استفال او اقيل..يالا ايه الحجة الجديدة

[M.Mosaad]

يا جماعه محدش يقدر ينكر دور الاعتصام في ميدان التحرير و قيمته و ضرورته للاصلاح في بلدنا و محدش يقدر ينكر دور اي حد شارك في الثورة دي و لكن انا ضد ان كل المطالب تبقي اصلاحات سياسيه لان فساد مصرالاقتصادي كان اقوي و اشد

يعني لو كانت مصر دوله فاسدة سياسيا قيراط فهي فاسدة اقتصاديا 24 قيراط و للاسف علي مدار السنين الطويله اللي فاتت مصر مفيهاش مسئول نضيف 100% و اساسا مفيش حد هيبقي مسئول و هيفضل نضيف لو معليهوش رقابه

الفساد في مصر مش اسامي الفساد هو منظومه حتي لو الاشخاص اتغيروا يعني شيل شفيق و حط عصام شرف شيل زيد و حط عبيد و بعد كدة

مصر محتاجه حاجة كدة زي جهاز حمايه المستهلك يبقي جهاز رقابي علي كل مصالح الدوله و ليه ميزانيته الخاصه و موظفينه يتم انتقائهم بعنايه بالغه من مختلف المجالات يكون دورهم وضع نظام للبلد في كل المجالات و كمان يبقي زي دور حماية المستهلك بالظبط تلقي الشكاوي الناس و التحقيق فيها و الرقابه علي كل كبيرة و صغيرة

و الله لو حتي مسئول فاسد غصب عن عينه هتعدل لان في رقابه عليه

استمرار تركيز المطالب في الجانب السياسي بس و التركيز علي التخلص من الاشخاص مش هو الحل مصر بتنهار اقتصاديا اكتر ما هي منهارة و القصة مبقتشي وضع مؤقت ده وضع ممكن يستمر كتير باستمرار وقف الحال و التركيز علي الاشخاص و الهتاف لاي حد بيهاجم الحكومه

الناس مبقتشي لاقيه تاكل و ناس كتير بقت بتسرق علشان لقمه العيش بلطجيه الايام دي بتوع النظام السابق و بتوع الحزب الوثني لكن بلطجيه الايام الجايه هيبقوا بلطجيه رغم انفهم لاني لو ملقتش اكل و اكل عيالي عيش حاف هضطر اوقفك في نص الطريق و اقولك طلع اللي في جيبك و لو بقيت بلطجي محترم هقولك طلع اللي في جيبك و اقسمه معايا علشان اكل عيالي

[Abo_Lina]

طبعا لا يمكن يحصل إصلاح إقتصادي بدون إصلاح سياسي يسبقه
كل دول العالم أصلحت من نفسها سياسيا أولا .. ثم تبع ذلك الإصلاح الإقتصادي
أقدر أعدد أمثلة من هنا لبكرة

[M.Mosaad]

طبعا لا يمكن يحصل إصلاح إقتصادي بدون إصلاح سياسي يسبقه
كل دول العالم أصلحت من نفسها سياسيا أولا .. ثم تبع ذلك الإصلاح الإقتصادي
أقدر أعدد أمثلة من هنا لبكرة

بس الواحد لازم يدرس ظروف البلد كويس مصر بوضعها الحالي كعدد سكان و بنيه تحتيه و ظروف معيشيه و تعليميه مش هتقدر تستني الاصلاح السياسي و بعدين الاصلاح الاقتصادي لازم يتم الاتنين بالتوازي مع بعض و لازم تكون المطالب للاتنين سوا

مصر محتاجه وقت كتير للاصلاح السياسي و اقتصاديا مش هنقدر نستني كل دة علشان يحصل بعد كدة اصلاح اقتصادي

يعني من ضمن المطالب حل جهاز امن الدوله و محاكمة القتله الجزء الاول تنفيذة ضروري و مهم جداااااااا بس لازم يتم دراسة كل جوانبه يعني الظباط اللي في الجهاز دة هيتم معاهم ايه هيتنقلوا اجهزة تانيه هيتم تسريحهم و يبقوا بلطجيه بس من غير بدل شرطه الموضوع دة عايز وقت لان حتي القتله دول (( مع ان نفسي يتعدموا قدامي في ميدان عام بكرة الصبح )) بس مش قادر ابقي زيهم و بقول لازم يتحاكموا محاكمه عادله و دة بياخد وقت

اللي اقصدة المظاهرات في ميدان التحرير يجب استمرارها كل يوم جمعه لعدم تعطيل البلد و يجب اعادة صياغه المطالب لخدمه كلا الاصلاحين السياسي و الاقتصادي و الضغط علي جهاز رقابي قوي لمتابعه حاله البلد لان مصر فيها فاسدين كتير اوي صغيريين برضة من اول الموظف اللي بيفتح الدرج بتاعه لحد المواطن اللي بيرشي عسكري المرور و السلوك دة مس هيتغير بين يوم و ليله يبقي لازم الاجبار علي تنفيذه و مراقبته بصرامه

و برضة جهاز الشرطه يجب عودته للشارع و لازم المواطنين اللي زي و زيك يحترموا جهاز الشرطه (( يحترموه مش يرهبوه )) و لازم نقف معاهم ضد اي نوع من انواع البلطجه من اول سواق المكروباص لحد البلطجي ابو سنجه و مطواه يعني من ضمن المطالب لازم المطالبه بعودة الشرطه في اطار جديد يضمن ليهم حياتهم و يضمن لينا احترامنا معاهم