تاجير تاكسي

[pirlo2000]

السلام عليكم .....
انا محتار احط الموضوع ده فين بس لقيت ان هنا انسب مكان......
انا الحمدلله ربنا رزقني بعمل في القرية الذكية بس المشوار طويل جدا كل يوم بسوق حوالي 3 ساعات (انا في مدينة نصر)و فبوصل البيت مفيم تماما و هلكت انا و العربية .....
بدل الانتقال الحمدلله مش بطال و ممكن اشوف بيه حل للمشكلة ديه بس انا عايز مساعدتكم للاستشارة و خصوصا ان معلوماتي عن التالي قليلة حيث اني مش من رواد التاكسيات....

كنت بفكر اتفق مع تاكسي اروح و اجي معاه كل يوم .... السؤال بأه اجيب تاكسي اتفق معاه منين....اي تاكسي الاقيه في الشارع و لا في مكاتب مخصوصة (لو حد عارف حاجة يقولي)....

و الاجرة هتبقي ببتحسب ازاي .... اكيد مش هتبقي زي الاجرة العادية.....

و الموضوع اصلا ده ممكن و لا انا بحلم.....

الف شكر مقدما :)

[AmatoALLAH]

اكيد طبعا مش هتكون زي الاجرة العاديه

دا من مدينة نصر للقرية الذكيه تعملك 80 او 90 جنيه بالتاكسي الابيض

بتهيئلي هيكون مبلغ شهري تتفق معاه عليه

[shaddadfalcon1]

بيتيهالي اي سواق تاكسي تظبط معاه ماهيصدق لانك كده لقطه ليه
مشوار زي ده رايح جاي كل يوم ممكن يعملهم ويروح ينام واكيد لو بقي ابونيه هيبقي ارخص ولو تشوف حد معاك في الشغل يبقي احسن كتيير وارخص

[M.Mosaad]

لا اي تاكسي ابيض ممكن تتفق معاه بالشهر
و تشوف المشوار بيعمل كام في العادي و تخصم منه 20% علي اساس انه مبلغ ثابت للسواق و تدفعله بالاسبوع و طبعا هو ملوش دعوه لو اجازات رسميه او اجازات سنويه ليك الا طبعا لو اجازة طويله اسبوعين مثلا و لا حاجه يعني الاتفاق بيبقي بالشهر و الدفع بالاسبوع

و الافضل كمان تشوف حد من زمايلك في طريقك و تقسموا فلوس التاكسي سوا بس مش اكتر من 2 زمايل علشان المشوار طويل و تقعدوا مستريحين

و ممكن كمان من غير تاكسي تقسموا عربيتاكم يعني كل واحد يروح بعربيته اسبوع هتبقي فكرة كويسة برضة

[pirlo2000]

الف شكر علي تجاوبكم..... الفكرة اني تقريبا الوحيد في الشركة اللي في مدينة نصر :)

الفكرة اني اضمن منين انو يكون سواق كويس .... هل في مثلا مكاتب الواحد يتعامل معاها يجيبوله هما سواق بالتاكسي بتاعه ؟

[mohamed_mohsen]

طب ما تشوف سواق يوديك و يجيبك بالعربيه بتاعتك
متهيألي كده ارخص

[Everlasting]

طب ما تشوف سواق يوديك و يجيبك بالعربيه بتاعتك
متهيألي كده ارخص

[أحمد كمال]

اكيد طبعا مش هتكون زي الاجرة العاديه

دا من مدينة نصر للقرية الذكيه تعملك 80 او 90 جنيه بالتاكسي الابيض

بتهيئلي هيكون مبلغ شهري تتفق معاه عليه

بالاصفر الاجرة ما بين 50 و 70 حسب الزحمة

اعتقد الابيض زيه او ارخص

[medomaster]

