يا جماعة بذمتكم ،، يرضيكم اللي حصل

[smsm_nabawy]

السلام عليكم يا أخواني

أنا بجد متحير أوي ،، أنا كنت من أوائل الناس اللي رافضة المظاهرات دي ، و بعد اللي حصل زدت رفض فيها

المفروض اللي أتقال أنها حتكون مظاهرات سلمية ،، نعبر فيها عن رأيها ،، لكني كنت متاكد انها أستحالة تكمل بكده ،،

رغم اني كنت متوقع أنها حتقلب بحرق دم و موت ناس

إلا أن دمي اتحررررق جداً لما عرفت كده !!! لأني كنت متأكد انها حتقلب بعد كده بهمجية و تلاحم بين قوات الأمن و بين المتاظهرين !!

بصراحة مش عارف ،، أنا عايز أسألكم حاجة

ايه رأيكم في اللي بيحصل !! هل ده ينفع !!

أنا معاكم أن في حاجات غلط لازم تتغير !! و فيه فساد في بعض الجهات الحكومية ،، و في بوظان في الاحوال !! بس انا شايف أن البوظان ده فينا كلنا .. في الشعب كله

كله بسبب حاجة واحدة ،، عدم تقوى الله ...!! أنعدام تقوى الله فينا كلنا ...

لو كل واحد فينا يتقي الله في كل حاجة بيعملها ،، سواء مذاكرته ،، شغله ،، معاملته مع غيره من الناس !!!

حينصلح حالنا ... لو ألتزمنا بتعاليم ديننا ... ليه عمالين نعترض على الظلم اللي جاي من الحكومة ،، مع أنه موجود في كل حته .. حتى غير الحكومة ... البياعين في الشارع ،، تلاقي الواحد منهم مش بيتقي ربنا،، و حادد حاجته قدام المحل ب 4 أو 5 متر ... يقولك أودي حاجتي فين ،، و واخد الرصيف كله ،، فين الرحمة بين الناس و بعضها،، ساب أيه هوا للناس تمشي فيه على الرصيف ...

بتوع العيش،، بيخبزوا العيش كله نشا ،، و حاجات عجيبة ،، اشي خشب ،، و أشي سلك ،، و أشي الخيط الي بنصطاد بيه ده .. و ده كله طلع معايا ،، و حاجات تانية ،، اجسام عجيبة كده ،، مش بعرف أميزها ،، فين تقوا الله !!

فين الرحمة بينا و بين بعض !!!

فين الزكاة و ألتزام الناس بيها !!! متقنوعنيش أن لو كل واحد المفروض عليه زكاة بيعملها ،، حيفضل الشعب ده فقير برده !!!

خلاصة الموضوع ... أنا رأي أن السبب ،، أحنا ،، الشعب المصري .. مبقاش فينا رحمة ،ن مبقاش عندنا أمانة في التعامل ،، مبقاش في تقوى لله ،، ولا مراعاة للضمير .... او الامانة !!

و ده في المصرين ،، حكومةً و شعباً...

ايه فايدة الثورة دي من غير منغير اللي جوانا الأول ....!!!!

يعني ايه فايدة مثلاً "ده لو حصل فعلاً..." أن الحكومة تتغير ... !! وتيجي ورارها حكومة جديدة ،، برده يكون فيها أنعدام ضمير ...

حنبقى زي محنا !! معملناش حاجة !!

يا ريت الموضوع ده "و قصدي على الأحداث الجارية في البلد ..." يفكرنا بحاجة و هي أننا نتقي ربنا كلنا ،، و في كل حاجة ...

يا ريت ....

أنتم بقى أيه رأيكم في الموضوع ده !!

[النوبي]

مش عارف اقولك ايه
برغم اني كنت معترض علي اسلوب المظاهرات إلا اني هموت وانزل معاهم ولولا المسافه كان زماني في الشارع
الحق مش بيجي بالساهل
ولو كانوا افتعلوا حماقه انا مكنتش راضي عنيها
فالاكثر حمقا اني انتقدهم واضيع اللي بيعملوه هباء
انا مصري ومع التغيير
ومينفعش الناس تدفع التمن وفي الاخر اقول اصلي معترض
ياريت تتوجه الي الله وادعيلهم وادعي لنفسك ان الله رحيما بعباده

[smsm_nabawy]

ياااااا رب،، أهدي الحال لما فيه الخير لنا !!

[Moh.Abdelbaset]

مبدئياً أنا متفق مع حضرتك
بس الأهم الآن إن المتظاهرين و أفراد الأمن يكونوا بخير
لأن الوقت ده الناس فيه منفعلة
و الأراء اللي ليها ملاحظات على اللي حصل أو حتى بترفض اللي حصل
من غير المناسب طرحها الآن..لأن بعض الناس هتقابلها بتهكم و يمكن يقولولك إنك تبع النظام
كلنا مع التغيير..لكن ممكن نختلف في طرق التغيير
و مش شرط إن التغيير يبقى للأحسن
ياما نظام الحكم في مصر اتغير و الوضع بيصير للأسوء.

[smsm_nabawy]

فعلاً ،،، انا قلقااااااااااااااان جداً على الناس اللي بره دول .... خايف يكون في ناس تانية تموت !! حرام ،،

[SkyBird]

اقولك رأيي ومن غير زعل
كل الكلام اللي قلته هو حق يراد به باطل
يعني علشان لقينا رغيف عيش فيه خيط يبقى نستكين للظلم ونسكت عن قول الحق امام سلطان جائر
مبرر متضارب
اكره جدا كلمة "ولكن"
لما شخص يقول
انا ضد الظلم و .... لكن
لكن هنا او ما شابهها من تعبيرات معناه استدراك انه في لا وعيه وضميره مع الظلم قلبا وقالبا ولكي يكون كلامه مقبول فيتم تغطيته بثوب من الفضيلة والنصائح السامية
فاياك اخي ان تقع في هذا الفخ
حفظك الله وكل شباب مصر الابطال

[ashouhdy]

start new and fresh !

