طب حضرات السادة المواطنين و القوى السياسية خلاص باعوا البرلمان ولا ايه ؟

[تامر.محمد]

سلام عليكم
دلوقت اللي حصل حصل , انا حتى مندهش بصراحة من زعل ناس كتير مع ان رأيي الشخصي ان نعم او لأ كانوا هايمشوا في نفس السكة , بإيد المجلس العسكري مش بإيدينا

المهم
دلوقت الفترة اللي جاية البلد داخلة على انتخابات
و الحزب الوطني كوادره ما تزال موجودة في دواير الانتخابات , عايز افكركم بحاجة , كوادر الحزب الواطي في كل دايرة عاملين علاقات مع الشرطة فيها , دي حقيقة مش خيال , فلان و فلان لسه زي ما هما , و مأمور القسم الفلاني لسه فلان برده ..... يعني باختصار قدامنا معركتين

الأولى الضغط عشان عزل الحزب الوطني من الحياة السياسية و لو مؤقتا , في نفس الوقت و على خط تاني , يا اما الضغط في اتجاه الانتخابات بنظام القوايم النسبية , او الترتيب كويس بقى عشان مافيش دواير انتخابية تقع في ايد الوطني و ده احتمالاته مش قليلة

ولا خلاص مش عاجبنا الدور ده و مش لاعبين ؟

[human]

المشكله انك عرفت ان السلاح اللى معاك غير فعال
و لو استخدمت ذات السلاح هيحصل فتنه

الوضع صعب

[تامر.محمد]

المشكله انك عرفت ان السلاح اللى معاك غير فعال
و لو استخدمت ذات السلاح هيحصل فتنه
الوضع صعب

في رأيي قبل تحديد السلاح لابد من تحديد الحلفاء و الخصوم
الخصم اللي لازم الكل يتحالف ضده هو فلول الحزب الوطني
اما السلاح , فعلى رأي نوارة , لابد من تطويره او تغييره , و لازم سلاح مستمد من الناس لأن المباديء النخبوية على رأيها مش هاتنفع الكل

[A.Saad]

هما مش بتوع الحزب معروفين
يبقى ليه نفترض ان الناس هتنجحهم

[تامر.محمد]

هما مش بتوع الحزب معروفين
يبقى ليه نفترض ان الناس هتنجحهم

انا كنت فاكر كده برده لحد ما اكتشفت مؤخرا حاجة
بتوع الحزب ما كانش بينجحهم ان الناس بتحبهم و انما كان بينجحهم التزوير (اتمنى انه يكون انتهى) + شبكة العلاقات مع المستفيدين و المنتفعين و الجهلة جهل مطبق و العائلات الكبيرة , و دول اللي عليهم العين و دول اللي يقلقوا جامد

[M.Mosaad]

المفروض ان الحزب الواطي بقي وصمة عار لاي حد يعني لو عايز تغتال حد سياسيا يبقي تقول عليه دة كان حزب واطي و الناس كلها لازم تفهم كدة و اي مرشح في الانتخابات الجايه حزب واطي او كان حزب واطي يبقي الناس تتجاهله تماما

و علي فكرة انا من رايي ان بتوع الحزب الوطني كدة كدة موجودين سواء اتعملت الانتخابات دلوقتي او كمان 6 شهور يعني حاسس ان نعم من لا مكانتش هتفرق كتير المهم الناس الغلابه اللي بيضطروا يبيعوا صوتهم علشان خاطر 50 و لا 100 جنيه ربنا ينور بصيرتهم و يعرفوا انهم لو ادوا صوتهم لحد يستحقوا هيكسبوا اكتر بكتير من ال 50 و لا ال 100 جنيه دول

[wawoo]

و الحزب الوطني كوادره ما تزال موجودة في دواير الانتخابات , عايز افكركم بحاجة , كوادر الحزب الواطي في كل دايرة عاملين علاقات مع الشرطة فيها , دي حقيقة مش خيال , فلان و فلان لسه زي ما هما , و مأمور القسم الفلاني لسه فلان برده ..... يعني باختصار قدامنا معركتين

الحقيقية يا استاذ tlrsiap انة انا كنت متوقع محولات لاجهاض الثورة ..و لكن الموضوع تم بذكاء شديد جدا .."مش غريبة على الناس دى لانهم محترفين فى المؤمرات و اللاعيب السياسية الملتوية "..

الوضع الان كما يلى :
-تم الافراج عن بعض المتهمين الخطيرين فى الاسكندرية فى اتهامات قتل المتظاهرين و كل واحد يتخيل الاسباب براحة .
- فتحى سرور مهندس قوانين الحزب الوطنى كان بيدلى بصوتة عادى فى الاستفتاء
- ذكاريا عزمى فى موقعة عادى و يتعاون مع الجيش تمام
- صفوت الشريف لا غبارعلية وبيؤسس لحزب جديد .."حرية بقى "
- كل رئساء التحرير موجودين زي ما هما وكل رئساء قطاعات التلفزيون موجودين و معروف كانو بيسندو مين قبل الثورة و حتى فى بدايتها .
- المتهمون فى قضايا الفساد من رجال الاعمال و الوزراء السابقون يعرضون مبالغ وهيية للافراج عنهم و الفكرة محل البحث حاليا و لا استبعد الموافقة..
- مبارك و عائلة مستمتعون بحياتهم فى شرم الشيخ ولا عذاء للشهداء


الخلاصة ...انة تم اجهاض الثورة بشكل ديمقراطى خبيث بعد ما تمت الثفقة مع احد عناصر ااتلاف الثورة ..طبعا الثمن اللى دفع حيظهر بكل تاكيد فى الانتخابات البرلمانية القادمة ..

