ياترى بعد الثورة هل غيرت تصرفاتك الخاطئه؟

[dr.hazem]

السلام عليكم ورحمة الله

باختصار شديد
لسا بتدي السياس المنطورين في كل حته فلوس؟؟ مع انك متأكد من جواك انه ملوش حق عندك

لسا بتدور ازاي تمضي حضور وتزوغ من الشغل وتقول مالكل بيعمل كده؟
لسا في ناس بتحجز قدام بيوتها من الشارع بالطوب؟

لسا عندك استعداد انك تدي حد فلوس عشان يخلصلك ورقك؟؟؟

لسا بتمشي وانت قافل مراياتك الجانبية؟؟
لسا بتمشي بالليل مش مولع انوار او مولع السهاري فقط او معندكش انوار فرامل؟؟؟؟
لسا بتمشي من غير ماتربط حزام امان؟؟؟

عارفين لو الحاجات دي مختفتش دلوقتي.... يبقى معلش بلاش نقول ثورة عموما كده وبلاش نجيب سيرة الاصلاح

لان كل دي صور من الفساد واحنا بنعين فيها الناس ونشجعها

معلش انا مش هتكلم اكتر من كده لكن انا خلاص عايز بجد اغير واتغير للاحسن ان شاء الله


تحياتي

[mmtronic]

لو عايز رد على اسئلتك دى كلها انزل الشارع بعربيتك و انت تشوف للاسف ان الناس مش عايزة تنضف ابدا

ربنا ادانا فرصة ذهبية ان احنا نرجع و ننضف بجد بس زى ماقلت للاسف الناس مصرة و تتمادى فى البلطجة

و الله يا جماعة - المشكلة مش فى البلطجية الى دايريين يميين و شمال على حسب حكايات الناس انما المشكلة فينا احنا فى الناس العادية الى مصرة تبلطج على بعضها فى الشارع و غيرة

انزل الشارع و شوف و انت يجيلك احباط - انا كنت فى مشوار فى الزمالك و عديت على وسط البلد رجعت بيتى و انا ضغطى عالى

مشى عكسى

ركن صف ثالث

كسر اشارات

عدم احترام اولوية المرور و غيره كفاية علشان ضغطى على

انا ليسة رايح اجدد ترخيص العربية - اما نشوف دا كمان عامل اية

لكى الله يا مصر

[human]

السايس ده بلطجى بياخد اتاوه

[MOUSTAFA_SAAD]

يا استاذ للاسف احنا عمرنا ما حنتغير ويظهر ان احنا شعب مبيجيش غير بالاستبداد

انا شغال فى الجوازات وطبعا المكان تبع وزارة الداخليه
مش عايز اقولك ايه كمية السفاله اللى الواحد بيشوفها كمل يوم من بعد الثوره والناس جايه تتخانق وعاوزه تخلص ورقها بالعافيه حتى لو كمان ناقص مستندات هى الثوره كانت قايمه على الفوضى والغاء القوانين والتعليمات وكله يبقى زيطه

وللاسف سمعة الداخليه السيئه احنا بندفع تمنها فى المكتب عندنا رغم كل اللى معانا مجرد ظابط واحد مختص بناحيه اشرافيه فقط و3 امناء شرطه والشغل كله قايم على المدنيين وتلت المكتب ستات كبيره فى السن كمان يعنى لكان عندنا تعذيب فى القسم ولاضرب ولا اى حاجه وكل واحد ييجى عامل نفسه فتوه ومحدش قادره ومشاكل لاتنتهى على ذلك الحال
ادى اللى عملته الثوره فى بعض الناس وبداو يستغلوها استغلال خاطىء للاسف

ده غير المطالب الفئويه اللى الحمد لله عندنا فى الشغل محدش عمل اضراب ولا اعتصام وموظف البنك والبترول اللى بياخد من خمس الى عشر اضعاف مرتبى عامل مظاهره واعتصام ومش عاجبه كمان
بصراحه حاجه غريبه الواحد بعد ما بداء يحب البلد والناس تانى علشان الايجابيه اللى كنا فيها رجع يكره البلد تانى بسبب شوية المستغلين اللى مبيحمدوش ربنا والغريبه انهم احسن حال ومرتبات وامتيازات ومع ذلك مش عاجبهم وياريتهم بيشتغله قد اللى بياخدوه

