مخنوق ... و متوتر علطول ... وقلقان ... ساعدوني لو سمحتم

[Mahmoudyoussif]

يا جماعه انا لاول مره في حياتي وللهي

بكتب عن مشكله عندي على اي منتدى او موقع الكتروني حتى

انا في الايام العاديه اصلا كان احيانا بيجيلي حالات اكتئاب لوحدي كده مش عارف ليه

بعد احداث الثوره و كميه مناظر القتلى يوميا و بعدين كميه الاشاعات الغريبه اللي بتتطلع

ما بقتش عارف لا انام غير و النور مفتوح و بقوم على اي صوت

لو روحت الشغل بروح متاخر و مستواي نزل في الشغل عن اول ما جيت حتى زمايلي في الشغل مستغربين

من كده قبل كده كنت ممكن اشتغل من الساعه 8 الصبح لغايه 11 بليل دلوقتي بروح الشغل الساعه اتنين الضهر

و بمعرفش اشتغل ... الموضوع ده انعكس عليا اصلا في علاقتي مع خطيبتي ما بقتش عارف اكلم معاها زي الاول

مابقتش اخرج غير للشغل اللي انا عايز اسيبه اصلا .... بقيت ببص للكل واحد كويس بتعامل معاه من بقال لسواق

تاكسي لواحد ماشي في الشارع بقيت مشتت الذهن 24 ساعه مش عارف اعمل ايه بصلي و اقر قران اروق

شويه و بعد كده الحاله دي بترجعلي تاني ... اصلا قبل احداث 25 يناير حصل ان في طفل عندنا في العماره و قع

من الخامس عندي في المنور في الاول و شلته بايدي طبعا في عداد الاموات ... مات بعديها بكذا يوم في

المستشفى ... الموضوع دا برده دخلني في مود مش كويس ... قلت شويه و هسافر شرم او اي حته

لقيت احداث الثوره


بصراحه مش عارف اعمل ايه انا لقيتكوا زي اخواتي قلت افضفض معاكوا عشان انا داخل على مرحله

ما يعلم بيها غير ربنا ... معلش لو طولت عليكوا و ما تبخلوش عليا بالردود

[أحمد كمال]

انت محتاج طبيب نفسي يساعدك على عبور الازمة اللي انت فيها

و ده لا عيب و لا حرام خالص ......

[Mahmoudyoussif]

انت محتاج طبيب نفسي يساعدك على عبور الازمة اللي انت فيها

و ده لا عيب و لا حرام خالص ......

لو تعرف دكتور كويس ممكن تقولى عليه

و ربنا يجزاك عني خير

[Ahmed_Elkhateb]

يا باشا انت تلتزم فى الصلاة وتدعى بدعاء فك الهم والكرب وتقيم الليل والله هتبقى تمااااااااام اوى

[youssefmustang]

انت انسان حساس زيادة عن اللزوم وعواطفك طاغية عليك اكتر من عقلك والعلاج الامثل زى ما قال الاستاذ احمد الخطيب
الصلاة وقيام الليل والدعاء
ولا طبيب نفسى ولا يحزنون
وان شاء الله هتكون فى حال جيد بعون الله اخوكم يوسف

[youssefmustang]

وعلى فكرة الاعراض اللى بتحكى عليها تشابه اعراض المس او السحر والله اعلم

[AhMeD EzZ]

انا زيك بالظبط ... 24 ساعة حاسس بقلق و خوف
مش بنام في الضلمة نهائي .. لازم استني الفجر يشقشق و انام بعدها
اسمع قرآن شوية اهدي بعديها بشوية ارجع لنفس الحالة .... و المشكلة ان الموضوع معايا بقالة فترة كبيرة نسبياً

محدش عندة حل .؟

[AmatoALLAH]

