هو في أية! انا بحلم ولا اية؟

[mahmoudselim]

هو في اية بجد؟ هو انا بقالي25 سنة بحلم ان دي من اسوء فترات مصر علي مدي تاريخها. لايكونش انا اصلا مش عايش في مصر وعايش في بلد تانية فيها كمية الفساد دا ودولة مصر العظيمة لسة عظيمة ي ما هي؟!! ولا يكون انا مصري بس عميل وخاين علشان عاوز اخرب استقرار مصر وبطالب بتنحي القائد العظيم صاحب الضربة الجوية و صاحب انتصار اكتوير بالمرة وصاحب الطيارة كمان والدبابة والسفينة والمدفع والرشاش يلا بقي ماهي ظاطط!! وهو كمان جمعة الشوان ورأفت الهجان بس متخفي وهيطلع كمان سعد الدين الشاذلي وفي الاخر 400000 جندي مصري اسمهم محمد حسني مبارك!!! اية ناااس في اية انا بجد هاتجنن كمية جروبات فظيعة وكمية بشر فيها افظع بيطالبو برجوع الريس ومش عارف اية نردلو اعتبارة, وكرامتة من كرامة مصر , لا وجمعة شكر و و و وهو في اية ؟

سؤال واحد بس ممكن اغير موقفي بعدية تماما !! انا عاوز 10 حاجات بس عملها حسني مبارك خلال 30 سنة فادت علي الاقل 50 مليون مصري وبأثر رجعي كمان ؟ بطريقة مباشرة! وفي نفس الوقت نفي بالدليل القاطع 10 حاجات عملها نفس الشخص أضرت بأكتر من 80 مليون مصري بشكل مباشر؟!!

انا بجد مش قادر اتوصل لتحليل نفسي لكذا واحد من معارفي الشخصية بيدافعوا بستماتة عن الرئيس المصري السابق!! بجد انا مش قادر افهم اذي ولية ولامتي؟؟ ولا الجروبات ال علي الفايسبوك والناس هناك مموتة نفسها من العياط يا عيني علي اجمل ايام مصر ال مش هترجع تاني!!!

في اية بجد انا اخر حاجة كنت اتوقعها ان يطلع شاب مثقف يدافع عن الرئيس السابق وعن نظامة .. اخر حاجة كنت اتوقغها فعلا.

يا اما انا فعلا عايش في حلم ومش قادر اشوف ان مصر في عصر مبارك بقت احلي من ماليزيا واجدع من الهند وأجمد من كوريا!!!

الله أكبر , حسبي الله ونعم الوكيل

[cheetos_892005]

في ناس كتير اتعودت عالعبوديه ....
من نوعيه تاكل و تشرب و تنام و تصحي الصبح تدعي عالحكومه و تشكو حالها ....
وعلي اخر الشهر ندعو بالستر و الحمد لله ان احنا عايشين .....
ناس تجيب ورا 200 سنه ...

[Ralliart]

والله انا حاسس اني هتشل
بعض الناس من عينة اللي بيسمعو تيمو وبيتفرجو على مهند صعب عليهم الراجل الليي بهدل فينا وفي أهالينا وحطنا في أسفل ترتيب الدول وكان عايز يورثنا كمان!!
ااكد لحضرتك ان الناس دي متعرفش اي حاجة ولا تعرف مين الوزير اللي سرق كام مليار ولا ابنه عمل ايه ولا اي بتنجان هما اعتبرو اللي بيحصل مسلسل واتأثرو وعيطو في آخره
إذا كان كلهم بيقولو انه قائد الضربة الجوية معناها انه خرج ركب الطيارة وساق قدام وبقية الطيارات وراه زي جريندايزر كده
مع انه كان في غرفة العمليات مع السادات !!

جرب اسأل اواحد فيهم كدة مين هو الشاذلي هتلاقيهم ولا يعرفوه مع ان دوره كان اكبر من مبارك بكتير والراجل كان بيحارب من ايام الحرب العالمية الثانية بس الاعلام على مدى 30 سنة ركب في ذهن الناس ان البطل الوحيد في اكتوبر هو مبارك وعلشان كده اخترناه

[blazer]

انا كمان مش مستوعب
ازاى واحد اتقتل بسببه اكتر من 300 نفس و اصابه 5000 منها كتير اوى بعاهات مستديمه
عشان يحافظ على نفسه
غير الاكل المسرطن والمياه الملوثه والهواء المسمم
دا طبعا غير الذل والاهانه داخل البلد من اصغر امين شرطه
وخارج البلد من اى حد
والسرقه والرشوه والكوسه والمحسوبيه والتواطىء مع امريكا واسرائيل لايذاء الشعوب العربيه واحتلاال العراق ولبنان
بجد ناس مغيبه وجاهله واعتادوا الذل واحبوه

[hossaam]

اصل دي عقدة الاب الروحي...والوالد..والقائد...والرمز...والكلام ده
احنا اللي بنعمل الفراعنة ..فعلاااااا

هانقول ايه؟!....حرية رأي...ما تشغلش بالك

[cheetos_892005]

جرب اسأل اواحد فيهم كدة مين هو الشاذلي هتلاقيهم ولا يعرفوه مع ان دوره كان اكبر من مبارك بكتير والراجل كان بيحارب من ايام الحرب العالمية الثانية بس الاعلام على مدى 30 سنة ركب في ذهن الناس ان البطل الوحيد في اكتوبر هو مبارك وعلشان كده اخترناه

