تعالى اقولك..وائل غنيم ماسوني ولا مش ماسوني....بقلم هشام عفيفي

[Xander2010_Evo]

السلام عليكم
أولآ ده مجرد مقال من شاب زيي قريته علي الفيس بوك
أتمني الناس كلها تقرأه
وإحنا في عصر الديمقراطية يعني كل واحد يقول رأيه بإحترام بدون تجريح والإحترام للأخر متبادل
أسيبكم مع المقال بقي

بدايه..خلينا متفقين..ان في ميه وتلاتين الف واحد – ان مكانوش ميه واربعين - ..هيقولي..انصحك بانك تخش تقرا البروتوكلات الصهيونيه..وتقرا عن الماسونيه..وهيتهمني بالتخلف.....

----------

بعد الثوره المصريه بتاعت 25 يناير...انتشرت الكثير من الصور علي الفيس بوك...الحق وائل غنيم ماسوني...الحق ده لابس تشرتات..الحق ده لابس حظاظات...الحق بتاع البيت الابيض هو راخر لابس حظاظات !..


ارجع كام يوم للوراء كده..واتفرج علي التلفزيون المصري اثناء الثوره...الحق اجندات....الحق اخوان....الحق كنتاكي...
الحق..عناصر اجنبيه .- بالمناسبه كان في عناصر اجنبيه بالفعل..بس كانوا الصحفيين الي بيغطوا الخبر..اصلهم مبينجموش -

الماسوونيه...السيطره علي العااالم..اليهوووود...فووقوا يا مصر !!! ......

--------

خلينا انا وانت كده عزيزي القارئ..قاعدين علي القهوه وبنتناقش...ومعانا واحد رخم انا وانت مبنحبهوش

الصور الي علي الفيس..بتدل علي ان وائل غنيم ماسوني !! ..حلو....وكمان قالك في خبر من ويكيليكس.المشروع العجيب الي كنت بثق فيه الاول....قالك ان امريكا جندت وائل غنيم عشان يسقط النظام...!! حلو كده ..

استرجع معايا كام نقطه ..

يعني وائل غنيم..بالصلاة علي النبي كده..كان قاعد في امريكا...ولما حصلت حادثه خالد سعيد...راحت امريكا قالتله ايه ...

السيناريو الاولاني

"خد يا واد يا وائل..بص يا سيدي..اعمل صفحه..وسميها كلنا خالد سعيد...واقعد نمي فيها...وكبرها..وعليها..خليها زي بنتك ...حافظ عليها...وان شاء الله استني لما تونس تخلع بن علي ..وابقي هيج الشعب واسقط النظام..بس متتأخرش يا ولا !! "

السيناريو التاني

" خد يا واد يا وائل..بص يا سيدي..بما ان الشعب اسقط النظام في تونس..وانت صفحتك ماشاء الله كبيره وفيها ناس حلوين...فاحنا هنجندك..عشان تسقط النظام عندكوا انتوا كمان..وابقي خد معاك كام واحد كده ..عمرو سلامه علي محمد دياب..وبقوا قدوه للشباب يا حبيبي...واد يا وائل..امريكا بتعتمد عليكوا يا ولاد !! ..وائل راح قايل : حاضر يا طنت "


السيناريو الثالث

" واد يا وائل ..انت عارف يا حبيبي انك ماسوني..وان امريكا ماسونيه هي رخرا...وانت عاااارف يا حبيبيي...نظام مبارك وحش ..مش رادي يتعاون علي اسرائيل....قاطع عنهم الغاز والميه والنور....ومش راضي يقفل المعبر..ولا يبني جدار مع اسرائيلين عشان يساعد الفلسطينيين الوحشين ..ووضعنا في اسرائيل متأزم اوي يا واد...خد يا حبيبي الناس الي عندك علي الصفحه..واسقطوا النظام ...عشان نجيب واحد حلو مع اسرائيل ..في ظرف عشرين يوم تسقطوه يا ولا ...متتأخرش !! ..حاضر يا طنت "


ولك عزيزي القارئ تخيل اي سيناريو انت عايزه....حيث ان امريكا واسرائيل...كانوا متضايقين جدا من نظام مبارك الوحش الكخه...الي مكانش متعاون معاهم...فجابولنا وائل..عشان يسقط النظام ويضحك علي الشعب ويجيبوا واحد يخدم اسرائيل وامريكا


يا صديقي القارئ..بالله عليك كده...امريكا هتهم لأمرنا بتاع ايه ؟؟؟...يعني هتستفيد ايه لما النظام في مصر ..يكون ديمقراطيه...يكون حاجه محترمه...تحقق مطالب الشعب الي بينادي بيها بقالها تلاتين سنه

يعني مثلا ..وائل غنيم ده ..جاب مطالب من دولابهم الي في اسرائيل ..بافتراض انه ماسوني يعني ؟؟؟...

