حاحا

[airbus320]

بقرة حاحا

ناح النواح و النواحة

على بقرة حاحا النطاحة

و البقرة حلوب

حاحا

تحلب قنطار

حاحا

لكن مسلوب

حاحا

من أهل الدار

حاحا

و الدار بصحاب

حاحا

و احداشرباب

حاحا

غير السراديب

حاحا

و جحور الديب

حاحا

و بيبان الدار

حاحا

واقفين زنهار

حاحا

و يوم معلوم

حاحا

عملوها الروم

حاحا

زقوا الترباس

حاحا

هربوا الحراس

حاحا

دخلوا الخوجات

حاحا

شفطوا اللبنات

حاحا

و البقرة تنادي

حاحا

و تقول يا ولادي

حاحا

و ولاد الشوم

حاحا

رايحين ف النوم

حاحا

البقرة انقهرت

حاحا

ف القهر انصهرت

حاحا

وقعت ف البير

حاحا

سألوا النواطير

حاحا

طب وقعت ليه

حاحا

وقعت م الخوف

حاحا

و الخوف ييجي ليه

حاحا

من عدم الشوف

حاحا

وقعت م الجوع

و من الراحة

البقرة السمرة النطاحة

ناحت مواويل النواحة

على حاحا

[hamedo0]

هو ايه ده شعر ولا غزل ولا ايه
بعد اذنك توضح ده ايه بظبط

[CryptonX]

ياريتني مادخلت .... انا اسف ...
شوف حاجة افيدلك تعملها .

[goodwave]

أصحاب العقول في راحاااااا ..... يا عم حاحااااااا

[airbus320]

انا اسف جدااااااااااااااااا ان محدش عرف انها من اشهر قصائد الشاعر العظيم احمد فواد نجم وياريت محدش يقولى هو مين عشان يبقى الجهل بيعنه

[gemtawila]

دى قصيدة للشيخ امام زميل احمد فؤاد نجم والبقرة هى مصر

[gemtawila]

اسف ، اللى كان بيغنيها هو الشيخ امام
كبر اسم نجم بعد تعرفه إلى الشيخ إمام في أوائل ستينات القرن الماضي. وكبرت معهما الظاهرة التي حملت اسمهما. وترافق ذلك مع أحداث سياسية واجتماعية كبيرة في مصر وفي العالم العربي وعلى النطاق العالمي. وعبرت عن تلك الحقبة، التي امتدت إلى عقد السبعينات كله وقسم من الثمانينات، قبل أن ينشب الخلاف بينهما لفترة من الزمن، مجموعة من قصائد نجم بتلحين وغناء الشيخ إمام، انتشرت بسرعة فائقة في كل الاتجاهات. كان من بين هذه القصائد واحدة ترثي القائد الثوري الشهيد غيفارا، وأخرى ترثي الشاعر الشهيد بابلو نيرودا، وثالثة ترثي القائد الشيوعي الفيتنامي هوشي منه. وكانت هذه القصائد تعبر عن موقف ثوري متقدم ومتفجر لدى كل من نجم وإمام بالمعنى الوطني وبالمعنى الأممي على حد سواء. كما كانت قصيدته في استقبال كل من الرئيس الفرنسي “جيسكار ديستان” والرئيس الأمريكي نيكسون من بين تلك القصائد التي انتشرت في جهات العالم الأربع. وكانت هاتان القصيدتان رداً سياسياً بليغاً على سياسة السادات وتعبيراً ناضجاً عن موقف نجم من الأحداث السياسية التي كانت تشهدها مصر، وكان يشهدها العالم العربي في تلك الحقبة.

إلا أن قصيدة “بقرة حاحا” كانت تعبر عن موقف اجتماعي نقدي للطبقة الاجتماعية السائدة والنظام السياسي بكامله. يقول نجم في هذه القصيدة:

ناح النواح والنواحة

على بقرة حاحا النطاحة

والبقرة حلوب

حاحا

تحلب قنطار

حاحا

لكن مسلوب

حاحا

[gemtawila]

الفقرة السابقة منقولة

[gemtawila]

ده رابط بيوضح مين هو الشيخ إمام

http://ar.wikipedia.org/wiki/%D8%A7%D9%84%D8%B4%D9%8A%D8%AE_%D8%A5%D9%85%D8%A7%D9%85

[goodwave]

لو الجهل بعينه إني معرفش الكلام الفارغ والقصائد التافهة (دي لو سميتها قصائد) ومعرفش شخصية تافهه زي أحمد فؤاد نجم دة ..... يبقى انا ليا كل الفخر والشرف إني أكون جاهل!

وفعلا أصحاب العقول او العجول في راحة!

[TAG_Turbo0]

أولا شكرا للأخ الى عرض القصيده
ثانياً لو أى حد ركز فى القصيده هيلائى ان هو ده حال البلد فعلا
الراجل شبة مصر بالبقرة الحلوب الى بتدى خيرها لأصحبها
ودخل ناس غرباء أخدوا خيرها وأصحابها نايمين
انا مش فاهم الناس معترضه على ايه؟؟؟؟؟؟

[airbus320]

عندك حق

انا شايف فعلا ان عندك حق اصحاب العقول والعجول فى راحة:) وجهل

[محمد عز]

انا من رايى اللى مش عاجبه الموضوع ميعلقش عليه

لكن ان واحد يقول للتانى روح شافوا حاجة مفيدة تعملها

حاجة مش ظريفه الصراحه

[CryptonX]

انا من رايى اللى مش عاجبه الموضوع ميعلقش عليه

لكن ان واحد يقول للتانى روح شافوا حاجة مفيدة تعملها

حاجة مش ظريفه الصراحه

اولا اعلق او لا اعلق ده شيء خاص بيا

ثانيا في كلامي عتاب لصاحب الكلام مش لناقل الكلام . لانه المفروض لما تنقل كلام حد تكتب في الاخر انه منقول من كذا او من فلان علشان الكلام ميتاخدش عليك .

ثالثا لو كان دكتور احمد زويل نفسه كتب الكلام ده .. فهو اسلوب في رأي الشخصي متدني و لا يليق يمنتدانا المحترم و احمد فؤاد نجم معروف عنه قلة ادبه و سخريته .

[airbus320]

اولا اعلق او لا اعلق ده شيء خاص بيا

ثانيا في كلامي عتاب لصاحب الكلام مش لناقل الكلام . لانه المفروض لما تنقل كلام حد تكتب في الاخر انه منقول من كذا او من فلان علشان الكلام ميتاخدش عليك .

ثالثا لو كان دكتور احمد زويل نفسه كتب الكلام ده .. فهو اسلوب في رأي الشخصي متدني و لا يليق يمنتدانا المحترم و احمد فؤاد نجم معروف عنه قلة ادبه و سخريته .

والله انا مستنى من الناقد الادبى الكبير يقولى فين قلة الادب الى فى القصيدة