للنقاش ,, أمن الدوله يتحل ولا تعاد هيكلته...

[medo_2060]

السلام عليكم

التعامل مع أمن الدوله ... ناس تقول يتحل نهائيا...
وناس تقول مفيش بلد متنفعش من غير جهاز أمن دوله محترم.. وبيطالبوا باعاده هيكلته...

المفروض مفيش قدامنا غير الحلين دول ولو فكرنا فى كلام اصحاب الحلين دول هنلاقى الاتنين كلامهم صحيح ومقنع..

الناس الى بتطالب بعدم حل امن الدوله واعاده هيكلته .. بتتكلم صح.. لازم يكون فى جهاز فعلا بعد تحديد مهامه طبعا زى fbi... ولازم يكون موجود لحمايه البلد والتدخل فى القضايا الكبيره ...

والناس الى بتقول يتحل .. بتتكلم صح برضه .. لأن امن الدوله من اصغر واحد لرئيس الجهاز نفسه مابيعرفوش غير حاجات محدده
( تعذيب, قتل, قمع, بلطجه ,من الاخر نص مصايب البلد هما وراها) ... ووجهه النظر دى بتقول انك عايز تضحك على نفسك وتقول الذئب لبس فراء الخروف ..

وطبعا مينفعش نقول هنستنى نظبط مناهج الدراسه ونستنى اجيال جديده اتعلمت صح لان دا حل عالمدى البعيد ومش هيتوافق عليه

ايه الى ممكن يتعمل فى رأيكم فى المشكله المعقده دى ؟

[cheetos_892005]

اعادة هيكلته ونظامه و تطهيره .....

و فصله عن وزارة الداخليه او يبقى قسم منفصل ...

مع اعده ترتيب مهامه وهي حمايه الدوله والشعب من الارهاب و غيرها .....

مش حماية النظام و قطع لسان اللي بيقول رايه واللي مربي دقنه ....

كان في ظابط امن دوله بيتكلم انهلرده علي نجوم اف ام قبل المغرب كده ....
حد سمعه قال ايه؟؟؟؟

[Egyzizo]

تعــاد هيكلته ..
مع وجود هيئة رقابية على طريقة التعامل مع الزباين.

[Ahmed Anwer]

عارف دايما التفاصيل مش مهمة

المهم طريقة التنفيذ أو الأداء علي ارض الواقع

بس مبدئيا لازم الناس اللي كانت شغاله فيه ،،

يا تترفد ،، يا ياخدوهم يشغلوهم في اي حته

طبعا بعد ما يتحاكموا ،،،

[atef_rashad]

لما امريكا متبعتش معتقلينها عندنا ساعتها يبقى امن الدوله او اى كان اسمه بقى شغال صح

[cheetos_892005]

عارف دايما التفاصيل مش مهمة

المهم طريقة التنفيذ أو الأداء علي ارض الواقع

بس مبدئيا لازم الناس اللي كانت شغاله فيه ،،

يا تترفد ،، يا ياخدوهم يشغلوهم في اي حته

طبعا بعد ما يتحاكموا ،،،

انهرده كان في ظابط امن دوله بيتكلم بيقول انا كنت بتمني انا و زمايل كتير اليوم اني اتنقل او اترفد حتي من الجهاز ده ...

لاننا مكناش راضين عن اللي بنعملوا بس بنعملوا ...

المذيع قاله ما كنت تقدم استقالتك ......

الظابط سكت شويه قاله مينفعش ....

المذيع قاله ليه يعني باستنكار كده ؟؟؟؟

قاله اللي بيعملها او يطلب نقله بتبقي نهايته و بيتحط في قائمة المغضوب عليهم ..

وقالوا احنا اسفين قوي و بنطالب بتغير كامل في الجهاز

ونفسنا نحمي الدوله بقي مش النظام ...