يعني مثلا ..الغاء قانون الطوارئ..وان الفتره الانتخابيه تكون فترتين اقصاهم...وتشيل الشروط التعجيزيه عشان الريس يترشح..دي مطالب اسرائيل مثلا ..وقالت لوائل اعمل كده يا وائل ؟؟؟؟


بلاش دي ..خد دي ...كرامتك الي كانت بتتهان مع الشرطه كل يوم..في اي مصلحه...مصالح البلد الي كانت واقعه...المليارات الي اتسرقت..الي تشكل ميزانيه دوله ...هل ده كان شيء بيزعل اسرائيل وامريكا والماسونيه فراحوا قايلين لوائل ..يا واد يا وائل..عايزين نعمل البلد حلوه..ونرفع راس وكرامه المصري عشان نعرف نسيطر عليه ؟؟؟


بافتراض افتراض خيالي علمي جاي من توم وجيري..وائل ماسوني...ها..وبعدين...اقصى حاجه ممكن يعملها ايه ؟؟
- وراعي برده انه كان مؤسس فكره خمسه وعشرين يناير او احد المساهمين فيها –


ها ..هيعمل ايه ...هيقولنا مثلا..يا جماعه ..اقلبوا ماسونيين..واحنا نقول..سمعا وطاعه يا وائل !!
هيقولنا مثلا..يا جماعه..تفرقوا ..وكسروا في بعض..واعملوا مشاحنات..ومتنضفوش الشارع !!! ..سمعا وطاعه يا وائل ؟؟


يعني مثلا مثلا ..اقصى حاجه ممكن يعملها ايه....اقصى اقصى حاجه..هيقولهم يا جماعه البسوا حظاظات ؟؟

الشخص الرخم الي كان معانا في القهوه : ..

طب بص يا سيدي...تفسر بايه الحظاظات والتشرتات ادي واحد

تفسر بايه ..ان انت بتقول ..التلفزيون المصري كان بيقول اجندات...واهو دلوقتي مفيش حكومه..الحكومه بردو الي بتقول علي وائل انه ماسوني ؟؟ ..ادي اتنين

يااااابني..- ولازم يطول فيها كده - ..فووق بقي..وائل ده ماسوني...ماسووني..يعني عايز يسيطر علي البلد عشان اسرائيل تحتلنا !! انتا مبتقراش بروتوكولات صهيونيه ؟؟


---------

الحظاظات كل لون بيرمز لرمز...يعني الاخضر الي كان وائل لابسه..بيدل علي السلام وسلام البيئه ..
رمز بيستخدمه...زي علامه النصر كده V ...

التيشيرت...الماركه ماركه عالميه معروفه...شبيهه بعلامه البوجو – مش بيجوه عشان بتقولوها غلط - ..علي كده الي راكب عربيه بوجو وعليها الاسد اياه..يبقي ماسوني كافر زنديق !!


الجمله الاخيره والمطلوب انك تستوعبها كويس :

وانا اسف يا وائل ان كنت بتقرا هذا الكلام...ولكن لو افترضنا فرض ان وائل ماسوني

الشعب المصري مش شعب متخلف...احنا شعب قمنا بالثوره في عشرين يوم ...نعرف نفرق..اذا كان الشخص في مصلحتنا ولا لا ...محناش قطيع غنم...لو واحد قالنا روحو هنروح..وارجوا هنرجع...

عمر ما كانت الديمقراطيه وكرامه المصري خدمه لمصلحه اسرائيل

النظام السابق..كان اكبر خادم وحامي لاسرائيل...