انا كنت محتار زيك كدة والحمد لله اتفقت مع تاكسي وماشي تمام
هحكيلك الموضوع من الاول ....
انا بقى كان عندي نفس مشكلتك بس في الجامعة وقررت إني أتفق مع تاكسي انا و 3 أصحابي توزيعا للمصاريف يعني
وبدأت رحلة البحث عن تاكسي وانا كنت زيك كدة والحمد لله ليا خبرة كويسة دلوقتي في التعامل
انا نزلت عادي أقف تحت البيت وبدأت اركب أي تاكسي يكون أبيض وشكل العربية جديد عشان ميقرفنيش في موضوع الأعطال دا ويكون شكل الراجل محترم كدة وأركب معاه وأقوله يوصلني مشوار صغير كدة بتاع 3 جنيه كدة وأبدأ أدردش مع السواق وكدة وأعرف شخصيته من ناحية الإلتزام في المواعيد أو التدخين ( لأن دي حاجة بتتعبني) وموضوع الرضا (في ناس بتبقى ساخطة على النعمة حتى لو هتديله مليون جنيه) يعني كنت بعمله انترفيو كامل كدة بس بطريقة الدردشة وركبت مع كذا واحد وكانو مينفعوش والمهم لاقيت واحد كويس فقلتله في وشط الكلام كدة متعرفش واحد صاحب تاكسي أبيض يوصلنا من حلوان للتجمع والعكس وتكون مواعيده مظبوطة ..طبعا الراجل يفكر كدة شوية ويقولي أنا ممكن أوصلك وطبعا بيبقى عاوز يعرف هياخد كام ............الحته دي لازم تبقى حاسبها قبليها عشان تقوله على طول إنه هياخد كذا
هقولك تحسبها ازاي ..........انا هشرحلك أنا عملت ايه وانت حاول تقيس الموضوع علي موضوعك
الطريق من حلوان للجامعة بياخد حوالي 56 جنيه بالتاكسي الأبيض (العداد ) دا رايح ...يعني رايح جاي قول 100 جنيه وانا بروح 20 يوم في الشهر (عندي جمعة وسبت أجازة ) يعني 100*20 = 2000 جنيه ...دا انا لو هركب كل يوم تاكسي مختلف
انا بقي بدفع للراجل 1500 جنيه في الشهر (عشان انا هركب معاه كل يوم )
بس اول لما بييجي يقولي هتديله كام بقوله 1400 في الشهر (وهدفعلك كل 15 يوم ) عشان ميحسش بالملل وكدة وطبعا أنا كل 15 يوم بديله ال700 جنيه و50 جنيه بونص كدة عشان هو ملتزم في المواعيد وكدة ...يعني كدة كدة بديله ال1500 جنيه بتوعه وابقى مبقشش عليه كمان ..والموضوع دا يمشي برده عشان لو طلب زيادة ولا حاجة بقوله لو أول شهر مشيت معايا كويس في المواعيد وكدة هزودك ل1500 وهو طبعا بيلتزم جدا ...وهكذا
شوية تعليمات بقى من الخبرة كدة
1- اكتب كل حاجة صغيرة أو كبيرة اتفقتو عليها (يعني هتدفع أيام الأجازات ولا لأ ولو مجاش هتخصم قد إيه وهكذا .....كل حاجة )
2-تدفعله الفلوس مؤخر إوعى تدفعله مقدم عشان ميخلعش ومتعرفش تجيبه تاني (انت كدة كدة مكان بيتك هو عارفه
3- حاول تاخد صورة من بطاقته أو تعرف ههو ساكن فين
4- إوعي تتفق مع تاكسي بنزين (عشان اتفقت قبل كدة وقرفني في عشتي وعاوز كل كام يوم فلوس زيادة )
5-أول أسبوع أكد على المواعيد وخليك حاسم فيها عشان ميتأخرش بعد كدة
6-لو عرفت تجيب حد ساكن جمبك بيروح نفس المشوار وتقاسم معاه الفلوس يبقى أحسن وأوفرلك
7-تتفق معاه إن اليوم اللي هيغيبه لازم يوفرلك تاكسي بديل او هتخصم منه يوم ولازم يبلغك بليل
بس كدة مش فاكر حاجة تاني ولو حضرتك محتاج أي حاجة تاني تسالني عليها ابعتلي على الخاص وانا هبعت لحضرتك رقمي وربنا يوفقك إن شاء الله

[pirlo2000]

الف شكر لكل الردود و الحمدلله واضح ان الموضوع مش حلم بعيد ...... و ياريت لو حد عنده برضه تجربة سابقة يفتبنا في الموضوع ده...


و شكرا جدا للاخ الفاضل medomaster علي شرحه التفصيلي و انا اسمي علي فكرة محمد علاء زيك

[mahmoudselim]

كان في هنا بعض الاعضاء عاوزين يشتغلوا علي عربياتهم الملاكي لمشاوير وكدا.. ممكن تتفق مع حد هنا وهتبقي في نفس الوقت ضامن الشخص والعربية وفي نفس الوقت برضوا بتوفرلة فرصة عمل في الوقت الصعب دا.

اعتقد هي المشكلة الوحيدة هي ممكن تكون تكلفة البنزين .. او ممكن متكونش مشكلة علي حسب نوع البنزين والعربية

[tiger451]

انا رايي تشتري تاكسي يدخلك فلوس وفي نفس الوقت يوصلك كل يوم ببلاش :)

[abumoh2000]

ممكن حضرتك تاجر عربيه من اى مكتب بسواقها
يوديك و يستناك لحد ما تخلص شغل وبعد كده يرجعك البيت
بس معرفش تكلفتها كام

[pirlo2000]

ممكن حضرتك تاجر عربيه من اى مكتب بسواقها
يوديك و يستناك لحد ما تخلص شغل وبعد كده يرجعك البيت
بس معرفش تكلفتها كام

اكيد هتبقي غالية اوي...... خصوصا انو هيستني

[abumoh2000]

اكيد هتبقي غالية اوي...... خصوصا انو هيستني

اسال ال8 ساعات بكام