الناس فاهمه الحريه غلط

[aminibrahim]

شهدت محطة حلون إغلاقا مؤقتا بسبب مشاجرة وقعت بين عدد من الباعة الجائلين ورجال الشرطة أمام محطة المترو بعد أن رفض الباعة إخلاء المنطقة أمام المحطة، كما ورددت أخبار عن محاولة أحد الباعة إحداث جروح متفرقة بجسده واتهام رجال الشرطة بذلك، كما حاول أحد الباعة أخذ طفلة رهينة حتى يتم إخلاء سبيله، إلا أن المحاولة فشلت بسبب تدخل الأهالى وتخليصها منه وبدأ الجيش فى محاصرة منطقة المحطة وإطلاق أعيرة نارية فى الهواء لتفريق المتجمهرين.
منقول من مصراوي

[mertahgedan]

لسه في ناس فاهمة ان الحرية هي الفوضي المفروض هنا يظهر دور الاعلام لأن الاعلام هو أسرع وسيلة ممكن تؤثر في الناس.لازم الناس تفهم يعني ايه حرية وان الحرية مش تناحة.

[heshamzaky]

أنا معاك الناس بقت فاهمة الحرية بمفهوم خاطىء و كل الى مش عاجبة حاجة بيعمل أثارة للشغب تحت مسمى أنة بيعبر عن رأية و فى الحقيقة هو مخرب و ليس كما يدعى

[MASERATI]

السلام عليكم و رحمة الله و بركاته

نفس المشكلة اللى بيقع فيها بتوع الشرطة للمرة المليون !!!!!!!!!!

هما, جم لقوا فيه باعة جائلين, قاعدين و مش راضيين يوسعوا المكان و كده, و الشرطة قالتلهم بالذوق, امشوا و روحوا اقفوا فى مكان تانى و هما الباعة الجائلين -شايفين أن الدنيا اليومين دول هيصة بأه و أوكازيون و اللى عاوز حاجة يعملها- مش بيسمعوا الكلام, خلاص, تليفون صغير لقسم الشرطة, يبعت عربية بوكس و يقبض على البياعين دول فى هدووووووووووووء تاااااااااااااااام و يتعمل ليهم محضر فى القسم و خلاص, لكن أن الشرطة -و بالذات اليومين دول- يقفوا فى الشارع و يتخانقوا مع الناس تانى زى ماكانوا بيعملوا زمان؟؟؟!!!! , مش أيامهم خالص يعنى .

[تامر.محمد]

دول مش فاهمين الحرية غلط
دي عالم بتتسلبط ولا في بالهم حرية ولا بطيخ


الباعة الجائلين في عز الاعتصام ( قبل تنحي مبارك بأيام) نزلوا التحرير و نصبوا بضاعتهم على طول الرصيف , ماحدش قال لهم تلت التلاتة كام , الناس واقعيا كانت بتحتاج تشتري حاجات
بعد كده بدأوا يتخانقوا مع بعض على الأماكن و يعاملوا الناس بقلة أدب و يعملوا مشاكل , و بدأ المتطوعين يطلبوا منهم انهم يتنقلوا بحاجتهم لمكان على الطرف مرة في التانية , و شفت بعيني سلبطتهم و قلة أدبهم
تاني يوم كانت مظاهرة مليونية و الدنيا زحمة جدا فما شفتهمش

الناس دي للأسف عاشت حياة اتعودوا فيها ان اللي عايزينه مش هاياخدوه الا بالدراع , ولا في بالهم اي حاجة الا انهم يبيعوا و بس
للأسف دول من ضحايا النظام البائد اللي ربنا يقدرنا و نطهر البلد منه

[WalidAdel]

الناس دي للأسف عاشت حياة اتعودوا فيها ان اللي عايزينه مش هاياخدوه الا بالدراع ,

فعلا و النظام الفاسد انجب ناس كتيييييره جدا منهم و دول اللي شايفينهم دلوقتي في الشوارع من بلطجيه و مطظاهرات فئويه و كل عياز طلباته تتنفذ دلوقتي تقولشي الجيش معاه الفانوس السحري مثلا
دا غير حاجات كتيييييره اوي حتي بتوع ثانويه عامه عاملين مظاهرات علاشن عايزين يلغوا حاجات من المنهج و يأجلوا الامتحانات ناس غريبه فعلا مش هاممهم ان البلد واقفه و الاقتصاد في النازل و شويه هانبتدي نجوع من قلة الفلوس ماحدش حاسس بحاجه فعلا ...... لنا الله

[SkyBird]

رجالة والله
وغباء الشرطة لسة غباء فطري
يعني ظروف الناس زي الزفت والناس مش لاقية لقمة تاكلها وكل واحد منهم يقف 16 ساعة علشان يعمل قرشين
والشرطة جايه تخلي المكان خلاص حبكت
ميصبروا على الناس لغاية ما الدنيا تستقر
ولا ما صدقوا يرجعوا للشغل
بدل ما يجروا ورا البايعين يروحوا يحموا القصر العيني من البلطجية علشان الدكاترة تعرف تشتغل

[Egyzizo]

تحذير: الفيديو المرفق يحتوى على مشهد صعب

شهدت محطة حلون حادث مأساوي ذبح بائع متجول نفسه امام ركاب المترو ..
البداية كانت مشاجرة وقعت بين عدد من الباعة الجائلين ورجال الشرطة أمام محطة المترو بعد أن رفض الباعة إخلاء المنطقة أمام المحطة.

قام أحد الباعة بخطف طفلة رهينة حتى يتم إخلاء سبيله .. ووضع السكين على رقبتها ...

إلا أن المحاولة فشلت بسبب تدخل الأهالى وتخليصها منه وبدأ الجيش فى محاصرة المحطة وعندما وجد البائع نفسه محاصرا والجيش يقوم بإطلاق أعيرة نارية فى الهواء لتفريق المتجمهرين .. ذبح نفسه في مشهد درامي مثير

YouTube - ‫ط¨ط§ط¦ط¹ ظ…طھط¬ظˆظ„ ظٹط°ط¨ط ظ†ظپط³ظ‡ ظپظ‰ ظ…طط·ظ‡ طظ„ظˆط§ظ†‬‎

[MASERATI]

السلام عليكم و رحمة الله و بركاته

أنا من رأيى -اللى أنا حر فيه, زى ما أى حد حر فى رأيه- أن البياع ده مات منتحرا كافرا و ده تصرف غبى جدا .