وزير المالية المصري ..في العاشرة مساء .. سمك لبن تمر هندي

[osoliman88]

الراجل يا إما جاهل يا إما بيستطبعطنا
الراجل شكله فلة فلة أخر حاجة
منى الشاذلي بتقوله انتم ازاي هتعينوا ناس ووظائف جديدة ، وهتقوموا بتثبيت العمالة المؤقتة إزاي وأنتم بتقولوا ما فيش فلوس. يروح رادد الراجل عن حاجة تانية خالص ويقوله أصل الأغذية كانت موجودة في الميناء والناس اللى هما مستوردين مش معاهم فلوس لدفع الجمارك. ترجع منى الشاذلي تقوله أنا بأسالك عن الوظائف .. يروح الوزير قايل أصل الولاد الثوار غيروا حاجات كتيرة .... وبعدين راح داخل في موضوع الأجور وإن هي مش عاجباه.. أي كلام
ربنا يستر

[FunnyMickey]

كويس كويس
كده ضمننا فرض الضرائب علي شعب ليبيا الشقيق
:)

[amrelsaqqa]

ما جايز اكتشف ان البلد مليانة فلوس بس مكسوف يقول
الراجل شكله مش سهل على فكرة رغم ان كلامه فعلا غريب
بس بيضرب امثلة بالمكسيك والبرازيل وتركيا وماليزيا ومهاتير محمد يعنى شكله فاهم والله اعلم
واهو هيعين الناس فعلا وهيبدأ يصرف معاشات لأسر الشهداء 1500 جنيه
يعنى حتى لو كلامه غريب بس اهو هينفذ فعلا
كفاية انهم لو عملوا اعادة هيكلة لكل المرتبات وشالوا الناس اللى بتاخد 180 الف في الشهر يعنى قد مرتب 100 واحد بياخدو 1800 جنيه
حسبى الله ونعم الوكيل فيك يا للى في بالى

[amr mokhtar]

انا حاسس إنه فاهم و عنده خلفية علمية ... مجرد إحساس
بس هو فى الكلام مش مركز خالص و تسأله فى حاجة يرد فى حاجة تانية

[osoliman88]

منى بتسأله عن موضوع ديون مصر... راح رادد عن إستثمار أموال التأمينات الإجتماعية، وبعدين راح مدخل طلعت حرب في الموضوع.. أنا يا أخوانا مش قادر أمسك نفسي من الضحك. يا نهارد اسود يا جدعان

[osoliman88]

أسمعوا دي بيقولك الهند خادت نظام الضريبة الموحدة من مصر وطبقتها عندها... ده على أساس أنها إختراع مسجل بإسم مصر.... الصبر يا رب

[osoliman88]

من حرامي ومرتشي ونصاب الى غبي وأهبل .. يا قلبي لا تحزن .. والسلام عليكم والى لقاء في ثورة أخرى

[otefa]

الراجل شكله واخد أوامر صارمة بالأنضباط......يس باين عليه مش سهل ابدا ومن عاشقي الروتين ..........بس النظام المظبوط هايمشي أي موظف على العجين مايلخبطوش أن شاء الله

[hossam_elwani]

هو اسمه ايه وتاريخه العلمى والادارى ايه ارجو الافاده

[eng_volto]

انتو زعلنين كده ليه من كلامه
محنا زهقنا من كتر الكلام بطرس غالى مكنش حد يغلبه فى الكلام
ممكن الراجل ده من النوعيه الى مش بتعرف تتكلم - بيتكسف -
فمش بيعرف يجمع افكاره فى لحظه السوال
بس هو بيتكلم فى افكار كويسه وسياسات نجحه عايز ينفزها

ونشوف هيعمل ايه

[ecybrarian]

على فكرة سمير رضوان من اهم الخبراء في تخصصه في مصر..انا هاتجنن هو ليه عامل عبيط كدا؟؟؟ شكله فعلا اكتشف إن البلد مليانة فلوس ومش عايز يقول

[د/أحمد ابراهيم]

بصو يا جماعة انا سامع بجد ان الراجل شديد في الشؤن الماليه وانه فعلا يستحق المكان ده من زمان

موضوع اداؤه امام الكاميرا ده لا يعني انه فاشل

فيه ناس كتيره بتضرب لخمة امام النقاش المباشر

خليك مكانه وعارف ان 80 مليون بيسمعوك ؟ اي غلطه هتتحفظ مدي الحياه

ادوا الراجل فرصه

[amrelsaqqa]

بالراحة على الراجل !!!!!!!!!!!!!!!

[nevozaky]

يا جماعة على فكرة انا سمعت على الراجل ده من زمان انا ما شفتش البرنامج من اوله .لكن ده راجل صاحب علم وعلامة .وهو اللى وضع النظام المالى ونظام الاجور فى جنوب افريقيا بعد انتهاء العنصرية ووجود مانديلا .وعلى فكرة هو لقى فلوس كتير فى مصر بس مش عايز يغلط فى الناس اللى قبله .وبحكم وظيفتى انا اعلم جيدا ان فعلا فى فلوس كتير فى مصروالناس ما تعرفش حاجة .واللى يقول ان مصر فقيرة يبقى ما يعرفش مصر .ويا رب يصدق فى حاجات كتير ويطلع كلامه صح .

[hossam_elwani]

هل شارك فى وضع النظام المالى لتركيا فعلا ؟؟؟؟؟