وتأكد ..انه لو مكانش حامي وخادم لاسرائيل..مكانش قعد 30 سنه ...زي صدام كده ..راحوا وجابوه

اسلوب التفرقه ..وتخوين الجميع ...هو احد الاساليب الاسرائيليه فعلا ..
لما تلاقي الصحافه والاذاعات الاسرائيليه ..عماله تقول في اخبار عشان توقع بين ده وبين ده

هي دي اساليبهم..هتلر كان بيحرق فيهم عشان كده...كان هتلر ينتصر..يقولوا هتلر خسر
كان كل شيء ..عكسه...

اكرر مقولتي الاخيره..

نحن ليس بقطيع غنم..عشان حد يتحكم فينا

وائل ماسوني مش ماسوني ..- وبالمناسبه فكره ان يكون في احتمال انه ماسوني دي تدل علي عدم الوعيي ..وعدم الوعيي الي احنا فيه هو اكبر خادم لاسرائيل - ...مش هيفرق معانا..ولا حد هيتحكم فينا..ولا احنا هننساق ورا اي رأي...فاحنا عندنا عقل ..بنحكم بيه...غياب العقل..هو الفكره الي عايزه تطبقها اسرائيل علينا...


اعتذر اعتذار كبير لوائل غنيم.

--------

منتظر الناس الي هتقولي روح اقرا البروتوكلات الصهيونيه

هشام عفيفي
16-فبراير-2011

[img2]http://a5.sphotos.ak.fbcdn.net/hphotos-ak-snc6/180413_184439114925674_120586064644313_427536_2783 270_n.jpg[/img2]

[FunnyMickey]

معاه في كل كلمه قالها
وعندي رأي بسيط بس

ماسوني ولا مش ماسوني اهو لنفسه
حنعمل بيه ايه يعني

اما مخطط لامريكا فده مستحيل
لان امريكا نفسها كانت مع الريس لاخر وقت
وقلبوه لما عرفوا انه الشعب مش حيسكت

الثوره قامت خلاص وحققت اهدافها
وان الاوان عشان نتابع الاهداف دي
ونفوق ببقي

للحلوين اللي كل واحد نازل قدام شغله كل همه انه يعمل مظاهرات عشان يتثبت
ان الاوان اننا نفوق لكدابين الزفه اللي كانوا قاعدين في بيوتهم والناس بتموت
ونازلين دلوقتي يلموا الحلاوه من الشارع

ان الاوان لاسكات كل من يريد اهدار اهداف الثوره لاسباب شخصيه
اعلاها
زياده المرتب
وتولع البلد بعدها

مش عاوز الشخص اللي بيفكر في نفسه وبس
مش عاوز شخص لو جاله بكره عقد في السعوديه بكام الف زياده يبيع البلد ويمشي
وبعد كام سنه لو ربنا كرم مصر وبقينا دوله فيها فلوس اكتر من الخليج يسيب شغله في الخليج ويقول انا مصري


تعرفوا من شهر وشويه كده كنت بحلم اني ابقي رئيس
اه والله

كان نفسي اوي ابقي رئيس جمهوريه

كان فيه قرا كده كنت حاخده لو انا مسكت المنصب ده

حعمل دعوه لللمصريين المسافرين بره
عاوزكو تعمروا البلد بخبراتكو
وتعلوها معايا
ومع الشعب
ونعلي باسم مصر لفوق
وتتعبوا معانا لحد البلد ما تقوم علي رجلها

اللي مش عاووز يرجع ميرجعش
هوا حر
بس لو جه بعد البلد ما تقوم
حيعامل معامله الاجنبي
من الاخر كده
اللي حيفضل بره
يخليه بره
ولو حب يرجع
يتنازل عن الجنسيه ويعيش بلا هويه

شرير انا مش كده
احمدوا ربنا بقي اني مبقيتش رئيس
:)

[ahmedkoko]

والله انا متفرقش معايا هو ايه؟ يطلع زي ما يطلع..انا اللي يهمني ان الثوره نجحت و الشعب تغلب علي حاجز الخوف اللي كانوا دايما معيشينا فيه و بقينا شعب حر.
انا متهيآلي ان بعبع الاخوان مبقاش نافع ولا بعبع اسرائيل فقالوا نفتكس بعبع جديد نخوفهم بيه .

