استشارة عاجلة في تشطيب واجهة منزل .

[ehab]

السلام عليكم و رحمة الله

دلوقتي احنا بنعمل الواجهة بتاعة البيت بتاعنا الواجهة الامامية الصنايعي الي شغال بيقول انه مش هيعمل طرطشة قبل المحارة لانه هيعمل طبقة اسمنت سمكها 10 سنتي و دا كافي

السؤال هل الكلام دا كدا مظبوط ؟
لان في واحد جارنا قال دا كدا لو جيت تدق اي حاجة في الواجهة هتلاقي المحارة بتقع علشن الطرطشة هي الي تخلي المحارة تمسك كويس ارجو الافادة العاجلة و شكرا .

[hugan]

اولا انتوا هاتشطبو دهانات ولا طرطشه يعني بورده واسمنت ابيض واوكسييد لون حسب الطلب
لكن الطرطشه مهمه جدا لانها تعمل علي التصاق طبقه المحاره جيدا بالطوب لانها بتكون خشنه جدا وعباره عن بروزات ونتؤات غير متساويه
مما يعمل علي التصاق طبقه المحاره جيدا بالطوب
لكن لو تم عمل المحاره مباشره علي الطوب وارد جداا انها تفصل مع اي خبط او تكسير

وكلام جارك سليم
لكن كلام المبيض غير سليم لان سمك طبقه المحاره ووصولها الي 10 سم ضار جدا وبيحصل تنميل وتشققات بالواجهه

[mostafa3000]

حضرتك لازم نطرطش الطوب بمونة الطرطشة قبل مونة البياض
والافضل بعد عمل الطرطشة يتم رشها لمدة 4 ايام قبل وضع مونة اللياسة ( البياض )
وواضح ان الصنايعي بتاع حضرتك خبرتة ضعيفة

[mrghost]

10 سم كتير اوى اوى وده غلط جدا جدا جدا مع الوقت هتقع بسهوله
والطرطشه دى شيى اساسى
نصيحه شوف صنايعى غير ده

[korkor]

الطرطشه بند اساسى فى اعمال البياض كما ان سمك البياض الاعتيادى لا يزيد باى حال من الاحوال عن 5 سم , انصحك تشوف واحد تانى بتاع محاره

[ehab]

الف شكر لكم كلكم لاهتمامكم

استاذ hugan

المفروض احنا هنعمل التشطيب حاجة اسمها جرافيتو من داري و هيكون تحتيها المحارة المفروض
لو حضرتك ليك رأي تفضل ممكن تنصحنا بيه

استاذ mostafa3000

معلش سؤال بس المفروض نرشها ايه لمدة 4 ايام ؟

استاذ mrghost
الف شكر لاهتمامك

استاذ korkor
الف شكر لاهتمامك

[mohamed2002]

انا قبل ما اركب السيراميك في الحيطة السباك قالي لازم الحيطة يتعمل لها طرطشة عشان يمسك السيراميك وكلام جارك سليم بس غالبا الصنايعي بيستسهل
الا بكام طن الاسمنت؟

[Ralliart]

ازاي يعني؟؟؟؟ 10 سم ده مبالغ فيه وكمان مفيش حاجة اسمها من غير طرطشة يعني كل الأسباب لوقوعها متوفرة

مش هيعرف أصلاً يعملها لأنها هتقع لوحدها قبل ما يخلصها

[tarekzein]

أولا سمك البياض مبالغ فيه جدا

ولو ضرورى السمك ده لضبط الواجهه فى بعض الأماكن وليس كلها يبقى لازم يتم على مراحل أسمها تلبيش

ولازم يضاف مواد ربط للمونه مثل السيكا أو الأديبوند

طبعا الطرطشه شىء أساسى جدا

والطرطشه لازم تكون مثل المسامير على الواجهه (تقيله يعنى )

بعض الصنايعيه لما يلاقى أن المبانى الموجوده فى الواجهه عباره عن ضهر مبانى

بيستغل الفراغات اللى بتكون بين الطوب عشان ميعملش طبقة طرطشه

وده غلط

الطرطشه عباره عن طبقة ربط بين الطوب والمحاره

ووجودها ضرورى

نصيحه شوف صنايعى أو مقاول غيره

[tarekzein]

آه يا أيهاب لو حابب

أنا ممكن آجى معاك وأعمل معاينه وأقولك على المفيد

وأستلملك من الصنايعى كمان

بس على شرط

مليش دعوه بأى أتفاقات ماليه بينك وبينه

وأنت اللى هاتجيب الصنايعى مش أنا

لو حابب أبعتلى عالخاص

[samcar]

طبقة اسمنت ايه اللى سمكها 10 سم ؟؟؟؟- الجدع ده عنده كام سنه واشتغل قبل كده فين ؟؟؟؟

يمكن لو كان اتكلم عن خامات جديده للتشطيب- ولو ان فى انواع طالعه جديد وغاليه- كنت قلت انه ممكن يستغنى عن الطرطشه بماده رابطه - ممكن تندهن مباشره على الطوب- لكن طبقه محاره 10 سم ده اكيد كان تربى

[tarekzein]

طبقة اسمنت ايه اللى سمكها 10 سم ؟؟؟؟- الجدع ده عنده كام سنه واشتغل قبل كده فين ؟؟؟؟

يمكن لو كان اتكلم عن خامات جديده للتشطيب- ولو ان فى انواع طالعه جديد وغاليه- كنت قلت انه ممكن يستغنى عن الطرطشه بماده رابطه - ممكن تندهن مباشره على الطوب- لكن طبقه محاره 10 سم ده اكيد كان تربى

ههههههههههه

جامده تربى دى

ده حتى الأموات ميرضوش بيه

فى الخليج بيسموه مليس

[hugan]

[QUOTE=ehab;3873313415]الف شكر لكم كلكم لاهتمامكم

استاذ hugan

المفروض احنا هنعمل التشطيب حاجة اسمها جرافيتو من داري و هيكون تحتيها المحارة المفروض
لو حضرتك ليك رأي تفضل ممكن تنصحنا بيه


تمام الجرافيتو كويسه
ويجد نوع اخر هو السافيتو اظن من كيماويات البناء الحديث يستعمل الان بكثره وهو مقاوم للرطوبه والامطار