الزملاء اللي بيقولو لا للتعديلات ... ياريت حد يقولي ايه اللي حيحصل لما نرفض التعديلات

[aif]

طول ماحنا مع بعض و بنفكر هنوصل لحاجه
حتى لو كملنا زى دلوقتى لمده 6 اشهر
مافيش مشاكل
كده كده مافيش جديد

يا طارق ازاي نفضل كدة
ده في منتهى الخطورة
العسكر دلوقت مش راغبين في الحكم
لو المدة طولت ما تضمنش ايه اللي ممكن يتغير
المشاركة السابقة فيها سيناريو عمل الدستور لو قلنا نعم
يعني فيه سيناريو ح يوصلنا لدستور جديد
لأ ح توصلنا لأيه ؟
فيه سيناريهات ايه ممكن تحصل ؟
هو ده اللي نفسي حد يجاوب علية ؟؟؟؟؟

[FunnyMickey]

والله انا شايف ان كل المواضيع دلوقتي بتلوي دراعنا عشان نقول نعم

لو قلت لا
الجيش مش حيشكل لجنه رئاسيه ولا حاجه
وحيحكم البلد

جميع المشايخ والازهريين بيقولوا نعم
واللي بيقولوا لا دول ناس كخه ووحشين

لو قلنا نعم الدستور القديم مش حيشتغل تاني وحيفضل معطل

طب نفسي افهم بقي
فين ام الديموقراطيه
جبتولنا القطط الفاطسه كلها حطيتوها في خانه لا
ونعم دي لو قلناها محسسني ان احنا حنبقي في الجنه ونعيمها

دلوقتي انا عاوز افهم حاجه بس صغيره اوي وياريت تقولولي انا صح ولا غلط

انا حقول لا عشان :

1- صلاحيات الدستور القديم بتاعت الرئيس انه يبقي رئيس كل حاجه في اي حاجه دي انا مش عاوزها
2- مش عاوز الرئيس يمسك الاول وبعد ما ننتخبه يتعمل الدستور لانه ممكن يفصله علي مزاجه لا
انا عاوز الدستور ييجي الاول وبعدين الرئيس ينتخب بقي
3- كنت عاوز اخد فرصه اشم فيها نفسي شويه بدل مالواحد طالع من ثوره علي حكم عسكري ومن حكم عسكري علي بلطجيه ومن بلطجيه لفتنه طائفيه ومن فتنه طائفيه لدستور وحخش في موال الانتخابات بقي وانتخابات الرئاسه وهلم جرا

دي اسبابي اللي انا عارفها ومقتنع بيها واللي فهمتها من جميع الاراء اللي قريتها واللي اقنعتني اكتر من اسباب اللي بيقولوا نعم
بس فيه دلوقتي حاجتين وقفوني خلوني افكر تاني واقع في حيره تاني

1- كلام سياده اللواء عن تأكيد تعطيل دستور 71 ولن يتم العمل بيه في حاله نعم
2- عدم قبول عمل لجنه رئاسيه تقوم بعمل دستور جديد بالانتخاب ولكن سيتم تعيين لجنه علي مزاجهم تقرر مواد الدستور الجديد دون الرجوع للشعب وبدون عمل استفتاء

ده اللي انا فاهمه ببساطه لحد دلوقتي وبعد ما كنت رايح اقول لا وانا مقتنع
حاسس ان يوم السبت حروح اللجنه واقول نعم مجبرا
:(

[FunnyMickey]

يا باشا كلنا عاوزين دستور نظيف ومحترم
ده لا يختلف عليه اثنان
لو قلنا نعم
ح ننتخب برلمان بعد 6 شهور
ثم ننتخب رئيس
وفي خلال 6 شهور سيتم عمل دستور جديد من لجنة منتخبة من البرلمان
وبعد 15 يوم يتم الاستفتاء
وبعدين الرئيس والبرلمان يكملو مدتهم بأحكام الدستور الجديد الذي سيفعل منذ نتيجة الاستفتاء عليه
ده سيناريو نعم
..
..
ايه هو سيناريو لا ؟؟؟؟؟؟؟
هو ده مربط الفرس
يعني اقول لا وانا مش عارف ايه اللي ح يحصل ؟؟؟؟؟؟
لازم حد يفهمنا ايه اللي ح يحصل لو قلنا لأ
انا منتظر حد يقنعني
والله لو اقتنعت ح اروح اقول لا