[ahmed-moga]

معاه في كل كلمه قالها
وعندي رأي بسيط بس

ماسوني ولا مش ماسوني اهو لنفسه
حنعمل بيه ايه يعني

:)

عندك حق والله ياصبحي مش عارف ليه بالأحداث دية حاسس ان فيه البعض في الفتره المقبله هنقول اخترناه وبايعناه
وائل غنيم مع خالص احترامي وشكري له زيه زي اي حد من شباب الثوره ويمكن فيه اكتر قدم منه ففيه اللي لسه معتقل حتيي الأن او اللي اتصاب اصابه عملتله عاهه مستديمه واللي اتحاكم محاكمه عسكريه ب25 سنه سجن ياريت نعطي لبقية الشباب اللي شاركوا في الثوره حق قدرهم ومنختذلش الثوره في شخص بعينه علشان تم استضافته في القنوات الفضائيه وائل غنيم زيه زي اي شاب شارك في الثوره موضوع ماسوني او غير ماسوني فهذا شأنه الخاص به وحده ولايحق لوائل ان يدعو احد من الشباب لأعتناقه

[otefa]

وائل غنيم .........في الأغلب مصرية وليس أمريكية

[otefa]

معاه في كل كلمه قالها
وعندي رأي بسيط بس

ماسوني ولا مش ماسوني اهو لنفسه
حنعمل بيه ايه يعني

اما مخطط لامريكا فده مستحيل
لان امريكا نفسها كانت مع الريس لاخر وقت
وقلبوه لما عرفوا انه الشعب مش حيسكت

الثوره قامت خلاص وحققت اهدافها
وان الاوان عشان نتابع الاهداف دي
ونفوق ببقي

للحلوين اللي كل واحد نازل قدام شغله كل همه انه يعمل مظاهرات عشان يتثبت
ان الاوان اننا نفوق لكدابين الزفه اللي كانوا قاعدين في بيوتهم والناس بتموت
ونازلين دلوقتي يلموا الحلاوه من الشارع

ان الاوان لاسكات كل من يريد اهدار اهداف الثوره لاسباب شخصيه
اعلاها
زياده المرتب
وتولع البلد بعدها

مش عاوز الشخص اللي بيفكر في نفسه وبس
مش عاوز شخص لو جاله بكره عقد في السعوديه بكام الف زياده يبيع البلد ويمشي
وبعد كام سنه لو ربنا كرم مصر وبقينا دوله فيها فلوس اكتر من الخليج يسيب شغله في الخليج ويقول انا مصري


تعرفوا من شهر وشويه كده كنت بحلم اني ابقي رئيس
اه والله

كان نفسي اوي ابقي رئيس جمهوريه

كان فيه قرا كده كنت حاخده لو انا مسكت المنصب ده

حعمل دعوه لللمصريين المسافرين بره
عاوزكو تعمروا البلد بخبراتكو
وتعلوها معايا
ومع الشعب
ونعلي باسم مصر لفوق
وتتعبوا معانا لحد البلد ما تقوم علي رجلها

اللي مش عاووز يرجع ميرجعش
هوا حر
بس لو جه بعد البلد ما تقوم
حيعامل معامله الاجنبي
من الاخر كده
اللي حيفضل بره
يخليه بره
ولو حب يرجع
يتنازل عن الجنسيه ويعيش بلا هويه

شرير انا مش كده
احمدوا ربنا بقي اني مبقيتش رئيس
:)

تفسر بأيه الكلام ده

http://www.nilemotors.net/Nile/201733-a.html

[misoalex]

مش عارف اقول ايه بس الحمد لله ان لسه فيه ناس فاهمه وناس عاقله فى المنتدى والبلد

كل حاجه فى الدنيا عند المصرين بقت من 3 جهات
امريكا
اسرائيل
الاخوان

مش واخدين بالهم ان مبارك اكبر شريك مساعد لامريكا واسرائيل عشان يساندوه ويساعدوه فى توريث الحكم لابنه غير مصالح تانيه كتييييييييييير

[FunnyMickey]

انا كل اللي محزنني في الموضوع
اننا بنستأذن قبل ما نخش سيناء
هوا فيه عار اكتر من كده