[amado ibrahim]

تقبل تحياتى على طرحك للموضوع

انا متهيألى انى كنت ناقشت الموضوع معاك قبل كده

هافكرك

فاكر لما اتكلمنا عن حملات توعية يقوم بيها الدعاة من الجانبين الاسلامى و المسيحى

فاكر لما قلتلك شرط ان اللى بيوجه الخطاب يكون ليه قاعدة شعبية و قبول جماهيرى عند القاعدة الجماهيرية من البسطاء

فاكر الاسماء اللى اتناقشنا حوليها من الجانب الاسلامى

الدكتور نصر فريد واصل

الشيخ المحلاوى

الشيخ حافظ سلامة

الشيخ محمد حسان

وغيرهم ممن لهم قبول و شعبية لدى البسطاء

( واكيد اخوانا المسيحيين اكثر مننا علما بمن لديهم قبول طاغى لدى البسطاء )

طب ليه الخطاب الدينى من الطرفيين مش احنا اتفقنا نبعد الدين عن السياسة

كلامكم صح لكن الوقت ضيق

فلازم تنطلق حملات توعية قوية يتم فيها التنسيق بين عنصرى الامة

و الغرض هو توضيح اهمية الصوت و انه امانة ربنا سبحانه و تعالى هيسأل عنها الانسان يوم القيامة لماذا ضيعها

وده هيكون الحل الناجع و السريع للقضاء على رجوع فلول النظام السابق مدعوميين بالجانب المالى و العصبية القبلية

تخيلو معى تلك الدعوات امام المال و سطوة العائلات الكبيرة من يكسب

شعبنا شعب متدين بطبعه ومن الالاف السنيين

لذلك لا يمكن اغفال الخطاب الدينى فى التوعية للبسطاء

نقطة اخيرة

كوادر شباب الثورة لازم يتحركو و بسرعة لتنظيم انفسهم و النزول لارض الواقع فى القرى و النجوع والاقاليم البعيدة

و اعتقد انهم لو طلبو الدعم من الكوادر الدينية هيلاقو ترحيب كبير بهم

المهم ياخدو المبادرة و يبتدو فى اسرع وقت

تقبل تحياتى

[fepsceasar]

اهم حاجة اللى قال نعم او لا يشتغل بنفس الحماس الفترة القادمة لافراز الصالح من الطالح

[otefa]

المفروض ان الحزب الواطي بقي وصمة عار لاي حد يعني لو عايز تغتال حد سياسيا يبقي تقول عليه دة كان حزب واطي و الناس كلها لازم تفهم كدة و اي مرشح في الانتخابات الجايه حزب واطي او كان حزب واطي يبقي الناس تتجاهله تماما

+1

و علي فكرة انا من رايي ان بتوع الحزب الوطني كدة كدة موجودين سواء اتعملت الانتخابات دلوقتي او كمان 6 شهور يعني حاسس ان نعم من لا مكانتش هتفرق كتير المهم الناس الغلابه اللي بيضطروا يبيعوا صوتهم علشان خاطر 50 و لا 100 جنيه ربنا ينور بصيرتهم و يعرفوا انهم لو ادوا صوتهم لحد يستحقوا هيكسبوا اكتر بكتير من ال 50 و لا ال 100 جنيه دول

بيع الأصوات مابقاش يتخاف منه.......الأستفتاء الأخير أكبر ميزة ليه أنه نزل 18000000 من الشعب
هاترشي كام منهم؟؟؟؟ وميزانية كام!.........والمكسب المتوقع كام من وراء كرسي مجلس الشعب(بعد الأصلاحات والرقابة عليهم)
أغلب الظن أغنياء الحزب الوطني السابقين هايدخلو من الباطن في أحزاب أخرى

[hossaam]

الموضوع فعلا مش سهل خااالص...ومحتاج تحرك وشغل

انا في منطقة جنب شغلي...الناس فيها لسه معلقين يفط الدعاية السابقة بتاعة نواب الحزب الوطني على ابواب بيوتهم وبلكوناتهم..!!!! وللمعلومة المنطقة دي فعلا بيحكمها شغل العائلات وكبير العيلة اللي رأيه بيمشي على الكل..!!!

[alaa_dash]

الموضوع فعلا مش سهل خااالص...ومحتاج تحرك وشغل

انا في منطقة جنب شغلي...الناس فيها لسه معلقين يفط الدعاية السابقة بتاعة نواب الحزب الوطني على ابواب بيوتهم وبلكوناتهم..!!!! وللمعلومة المنطقة دي فعلا بيحكمها شغل العائلات وكبير العيلة اللي رأيه بيمشي على الكل..!!!