سيناريو لا اللي انا عارفه
ان لو كله قال لا

يتلغي الدستور خالص ويتعمل لجنه جديده منتخبه تقوم بعمل الدستور الجديد ويتم تأجيل انتخابات الشعب والشوري والرئاسه لحين اصدار الدستور

ده اللي انا فاهمه واللي انا متحمسله جدا
لان ده معناه فعلا البلد تبقي نضيفه فعلا
وجديده من كله وخلال الفتره دي اللي هيا بردو لا تتعدي ال6 شهور يفضل الجيش ماسك

انما اللي رجعوا قالوه بقي ان مفيش لجنه حتتشكل والدستور الجديد لو الناس قالت لا حيتعمل بدون الرجوع للشعب
بامر من الجيش

يبقي ده اسمه لوي دراع ولا مش اسمه لوي دراع

[kono]

طب يا جماعة ماهو باين من كلام اللواء ممدوح شاهين...ان التعديلات دى ضمن اعلان دستورى للمرحلة الانتقالية..وان دستور 71 معطل يبقى مش هيبقى فيه فرعون ولا حاجة ..المشكلة كلها الوقت بالنسبة لى فى المجالس ..مجلس الشعب الكوتة (الكوسة ) المفروض تتلغى ..ومجلس الشورى وظيفته ايه ؟؟؟

بالنسبة للناس اللى بتطالب بمجلس رئاسى...مش ساعتها كل قوى سياسية هتقول لازم يبقى حد بيمثلنا فى المجلس ؟؟ وندخل فى صراع

[AshTurbo]

انما اللي رجعوا قالوه بقي ان مفيش لجنه حتتشكل والدستور الجديد لو الناس قالت لا حيتعمل بدون الرجوع للشعب
بامر من الجيش

يبقي ده اسمه لوي دراع ولا مش اسمه لوي دراع

مفيش حد هيقدر يفرض سيطرته ويلوي دراع الشعب دلوقتي ولا جيش ولا غير جيش واللي عاوزه الشعب هيحصل لو طالب بيه دلوقتي لو أستنينا الحكاية هتبرد وموقف الشعب والثورة هيضعف وهيظهر ناس تانية ويبدأ التنافس والتقاتل على الأنتخابات البرلمانية والرئاسية وهنرجع للأول وأسوء .


ياجماعة ننظف مرة واحدة وتبقى هي المرة ونفضل نظاف على طول بالذمة في حد يكره النظافة ويقول بلاش النهاردة أنظف بكره ؟... تخيل نفسك بعد ما يتعمل دستور جديد هتمشي في الشارع راسك مرفوعة في مصر وفي أي حته في الدنيا هتعرف حقوقك وواجباتك هتحس أنك بني آدم مش مجرد كائن ماشي على رجله وخلاص هتأثر في صناعة القرار في بلدك والكبير قبل الصغير هيعملك ألف حساب ياجماعة أحنا الشعب عاوزين أحنا اللي نعمل الدستور مش حد تاني اللي يعملهولنا .

[FunnyMickey]

طب ماهو اديك شايف اهو
ماهو لامؤاخذه ابقي راجل عبيط لو جه لواء قاللي لو قلت لا حنعمل دستور علي مزاجنا ومش حيبقي من حقك توافق عليه
قول نعم احسن لك

يبقي حقول ايه
لا بردو واودي البلد في داهيه
مانا مش حقول لا عند وخلاص يعني

[deee]

الاخوة اللى بيقولوا نعم ...
ده إهداء ليكوا ..

من تلاتين سنة قلنا نعم للإستقرار .. واديكوا شفتوا النتيجة ..
انا معنديش استعداد انى اعيش تلاتين سنة تانى ويمكن اكتر بنفس الطريقة ...

انا هاقول لا لتعديلات مرقعة مهترئة ..

[alaa_dash]

سيناريو لا اللي انا عارفه
ان لو كله قال لا

يتلغي الدستور خالص ويتعمل لجنه جديده منتخبه تقوم بعمل الدستور الجديد ويتم تأجيل انتخابات الشعب والشوري والرئاسه لحين اصدار الدستور

في حالة لا ..
انتخاب لجنة تعمل تصيغ دستور جديد ....استفتاء على الدستور الجديد ........انتخابات برلمانية....رئيس جديد....