انا زيك بالظبط ... 24 ساعة حاسس بقلق و خوف
مش بنام في الضلمة نهائي .. لازم استني الفجر يشقشق و انام بعدها
اسمع قرآن شوية اهدي بعديها بشوية ارجع لنفس الحالة .... و المشكلة ان الموضوع معايا بقالة فترة كبيرة نسبياً

محدش عندة حل .؟

هي ايه حكاية النوم في الضلمة دا

انا كمان بئيت اخاف انام في الضلمة

بالرغم اني ماكونتش اعرف انام نهائي في اي نور حتي لو كان بسيط :(

[Mahmoudyoussif]

انا العيله عندنا معروف عنها انها بتتاثر بالحسد

من وانا صغير اتحكالي كذا موقف عن الحسد فعيلتنا و ليا انا بالذات

واتاثرت بيه ... بمعني اني كنت لسه مولود و ما ببطلش صريخ

حتى جيه شيخ كان صاحب والدي الله يرحمه وقرا عليا ايات من القران

و اتاوبت جامد و نمت على رجليه و قال لوالدتي ساعتها دا حسد

حتى والدي اتعرض لنفس الموضوع دا مش عارف دا له علاقه ولا لا

كان الموضوع داخل فيه اعمال وكده ... هل من طريقه اتاكد بيها طيب

[zalpany2000]

السلام عليكم ورحمة الله
اخي الكريم
خير ان شاء الله ... اولا الموقف اللي انت اتعرضت ليه بتاع وفاة الطفل ده ... موقف مش سهل ... وغالبا هو السبب الجوهري في اللي حضرتك فيه ... انت محتاج تكسر حالة الجمود اللي في حياتك ... لازم تخرج للشوارع ... انزل مع صحابك .. اتحرك ... ادخل سينما ...شوف مين من صحابك بترتاح معاه وفضفض
لازم تكسر حالة الجمود دي باي شكل
و ياريت لو تسافر تغير جو يومين او حاجه

وماتهربش من الفكر ... بس ماتخليهوش يسيطر عليك ... يعني ماتحاولش تبذل مجهود ذهني علشان تنسي موضوع الطفل ده ... بس افتكر قد ايه كنت متماسك و قد ايه عملت موقف كويس ... وتحملت ... وحوله من حالة ذعر و صدمة لحالة رضا عن النفس

طبعا مهم جدا ما تقعدش لواحدك كتير ... اتكلم مع اصدقائك .. مع اهلك في البيت ... وهي فترة وان شاء الله تعدي

موضوع النوم في الضلمة ده بقي مش عارف اقولك ايه ... انا اوقات باحط حاجه تحت عقب الباب علشان مايدخليش نور الاوضة ... بس قادر طبعا افهم ان حالة القلق اللي انت فيها دي هي السبب

عموما مش مشكلة بس يا ريت تخلي حديطفيه بعد ما تنام لان النور مرهق جدا اثناء النوم، ويتسبب في انك تقوم مرهق كأنك مانمتش

تحياتي وربنا ييسرلك الاحوال ويعفو عنك و عنا

[Mahmoudyoussif]

ربنا ييسر الاحوال ان شاء الله وشكرا لكل اللي ردوا عليا

بس للاسف حتى والدتي اللي هيا الحاجه الوحيده اللي مونساني دلوقتي

عايزه تسافر تعمل عمره مع انها رحت من 4 شهور فاتوا بحاول اقنعها

انها تقعد معايا الفتره دي مش مقتنعه بقولها حالتي النفسيه بتسؤ

بتقولي انت عامل زي العيل الصغير و ببتدلع وخلاص ... بصراحه بقيت

عايز اقطع الباسبور او اخبيه مع العلم اني انا اللي عملتها الفيزا

[AshTurbo]

أن شاء الله خير يا محمود باشا أحنا هنا كلنا أخوانك وأهلك وأصدقائك وتقدر تفضفض براحتك في أي وقت وهي فترة وغمة وتعدي ومش بس أنت لوحدك اللي عندك توتر وقلق مصر كلها عندها توتر وقلق مع تفاوت الدرجات من واحد للتاني فماتخافش وأدعي لربنا معانا يفك الكربة دي عننا وأن شاء الله البلد بتتحسن وهترجع شغلك أحسن وأقوى من الأول وأوعى تسيب شغلك دلوقتي لأن دي هيزيد حالتك للأسوء أنزل كل يوم غير جو قابل ناس وأتلكم معاهم كلم خطيبتك وعائلتك وتقرب الى الله وخليك مؤمن بقدرة الله .

