نجيب ساويرس

[som3aa]

يا جماعة انا عايز افهم ازاى ساويرس يروح مع البرادعى و عمرو موسى و سلامة و كدا علشان يقابل الجيش بصفته ايه؟

حد يعرف ساويرس اشترى موبينيل بكام ( كانت شبكة محمول كاملة ملك هيئة الاتصالات الحكومة يعنى ) و ساويرس اشترى الشبكة برخصة التشغيل !! بكام و ازاى؟؟ مزاد و لا أمر مباشر؟!!!!
اتصالات اشترت رخصة التشغيل فى سوق متشبع سنة 2006 فى مزاد علنى ب 17 مليار مصرى , الرخصة بس !!!

عائلة سويرس اشترت اراضى الجونة و شركة الاسمنت اللى حسب الفجر اشتريتها ب 2 مليار و باعتها ب 70 مليار للافارج الفرانسوية ازاى؟؟؟


مش فاهم بصفته ايه يروح يقابل الجيش؟؟؟!!!!

[نور القمر]

مهو من الناس اللي طالع عليها اشاعات انه هيرشح نفسه !!!!!!!!!!!!1

[Egyzizo]

ممكن تقدم فيه بلاغ للنائب العام ، وحتى يحكم فى الأمر لا داعى للشوشرة على سمعة الناس.

وزى ما حضرتك شايف مكتب النائب العام مش ملاحق على الشغل وأى حد بيشتكى أى حد دلوقتى ، فلو نجيب ملطوط مش هيتعتق.

[mstool]

مش هيرشح نفسة يا جدعان متخافوش ساويرس وطنى اة و كل حاجة بس الدستور يقول ان الرئيس لازم يبقى مسلم فمش هينفع يرشح نفسة ياريت بلاش اشاعات و الدستور عمرة ما هيتغير فى الحتة دية على ما اعتقد حسب ديانة الدولة فبلاش كلام كتير و ساويرس راجل محترم جدا ووطنى و مهربش زى ناس تانين و مرضاش فى يوم من الايام خالص و قال على جستى ان ابيع موبينيل للشركة الفرنسية اظن فاكرين الكلام دة لما عيط فى المحكمة السنة اللى فاتت و على هو محترم و كويس جدا فى التعامل مع الناس عن تجربة شخصية و بيعمل خير كتير بس فى السر محدش يعرف عنة حاجة
وياريت مش اى حد نتكلم علية و انتا متعرفهوش
هو رايح بصفتة انة كان واحد من لجنة الحكماء و مفكر و خايف على مصلحة بلدة و رجل دماغة حلوة اوى بامارة انة وصل للى هو فية و اى حد يعرف ساويرس شخصيا ميقدرش يفتح بقة بكلمة وحشة عنة

[mr_vampire]

فعلا سؤال وجيه جدا: صفته ايه عشان يحضر اجتماع زي ده؟؟؟؟؟؟؟؟؟؟؟؟

[medo_2060]

هو مش هيرشح نفسه بس فعلا هو من الناس الى واخده اراضى برخص التراب وطلعله مليارت من وراها.. زيه زى ابو العينين وعز فى الحته دى
انا مستغرب جدا برضه بعد دا يروح يقابل المجلس العسكرى ازاى ..

- نجيب ساويرس: تسلم عشرين مليون متر مربع تقدر قيمتها السوقية بمبلغ 1.3 مليار جنيه. أنشأ مصنعا للأسمنت على قطعته بمساحة مائتي ألف متر مربع وباع كل المساحة الباقية في صفقات بعدة مليارات.

اشترى شركة أسمنت أسيوط بمبلغ 2.2 مليار جنيه ثم قام ببيعها إلى شركة لافارج الفرنسية بعد ستة أشهر بمبلغ 78 مليار جنيه, أي أنه ربح 76 مليار جنيه في ستة أشهر.

----------
لو الكلام دا مش صحيح ليه لم ينفيه او يوضحوا ان الاراضى دى ملك مين حاليا

[som3aa]

ممكن تقدم فيه بلاغ للنائب العام ، وحتى يحكم فى الأمر لا داعى للشوشرة على سمعة الناس.

وزى ما حضرتك شايف مكتب النائب العام مش ملاحق على الشغل وأى حد بيشتكى أى حد دلوقتى ، فلو نجيب ملطوط مش هيتعتق.