.......

طريقة انتخاب اللجنة :
عدد الدوائر الانتخابية لمجلس الشعب 222 دائرة ...يكونوا المنوطين بعمل الدستور (مش ينتخبوا حد تاني) و يستعينوا بأساتذة قانون دستوري ..للصياغة و الاستشارة ..و ينتهي دورهم بالموافقة على الدستور الجديد

او

عدد دوائر مجلس الشورى 176 ... ثم بنفس الطريقة السابقة ..

.........
طيب ايه الفرق بين انتخاب مجلس شعب و شورى و الطريقة السابقة ؟
الناس كلها ..100% عارفة انها رايحة تختار واحد شغله عمل دستور جديد فقط ..لا يعين ابنائهم ولا يرصفلهم طريق .. ولا غيره ..
+
في حالة نعم ...ستلاحق مجلس الشعب اتهامات جاهزة و تقال من الان انهم اخوان و جزب وطني و عايزين دولة اسلامية و اهملوا حق الاقليات و ماخدناش فرصتنا ...
حالة ارهاب لمجلس الشعب يؤثر سلبا على اختياراته و محاولات لارضاء دول او دول ...
لكن لجنة منتخبة ...العمل بقوة الشارع الذي اختارهم ..و ابطال حجة عدم اعطاء الفرصة للبعض انهم ما نزلوش الشارع و الناس ماعرفتهمش ... والكلام ده...

طيب ما هو مجلس الشعب برضه الشارع و الناس هما اللي اختاروه ؟

تمام بس الناس في مصر لما بتنتخب عضو مجلس شعب بيبقى اخر حاجة في دماغها انه هيشتغل على دستور جديد ..عضو مجلس شعب يعني وظيفة لابني و الشارع يترصف و شنط رمضان ...
لكن اما يعرف انه هينتخب واحد مش هيعمله حاجة غير دستور جديد و هيمشي ...ممكن ميروحش اصلا :)

...................
انا هقول لا .. و ماتفرقش معايا النتيجة النهائية نعم او لا ...و لو اني افضلها لا ..
عشان فيه ناس مش هترضى بالنتيجة .......و الناس ديه صوتها عالي .. و مزعج ...
و انا كده كده حوصل للنتيجة النهائية ! دستور جديد على كيف الاغلبية ..يبقى ليه وجع الدماغ ..
...

[zago]

انا مع الأخوان
قالو ايوه حقول ايوه
قالو لا حقول لا
قالو مقاطعين يبقى حنام في بيتنا
عمرك شوفت فيهم واحد حرامي؟
واحد مرتشي ؟
واحد بتاع حريم ؟
واحد بتاع قمار ؟
واحد اخد فلوس من بنك وهرب ؟؟

يا رب بقى نبقى دوله اسلاميه

[hh]

في حالة لا ..
انتخاب لجنة تعمل تصيغ دستور جديد ....استفتاء على الدستور الجديد ........انتخابات برلمانية....رئيس جديد....

.......

طريقة انتخاب اللجنة :
عدد الدوائر الانتخابية لمجلس الشعب 222 دائرة ...يكونوا المنوطين بعمل الدستور (مش ينتخبوا حد تاني) و يستعينوا بأساتذة قانون دستوري ..للصياغة و الاستشارة ..و ينتهي دورهم بالموافقة على الدستور الجديد

او

عدد دوائر مجلس الشورى 176 ... ثم بنفس الطريقة السابقة ..

.........
طيب ايه الفرق بين انتخاب مجلس شعب و شورى و الطريقة السابقة ؟
الناس كلها ..100% عارفة انها رايحة تختار واحد شغله عمل دستور جديد فقط ..لا يعين ابنائهم ولا يرصفلهم طريق .. ولا غيره ..
+
في حالة نعم ...ستلاحق مجلس الشعب اتهامات جاهزة و تقال من الان انهم اخوان و جزب وطني و عايزين دولة اسلامية و اهملوا حق الاقليات و ماخدناش فرصتنا ...
حالة ارهاب لمجلس الشعب يؤثر سلبا على اختياراته و محاولات لارضاء دول او دول ...
لكن لجنة منتخبة ...العمل بقوة الشارع الذي اختارهم ..و ابطال حجة عدم اعطاء الفرصة للبعض انهم ما نزلوش الشارع و الناس ماعرفتهمش ... والكلام ده...

