نوارة نجم تكتب : شيل كفنك واحفر قبرك وانزل التحرير

[zouba92]

اللي بيتيريق عليها هما نفسهم اللي بيتريقوا على المطالب المشروعة للثورة و هما برضوا اللي كانوا بيتريقوا على طلب تنحي مبارك قبل ما يمشي و عمالين يغنولنا أغنية الفراغ الدستوري.

هما هما برضوا اللي قعدوا يعيطوا الجمعة اللي فات على الثورة اللي الأخوان سرقوها و وائل غنيم اللى انطرد من الاخوان (مع ان مش ده اللي حصل) و محدش منهم علق نص تعليق على ان الجمعة دي غنيم طلع عالمنصة مع قيادي مهم في الأخوان و قالوا ان الشعب المصري أيد واحدة.

هما هما نفسهم اللي بيقولوا ان المظاهرات موقفة حال البلد و ان المتظاهرين حيخربوها, مع انهم متأكدين ان الاعتصامات الفئوية هي المشكلة و ملهاش علاقة خالص بالمظاهرات و ان المظاهرات يوم جمعة و ما عملتش أي مشكلة.

و أحلى حاجة بقى انهم عاملين فيها ثوار و يقولولك احنا نزلنا, احنا اللي واجهنا الأمن, احنا اللي عملنا الثورة, اللي بينزلوا دلوقتي دول مندسين, دول ليهم أجندات (مبتفكركش بحاجة أجندات ديه؟؟)...........

و برضوا عشان كلامي ميتفهمش غلط, أنا مش ضد ان واحد يكون ليه رأي مختلف أطلاقا, كل واحد حر في رأيه. انما لما ناس بعينها تبقى بتستميت عشان توجه الناس لاتجاه معين يبقى معلش, من حقى مفترضش حسن النية.


+1111111111111111111111
حضرتك قلت كل الكلام
و على فكرة برضو الكلام ده مش دفاعا عن نوارة خاااااااااالص, الي عايز يحبها يحبها و اللي عايز يكرهها يكرهها, انما الغريب اني بدل ما اناقش رأي سياسي بالحجة ايقى كل تركيزي اني أطعن في اللي بيقوله.

[mohamed76]

مسامحينك من قبل ما تعتذر... الخناقة مش معاك.. احنا عارفين طريقنا كويس، وعارفين عدونا كويس، وعشان كده كنا بنطلب منك تسمع كلامنا... كله خير ان شاء الله

مبارك بيتناصح علينا؟

ما عاش ولا كان اللي يفتكر نفسه بيضحك علينا... ده احنا المصريين، نودي اتخن تخين البحر ونرجعة عطشان، احنا طيبين اه، عبط لا، ومش عشان كل اللي حواليه اغبيا افتكر نفسه نبيه

ها؟ اخر حلقات الثورة المضادة ان تحصل مواجهة بين الجيش والشعب؟ ها؟ ده اخر ما جادت عليك بيه المنوفية يا مبارك؟ طب احنا عندنا منايفة انبه منك كتير، ده انت عريت المنايفة

احنا شايلين اكفانا وحافرين قبورنا

وآدي رسالة للجيش المصري باسم الشعب المصري، وايوة باتكلم باسم الشعب لاول مرة في حياتي، وانا ضامنة برقبتي، باسم الخمسة وتمانين مليون بني ادم:

مش حنرفع ايدنا على الجيش المصري، ولا حيطلع من بقنا له غير كل خير، وكل بر، وكل طيبة... واذا احنا هُنّا عليه وقرر يموتنا، احنا بنوعده اننا رافعين ايدينا لفوق، ايادي عزل، وحننام له كمان تحت الدبابة عشان ما نتعبوش في الجري

لئن بسطت يدك إلي لتقتلني ما أنا بباسط يدي إليك لأقتلك... ولا أزقك، ولا حتى أمنعك إنك تقتلني

مش احنا... مش احنا ابدا، ومافيش حد، مهما يعمل، حيعرف يلتف على ثورتنا، واللي احنا عايزينه هو اللي حيحصل، احنا اصحاب الثورة، واحنا اصحاب التضحية، واحنا اصحاب الفلاح... واللي عايزينه هو اللي حيحصل إن شاء الله

