اللى عايز يروح السودان ... تقرير شامل

[mbluethunder]

14- الأسعار: تحدد الحكومه الحد الادنى من الرواتب بـ 200 جنيه (100 دولار تقريباً) وانا مثلاً بادى المحاسبين عندى 400 جنيه ....ولكن مع هذا فإن الأسعار هنا خزعبلية !!! اضرب اى سعر فى مصر (دلوقتى ..حتى بعد الزيادات) فى 2.5 و3.... فيما يلى أمثله وطبعا الاسعار بتتفاوت (لاى حاجه) حسب الولايه والموسم:

f. الإيجارات: ناااار ...فى مكان "معقول" مش هايقل عن 500 دولار

مجهود رائع تشكر عليه وفيه تفاصيل كتيره

أنا كنت من الناس اللي ربنا كرمهم وشافوا السودان لمدة إسبوعين بس كانت في أقصى الجنوب يعني على الحدود كده ( في الصحراء)

الحمد لله إن ربنا ألهمني الصبر في الإسبوعين دول ولما رجعت قولت الحمد لله إني ربنا أكرمني وخلاني اشوف السودان مره في العمر لأني مش نواي بصراحه أعملها تاني :)

بس انا ليا تعليق على المقطع ده

حضرتك بتقول إنك بتدي المحاسبين عندك 400 جنيه يعني حوالي 200 دولار والسكن غالي جدا ومش ققل من 500 دولار فأعتقد كده إنك بتتكلم على محاسبين من أهل البلد يعني مش مصريين يعني ولا انا غلطان

بس بجد مجهود رائع وياريت كل واحد قاعد في بلد زي حضرتك يشرحلنا مميزتها زي كده

[OsKaR]

شرحت فأوفيت
thanks

[emadkamel]

أستاذ عماد بجد شرحك رائع جدااااااااااااااااااااااا وممتاز وبما إني مقيم أصلا في السودان فإنت مسبتش حاجة بجد مقولتهاش:)
بس أنا زعلان منك بجد علشان أنا سألتك إنت قاعد فيين هناك ومردتش عليا:)
على العموم أنا قاعد في حي المجاهديين عند جامع برعي وبجد أنا أول ما أنزل لازم أشوفك ونتقابل وهعزمك على العشاء في oxgen (بس على حسابك:))

يا خبر ابيض ... هو انا اقدر على زعلك برضه .... صدقنى مش قصدى ... انا فى الخرطوم كنت ساكن فى العمارات بقالى سنه ودلوقتى نقلت فى الرياض ... فى بورسودان ساكن فى الإمتداد

انا دلوقتى فى بورسودان واحتمال انزل الخرطوم فى عشرينات الشهر ده .. نتقابل على خير واتشرف بيك والعزومة عندى زى ماقلت .... انت نازل امتى؟

[emadkamel]

أنا كنت من الناس اللي ربنا كرمهم وشافوا السودان لمدة إسبوعين بس كانت في أقصى الجنوب يعني على الحدود كده ( في الصحراء)

الحمد لله إن ربنا ألهمني الصبر في الإسبوعين دول ولما رجعت قولت الحمد لله إني ربنا أكرمني وخلاني اشوف السودان مره في العمر لأني مش نواي بصراحه أعملها تاني :)

ليه بس كده ..... ياراجل هو فى زى السودان :):) ... امال احنا نعمل ايه ياصديقى؟ ... بس باقوللك ايه انت كنت فين فى الجنوب اللى فى صحرا ده؟ وكنت بتعمل ايه هناك؟

حضرتك بتقول إنك بتدي المحاسبين عندك 400 جنيه يعني حوالي 200 دولار والسكن غالي جدا ومش ققل من 500 دولار فأعتقد كده إنك بتتكلم على محاسبين من أهل البلد يعني مش مصريين يعني ولا انا غلطان

بس بجد مجهود رائع وياريت كل واحد قاعد في بلد زي حضرتك يشرحلنا مميزتها زي كده

أه طبعاً اهل البلد ... علشان كده انا ذكرت الحد الادنى اللى الحكومه عاملاه وده فى قانون العمل .... مش معقول هاتجيب محاسب من مصر وتديله 200 دولار ... طبعاً اهل البلد معظمهم ساكنين فى بيوتهم الخاصه ... وبعدين عادات الاكل والشرب ومتطلبات الحياه بصفه عامه بسيطة ... فممكن يقضى الشهر بالـ 400 جنيه ... فى نفس الوقت انا ذكرت الايجار بتاع الاماكن "المعقوله" .. انما طبعا فى اقل من كده

[mbluethunder]

ليه بس كده ..... ياراجل هو فى زى السودان :):) ... امال احنا نعمل ايه ياصديقى؟ ... بس باقوللك ايه انت كنت فين فى الجنوب اللى فى صحرا ده؟ وكنت بتعمل ايه هناك؟