طيب ما هو مجلس الشعب برضه الشارع و الناس هما اللي اختاروه ؟

تمام بس الناس في مصر لما بتنتخب عضو مجلس شعب بيبقى اخر حاجة في دماغها انه هيشتغل على دستور جديد ..عضو مجلس شعب يعني وظيفة لابني و الشارع يترصف و شنط رمضان ...
لكن اما يعرف انه هينتخب واحد مش هيعمله حاجة غير دستور جديد و هيمشي ...ممكن ميروحش اصلا :)

...................
انا هقول لا .. و ماتفرقش معايا النتيجة النهائية نعم او لا ...و لو اني افضلها لا ..
عشان فيه ناس مش هترضى بالنتيجة .......و الناس ديه صوتها عالي .. و مزعج ...
و انا كده كده حوصل للنتيجة النهائية ! دستور جديد على كيف الاغلبية ..يبقى ليه وجع الدماغ ..
...

يا حاج أحمد مدوخنا وراك في المواضيع ليه؟؟؟؟؟

ما انا رديت على حضرتك في الموضوع الأولاني. بالنسبة للي بيقولوا لأ و أنا منهم, عايزين ننتخب لجنة تأسيسة لعمل دستور جديد. مش مستحيل ننتخبها و لا حاجة, و أنا رديت على النقطة دي و اقترحت و غيري أقترح طرق لأنتخابها. و في الحالة دي ممكن نعمل دستور في خلال 7-8 شهور و بعدين انتخابات برلمانية و رئاسية و نبتدي صح لأول مرة في حياتنا.

اللي فعلا حيحصل لو قلنا لأ, مش معروف بالظبط. رايي الشخصي انه ده متعمد عشان الناس تخاف تقول لأ و الا الجيش هو اللي حيتصرف بمزاجه. طيب ما هو كدة أساسا مش مديني أختيارات, هو بيعاملنا زي ما نكون عيال بيفرحنا بالاستفتاء انما كدة كدة حيعمل اللي هو عايزه.

بدليل انه رجع دلوقتي يقول أعلان دستوري, يعني حيستعين بمواد تانية غير اللي اتعدلت من غير ما يستفتي حد. و بيستخدموا بطريقة غير مباشرة نفس طريقة التخويف اللي قبل ما مبارك يمشي, الخوف من المجهول.

عشان كدة حنقول لأ, لأن حتى لو هما مش عارفين حيعملوا ايه لو قلنا لأ ( وده يبين انهم كانوا مفترضين ان المصريين كالعادة مش بيقولوا غير أه), أحنا عارفين عايزين ايه. و برضه الهدف اننا نوصل للأستقرار مش عشان استحلينا الوضع كدة.

[ahmedjumpo]

بالنسبة لموضوع تعطيل الدستور فى حالة نعم ده مش صح و الرد

+++++++++++++++++++++1
لو دستور 71 هيتلغى زى ما بعض الناس ما بتقول و ده مش صحيح و هأقول لحضرتكم ليه
بس لو هيتلغى يبقى غلط نسمى المواد المطروحة ديه تعديلات لان التعديل لا يكون الا على حاجة قائمة
اما مش صحيح ان دستور 71 هيتلغى ليه هأقول لحضرتك
* ما الالية التى تنظم انتخابات مجلسى الشعب و الشورى و عدد اعضائهما ـــــــ دستور 71
* ما الالية التى تحدد اختصاصات مجلسى الشعب و الشورى و كيف يصدروا قوانين و على اى اسس حتى ينتهوا من الدستور الجديد ـــــــــ دستور 71
* ما القواعد المنظمة لعمل و اختصاصات رئيس الجمهورية المنتخب و حتى عمل الدستور القديم ــــــ دستور 71
* بأي صفة و اى قواعد تحكم علاقة مجلس الشعب بالحكومة و كيفية محاسبتها ــــــــ دستور 71
و العديد من الاختصاصات و الامور التى لا يصح ان تفعل بدون دستور
اما الاعلان الدستور بيكون لفترة انتقالية و لا يجوز خلاله و الله اعلم ان تنتخب اى مجالس نيابية او برلمانية لان زى ما قلنا انه بيكون مؤقت لفترة قصيرة اما المجالس النيابية فمدتها خمس سنوات