انا مش بشوشر على حد , انا كنت قريت كلام كتير عنه و عن موضوع تخصيص موبينيل بالذات و عندى تسائل مشروع , موبينيل اتباعت بكام و فى مزاد و لا لا , حد يعرف؟

متهمتش حد و من حقى اسال السؤال دا!!!!!!
الكلام دا اتكتب قبل كدا فى كذا جريدة و خصوصا الفجر بتعيده و تزيده كتير اوى

السؤال واحد زيه اساسا كان مكتوب عليه فى الجرائد انه ممنوع من السفر بس طلعت اشاعة بصفته ايه يروح يقابل الجيش؟؟؟؟

انا بتسائل مش بتهم حد !!!

[AhMeD EzZ]

ساويرس بصفة عضو لجنة الحكماء و رجل اعمال وطني

[som3aa]

ساويرس بصفة عضو لجنة الحكماء و رجل اعمال وطني

مين اللى عينه ؟؟ مين اللى عينه و مين اللى عين مكرم محمد احمد عضو لجنة حكماء
على فكرة فى رايى الشخصى ان ساويرس بيحب مصر و كان عامل منح لناس كتير و حاجات كتير بس دا ميمنعش برده انى اسال اشترى موبينيل ازاى و بكام صح و لا ايه؟




فى حاجة وحشة اوى فى ناس كتير فى الشعب المصرى فى رايى

اللى يعيط كتير يصدقوه و اللى يقول انا معكم كتير يصدقوه برده و اللى يعمل خير يقولك دا راجل خير زى السلاب مش مهم هو بيعمل ايه المهم انه بيدفع فلوس و يساعد ناس يبقى راجل خير!!!!!!!

حاجة غريبة فعلا!!!!!

مش معنى ان حد يبقى بيحب البلد انه مش حرامى مش بتكلم على حد معين بتكلم عامة , مش معنى انه محترم يبقى كويس , على فكرة فى ناس شايفة موضوع الاراضى و كدا فهلوة مش سرقة , فى ناس شايفة الرشاوى عمولات و غيرها.

مش معنى برده ان معاه فلوس يبقى حرامى !!! ناس كتير فكرها كدا , مش معنى اننا منسنعش عنه حاجة يبقى كويس , انا كنت فاكر رشيد راجل نضيف بس لما قريت صفحة بحالها عنه لما اتمنع من السفر لو الكلام دا صح تبقى مصيبة مع انه على قد ما يقدر وقف قدام عز , يا ريت نبطل العادة السيئة و هى الحكم على الناس بالشكل و بالكلام اللى بيقولوه فى الجرايد او التليفزيون .

لازم نشوف بنفسنا حقيقى الكلام دا و لا لأ!!!

[yascro]

بصفته مواطن مصرى مهربش بره مصر

[mahmoudysf]

بصفته مواطن مصرى مهربش بره مصر

وانا مواطن مصري ومهربتش برة ممكن ابقى عضو لجنة حكماء

[mynameh]

يا جماعة اللي عندوا مستندات تدينة يقدمها فورا

بس بلاش نفضل نتلكك و نعترض لمجرد الاعتراض الي عندة ورق يقدمة
و كفاية خلافات بينا و بين بعض علي اي حاجة


دي كانت ثورة " حرية " يا جماعة استهدوا بالله

[som3aa]

هو ليه اى نقاش الناس بتعتبره خناقة؟؟
كل واحد بيعبر عن رايه محدش جه ناحية التانى , بالعكس خالص

[mynameh]

هو ليه اى نقاش الناس بتعتبره خناقة؟؟
كل واحد بيعبر عن رايه محدش جه ناحية التانى , بالعكس خالص

و الله العظيم كل الخناقات اللي فاتت كانت بدايتها نقاش بسيط زي دة

المشكلة اننا كلنا بعد الثورة يا إما انا صح يا اما كلة غلط

ثقافة الحوار تقلش اتبخرت او راحت فين معرفش

لما ترجع مش هقدر اقول الكلام دة ...... بس نقول يارب

[Abo_Lina]

بعيد عن نجيب ساويرس نفسه
مصطلح لجنة الحكماء ده
مين تحديدا أطلق على الناس دي الحكماء
هل الشعب ?
هل هما أطلقوا على نفسهم صفة الحكماء ?