يا ريتك بقى يا مبارك تلم تعابينك عشان ما تتعبش قلبك.. سنك ما يستحملش

احنا قلبنا ما بيتعبش، ما عادش خلاص، قلبنا تعب لحد ما نحس، وبعد ما شفنا الجيش بيضربنا مش باقيين على الدنيا دي

اللي عايز يموتنا يموتنا... ويبقى كسب فينا جميلة، واحنا مش حنمنعه يقتلنا، ولا حنمد ايدنا بالسوء، ولا حنلطخ صوابعنا بالشر

مبارك كان دايما يقول للامريكان: انتوا اصلكم ما تعرفوش الشعب المصري

وانت يا مبارك ما تعرفش الشعب المصري

مصر ام الخير... واحنا الخير

والخير له الكلمة الاخيرة .
هذا الخبر منقول للأمانه من موقع أخبار لايف

100%

[نور القمر]

الجيش عمل مؤتمر صحفي واكد ان المقبوض عليهم من غير المتظاهرين وكان العدد الاجمالي 27 فرد وتم القبض عليه الساعة 1 صباحا
ومن ضمن ال 27 دول 8 افراد بلطجية بيحملوا السنج والسواطير والبانجو ولا يحملون بطاقات هوية
وبيقول انه عرض المقبوض عليهم على مجموعة من الثوار عشان يتأكدوا بنفسهم ان مش من ضمنهم ثوار
اما باق ال 27 تم الافراج عنهم
وقال ان البلطجية بدأوا بالقاء الزجاجات الفارغة والحجارة على الشرطة العسكرية وانهم مش هايقبلوا هذه الاهانات وهايتعاملوا معاهم
وفي لقاء مع الشباب المفرج عنهم اكدوا ان ضمنهم كان في مجموعة بلطجية
ومنهم واحد قال ان في مجموعة مرتدية لبس جيش في عربية زرقاء ملاكي هم اللي تعرضوا ليهم وطاردوهم وانهم استعانوا بالجيش الحقيقي لتخليصهم

[تامر.محمد]

اظن ان اللي هي عايزة تقوله ان اللي حصل امبارح لعبة من امن الدولة لإيقاع الشعب و الجيش في بعض
لا استبعد , لكن ما اقدرش اتبنى الاحتمال ده

[نور القمر]

انا مجرد بنقل خبر سمعته عن لسان اللواء اسماعيل عثمان في المؤتمر الصحفي
اما حقيقة الامر الله اعلم بها بس الواضح عليه انه مش عاجبه اللي حصل مهما كان المتسبب فيه ومعتقدش انه ممكن يتكرر تاني خوفا من تدهور الامور بين الجيش والشعب

[A.Saad]

الجيش عمل مؤتمر صحفي واكد ان المقبوض عليهم من غير المتظاهرين وكان العدد الاجمالي 27 فرد وتم القبض عليه الساعة 1 صباحا
ومن ضمن ال 27 دول 8 افراد بلطجية بيحملوا السنج والسواطير والبانجو ولا يحملون بطاقات هوية
وبيقول انه عرض المقبوض عليهم على مجموعة من الثوار عشان يتأكدوا بنفسهم ان مش من ضمنهم ثوار
اما باق ال 27 تم الافراج عنهم
وقال ان البلطجية بدأوا بالقاء الزجاجات الفارغة والحجارة على الشرطة العسكرية وانهم مش هايقبلوا هذه الاهانات وهايتعاملوا معاهم
وفي لقاء مع الشباب المفرج عنهم اكدوا ان ضمنهم كان في مجموعة بلطجية
ومنهم واحد قال ان في مجموعة مرتدية لبس جيش في عربية زرقاء ملاكي هم اللي تعرضوا ليهم وطاردوهم وانهم استعانوا بالجيش الحقيقي لتخليصهم

ده اللى كنا خايفين منه
سيناريو الجيش بيضرب فى الناس
الناس تتقلب على الجيش
واما بنقول كدة
بنكدب ونطلع انهزاميين