+111111111111
كنت قاعد مع واحد صحبي عالقهوه ((معايا في هندسه متعلم يعني )).....وهو من اشد المؤيدين انه كان يكمل فترته و حرام نهينه و هو اللي حارب والكلام ده ....
فا جيه خبر وفاه الشاذلي ....بيقلي مين الشاذلي ده ....قلتله مهو من وساخه النظام اللي انت بتدافع عنه بتسال السؤال ده ..
اتكتم قوي .....
بالحق ؟؟؟
هو مين كان قائد المدرعات والمشاه والبحريه و المدفعيه؟؟؟؟ولا الطيران اهم من دول ؟؟؟؟
انا معرفش تخيلوا

[mahmoudselim]

مشغلش بالي اذاي بس ياباشا .. الحركات دي لو تطورت او زادت وانضملها اعداد تانية هترجعنا 200 سنة لورا فعلا .. ال مخوفنى فعلا ان في ناس مستعدة بس ان الحركات دي بالبلدي كدا تكمل وتعمل الدور ال عليها وبعد كدا ممكن تحصل حاجات ماحدش كان يتوقعها لاقدر الله.. لسة علي فكرة الامور مستقرتش ودلوقتي في جذب وشد من الناحيتين والله أعلم هترسي علي اية

[mahmoudselim]

+111111111111
كنت قاعد مع واحد صحبي عالقهوه ((معايا في هندسه متعلم يعني )).....وهو من اشد المؤيدين انه كان يكمل فترته و حرام نهينه و هو اللي حارب والكلام ده ....
فا جيه خبر وفاه الشاذلي ....بيقلي مين الشاذلي ده ....قلتله مهو من وساخه النظام اللي انت بتدافع عنه بتسال السؤال ده ..
اتكتم قوي .....
بالحق ؟؟؟
هو مين كان قائد المدرعات والمشاه والبحريه و المدفعيه؟؟؟؟ولا الطيران اهم من دول ؟؟؟؟
انا معرفش تخيلوا

ما هي دي برضوا من وساخة النظام السابق واعاوانة انة علي مدار 30 سنة بيفهمنا ان نصر أكتوبر هو الضربة الجوية ال كسبتنا 90% من الحرب قبل ما يخطي اي جندي مصري شريف ارض المعركة!! انا فهمت لية دلوقتي علي مدار 30 سنة مركزين علي الضربة الجوية فقط.. وللاسف فهمت متأخر

[cheetos_892005]

العناصر اللي طالعه اليومين دول بتوع بالروح بالدم .......
اكتر ناش كانت مخوفاني انو يكمل ال 6 شهور و يقعد يلعب عالعاطفه الهبله ديه ....
و في الاخر كله يروح ....و يمكن نطلع احنا كخه في الاخر ...

[mazagngi2010]

شعب عدو نفسه بجد بتفرس من الشخصيات دى الله يحرقهم وفعلا دول اللى ممكن يقضوا على الثوره بدرى بدرى ومعاهم اللى بيتظاهروا علشان بدلات وفلوس فى كل حته
ناس عايزه الاعدام ضربا بالجزم
فعلا شويه عبيد
المشكله فى الجهل وانهم فاكرين انهم هيخسروا قدام مع ان الخير كله جاى ربنا يستر فى الشهر ده
بدل مانطلع عليه فى شرم ونخربها الناس عايزه تعمل له مظاهره وفاء ربنا يسهل فى الشهر ده وميعلاش صوتهم

[mazagngi2010]

رد مكرر

[amado ibrahim]

متنسوش يا جماعة ان كان فيه حوالى مليون منتفع من بقاء النظام السابق

العالم بتوع شباب الجيل دول اقرب مثال

غير الناس الغلابة اللى من عينة (دا راجل كبير - دا ابنه اللى عمل كده- هو ذنبه ايه- عفى الله عما سلف)
الغريب ان اللى بيقول كده ممكن يكون مش لاقى ياكل ولا يشرب ولا يجوز اولاده
لكن من الخداع اللى اتعرضله الشعب طوال 30 سنة بيقول كده
وده دليل على قوة الدعاية اللى كان بيتكلم عنها جوبلز
ومحدش يسألنى مين جوبلز ده

[mahmoudselim]

ربنا يستر فى الشهر ده
بدل مانطلع عليه فى شرم ونخربها الناس عايزه تعمل له مظاهره وفاء ربنا يسهل فى الشهر ده وميعلاش صوتهم

الراجل معاة حرس الرياسة في شرم.. وعايش حياتة طبيعية وعلي اتصال دائم بأعاونة في الحكم زى زكريا عزمى وعمرو سليمان, وبيوصلة اخر التقارير. دا حسب اكتر من مصدر مصري واجنبي. طيب دا يبينلك اية؟ وفي دعوات زي ما حضرتك تفضلت بمظاهرات تعبير عن الوفاء مليونية.

شوف انا نفسي ال شاركت في الثورة لسة لحد دلوقتي مش مستوعب انة مشي . اة والله
تخيل بقي هو وابنة وحاشيتة بيفكرو اذاي

[waelfarid]

العبيد دول زي الجعران حشرة لا تعيش ولا تنتعش الا في روث (مخلفات)البهائم لو طلعت منها تموت حسبنا الله ونعم الوكيل