قلق!!!

[A7MED_PHARMA]

السلام عليكم

شوية حاجات كده متجمعة على بعض .. حاسس إنها بتقلقني
أولا:-
مبارك مامشيش من البلد .. وفضل قاعد في شرم الشيخ
ثانيا:-
الحاكم العسكري دلوقتي ..طنطاوي
كان معروف عنه دايما إنه (الراجل) بتاع مبارك .
ثالثا:-
ومع الاحترام للمجلس العسكري

ماشوفناش خطوات قوية(قـــــــــوية) ضد رموز الفساد الحقيقية..والرؤس الكبيرة
يعني ماشوفناش محاكمات أو إتهامات على الأقل ضد أشخاص بعينهم بخصوص مئات الشهداء

رابعا:-
إستمرار التشويش على الجزيرة ...وبدأ التشويش على العربية على قمر النايل سات

خامسا:-
الشرطة لسه مارجعتش تقريبا .. وإستمرار حالة إنعدام الأمـــــــــن في مصر

سادسا:-
زيادة رواتب رجال الشرطى 100% ..مع أول ربع ساعة عملوا فيها إعتصام
وماحدش زاد غيرهم تقريبا لحد دلوقتي

سابعا:-
الحالة النفشية المرتفعة للأربعة الكبار لما كانوا رايحين السجن
يعني وكأنهم رايحين ..وهما عارفين إنهم خارجين خارجين
وكان الأجدر بيهم لو خايفين من مصيرهم الإسود..كانوا هربوا بره
لكن ماهربوش ..وفضلوا قاعدين عادي جدا .
وراحوا السجن عادي جدا ..وكأنهم رايحين رحلة كام يوم وراجعين تاني

ثامنا:-
وجود بعض وزراء العهد القديم

تاسعا:-
فين الشباب الي في المعتقلات لحد دلوقتي ..وماحدش ليه بيجيب سيرة المعتقلين السياسين

ده كله جايبلي حموضة في بطني ..
ومش مستريحش

[nour_nrc]

والله عندك حق

دول هيخلوا الواحد ميعرفش ينام الا بمنوم

ليه ده كله

انا حاسس انهم حيبعوا الشعب كله علشان كام واحد

[mazagngi2010]

كلامك كله صح واللى ميفكرش فى الكلام ده يراجع حسباته
وربنا يسهل والجيش يفهم الناس عايزه ايه
وخد الخبر ده على الماشى

عاجل |المستشار محمود الخضيرى فى ميدان التحرير: اذا لم تقال حكومة شفيق حتى الجمعة القادمة فسيقوم المتظاهرين بمحاصرة الوزارات ومجلس الوزراء

[A7MED_PHARMA]

وبالذات النهاردة
النهاردة بدأ التشويش على قناة العربية على قمر النايل سات..ومش عارف الخطوة دي هدفها إيه في المرحلة دي
بس دي قلقتني جدااااااا

وقانون الطورائ...لسه موجود ليه
ماهو الحكم العسكري مش محتاج قانون الطورائ في حاجة
طيب يريحوا الناس ..ويحسسوهم ان الناس الي ماتت دي لها قيمة...ويشيلوا قانون الطورائ

[factorialx]

وبالذات النهاردة
النهاردة بدأ التشويش على قناة العربية على قمر النايل سات..ومش عارف الخطوة دي هدفها إيه في المرحلة دي
بس دي قلقتني جدااااااا

الكلام ده مش من مصر أو إدارة النايل سات لأنها ببساطه ممكن تقفل البث خالص زي ما عملوا أيام الثورة مع الجزيره
أي حد معاه أجهزة متطورة جدا يقدر يشوش على اي قناه بأنه يبث على نفس التردد
و حتى المحور و الحره بس المقصود الحره و المحور على نفس التردد

و الجزيره نفسها قالت إن مصدر التشويش ليبيا

موافقك في تخوفاتك أرفام 3 و 8 و 9 بس

[otefa]

ده ردي في موضوع مشابه

أنا عن نفسي ماعنديش أي شك أن الناس دي (صفوت الشريف وغيرهم) تحت السيطرة التامة من الجيش ولا هايقدرو يسحبو مليم ولا يتصرفو في متر أرض أو سهم في شركة أو برصة ألا بموافقة القوات المسلحة حضرتك مش واخد بالك أن البورصة مغلقة طيب ماسألتش نفسك ليه!!!!! الناس كلها كانت فاكرة علشان البورصة ماتقعش ده صحيح بس الأهم هو السيطرة على شركات الفاسدين حتى لاتباع أسهمها أو تهرب للخارج أو توضح في صناديق أستثمارية سرية ............أنا قايل الكلام ده بالمناسبة من يوم 31/1 ممكن تراجع مشاركاتي والأيام بتثبت صحة تحليلاتي وتوقعاتي وأتمنى بس السيناريو مايدخلش في جانبه المظلم نتيجة للفوضى في الشارع المصري...............نصبر عل القوات المسلحة وحكومتها ونشوف دول ماكملوش أسبوعين ياجماعة ده ألي بيذاكر في الجامعة قبل الأمتحان بشهر بيبقى مرعوب من النتيجة...............دي دولللللللللللللللله كاملة ومش أي دولة أكبر وأقدم دولة في الشرق الأوسط
ومعلش طولت عليكم

[medo_2060]