بالنسبة لمقترح لعمل لجنة تأسيسية للدستور الجديد فهناك اقتراحات كتير و ده واحد منهم

يا حاج احمد اولا رقم ال 100 اللى احنا حفظناه من التعديلات ليس رقما مقدسا لا يجوز ان يتنازل عنه
و عندك مثال فرنسا جمعيتها التأسيسية كانت من خمسين عضو فقط و هذا العدد كافى جدا
طبعا هاتقولى هننتخبهم ازاى و هأقول لحضرتك فكرة و اكيد فى أفكار تانية بس ديه فكرة منها
* جزء من الخمسين عضو هم فقهاء دستوريين و دول الاساتذة اللى هيعملوا الصياغة القانونية لمواد الدستور و دول فى منتهى السهولة ان يختارهم الجيش و ذلك بالتشاور مع اساتذتهم و كده يبقى جزء مهم من اللجنة خلصناه

* باقى اعضاء اللجنة هيكون بحل من اثنين
الاول : ان كل طائفة تنتخب من يمثلها بمعنى ان الاقتصاديين ينتخبوا العدد المحدد من قبل اللجنة لهم و كذلك المحامين و كذلك الاحزاب و كذلك الاقباط و كذلك الزراعيين و رجال الدين الاسلامى و العمال عن طريق النقابة العامة والجمعيات الحقوقية
و بالطريقة ديه يبقى كل طوائف الشعب اختارت ممثليها الذين يستطيعوا التعبير عنهم و اعتقد ان هذه الطريقة من افضل الطرق و ستأتى بالافضل من كل جهة و بالطريقة ديه اعتقد ان اللجنة ستشكل فى اقل من شهرين

اما الحل الثانى : هو ان كل طائفة من السابق ذكرها ترشح عدد من المنتمين اليها يزيد مثلا عن المحدد ليها بثلاثة ثم يقوم المجلس العسكرى بطرح الاسماء المرشحة و لتكن 80 او 100 اسم فى صورة مجموعات بمعنى مجموعة مرشحى الاقتصاد و مجموعة مرشحى العمال و هكذا ونختار مثلا 35 عضو بالاضافة الى الفقهاء الدستوريين و تبقى تمت اللجنة
و عند الاستفتاء و علاجا لحالة الامية اللى حضرتك قولت عليه فأنا مش هلزم اللى يختار انه يختار كل اعضاء اللجنة و لكن يختار العدد اللى هو عارف و فاهم انه يمثله و لو اختار كل اعضاء اللجنة خير

طبعا ممكن حضرتك تقولى طيب و الوقت و ازاى الواحد هيعقد يختار من الاعضاء ديه و فى ثلاث حلول
الحل الاول : ان تجعل الاستفتاء على الاعضاء يكون لمدة ثلاث ايام و ليس يوما واحدا و لنا المثال فى جسور الجمرات لما هدانا الله الى ان نجعلها متعددة الادوار فأصبح لا يوجد زحام و نفس المبدأ للثلاث ايام
الحل الثانى : توزع الاستمارات اللى فيها الاسماء عبر البريد و مراكز محددة يحددها المجلس العسكرى على ان يحدد سوم لتجميع هذه الاستمارات مع تحديد الاستفتاء بالرقم القومى و اللى هيقدم اكثر من استمارة العقوبة غرامة مع الحبس و هيسهل اكتشاف اى استمارات باطلة عن طريق الرقم القومى
الحل الثالث : ان اقسم الجمهورية الى ثلاث مناطق و كل منطقة تستفتى فى يوم

هذا تصور قد يكون فيه مميزات و قد يكون فيه عيوب و لكن اعتقد و الله اعلم ممكن تنفيذه عمليا
و زى ما قلت ممكن يكون فيه تصورات تانية
و ممكن بتعيين من الجيش بعد التشاور مع كل جهة لاختيار ممثلين عنها و اظن كلنا بنثق فى الجيش و اختياراته النزيهة و البعيدة عن الاتجاه الى احد التيارات السياسية و اظن لجنة التعديلات الدستورية الى يوجد الكثير الموافق على تعديلاتها كانت بتعيين من الجيش