ديه المشكلة الرئيسية ...

الاستفتاء عدى بسلام عشان مفيش اطراف محددة ..

لكن المجلس هيبقى فيه اطراف متعددة في المنطقة الواحدة ... و مندوب لكل مرشح في كل لجنة و دعاية على باب اللجنة و هيصة

و مناديب عند الفرز ..و ساعتها ما ينفعش السيد رئيس اللجنة يقول اللي عنده شك ان فيه حد صوت مرتين ابقى روح بلغ
زي ما حصل في الاستفتاء ...

[Ralliart]

بيع الأصوات مابقاش يتخاف منه.......الأستفتاء الأخير أكبر ميزة ليه أنه نزل 18000000 من الشعب
هاترشي كام منهم؟؟؟؟ وميزانية كام!.........والمكسب المتوقع كام من وراء كرسي مجلس الشعب(بعد الأصلاحات والرقابة عليهم)
أغلب الظن أغنياء الحزب الوطني السابقين هايدخلو من الباطن في أحزاب أخرى

انتخابات مجلس الشعب مختلفة لأن كل واحد بيمسك دايرته وبيوزع فلوس ووسايط على الكبار اللي ليهم رأي في عائلاتهم وهما عليهم الباقي ولسة في ناس كتير جداً مش فارق معاها حسني من غيره ومكسلين يشغلو مخهم

[mailo]

ياجماعة لازم يكون فيه حملاااااات توعية للمواطنين

الحزب النيلة لعبها صح وزي ماعز قال قبل كده الحزب الوطني مش قاهرة وجيزة هو أكتر شغله في المحافظة وال اقاليمالتانية

ودلوقتي كل الناس بتتفرج على تامر أمين وأمثاله وتعبوا من المشاكل اللي بتحصل وهيصدقوا أي حاجة تتقالهم عشان البلد ترجع زي الأول حتى و هم عارفين إنه كدب في كدب
وبزات في القرى

لازم المعارضة ولمرة واحدة بس تتحد في مواجهة النظام اللي فات ويبطلوا موضوع مصلحتي ده بقى ومعاهم كمان الاخوان المسلمين لإن من الآخر كده ولا طرف فالمعارضة لحد دلوقتي يقدر يقف قدام اعضاء الوطني لوحده حتى فالظروف اللي احنا فيها دي

وحتى لو اتحدوا هيطلع عنهم عشان يحققوا انتصارات عليهم

وربنا يستر علينا
ده لسة امبارح عاطف الالسادات طلع على برنامج عَمر اديب وبيقول "ثورتنا" وبيقول إنهم بصلحوا نفسهم عشان ينزلوا الانتخابات تاني
يعني بينظموا نفسهم من جديد وكلنا عارفين إن في لسة فساد في كل القطاعات وسهل قوي إني اوهمك إني اتغيرت وإني هارجع بقوتي تاني عشان يبتدي الفساد يشتغل تاني

ياجماعة الحزب الوطني قدامه على الاقل 10 سنين هزايم متلاحقة عشان نقدر نطمن شوية من ناحيته

التوانسه عملها صح وفككوا الحزب الحاكم رسميا وده اللي هيقضي عليه فعلا عشان ساعتها كل واحد من الكبار هيعمل لنفسه حزب جديد وقوة الحزب ده هتتقاسم على 3 أو 4 احزاب على الاقل وكده هيكون فيه شوية تكافؤ إنما طول مهما تحت حزب واحد هيفضلوا اقوياءءء

ربنا يستر

[M.Mosaad]

ب
هاترشي كام منهم؟؟؟؟ وميزانية كام!.........والمكسب المتوقع كام من وراء كرسي مجلس الشعب(بعد الأصلاحات والرقابة عليهم)

هي دي اللي انا متمنيها من ربنا ان الناس دي تبقي عارفه انها مش هتكسب من ورا البرلمان زي زمان لانهم زمان مكنش عندهم مشكله في الفلوس و في ناس صارفه عشرات الملايين علشان يخشوا مجلس الشعب امنيتي بقي ان البرلمان يتغير عن زمان و الاشكال الزباله دي تعرف انها مش هتكسب منه زي زمان يعني الناس عايزة حد يقدم خدمات مش يقعد يسرق و يسمسر

بس انتخابات مجلس الشعب مختلفه خالص عن انتخابات الاستفتاء لان في وجوة محددة و متعددة و تكسير اصوات و بلطجه و عوامل كتير ربنا يستر فبها

المفروض ان المجهود اللي الاخوان و السلفيين و القساوسه بذلوة علشان يدفعوا الناس جهه نعم او لا في الاستفتاء يبذلوا اضعافه في توعيه الناس ايه اللي ممكن يكسبوه من ورا نائب في البرلمان حريص عليهم و امين و بيتقي ربنا

بس ان شاء الله انا متفائل خير لان الناس من جواها عايزة تتغير بجد و شكل الطوابير بتاعه الاستفتاء كان في منتهي التحضر و الرقي و الوعي ربنا ييسر الحال