الجزء بتاع عوده الشرطه دا بالذات الوزير اللذيذ الجديد بيقول انه نزل 97 % من الشرطه للشارع ههههههههههههه
احلى حاجه فى المسؤلين عندنا بيتكلموا عن شعوب تانيه
ودا استفتاء على مصراوى بيرد عليه :
ما تقييمك لتواجد الشرطة في منطقتك ؟

متواجدة بكثافة (1%)
متواجدة بشكل طبيعي (18%)
غير متواجدة (81%)
اجمالي الاصوات :69,109

[nktis]

متفق معاك ... ربنا يستر

[otefa]

رسالة رقم (21) من المجلس الأعلى للقوات المسلحة

http://www.facebook.com/Egyptian.Armed.Forces

[mahmoud_afifi]

حاجه تخوف اه بس المجلس الاعلى للقوات المسلحه نفى وجود اي التفاف على الثوره وان كل دي اشاعات.
وبالنسبه للتشويش على قناة الجزيره هما قالوا ان مصدره من جنوب ليبيا انما العربيه الله اعلم.
ان شاء الله مع الحكومه الجديده كل حاجه هتتظبط

[waelfarid]

هو الشرطة بتشتغل 8ساعات بس في اليوم وما زاد عن ذلك overtimeولا ايه
حد يعرف
وهل هما نازلين علي قديمه لسة محصلهمش format للمنهج بتاع حماية الاسرة الحاكمة ومصالحها
ولا فيه كام bad sector عندهم
الهارد اللي عندهم mechanical ولا غيرو وبقو solid stateههههههه
حصل اي تغيير ولا جايين -بعضهم- يسترجع الهيبة بالعافية للي مش عارفين يفرقو بين التعامل باحترام عن التعامل بخوف
بندعي ان ربنا يهديهم لاننا محتاجين لهم وهما محتاجين لنا ونتفاءل خير ان شاء الله

[osoliman88]

على فكرة انا عندي مخاوف أكتر من اللى حضرتك قولتها ... وبحاول أعمل زي النعامة وأدفن رأسي في الرمال ... لأن البديل أنا خايف جدا. ويكفي أن أقول منذ تنحي مبارك وأنا أشعر بالخوف الشديد من سماع الأخبار لدرجة أني توقفت بدرجة كبيرة عن مشاهدة القنوات المصرية وقنوات الأخبار ... لأنني فعلا أشعر بخوف بل برعب شديد، أدعو الله أن تنجو مصر وننجو معها .... اللهم سلم مصر اللهم سلم شباب مصر اللهم سلم شعبها

[mertahgedan]

كله جاي بالصبر . الجيش دلوقتي معانا مش ممكن يدي فرصة لمبارك وأدواته بالعودة مرة آخري .المطلوب دلوقتي اننا نكون في ظهر الجيش نساند الجيش الضغط الجماهيري يعطي للجيش قوة في موقفه . المهم منع المظاهرات الفئوية

[wawoo]

ثامنا:-
وجود بعض وزراء العهد القديم

تاسعا:-
فين الشباب الي في المعتقلات لحد دلوقتي ..وماحدش ليه بيجيب سيرة المعتقلين السياسين

ده كله جايبلي حموضة في بطني ..
ومش مستريحش

الحقيقية اسباب منطقية جدا للقلق و هناك اسباب اخرى كمان ..

من كلام بعض اعضاء المجلس العسكر فى العاشرة مساء ..انا شخصا اطمنت الى حد ما بخصوص بعض الامور
طبعا هناك ضغط كبير على المجلس فى المرحلة دى و صعب نحدد لان هو المجلس ناوى على اية بالضبط

انما تاكد ان مع الوقت حتبان مواقف الجميع بالضبط و فى الحالة دى لازم يكون فى وعى كافى بالمطالب الاساسية للثورة الى لو لم تتحقق يبقى التظاهر مستمر الى ان تتحقق

المجلس العسكرى نفسة اكد ان فى اعداء للثورة و دة طبيعى و الكل يتفق معاة ..انما السؤال ماذا سيفعل الاعداء الان بعد ما حدث اكيد تحركاتهم معظمها حتكون مستخبية و الخطورة الحقيقية فى ما يحكى من مؤمرات قد تكون الان محل تخطيط من جانب المنتفعين او المستفدين من النظام السابق باى شكل كان

هى مرحلة حرجة و ولادة متعسرة و فترة نقاهة صعبة كما وصفها ابراهيم عيسى و القلق و تواخى الحذر مطلوب انما على الجانب الاخر اعتقد انة حان الوقت انة يكون فى توعية شعبية للمرحلة السياسية الجديدة عشان يكون فى استجابة قوية فى حالة وجود انتخابات او استفتائات على دستور او غيرة

انا عموما متفائل برغم صعوبة المرحلة دى و اعتقد اننا حنخرج منها قريبا ...القلق الوحيد يكمن فى حالة تحرك المجلس العسكرى فى اتجاة لا يعكس الطلبات الشعبية لجموع الشعب المصرى

[mazagngi2010]

كله جاي بالصبر . الجيش دلوقتي معانا مش ممكن يدي فرصة لمبارك وأدواته بالعودة مرة آخري .المطلوب دلوقتي اننا نكون في ظهر الجيش نساند الجيش الضغط الجماهيري يعطي للجيش قوة في موقفه . المهم منع المظاهرات الفئوية

احنا لسه هنقف ورا الجيش اكتر من كده
امال اللى فات بيننا وبينه كان ايه
اللى هيدى قوه للجيش دلوقتى هو قراراته الحاسمه الصحيحه مش اللكاعه والتنفيض لمطالب الناس