الحل لكل مشاكلنا في مصر .... مابعد 25 يناير بنظرة أخرى

[a7madramadan]

السلام عليكم ورحمة الله وبركاته

وحشتوني والله يـــا جماعة وأتمنى تكونوا كلكم بألف خير

أكيد الثورة الي بدأت ولم تنتهي لحد دالوقتي مافيش اي شك في أسبابها ..
وممكن نكونوا كلنا متفقين على الحل الوحيد الي ممكن يوقفها نظريا وهو تنحي حسني مبارك

بس للأسف عمر ما تنحي مبارك هيكون هوه الحل الجذري لمشاكلنا في مصر

احنا محتاجين تغيير في السلوك العام والموضوع هيبدأ بينا إحنا ومش بأي قرارات ولا تغييرات دستورية وقيادية

احنا من النهاردة محتاجين نقولو لأ بس بطريقة مختلفة

محتاجين نقولو لأ للرشاوي من النهاردة مش هندفعوا قرش واحد لأي مصلحة حكومية ولا خاصة لأي نوع من التخليصات في الأوراق علشان نقضوا على البيروقراطية المبالغ فيها والمحسوبية والعمولات

محتاجين نقولو لأ للي بيغلط قدامنا ... محتاجين نبلغوا الشرطة على موزع مخدرات في الشارع
لازم نقولو لأي حد بيغلط أيا كان مركزه قف عندك انت بتاخد حقي / انتي بتظلمني / انت بتضرني

محتاجين في أقرب فرصه نطلعوا بطاقات انتخابية و صوتنا يوصل ومانتنازلش بأي ثمن عن صوتنا ( وأكيد عارف ان لو سيادة الرئيس مبارك ما تنحاش في احتمالية ان الي حصل في كل الانتخابات يتكرر تاني ) بس ياريت تكون دي البداية

الموضوع أكيد عبارة عن بذرة لحاجة كبيرة ناقصة بلدنا ومحتاجة تكبر وهتكبر بإضافاتكم ليها وبتطبيقها

شخصيا أخذت على نفسي عهد بالبداية بنفسي في تحسين وضع بلدي
وياريت كل الي يقرأ الموضوع ياخد على نفسه عهد قدام ربنا انه عاوز يكون أحسن ويفيد بلده ويفيد نفسه لإن الإصلاح هيبدأ بينا إحنا مش بس بالقيادات السياسية

ربنا يصلح حالنا وحال بلدنا

والموضوع مفتوح لكل التعليقات والإضافات

[gemy1]

انت راجل محترم و ياريت الناس كلها تفكر زيك كده

[a7madramadan]

أشكرك على ردك

ومسألة ان الناس تفكر كده أكيد هتنتشر لما كل واحد يبدأ بنفسه وأكيد بنشر الفكر ده بكلامنا مع كل الأقارب والأصدقاء والمعارف وحتى الغرباء في طريق (أصدقاء الطريق) ومايفضلش يقول : ما الناس كلها .... والشعب المصري ....وطبيعة المجتمع ....... وكل الكلام الي لا بيحل ولا بيربط وبيرجعنا لورا يوم ورا يوم

[gemy1]

صح و الله و المفروض اننا ننحى المصالح الشخصيه دلوقتى و نشوف حال البلد اللى بينحدر للأسوأ يوم بعد يوم و ربنا قبلنا مش هايسيب حق الشهداء دول

[a7madramadan]

الشهداء دول ما أقدرش أقولهم ولا لأهلهم غير احتسبوا اخوانكم شهداء و افتكروا كلام ربنا

..... قال تعالى ( وَلَا تَحْسَبَنَّ الَّذِينَ قُتِلُوا فِي سَبِيلِ اللَّهِ أَمْوَاتًا بَلْ أَحْيَاءٌ عِنْدَ رَبِّهِمْ يُرْزَقُونَ (169) آل عمران )
و الآية الكريمة الثانية (وَلَا تَحْسَبَنَّ اللَّهَ غَافِلًا عَمَّا يَعْمَلُ الظَّالِمُونَ إِنَّمَا يُؤَخِّرُهُمْ لِيَوْمٍ تَشْخَصُ فِيهِ الْأَبْصَارُ (42) إبراهيم )

ودول دورهم خلص وحقهم هيرجع ان شاء الله في الدنيا بمعاقبة كل من تلوثت ايده من دمائهم الطاهرة ....وجزء كبير من حقهم علينا هوه اننا نحقق السبب الدنيوي لموتهم وهوه اصلاح حال البلد الي أكيد بدايته في ايدينا احنا