[ahmed1981]

هل الشعب هو الذي باع الغاز لإسرائيل
وبعد الإعتراض تم تمديد عقد البيع عشرين سنة

كده خيانة
يبقى لازم الناس تثور

[النوبي]

ياجماعه الموضوع مش مزايده مين وطني اكتر من مين
احنا كلنا مصريين
والراجل قصده ان كان ممكن تتحل سلمي بدون ايذاء احد لا من الشرطه ولا من الشعب
لاكن الان سبق السيف العزل يانوقف كراجل واحد ياما كلنا علينا السلامه

[smsm_nabawy]

آمين يا رب،، بس الموضوع هنا بجد عماي حيرة ،ن و كنت عايز أعرف ،، ايه الي انا حاسس بيه ،،

انا مش عايز أنزل بس عايز أنزل .... بس بقول برده ،، حيحصل ايه حتنتهي و حيفضل في مساوئ زي مكانت موجودة قبل كده !!

بالنسبة لرغيف العيش ،، قيس عليه حاجات تانية ،، قصدي أننا أصلاٍ سكتنا على كده ،، و ده مش من الحكومة و بس

لا ده من الناس كمان !! آفة أنتشرت في المجتمع المصري كله ،، و هي أصلاً غير متأصلة فيه !! مش عارف ،، انا ناوي أصلي و أدعي ،، ده اللي أقدر بيه حالياً .. بكره يقول كلام تاني ......

كل همي ،ن ميحصلش خسائر تانية في الأروااح !! تتحرق الحكومة أصلاً مفيش حد عايزها ،، لكن الأرواح اللي ماتت و بتموت ،، ايه ذنبها !!

أنا منهاار .. ليه ناس تموت !!! ده اللي من اول مسمعته ،ن و قلت الله يرحمه ،، جه التاني ،، زاد زهولي،، جه التالت !! بقيت مش قادر ،،جه الرابع ،، بقيت بعيط ... مش عارف ذنبوا أيه يمووت !! ليه ... عشان بيعبر عن رأيه ،ن و عشان وقف مع جماهير غاضبة!!

حاسس بدوشة في دمااغي !!!!!!!!!

[casperinoo]

معلش طالما متعرفش حاجه يبقي افضل ساكت
لو لحصل فينا النهارده ده في دوله محترمه كان يتشال فيها حكومه
ضرب نار وقنابل مسيله للدموع ومجموعه كبيره نزلت في الاخر كانت بتجري ورا الناس وتضربهم ويخدوهم ..
المظاهرة كانت سلمية جدا والامن هو اللي عمل القلبان ده كله
انا اللي زعلان عليه ان 90% من المظاهره ناس نضيفة ..اول مره احس ان فيه ناس بتحب البلد بجد مش مظاهرة علشان شغل ولا اجور متأخره...ناس عايزه مساواه وحرية و كل واحد ياخد حقة ((العدل)).الغلطان يتحاسب اي كان هو مين ...
.انما بقي الناس الغلابة المطحونين واللي طالع عينيهم كل واحد نايم في بيتة بيبكي علي حالة وبيفكر يأكل العيال ايه بكره

[mahmoudysf]

انا ردي عليك ممكن يبقى بكلام كتير
لاكن هختصره في الاتي يا ريتني كنت مع الناس دي
وللاسف لما حبيت انزل كان صعب اوصل للناس بسبب الكردونات الامنية
وان شاء الله يطلع النهار واللي ملحقش ينتفض لكرامتة يلحق
قبل مانترحم على الكرامة والشجاعة للابد
ربنا يهدي الناس للحق

[smsm_nabawy]

أستاذ نوبي ،، عندك حق ...
سبق السيف العذل

و لازم نقف مع بعض ،،

[A.Saad]

معلش طالما متعرفش حاجه يبقي افضل ساكت
لو لحصل فينا النهارده ده في دوله محترمه كان يتشال فيها حكومه
ضرب نار وقنابل مسيله للدموع ومجموعه كبيره نزلت في الاخر كانت بتجري ورا الناس وتضربهم ويخدوهم ..
المظاهرة كانت سلمية جدا والامن هو اللي عمل القلبان ده كله
انا اللي زعلان عليه ان 90% من المظاهره ناس نضيفة ..اول مره احس ان فيه ناس بتحب البلد بجد مش مظاهرة علشان شغل ولا اجور متأخره...ناس عايزه مساواه وحرية و كل واحد ياخد حقة ((العدل)).الغلطان يتحاسب اي كان هو مين ...
.انما بقي الناس الغلابة المطحونين واللي طالع عينيهم كل واحد نايم في بيتة بيبكي علي حالة وبيفكر يأكل العيال ايه بكره

البلد ادمرت
ياترى ده بيحصل فى البلاد اللى اكلمت عنها

[ashouhdy]

بلد اية اللى اتدمرت ؟!

الاقتصاد قبل كان بيخسر ملايين فى حكم مبارك فقط من تصدير الغاز لأسرائيل بأقل من ثمن انتاجة تقريبا 13مليون دولار يوميا !

تفتكر لو النظام استمر حيخسر تانى اكتر كام ؟؟؟

البورصة :

خسرت فى مايو اللى فات فى ظل النظام المبارك الجميل اكتر من خسائر الانتفاضة بتاعة الشباب !!


يبقى بلد اية اللى خربت !!