ملحوظة اخيرة : عمل الدستور ليس بالصعوبة التى يظنها الكثير لان مواد الحريات و الحقوق لن يوجد عليها خلافات و نتناقش فى باقى المواد التى هى فى الاخير مبادئ عامة

اعتقد من خلال تصورى المتواضع ان الموضوع ليس بالاستحالة التى يصورها البعض
و تحياتى لحضرتك

المشكلة ان ما حدش كان عايز يناقش لو قلنا لا هيحصل ايه لان المجلس العسكرى عامل نوع من التوجيه على الاستفتاء بنعم
وكان يفترض مع التعديلات ان المجلس العسكرى يطرح مع كل خيار من الاثنين الخطة التى تليه حتى يكون الناس رأيهم بالالمام بكل الموضوع و لكن ما يحدث هو حالة من التخبط و العك الدستورى و اختلف مع من يقول نعم و تعليله بذلك ان الخطوات محددة و الكلام ده مش صحيح و الدليل
* انتخابات المجالس البرلمانية فى شهر يونية
* بعدين لا الانتخابات فى شهر سبتمبر
* بعدين فى لقاء عضو المجلس العسكرى ببرنامج مصر النهاردة يوم 12/3 بيقول احتمال ما نعملش انتخابات مجلس شورى رغم ان التعديلات بيقول لازم يكون فيه اعضاء شورى
* بعدين هنعمل انتخابات رئاسة الاول
* بعدين لاء برلمانية الاول ثم الرئاسية مباشرة
* بعدين لاء برلمانية و الرئاسية هتكون بعد ما نخلص الدستور و نجهزه
* بعدين لاء هنعمل اعلان دستورى و نقص و نلزق من الدستور القديم

بالذمة هو ده الطريق الواضح و الخطوات التى لا تقبل الشك و اللى بيقولوا نعم بيدافعوا عنها كله قمة فى التخبط و اللخبطة و عدم الوضوح و فكروا فيها

[hh]

بالنسبة لموضوع تعطيل الدستور فى حالة نعم ده مش صح و الرد

بالنسبة لمقترح لعمل لجنة تأسيسية للدستور الجديد فهناك اقتراحات كتير و ده واحد منهم

المشكلة ان ما حدش كان عايز يناقش لو قلنا لا هيحصل ايه لان المجلس العسكرى عامل نوع من التوجيه على الاستفتاء بنعم
وكان يفترض مع التعديلات ان المجلس العسكرى يطرح مع كل خيار من الاثنين الخطة التى تليه حتى يكون الناس رأيهم بالالمام بكل الموضوع و لكن ما يحدث هو حالة من التخبط و العك الدستورى و اختلف مع من يقول نعم و تعليله بذلك ان الخطوات محددة و الكلام ده مش صحيح و الدليل
* انتخابات المجالس البرلمانية فى شهر يونية
* بعدين لا الانتخابات فى شهر سبتمبر
* بعدين فى لقاء عضو المجلس العسكرى ببرنامج مصر النهاردة يوم 12/3 بيقول احتمال ما نعملش انتخابات مجلس شورى رغم ان التعديلات بيقول لازم يكون فيه اعضاء شورى
* بعدين هنعمل انتخابات رئاسة الاول
* بعدين لاء برلمانية الاول ثم الرئاسية مباشرة
* بعدين لاء برلمانية و الرئاسية هتكون بعد ما نخلص الدستور و نجهزه
* بعدين لاء هنعمل اعلان دستورى و نقص و نلزق من الدستور القديم

بالذمة هو ده الطريق الواضح و الخطوات التى لا تقبل الشك و اللى بيقولوا نعم بيدافعوا عنها كله قمة فى التخبط و اللخبطة و عدم الوضوح و فكروا فيها

[WalidAdel]

بغض النظر عن التوقيتات اللي مكتوبه بس دا اقرب اللي هايحصل ان شاء الله سواء بنعم اولا لأ و الله اعلم

[LanCeLoT]

انا شايف ان المشكله ان المجلس العسكري ما قاليناش سيناريو واضح لنتيجة لأ

[tiger45]

المستقبل ضباب
ربنا يستر