[factorialx]

انزل الشارع و شوف و انت يجيلك احباط - انا كنت فى مشوار فى الزمالك و عديت على وسط البلد رجعت بيتى و انا ضغطى عالى

مشى عكسى

واحد الله يسامحه في شارع التحرير ( البحوث) ماشي عكسي بسرعه كان هيشلني معاه و أنا بعدي الشارع و باصص على الإتجاه اللي جايه منه العربيات

[sayed911]

بص انا عشان اكون صريح مع نفسي انا كنت بقطع ورقة النهاردة وفتحت ازاز العربية ورميتها وفجأ وهيا بتطير افتكرت اني كنت واخد عى نفسي عهد اني مش ها اعمل كده تاني ابدا وانا واثق انها مش ها تحصل مني تاني لأنه الثقافة اتغيرت .... ولكن فكرة السايس دي ليها ابعاد يعني انا مثلا النهاردة الصبح كنت في الدقي في شارع مصدق امام مجموعة طلعت مصطفى وكلنا عارفين الركنة هناك شبه مستحيلة تماما روحت جي والركنة كانت وصلت لصف 3 !!!!! سبت العربية للسايس هوة ركنها طلعت قعدت فوق 3 ساعات ونزلت هوة راح جايبلي العربية تاني قدام الباب .... وكان راكنا ورا المبنى في حتة لا يمكن انا ها اعرف اروح اوديها واجيبها يبقى لما اجي نازل لما اديتلوا اللي فيه النصيب مش عشان هوة حاجة ولكن هوة اصلا مطلبش حاجة لأنه موظف في الشركة !!!! ولكن احساسا مني انه الراجل خلقلي ركنة من تحت الأرض وحافظ على العربية !!!!!! ولكن مش اي سايس بقى دي قصة تانية !!!

[dr.hazem]

يا استاذ للاسف احنا عمرنا ما حنتغير ويظهر ان احنا شعب مبيجيش غير بالاستبداد

انا شغال فى الجوازات وطبعا المكان تبع وزارة الداخليه
مش عايز اقولك ايه كمية السفاله اللى الواحد بيشوفها كمل يوم من بعد الثوره والناس جايه تتخانق وعاوزه تخلص ورقها بالعافيه حتى لو كمان ناقص مستندات هى الثوره كانت قايمه على الفوضى والغاء القوانين والتعليمات وكله يبقى زيطه

وللاسف سمعة الداخليه السيئه احنا بندفع تمنها فى المكتب عندنا رغم كل اللى معانا مجرد ظابط واحد مختص بناحيه اشرافيه فقط و3 امناء شرطه والشغل كله قايم على المدنيين وتلت المكتب ستات كبيره فى السن كمان يعنى لكان عندنا تعذيب فى القسم ولاضرب ولا اى حاجه وكل واحد ييجى عامل نفسه فتوه ومحدش قادره ومشاكل لاتنتهى على ذلك الحال
ادى اللى عملته الثوره فى بعض الناس وبداو يستغلوها استغلال خاطىء للاسف

ده غير المطالب الفئويه اللى الحمد لله عندنا فى الشغل محدش عمل اضراب ولا اعتصام وموظف البنك والبترول اللى بياخد من خمس الى عشر اضعاف مرتبى عامل مظاهره واعتصام ومش عاجبه كمان
بصراحه حاجه غريبه الواحد بعد ما بداء يحب البلد والناس تانى علشان الايجابيه اللى كنا فيها رجع يكره البلد تانى بسبب شوية المستغلين اللى مبيحمدوش ربنا والغريبه انهم احسن حال ومرتبات وامتيازات ومع ذلك مش عاجبهم وياريتهم بيشتغله قد اللى بياخدوه

