلفزيون ....
الدنيا فيها كام بلياتشو ؟ههههههههههههههههههههههه

[مدحت منيب]

1-ممكن اسال حضرتك سؤال .. بس اوعدنى ما تكسفنيش ..!!

( محاولة للضغط النفسى فى اتجاه تحويلى لاجابة مطلبه بسيف الحياء )

و غالبا يكون ردى .. اوعدك هاتزعل اوى مش بس ها تتكسف ..

2- ترانى زوجتى فى كامل هندامى و حليق الذقن فتقول : انت خارج؟

امال يعنى لا بس كده عشان انام ؟

3- و عندما ارجع متاخرا جدا .. و تسمع ارتطام المفاتيح بزجاج الكيمودينو ، تقول : انت جيت ؟

غالبا با قول لها .. مش عارف !!

[Ramy_Tantawi]

بصفه عامه برضه جميع الأسئله الشخصيه اللي غالباً مالهاش اجابه ولا اللي بيسألها بيكون مستني اجابه اساساً بس هي يتكون تقريباً نسبة غلاسه ورزاله وتباته في دم الناس دي :p

آخر موقف اتعرضت ليه وجابلي الضغط والقولون وكان هاين عليا انتحر خلاص احد الأقارب اللي بيعانوا من ارتفاع نسبة التباته في الدم فجأه اكتشف اني لابس دبله وده معناه اني خاطب طبعاً لم يكتفي بالمباركه على الخطوبه وخلافه انما كان جميع الأسئله الاجابه عليها تحتاج مني اروح السجل المدني واجيب تاريخ البنت اللي خطبتها ومفيش مانع كمان اروح اجيب فيش جنائي ليها من احد اقسام الشرطه لإرضاء اسئلة الشخص الفظيع ده :D

ده آخر موقف اتعرضت ليه وزي ما قلت جابلي الضغط........في بقى مواقف كتير غير كده بنتعرض ليها في الشارع من ناس ماشفتكش قبل كده ولا هاتشوفك تاني ابداً زي واحد مره في المترو سألني الساعه كام وبعديها بدقائق سألني الساعه دي جايبها منين اصلي ماشفتهاش قبل كده !؟

يا سيدي حد قاللك اني بتاع ساعات انا مالي شوفتها ولا ماشفتهاش