بنستأذن عشان نخش ارضنا

ده ان دل يدل في اعتقادي الشخصي ان الناس دي شايفنا بالوهن والضعف ده
انهم عادي يعني دخلوا قوات
واحنا مدخلين قواتنا عشان نحمي خطوط الغاز

الله يخربيت دي اتفاقيات اللي مخليانا مطاطين روسنا
هوا مش الاتفاق ده المفروض يبقي عادل بردو
نفسي اعرف ام كامب ديفيد دي
فيها ايه لينا

يعني احنا اتفقنا ناخد سيناء
واحنا نديهم

ده نظام اب وابنه
سيب ياحبيبي دي انا اديك حبه حبه
:)

[m_elkhishin]

مش عاوز شخص لو جاله بكره عقد في السعوديه بكام الف زياده يبيع البلد ويمشي
وبعد كام سنه لو ربنا كرم مصر وبقينا دوله فيها فلوس اكتر من الخليج يسيب شغله في الخليج ويقول انا مصري



:)

يااااااااااااه
كلامك ده دبحني والله يا أخي

لما اكون واحد خلصت كلية هندسة، بتقدير جيد، ومعظم صحابي اشتغلوا في شركات كبيرة زي المصرية للاتصالات وموبينيل واتصالات ومصر للطيران وغيره وغيره وانا كنت جايب تقدير أكبر منهم وخبرتي العملية أكتر منهم بكتير لمجرد ان ملقتش واسطة محترمة تدخلني. وكان كل الشغل المتاح قصادي ميزدش عن 600-800 جنيه

قلت مش مشكله ، بدأت ابحث واعافر وعملت تعديل على أجهزة الشبكات اللاسلكية وخليت مداها يعدي ال 20 كيلو ووصلت الانترنت سنة 2003 لمعظم بلاد الارياف اللي حواليا وحاولت اعمل ترخيص في جهاز تنظيم الاتصالات ومعرفتش، و بدأ الناس اللي بتوزع للشركات الكبيرة تهددني عشان معنديش ترخيص عشان كنت بنافسهم في الجوده والسعر واضطريت اقفل المشروع ده.

لما اقعد من 2003 - 2009 في الحوارات دي ومش عارف أوصل لحاجة و يجي واحد مش مصري يقدر موهبتي ويديني جزء من حقي اللي حاولت بشتى الطرق اخده في بلدي ومقدرتش يبقى انا بعت البلد ومليش حق فيها؟؟

مش حقولك اديني مرتب زي هنا أو ركبني عريية زي اللي راكبها هنا، لأ، اديني مرتب ادمي يغطي احتياجاتي وانا مستعد اجي اشتغل عندك

[otefa]

بالظبط كده حكومة مبارك حكومة زيد ولا عبيد معاهدة السلام خط أحمر مش هاينفع نقرب منه في الفترة الحالية وأقل تقدير 4 سنين كمان............أيه بقى ألي هايزعل أمريكا ولا بنتها من التغيير وخصوصا أن كان رايح في سكة مجهولة(جمال) وال40% تحت خط الفقر الى زيادة ومايعنيه من قنبلة موقوتة تهدد أستقرار البلد والمنطقة

[dr_abooody]

هو لابس تيشيرت بيجو و رمز الاسد اللي على المعبد الماسوني مختلف الاسد رافع ايدية الاثنين لكن البيجو رافع ايد و منزل ايد الراجل بيحب العربيات البيجو و شكلة كدا بيموت فيها

[Xander2010_Evo]

والله أنا مبسوووط جدآآآ من رد فعل الناس إللي هنا فالمنتدي
لآن الناس عالفيس دلوقتي بقت ثورة كله نازل ضرب نار فالتاني
وإنتا عميل ....إنتا خاااااااين وإنتا وإنتا وده وده
بقينا بس بنرغي مفيش أي فعل أصلآ
أنا مش عارف الناس دي عاوزين زرار يدوسوا عليه الفلوس تنزلهم من السماء؟؟
مش لازم الناس دي تقدم طلباتها ولو متنفذتش يعملوا إعتصام "بس مش دلوقتي" البلد لو بالمنظر ده هاتضيع
ده غير إن القوات المسلحة ممكن صبرهم ينفذ
والأحسن بقي ينزلوا بالأحكام العرفية مادام الأدب مش نافع :))