اعانك الله ياعزيزي على ما انتم فيه
لكن احب اقولك ان المشكله فعلا مش فيكم كموظفين
مش هروح لدولة بعيده
السعودية جنبنا اهي
عندهم موظف الحكومه اللي واقف عالشباك في اي دايره بياخد حاجه اسمها بدل طبيعة عمل
لان كل اللي زيكم بيتعامل مع كل الفئات وهوا اللي في وش المدفع
وهنا ييجي دوركم
هل انتو طلبتو حاجه زي دي؟؟؟
هل الدوله والحكومه عارفه انتو حايشين عنها قد ايه؟؟؟

وسيبك من اللي مرتاح وبينزل ويعمل اعتصامات
ده اسمه طمع
لكن الاولى ان انتو تطالبو بحقوقكم المشروعه
مش بقولك طالب بحاجه مش بتاعتك
انا بقولك طالب بحقوقك فقط....

بص انا عشان اكون صريح مع نفسي انا كنت بقطع ورقة النهاردة وفتحت ازاز العربية ورميتها وفجأ وهيا بتطير افتكرت اني كنت واخد عى نفسي عهد اني مش ها اعمل كده تاني ابدا وانا واثق انها مش ها تحصل مني تاني لأنه الثقافة اتغيرت .... ولكن فكرة السايس دي ليها ابعاد يعني انا مثلا النهاردة الصبح كنت في الدقي في شارع مصدق امام مجموعة طلعت مصطفى وكلنا عارفين الركنة هناك شبه مستحيلة تماما روحت جي والركنة كانت وصلت لصف 3 !!!!! سبت العربية للسايس هوة ركنها طلعت قعدت فوق 3 ساعات ونزلت هوة راح جايبلي العربية تاني قدام الباب .... وكان راكنا ورا المبنى في حتة لا يمكن انا ها اعرف اروح اوديها واجيبها يبقى لما اجي نازل لما اديتلوا اللي فيه النصيب مش عشان هوة حاجة ولكن هوة اصلا مطلبش حاجة لأنه موظف في الشركة !!!! ولكن احساسا مني انه الراجل خلقلي ركنة من تحت الأرض وحافظ على العربية !!!!!! ولكن مش اي سايس بقى دي قصة تانية !!!

حلو
ده انتا بتديله عشان عملك مقابل
لكن اللي تروح على حته
وتركن فيها لوحدك وفجأة تلاقي واحد هوب راح ناططلك من تحت الارض وبيقولك ايوة يابيه
ايوة ياباشا
ده بتديله؟؟؟
انا موافق اديله لو مسح العربية مثلا
يعمل اي حاجه وياخد معنديش مشاكل
انما يأجرلي جزء من الشارع مش بتاعه ولا بتاع ابوه ده اللي مينفعش نرضى بيه
وهوا مش اي واحد عاطل عن العمل يعمل سايس ويبقى مليونير!!!

بس ليا ملاحظه ...
هوا حضرتك ممكن تآمن لاي حد وتديله مفتاح العربية يروح يركنها كمان؟؟
الا اذا كان وشه مألوف ليك وعارفه
لان الموضوع ده خطر جدا

عموما ربنا يسترها عالجميع



تحياتي لكل اللي مروا عالموضوع

[kono]

والله انا نفسى اتغير فيه حاجات كتير غلط بحاول ابطلها وحاجات تانية كتير برضه لسه مش عارف
والمشكلة بقى انى شغلى بيستلزم انى ادفع لكل موظف فلوس عشان اخلص شغلى مع ان ورقى مظبوط بس لما قررت انى مش هدفع تانى واقنعت شوية مستخلصين ..ناس تانين قالوا احنا مش هينفع نمشى شغلنا الا لما ندفع..ناس كتير للاسف مش عاوزة تتغير وفاكرين الثورة دى للقضاء على القوانين ..واننا نبقى بلطجية ونعيش فى فوضى

[dr.hazem]

كمثال فقط
حد جرب يمشي من غير كلاكس في البلد؟؟
ههههههههههههه
صعبه شويه بس ليه منحاولش؟؟؟

يارب يرفع الغمه عننا


آمين

[sayed911]

بس ليا ملاحظه ...
هوا حضرتك ممكن تآمن لاي حد وتديله مفتاح العربية يروح يركنها كمان؟؟
الا اذا كان وشه مألوف ليك وعارفه
لان الموضوع ده خطر جدا

