Tweet
أيادي مصرية سمرة
ليها في التمييز
ممدودة وسط الزئير بتكسر البراويز
سطوع لصوت الجموع شوف مصر تحت الشمس
ان الاوان ترحلي يا دولة العواجيز
عواجيز شداد مسعورين
أكلوا بلادنا أكل
ويشبهوا بعضهم نهم خسة وشكل
طلع الشباب البديع قلبوا خريفها ربيع
وحققوا المعجزة صحوا القتيل من القتل
اقتلني ...قتلي ما هايعيد دولتك تاني
باكتب بدمي حياة تانية لأوطاني
دمي ده ولا الربيع
الاثنين بلون اخضر
وبابتسم من ساعدتي ولا احزاني
تحاولوا .. ما تحاولو
ما تشوفو وطن غيره
سلبتوا دم الوطن وبشمتوا من خيره
احلامنا .. بكرانا اصغر ضحكة علي شفة
شوفتوش الصياد يا خلق بيقتله طيره ؟
السوس بينخر وسارح تحت إشرافك
فرحان بيهم كنت و شايلهم علي كتافك
أما اهالينا من زرعوا وبنوا وصنعوا
كانوا مداس ليك ولولادك و أحلافك
ويا مصر قام العليل
رجعتله أنفاسه
و باس جبين الوطن .. مال الوطن باسه
من قبل موته بيوم صحوه اولاده
مين كان سبب علته .. محبته لناسه
الثورة فيضان قديم محبوس ماشوفوش زول
الثورة لو جد ماتبانش في كلام او قول
تقلب وتعدل في سرية
تفور في القلب وتنغزل فتلة فتلة في ضمير القول
ماتخافش علي مصر يا أبا
مصر محروسة
حتى من التهمة دي اللي فينا مدسوسة
و لو أنت أبوها بصحيح وخايف عليها قوي
تركتها ليه بدن بتنخره السوسة؟
و بيسرقوك يا الوطن قدامنا عيني عينك
ينده بأول وطن و بقولي قوم فيينك
ضحكت علينا الكتب بعدت بنا عنك
لولا ولادنا اللي قاموا يسددوا دينك
لكن خلاص يا وطن صحيت جموع الخلق
قبضوا علي الشمس بايديهم و قالوا لا
من المستحيل يفرطوا عقد الوطن تاني
و الكدب تاني محال يلبس قناع الحق
بكل حب الحياه .. خووض في دم اخوك
قول انت مين
للي باعوا حلمنا و باعوك
أهانوك وذلوك ولعبوا قمار بأحلامك
نيران هتافك تحرر صاحبك الممسوك
يرجعلها صوتها مصر
تعود ملامحها
تاخد مكانها القديم
و الكون يصالحها
عشرات سنين تسكنوا بالكدب في عروقنا
والدنيا متقدمة
و مصر مطرحها
كتبتوا اول سطور في صفحة الثورة
وهما وعلما وخبرا مزاورة ومناورة
وقعتوا فرعون
هرب من قلب تمثاله
لكن جيوشوا مازالوا يحلموا ببكرة
صباح حقيقي ودرس جديد قوي في الرفض
اتاري للشمس صوت
و اتاري للارض نبض
تاني معاكم رجعنا نحب كلمة مصر
تاني معاكم رجعنا نحب ضحكة بعض
مين كان يقول ابننا يطلع بنا من النفق
دي صرخة ولا غنا
وده دم ولا شفق
اتاريها حاجه بسيطة الثورة يا اخونا
مين اللي شافها كده
مين اول اللي بدأ
مش دول شبابنا اللي قالوا كرهوا أوطانهم
ولبسنا توب الحداد وبعيدنا قوي عنهم
هما اللي قاموا النهارده يشعلوا الثورة ويصنفوا الخلق مين عانهم
و مين خانهم
يادي الميدان اللي حضن الفكرة وسهرها
يادي الميدان اللي فتن الخلق وسحرها
يادي الميدان اللي غاب اسمه كتير عنه
وصبرها مابين عباد عاشقة و عباد كارهة
شباب كأن الميدان اهله وعنوانه
ولا في الميدان نيسكافيه ولا كابتشينو
خدودوا عرفوا جمال النوم علي الاسفلت
و الموت عارفهم قوي وهما عارفينه
لا الظلم هين يا ناس ولا الشباب قاصر
مهما حاصرتوا الميدان عمره ما يتحاصر
فكرتني يا الميدان بزمان وسحر زمان
فكرتني باغلي ايام في زمن ناصر
شايل حياتك علي كفك
صغير السن
ليل بعد يوم المعاناة
وأنت مش بتأن
جمل المحامل وانت غض
باتعجب امتي عرفت النضال
اسمحلي حاجه تجن!
اتاريك جميل يا وطن
ما زلت وهاتبقي
زال الضباب وانفجرت باعلي صوت لا
حرضتنا نبتسم ودفعت انت الحساب
وبنبتسم بس بسمة طالعة بمشقة
فينك يا صبح الكرامة الا البشر هانوا
واهل مصر الاصيلة اتخانوا و اتهانوا
بنشتري العزة تاني والتمن غالي
فتح الوطن للجميع قلبه واحضانة
الثورة فيض الأمل
وغنوة الثوار
الليل اذا خانه لونه ينقلب لنهار
ضج الضجيج بالنداء
اصحا يا فجر الناس
فينك يا صوت الغلابة وضحت الانفار
واحنا وراهم اساتذة خايبة تتعلم
ازاي نحب الوطن وامتي نتكلم
طال الصدا قلبنا ويأسنا من فتحه
قلب الوطن قبلكم كان خاوي ومضلم
اولنا في الجولة
لسه جوله ورا جوله
ده سوس بينخر يا ابويا في جسد دولة
ايوا الملك صار كتابة انما ابدا
لو غفلت عينا لحظة هايقلبوا العملة
لكن خوفي مازال جوه الفؤاد يكبش
خوفي اللي ساكن شقوق القلب و معشش
ببقولي مش راح يسيبوا وهايلقولهم سكك وبيبان ما تتردش
وحاسبوا قوي من الديابة اللي في وسطيكم
وألا تبقي الخيانة منكم فيكم
الضحكة علي البق بس الرك ع النيات
فيهم عدوين اشد من اللي حواليكم
Comment