بنك إسلامى

[romieh]

السلام عليكم ورحمة الله وبركاته

فى ظل الظروف الحالية وان البلد مافيهاش أمان

فانا قررت انى احط الفلوس بتاعتى فى بنك علشان احافظ عليها

المطلوب دلوقتى انى عايز بنك بس يكون شرط انه تكون معاملاته اسلامية

وان البنك يكون معاملاته اسلامية 100% (يعنى مش عايز حد يقولى بنك مصر فرع المعاملات الاسلامية)

انا بصراحة خبرتى ضعيفة شوية فى البنوك الاسلامية

بس اللى أسمع عنهم هما:

بنك فيصل

المصرف المتحد

بنك البركة

والحقيقة انا مش عارف انهى واحد فيهم اسلامى فعلا 100% ولا لأ

كل المطلوب انى أعمل ايداع وأسحب الفلوس فى أى وقت

ولذلك انا عايز بنك يكون سهل معاملاته ويكون ليه فروع كتير ويكون ليه ماكينات atm منتشرة فى كل مكان

انا مش عايز من البنك أكتر من كده

ياريت لو حد عنده خبرة سابقة ويكون اتعامل فعلا مع اى بنك اسلامى يقولى عليه

وشكرا مقدما

[swimmer25]

أنا اتعاملت مع بنك فيصل لاني أعرف أنه فيه لجنة شرعية بتشرف علي معاملات البنك..وأرباحه غير ثابتة زي ما بيقولوا

فيه شيوخ بيقولوا انه اسلامي ومعاملاته صحيحة...
وفيه شيوخ زي مصطفي العدوي بيقول إن مفيش بنك إسلامي في مصر
دور علي النت وشوف الفتاوي عن البنوك الإسلامية و إسال شيوخ فقه

والله أعلي وأعلم

[swimmer25]

علي فكرة بنك فيصل مكن atm بتاعه مش كتير...عند الفروع بتاعته وبس وفروعه مش كتير

[M.Alaa92]

استاذ/swimmer25
انا اللى اعرفة ان الشعراوى قال " و ياريت حد يصلح لو فى غلط" ان ادام البنك مكتوب علية اسلامى يبقى الوزر على البنك
و ده تحليلى لان نيتك هى وضع اموالك فى مكان يتجنب به الشبهه الحرام
اما البنوك فاعتقد ان فيصل احسن بنك لانه معروف بالاضافة للاسباب السالف ذكرها

[أحمد علاء]

أولا جزاكم الله خيرا على تحري الحلال والله يوفقك لما فيه الخير في الدنيا والأخرة
انا سألت الدكتور أحمد على السالوس على البنوك الإسلامية وبالتحديد بنك فيصل وبنك أبو ظبي الإسلامي (الوطني للتنمية سابقا) فهو أفتاني ببنك فيصل فقط.
ولمن لا يعرف الدكتور أحمد على السالوس


· أستاذ الفقه والأصول وأستاذ فخري في المعاملات المالية المعاصرة والاقتصاد الإسلامي من جامعة قطر.
· النائب الأول لرئيس مجمع فقهاء الشريعة بأمريكا.
· خبير بمجمع الفقه منظمة المؤتمر الإسلامي بجدة ثم اختير عضوا بالمجمع
· خبير بجمع الفقه برابطة العالم الإسلامي بمكة المكرمة ثم اختير عضوا بالمجمع.
· أحد الأمناء لمركز قطر الإسلامي بلندن

ولبنك فيصل الأتي:
ماكينات ATM منتشرة بشكل متوسط ولكن ليس كباقي البنوك لكن يمكن السحب من اي ماكينة تحمل شعار 123 بتكلفة 4 جنيهات لعملية السحب.
يوجد كارت visa electron خاص بعمليات السحب من الماكينات اوالشراء من المحلات التجارية مباشرة من حسابك سواء داخل او خارج مصر.
يوجد أيضا نظام internet banking لكنه في قمة البدائية ويمكنك على الأقل متابعة حسابك.

[vampero]

طيب وبنك الوطنى للتنميه بالتعاون مع مصرف ابو ظبى الاسلامى ايه نظامه

[أحمد علاء]

طيب وبنك الوطنى للتنميه بالتعاون مع مصرف ابو ظبى الاسلامى ايه نظامه

الدكتور السالوس سألته بنفسي عليه علشان كان عامل نظام بطاقة إئتمان مدينة وديه مش موجودة في بنك فيصل فقالي فيما معناه بلاش ولو عايز تشيل فلوسك يبقى بنك فيصل .
الكلام ده من حوالي 6 شهور
الدكتور السالوس بيفتى ايضا بخصوص التعاملات في البورصة بعد لما يطلب الأوراق الخاصة بالتأسيس والتعامل للشراكات التي يسأل عنها ومش في مصر بس ده . بصراحة وده رأي هو من أكثر الناس الي فاهمه في الإقتصاد الإسلامي وده أيضا كلام مشايخ كبار.

[romieh]

ماهو انا اعرف برضه ان فيصل اسلامى، بس أنا كنت بسأل علشان فيصل فروعه مش كتير

وكمان ماكينات ال atm بتاعته مش كتير

والاغبى كمان ان بعض الماكينات اللى فى الفروع بتبقى جوة البنك وبيقفلوا الباب عليها

يعنى ماتعرفش تسحب منها بعد الساعة 5 مساء

فياريت لو يكون فيه بنك تانى اسلامى برضه يكون أفضل من فيصل فى موضوع ال atm ده

علشان لو ماكنش يبقى أمرى لله وأروح افتح فى فيصل

[أحمد علاء]

الأستاذ romieh

عموما فيصل أختلف كثير عن السابق وعن تجربة وموضوع ماكينات ال ATM الي جوه البنك اول مرة اسمع عنها :)
بس عموما فرع مدبنة نصر مثلا اكثر من ممتاز ويفرق كتيييييييييير جدا عن فرع مصر الجديدة الي لسه بيجددوا فيه بقالهم يجي سنة.