[عصام غنايم]

يتم تفكيكه بالكامل

متقنعنيش ان واحد قضى عمره كله بلطجه فجأه علشان عيون الثوره يبقى ذوق و محترم

لو عايز تتخيل وضعهم وحالتهم النفسيه اتفرج على فيلم زوجة رجل مهم ( احمد ذكى , ميرفت امين )

لو فعلاٌ الجهاز ده مهم يتم انشاء جهاز جديد على اسس وقواعد تشريعيه معلنه وتحت رقابه قضائيه كامله

بس بعد تفكيك القديم وتسريح افراده بعد محاسبتهم على المخالفات والتعذيب

[m3_dolphen]

إِنَّمَا جَزَاءُ الَّذِينَ يُحَارِبُونَ اللَّهَ وَرَسُولَهُ وَيَسْعَوْنَ فِي الْأَرْضِ فَسَادًا أَنْ يُقَتَّلُوا أَوْ يُصَلَّبُوا أَوْ تُقَطَّعَ أَيْدِيهِمْ وَأَرْجُلُهُمْ مِنْ خِلَافٍ أَوْ يُنْفَوْا مِنَ الْأَرْضِ ذَلِكَ لَهُمْ خِزْيٌ فِي الدُّنْيَا وَلَهُمْ فِي الْآَخِرَةِ عَذَابٌ عَظِيمٌ (33) سورة المائدة

[Car's Sniper]

مافيش حاجة اسمها يتحل

[factorialx]

الناس الى بتطالب بعدم حل امن الدوله واعاده هيكلته .. بتتكلم صح.. لازم يكون فى جهاز فعلا بعد تحديد مهامه طبعا زى fbi... ولازم يكون موجود لحمايه البلد والتدخل فى القضايا الكبيره ...

عايزك تقرأ عن توحش الFBI في الستينات أيام جي إدجار هووفر رئيسه لدرجة إنه عنده تسجيلات لنكسون رئيس أمريكا في الفتره دي

و بعد كشف فساده تم تحديد مدة رئاسة الfbi ب10 سنين كحد اقصى

الفكره إن إحنا مش خبرا أمنيين و كلنا متفقين على توحش أمن الدولة و إنه مكنش للدولة كان أمن النظام و إننا لازم نستفيد من خبرات جميع الدول قبلنا في الملف ده

مين بقى يقدر يرجعه لدوره الطبيعي بالقانون أو حتى يحله و ينشأ جهاز جديد

[AmAhmed]

الحل هو الحل

[د.أبونضال]

هناك فروع متعددة في أمن الدولة... أنا مثلا تم استدعائي لأمن الدولة ذات مرة بحكم تخصصي (مدرس لغة عبرية في الجامعة) لترجمة وفحص وثائق بالعبرية في إدارة تُسمى "إدارة النشاط الإسرائيلي"، ومثلها هناك إدارة للنشاط الإيراني ومكافحة التجسس وغير ذلك. ويمكن أن يقتصر عمل الجهاز على هذه الإدارات التي تتعلق بأمن الدولة فعلا لا أمن النظام.

[cayman69300]

تعاد الهيكلة بتاعته
و يتم تسمية اى مسمى اخر
لكن لا غنى عنة ابدا لحماية البلد

[mrwho1982]

ايه وظيفة امن الدولة

امن الدولة لخدمة النظام والنظام الحالي من الشعب

يكون جهاز معلوماتي تحت سيطرة الجيش يكون مراقب علية من الجيش

وفي ناس نازلة النهارده التحرير علشان الجهاز ده لازم يمشي

خاللي باللك انت عند مخابرات عامة ومخابرات عسكرية يعني امل الدولة مش هيفرق كثير

او يتاخد تحت جناح المخابرات او الجيش

وزير الداخلية لازم حد مدني او من القضاة او الجيش

والا كل جمعة هتبقي مظاهرات

[Ralliart]

مع ان كلامه ضايع بس شفيق قال كلمة كويسة وهي اننا لو مش عارفين نعمله نجيب اللي يعرفنا نعمله
وهي دي الحقيقة ان جهاز أمن الدولة عندنا لا يفقه شيئ عن طرق الاستجواب والتحقيق ولا التعامل مع الناس نهائياً وبيعتمد على شخصية الضابط اللي حظك جابك معاه
فالمفروض مؤقتاً إعادة صياغة دوره بأفراده الحاليين لان معندناش غيرهم مع محاكمة الفاسدين وبعد كدة البدء في تدريب الجداد والكويسين من القدام على الأسس الحديثة لامن الدولة عن طريق ناس من اي دولة فيها جهاز كويس او ناس من المخابرات واعتقد ان اي حد هيرحب بمساعدتنا في المجال ده