بص هوا معاك حق طبعا وفعلا .. ولكن هوا مش لابس لبس عادي ده لابس لبس فرد الأمن والكارنيه على صدروا وبيبقى واقف مع الأمن بتاع الشركة برة ... + لزيادة الأمان باخد كل مفاتيحي من السلسلة وبسيب مفتاح العربية فقط من غير ولا رخص ولا اي اثباتات بالمرة :d :d
ولكن هوا مثلا في كثير من العماير فعلا بتسيب مفاتيح العربيات مع لاسياس معروفين من زمن الزمن ولكن انا بصراحة بقلق :d :d

[dramir1]

ردي في الموضوع دا

http://www.nilemotors.net/Nile/206846-a.html

[dr.hazem]

ردي في الموضوع دا
http://www.nilemotors.net/nile/206846-a.html

زياد محمد بكير شاب من شباب ثورة 25 يناير .. مصمم تشكيلي بدار الاوبرا ووالده من محاربين اكتوبر 1973.. اختفى زياد يوم جمعة الغضب 28-1-2011 .. أهله فضلوا يدوروا عليه 43 يوم ولقوا جثته مع جثة الشهيد طارق عبدالحميد في المشرحة مصاب برصاصة في الصدر .. أهله متعرفوش على جثته بسبب اختلاف ملامحها وتحليل dna هو اللي أثبت شخصيته .....
عشان دم زياد ميروحش هدر ...هو مكانش ناقصه حاجه بس كان نفسه يشوف مصر احسن بلد في الدنيا
ياريت كل واحد فينا يحقق انجاز كبير في مجاله:

- لازم نوقف الخلافات بيننا ونقبل اراء بعض ونوضح وجهة نظرنا في اي موضوع باسلوب هاديء وبلاش عصبيه.

-ياريت نتعامل كويس مع بعضنا كمسلمين ومع اخوتنا المسيحيين "لأن اعداء الوطن عايزين مصر تولع بالفتنه الطائفيه".

- ياريت كل واحد فينا يراجع حساباته مع ربنا ويشوف هو مقصر في ايه لان الموت مايعرفش عمرنا كام "الموت يأتي بغته"
انا معرفش ممكن اموت امتى وازاي ولكن نفسي اموت موته ربنا يرضى عني بيها .
الله يرحم زياد كان مجهز معرضين المفروض كان يقيمهم "معرض صور فوتوغرافيه -معرض صور جرافيك" ولكن نصيبه انه يموت عشان احنا نعيش...واكيد دمه مش هايروح هدر لو كلنا اتغيرنا للأفضل وبقينا احسن بلد في العالم.
كل واحد فينا يسأل نفسه "لو النبي صلى الله عليه وسلم زارني في بيتي وقضى معي يوم هيبقى مبسوط مني ولا لاْ؟؟

-لازم احسن طبيب -مهندس-مدرس-محاسب-محامي....... يبقى مصري.
الهم انا نسألك حسن الخاتمه.


.................................................. .........................

جزاك الله خيرا يا دكتور على الرد وياريت كلنا نحس ونسمع الكلام ده
انا نقلت الكلام لهنا بالنيابه عن حضرتك


تحياتي

[mesaharaty]

على الجميع أن يبدأ بنفسه .
وهذا راجع إلى حد كبير جدا إلى النشأة والتربية
وبما إن التربية بتاخد وقت طويل لفاية ما تدى ثمارها الطيبة
يبقى طبيعى إن تغيير العادات لابد وأن يأخذ وقت طويل لكى يصبح مترسخا فى طبيعة الفرد
ولا أتصور إن إنسان نام يوم 25 يناير وصحى يوم 26 يناير فلقى نفسه إنسان تانى خالص ومختلف

أود أن أقول إن موضوع التغيير ده لازم ياخد وقته وقد يمتد إلى جيل بأكمله يشارك فى تغييره كل من المدرسة والمسجد والكنيسة والنادى والمنزل وغيره .

لكن الحل الأمثل هو أن ((تبدأ فى تغيير نفسك أولا وبسرعة ))