ربنا يكون في عونك بس يمكن الفتره اللي قعدتها في الجنوب كانت مؤثره اوي

حاكيلك اللي حاصلي

مبدأيا أنا كلفت بمأمورية شغل على لوحات كهربائيه في موقع بترول كان إسمه WNPOC في منطقه إسمها Higleig

المهم الموقع ده يبعد عن الخرطوم حوالي ساعتين بالطياره ( يعتي انا أخدها ساعتين من القاهره إلى الخرطوم وكمان ساعتين علشان أروح الموقع ده أيه الغلب ده )

خرجت من باب مطار الخرطوم وإستنيت حوالي ساعه لحد ما جه واحد من صحاب الموقع خدني ووداني ال Guest House

المفروض ال Guest House ده بيعتبر في أي شركه محترمه حاجه كده 5 نجوم.

المهم الراجل خدني وانا اول مره أشوف البلد ومش مدي خوانه. مره واحده لقيته وقف قدام بنايه أقل ما يقال عليها أوكازيون الورده السودا ( -10 نجوم ) وكان بيفكر إذاييقدر يوصل لل (-11) بس انا قلتله كفايه عليك ال 10 دول :)

المهم الكلام ده كان بليل ومعرفتيش انام بتاتا يمين شمال مافيش فايده والطامه الكبرى التلفزيون اللي المفروض يكون التسليه الوحيده ( قفلته ) وكنت عايز أرميه من الشباك

قعدت كده لغاية الصبح لما طلع وانا مش قادر هاموت وعايز انام ( يخرب بيوتهم ) آيه ده من اولها كده اومال هايحصل أيه بعد كده يارب سترك

طبعا انا عديت بمرحلة الفطور ده ( وحسبي الله ونعم الوكيل فيهم كلهم ) أنا عمري في حياتي كلها ما شوفت فطار يقعد ساعه أو ساعة ونص ( اومال لو كانوا بيتغدوا كانوا عاملوا آيه )

طبعا ساعة فطار وساعة إنتظار لغاية ما حد من بهاوات الموقوع تكرموا عليا وجم خادوا الأفندي اللي قاعد ملطوع ده ولما جم أخدت الشنطه على كتافي ( لأن البهوات ماعندهمشي حد يشيل حاجه ) وركبت ورايحين على المطار الداخلي

عينك ما تشوف إلى النور

(خليني أكمل بكره ) علشان أنا عايز انام

تصبحوا على خير ( ده أنت فكرتني بأيام)

[analyzer]

مجهود كبير جدا اشكرك عليه
لى سؤل : لو حبيت اعمل بزنس فى الكمبيوتر رئيك اية

[Karim_Monir]

مجهود رائع يا عماد باشا
بس انا من اللي سمعتة من علاء قبل كدة مافركش اروحها ابداااا
علالالاء
ابقي عدي بعد الصلاة قوللي حصل فيك اكتر من كدة
(معلش اصلي انا وعلاء بينا دور واحد في الشغل)

[emadkamel]

مجهود كبير جدا اشكرك عليه
لى سؤل : لو حبيت اعمل بزنس فى الكمبيوتر رئيك اية

تقصد ايه ببيزنس كمبيوتر؟
لو مراكز تدريب ... فى كتير قوى هنا ... انما مش كله متخصص او مستواه عالى

لو صيانه وتركيب وتجميع .... ممكن ... هو برضه فى كتير هنا ... انما مش كلهم مؤهلين او عندهم خبره ..... انما انت ممكن تتميز لو فى انتظام فى المواعيد وكواليتى كويسه وطبعاً اسعار منافسه ....

برضه ممكن تتاجر فى قطع غيار جمله ... دى عايزه استثمار عالى ولازم تيجى طبعاً تشوف مع وزاره الاستثمار ....لان كمان الجمارك على الكمبيوتر ومكوناته عاليه ..... زى ما قلت الرامه 512 بـ 60 دولار!!!!

[fady]

موضوع اكثر من رائع
شكرا ..

[emadkamel]

مبدأيا أنا كلفت بمأمورية شغل على لوحات كهربائيه في موقع بترول كان إسمه WNPOC في منطقه إسمها Higleig

ياراجل هجليج على الحدود؟؟ :):) ده انت خضتنى ... انا قلت فين البلد اللى لسه ماشفتهاش دى .... اصل الحدود فى الجنوب كلها غابات :):) وانا لفيت فيها ... فلما قلتلى صحرا .. قلت بس ده راح دارفور ... بس دارفور غرب وانت قلت جنوب !!! عامة هجليج فى اول زياره تبقى معقول شويه .... انا اول اسبوع ليا كان جوبا وملكال (عايز هنا احط وش واحد مرعوب ومتغاظ وبيعيط بس مش لاقى)

[COLOR=blue]
حاكيلك اللي حاصلي ......

