ما هي احتمالات حدوث مواجهات مسلحه مع اسرائيل او امريكا ؟

[tito_1980]

معلش اعذروا جهلي بس شوفت علي قناه العربيه ان امريكا بتشاور عقلها عشان تخش ليبيا و كلنا عارفين ان ليبيا لازقه فينا ده غير ان اكيد في قوات مسلحه مصريه في الجانب ده من البلد ... ايه احتماليه حدوث مواجهه مسلحه مع امريكا ؟

تاني حاجه اسرائيل بتتلكك عشان تخش سيناء و يبقوا عملوا ارض الميعاد و الحوار ده فهل ممكن اسرائيل فعلا تتمكن من دخول سيناء و ده لو حصل هتبقي كارثه فعايز حد فاهم يفهمني احتمالات المواجهات المسلحه دي

[aly_hosny]

حاليا
0%

[Ralliart]

الكارثة اللي يتخاف منها مش مجرد دخول أمريكا لان العلاقات دلوقتي سليمة
المشكلة في امتى هتخرج لو دخلت وهل هتعمل قواعد ثابتة كعادتها في جوانتانامو والعراق ودول الخليج وباكستان وافغانستان
الاجابة هي ان ديل الكلب مبيتعدلش ودي عادة متأصلة فيهم انهم لما بيخشو حتة لازم يلزقو فيها خصوصاً لو فيها بترول وكمان البعد الاستراتيجي في انها تعمل كماشة على مصر ودا اللي اسرائيل بتتمناه لان اسرائيل لوحدها هنعرف نأدبهم صح لكن لو اسرائيل جواً وبراً وامريكا جواً من قطر ومن ايطاليا وبراً من ليبيا تبقى كارثة بكل المقاييس خصوصاً ان دفاعاتنا الجوية مش من دفاعات الصف الأول
ربنا يستر وياخد القذافي ويريحنا ويريح الكل
والله من أول يوم وانا مقلق من دخول امريكا بهدف حقوق الانسان (قال يعني بيخافو عليها)

[itsonlyme]

ليبيا فيها مجازر ودخول أمريكا فيها هيكون بحجة انقاذ سكانها من مذابح القذافي
وليبيا فيها بترول كتير.

احنا لا عندنا قذافي بيدبح فينا ولا عندنا بترول

وطالما الجيش وعد بالالتزام باتفاقية السلام اسرائل مش هتحتل مصر ولا حاجة

نرجع لليبيا. أساسا أمريكا مش هتقدر تحتل ليبيا عشان هما لسه في ورطة أخلاقية لاحتلالهم العراق وأفغانستان.
ان شاء اللي ليبيا تخلص من القذافي وأمريكا مايكنش عندها حجة لغزو ليبيا

[نور القمر]

يارب نجي الشعب الليبي من امريكا ومن القذافي
والله نار القذافي ولا جنة امريكا
ربنا ينتقم من كل الظلمة

[som3aa]

0% !

[Amr_tika88]

من رابع المستحيلات ان امريكا تدخل مصر واسرائيل نفس الكلام لان حزب الله وايران وتركيا مش هتسيبهم ودي قوى اقليمية هتقف عقبة في طريقهم

[kono]

000000%
اعتقد القلق على ليبيا
غيتس قال النهاردة انهم هيبعتوا مئات المارينز لمساعدة واغاثة الشعب الليبى

انت تريد وانا اريد والله يفعل ما يريد

[abdalah_hashem]

اللى انا شايفة ان امريكا ممكن تدخل لبيا عشان فيها بترول وبتاع وتستفيد هيا جامد بس اتوقع ان دوة هيبقى بعيد شوية نتيجة ان الاقتصاد المريكى
بقى ضعفان عن حالتة الطبيعية اليومين دول خصوصا بعد حرب العراق والازمة الاقتصادية ودة بدليل افلاس شركات كتيرة وبنوك

لكن دخولها احتمال وارد واحتمال وارد برضة انجلترا تساعدها بس دوة بعيد شوية نتيجة ضغط الراى العام فى انجلترا بسبب خسائر حرب العراق على انجلترا

لكن بالنسبة لاسرائيل شايف انها ممكن تحاول بس فى الفترة الحالية لاة لاة ودة مش هيتم فى خلال فترة ان القوات المسلحة ماسكة البلد لانها التزمت بمعاهدة السلام لكن لو بعد تولى رئيس جديد الحكم وبحث مع مجلس الشعب وعمل استفتاء على الغاء المعاهدة من عدمة ونجح فى الغاءها هتكون فى حرب هتستغلها ايران فى بداية الحرب مع اسرائيل طبعا دوة فى حال استقرار الاحوال فى ايران لانها لو اضطربت داخليا جامد هيكون مدخل للغرب فيها بحجة النشاط النووى

لكن ان حزب الله وايران وتركيا يدافعوا عن مصر زى ما قال العضو

من رابع المستحيلات ان امريكا تدخل مصر واسرائيل نفس الكلام لان حزب الله وايران وتركيا مش هتسيبهم ودي قوى اقليمية هتقف عقبة في طريقهم

انا شايفة انها من الصعب مع ان مصر حزب الله عاوزها وايران عاوزاها تبقى دولة قوية فى المنظقة لان دوة هيحاصر اسرائيل

بس اساسا فكرة اسرائيل انها تخش مصر دية مستبعدة جدا جدا دلوقتى لو افتكرتوا خطاب السادات ايام حرب اكتوبر قاللك ان فى قواعد صواريخ موجهة الى اعماق اعماق اسرائيل يعنى بمعنى اصح الرد هيكون قاسى قوى على اسرائيل هيخسرها ارواح وخساير مادية لا يستهان بها
وان جاء دعم امريكا ليعوضها الخسائر الاقتصادية بس الارواح مش هتعوض


وعاوز اقول حاجة انا شايف ان الاحداث الحالية مهما طالت مدتها هى تجهيز لبدء المسلمين بعدها فى مسيرة التقدم والنمو لحد ميوصلوا ويبقى اغنى واقوى دول العالم وتبدا الحروب بتاعت نهاية الزمن واخر الدنيا يعنى

[AmAhmed]

لازم يحصل لنا حصار قوي جدا لاضعافنا و بعدين يحاولوا يدخولوا البلد و ده يكون بعد ما تخلصوا من البلاد الاضعف و الاسهل حتي تبقي مصر و السعودية
قبل كده العملية في الزبادي و امريكا و مصر و اسرائيل دول شقيقة
بل اعتقد الوضع الراهن حيعطي بعض القوة لغزة و حيحميها من هجوم اسرائيلي جديد و كله بأمر الله.
الخوف دلوقت علي اليمن و البحرين و ليبيا اللي حتبقي زي المطوة في ضهرنا