حقولك سر ما بيني وما بينك كدة .. ياما عدت عليا مواقف صعبة ومشاكل كانت ممكن تكسر أي حد لو كان حجر وفولاذ ومع ذلك كنت أجي في وسط الأحساس الرهيب بالضعف والضياع وأقف وأقول ( أنا مش هتكسر أنا مش هنهزم ) هأكمل ولا كأن في حاجة حصلت وبكرة أحسن وربك بيكرم والدنيا ماشية زي الفل أهي بحلوها ومرها وهي كلها شوية ضغوط وهتعدي مش أنت بس فيها متقلقش وبالنسبة لحل الدكتور النفسي جرب لمجرد التجربة لقيت نفسك أرتحت معاه يبقى كويس مخسرتش حاجة وممكن يديك مهدئات لحكاية القلق تساعدك بأذن الله .

[AhMeD EzZ]

هي ايه حكاية النوم في الضلمة دا

انا كمان بئيت اخاف انام في الضلمة

بالرغم اني ماكونتش اعرف انام نهائي في اي نور حتي لو كان بسيط :(

انا كنت زي حضرتك بالظبط ... مش عارف ايه الي حصل

و كمان دة بقالة معايا فترة كبيرة من قبل الاحداث الحالية ... يعني مش هي السبب :(

[Mahmoudyoussif]

أن شاء الله خير يا محمود باشا أحنا هنا كلنا أخوانك وأهلك وأصدقائك وتقدر تفضفض براحتك في أي وقت وهي فترة وغمة وتعدي ومش بس أنت لوحدك اللي عندك توتر وقلق مصر كلها عندها توتر وقلق مع تفاوت الدرجات من واحد للتاني فماتخافش وأدعي لربنا معانا يفك الكربة دي عننا وأن شاء الله البلد بتتحسن وهترجع شغلك أحسن وأقوى من الأول وأوعى تسيب شغلك دلوقتي لأن دي هيزيد حالتك للأسوء أنزل كل يوم غير جو قابل ناس وأتلكم معاهم كلم خطيبتك وعائلتك وتقرب الى الله وخليك مؤمن بقدرة الله .

حقولك سر ما بيني وما بينك كدة .. ياما عدت عليا مواقف صعبة ومشاكل كانت ممكن تكسر أي حد لو كان حجر وفولاذ ومع ذلك كنت أجي في وسط الأحساس الرهيب بالضعف والضياع وأقف وأقول ( أنا مش هتكسر أنا مش هنهزم ) هأكمل ولا كأن في حاجة حصلت وبكرة أحسن وربك بيكرم والدنيا ماشية زي الفل أهي بحلوها ومرها وهي كلها شوية ضغوط وهتعدي مش أنت بس فيها متقلقش وبالنسبة لحل الدكتور النفسي جرب لمجرد التجربة لقيت نفسك أرتحت معاه يبقى كويس مخسرتش حاجة وممكن يديك مهدئات لحكاية القلق تساعدك بأذن الله .

ربنا يكرمك يا رب و طول مالناس اللي زيك موجوده الواحد

بيستريح ولله وربنا يكرمنا يارب ويعدي الازمه دي على خير

[osoliman88]

روح لطبيب نفساني وماتقولش لحد

كان في موضوع موجود في المنتدي من فترة عن نفس المشكلة والزملاء كانوا كاتبين أسماء أطباء كثيرة - حاول تجد هذا الموضوع