يا باشا دى اقل حاجه عندنا .... :):) ..على الاقل انت نمت بين 4 حيطان ودى لوحدها نعمه تبوس ايدك عليها شعر ودقن :):) بس هما ضحكوا عليك فى الاستراحه دى ... كان المفروض من قبل ما تسافر تأكد على حجز فى فندق .... انما من غير ما تحكى كده .. الموقع هايكون حاجه تانيه خالص !!

طيب نتكلم جد ... خللينا من الاول نتفق ان الجنوب وظروفه مالهاش دعوه بالشمال ... الجنوب مدمر اكتر بكتير والخدمات بانواعها اضعف بكتيير وكل الاسعار اغلى بكتييييييييييييييير .... فمش كل السودان كده
وانا زى ماقلت مانصحش دلوقتى بالاستثمار فى الجنوب إلا لو شركات ضخمه للبنيه التحتية زى ما طلعت مصطفى بيعمل (عامل شغل هنا كتييير .... ربنا يستر ومايبقاش زى كبارى الاتوستراد :):))

وباقولك ايه.... ماتحكيش حاجه يا عم .. ابعتلى على الخاص ونقعد نعيط سوا براحتنا ... ماتسدش نفس الناس ... اهو كريم انسحب من اولها اهه :):)

[elpasha009]

بعد إذنك يا أستاذ علاء الكمبيوتر ومكوناته معليهاش أي جمارك زي مصر بالظبط بس عليها 15% ضريبة مبيعات وشوية دمغات والازم منه بتوصل ل 19% بالظبط.الكلام ده أكيد

[emadkamel]

بعد إذنك يا أستاذ علاء الكمبيوتر ومكوناته معليهاش أي جمارك زي مصر بالظبط بس عليها 15% ضريبة مبيعات وشوية دمغات والازم منه بتوصل ل 19% بالظبط.الكلام ده أكيد

طيب خللى علاء يرد عليك بقى :):)
هو الصراحه انا وانا باكتب الموضوع عملت بعض المكالمات علشان اعمل ابديت لاى معلومه قديمه عندى قبل ماكتبها للزملا ... ففى الموضوع ده بالذات انا كنت شارى الرامه قبلها ب5 ايام (وواضح انى محروق منها قوى لان دى تالت مره اذكرها فى الموضوع ده:):)) فسألت واحد مستورد هنا واكدلى انه لسه فى جمارك على الالكترونيات!! عامة لو انت متأكد يبقى خلاص انت ادرى طبعاً

بس سؤال انت بتجيب المكونات منين؟ يعنى من مصر ولا جنوب شرق اسيا مثلا؟ ولو من مصر بتدخلهم كوميسا وللا ايه؟

[MEDO80]

؟

طيب سؤال الي عايز يسال علي تمليك الاراضي في السودان
اية هيا جهه التعاقد ؟ و هل ممكن من مصر و لازم اسافر هناك ؟
و بعدين فية عمالة للزراعة و لا لازم اجيب من مصر ؟

[emadkamel]

طيب سؤال الي عايز يسال علي تمليك الاراضي في السودان
اية هيا جهه التعاقد ؟

للإستفاده من اى مشاريع معروضه للإستثمار يتم التوجه اولا لوزاره الإستثمار ومن خلالها يتم التنسيق مع الوزارات المعنية (زى مصر بالظبط)

و هل ممكن من مصر و لازم اسافر هناك ؟

مش فاهمها دى :):) يعنى هايكون ليك ارض هنا وماتجيش او تشتريها على العميانى كده؟؟ لو عايز ارض وتستصلحها فعلا وجدى فى الموضوع هاتيجى هاتيجى ...غير انك لازم تعمل دراسات (بالاضافه لبتاعة وزارة الاستثمار) عن الارض والملوحه والمحاصيل المناسبه والمناخ .....وكل ده لازم على ارض الواقع

و بعدين فية عمالة للزراعة و لا لازم اجيب من مصر ؟

طبعاً فى عماله هنا ... وطبعاً برضه فى الفلاحه بالذات المصريين احسن ... انما تكلفتهم اعلى ..فلازم تدرسها برضه وتشوف ايه اللى احسن

[mbluethunder]

مجهود رائع يا عماد باشا
بس انا من اللي سمعتة من علاء قبل كدة مافركش اروحها ابداااا
علالالاء
ابقي عدي بعد الصلاة قوللي حصل فيك اكتر من كدة
(معلش اصلي انا وعلاء بينا دور واحد في الشغل)

كيمووووو

معلشي يا باشا ماعرفتيش أعدي عليك النهارده

وبلاش تفكرني باللي حصل خليني اكمل مره واحده هنا وبعد أحاول انسى:)