نصيحة في عدسات بولاريزد ولا نضارة

[Karim_Monir]

السلام عليكم يا شعب :-)
كنت عايز راي الافاضل اللي ليهم علاقة بالنضارات ودكاترة العيون
انا مقاس نظري ناقص 3.5 تقريبا
واخر كشف عملتة من 3 سنين
وليا السنادي بدل نضارة من شركة التامين الطبي كنت عايز استغلة في نضارة شمس
وبما اني عندي نضارة بربري تمنها يقارب تمن عملية ليزك :-) وعاجباني بفكر اعمل ليها عدسات بولاريزد
هل يستاهلو ال 800 جنيه فعلا
وهل فيه انواع
وهل اعملها للشمس والنظر ولا كفاية الشمس
وايه افضل انواعها
وهل فيه لون مفضل عن لون ولا حسب مزاجي الونها
في سي اند كو بشوف نضارات بعدسات بولاريزد وايطالي بس براندات مجهولة ب 500 جنيه بس
علما بان عدساتي تتكلف 800 جنية
هل الموضوع يستاهل ولا لاء

[Tarek Gen 2]

الموضوع ده كله اعلانات عن اسم نظارة و عن نوع عدسات و عن محل سى اند كو و و و
انا اطالب بايقاف العضو و سحب المنتدى منه و اقالته من الادارة و اتخاذ اللازم درئا لهذه الجريمة مستقبلا :)
( يا اما يجيبلى نضارة معاه )

[eldell]

طيب متعمل عمليه الليزك وتريح نفسك من الحوارات ديه

[MOUSTAFA_SAAD]

انا لو منك ومعايا فلوسها اعمل العمليه وعلى فكره انا نظرى سالب 5.5 بعيد عنك ونفسى اعمل عملية الليزك بس الفلوس

[power]

معلش بس انا مش فاهم نظاره حضرتك البربري دي شمس ولا نظر
لو هي اصلا شمس اعتقد بالاش تغير العدسه لان ده براند عالي اوي وخساره تخسر العدسه اللي اكيد معموله بتقنه عاليه اوي حتي لو مش بولاريزد وخصوصا ان السعر بتاع التعديل مش مغري اوي فمن الافضل-رائي الشخصي-انك تكمل علي ال800جنيه وتجيب نضاره تانيه بولاريزد (حد يلعب في نظاره بربري ياراجل)
دا طبعا اذا كنت فلهم صح لكن لو النظاره دي نظر يبفي الكلام مختلف

[Karim_Monir]

ليزك مستحيل على جثتي :-)
اذا كان دكاترة العيون مابيعملوهاش :-)
البربري شمس بس طبعا قالب عدساتها نظر عشان اشوف

[Tarek Gen 2]

انا و 4 اصحابى و ابن خالتى و اختى عاملين ليزك و زى الفل :) طالما الدكتور معروف وبعد ارادة الله لا تخف :)

[eldell]

ليه ياكريم باشا ده انا بفكر اعملها ياريت لو تعرف ليها اى اضرار تقولى

[MOUSTAFA_SAAD]

انا اختى عاملاها وزى الفل ماشاء الله
وانا لو معايا فلوسها اعملها من بكره بلا نظارات بلا وجع دماغ

[heshamzaky]

ليزك مستحيل على جثتي :-)
اذا كان دكاترة العيون مابيعملوهاش :-)
البربري شمس بس طبعا قالب عدساتها نظر عشان اشوف

بقولك أية يا باشا و الله أنا أعرف دكتور عيون ممتاز جدا جدا جدا جدا بجد عند الحديقة الدولية العيادة بتاعتة والدتى سيدة كبيرة فى السن طبعا ربنا يديها الصحة عملت العملية عند الدكتور دة الاول كان نظرها وحش جدا جدا العملية بسيطة جدا جدا و الحمد لله النظارة الى بتلبسها حاليا لا تقارن بالنظارة السابقة
بجد جرب أكشف عندة مش حا تندم و العائلة كلها بتروح للدكتور دة نعرفة كويس حا أقول للحاجة توصى عليك و بجد حا يعحبك جدا لو حابب قولى و تحت أمرك يا باشا

[mido_soliman]

يا جماعة انتوا خرجتوا لية برة الموضوع الرئيسى بتاع كريم ؟؟
وبعدين ناقص 3.5 دة كلام فاضى ميتعملوش ليزك اساسا لو راح لدكتور حيقولة الليزك يفضل يتعمل من اول ناقص 6
يلريت باة اللى جرب العدسات البولوريزد يقولوا ويقولى انا كمان :]

[dr-mohamed]

الموضوع ده كله اعلانات عن اسم نظارة و عن نوع عدسات و عن محل سى اند كو و و و
انا اطالب بايقاف العضو و سحب المنتدى منه و اقالته من الادارة و اتخاذ اللازم درئا لهذه الجريمة مستقبلا :)
( يا اما يجيبلى نضارة معاه )

متضامن مع العضو ولو لم تنفذ طلباتنا هانعمل اضراب واعتصام على باب المنتدي وهانهد معتقل المغول ونهرب المعتقلين - اقصد الموقوفين - الذين تم اعتقالهم في عهده

انا و 4 اصحابى و ابن خالتى و اختى عاملين ليزك و زى الفل :) طالما الدكتور معروف وبعد ارادة الله لا تخف :)

ابعت لي اسمه وتليفونه لو معاك

[aif]

ايه النظارة البربري دي يا كريم ؟؟؟؟؟
يعني لونها اسود ؟؟؟؟
ولا مستوردة من قبائل البربر بتوع الصحراء الكبرى ؟؟؟
ولا من عند البربري بتاع النابوليا ؟؟؟
...
انا متابع الموضوع بس عشان اعرف معنات الكلام .... وايه البولازريد دي كمان ؟؟؟
هو انت بقى كلامك غريب كدة ليه ؟؟؟
انا حاسس اني سافرت بآلة الزمن

[dr-mohamed]

ايه النظارة البربري دي يا كريم ؟؟؟؟؟
يعني لونها اسود ؟؟؟؟
ولا مستوردة من قبائل البربر بتوع الصحراء الكبرى ؟؟؟
ولا من عند البربري بتاع النابوليا ؟؟؟

غلط يا حاج عاطف
دي بيبقي واحد اسمه بربري ماسكها طول الوقت اول ما كريم يحب يلبسها بربري يلبسها له ويفضل ماسكها من الدراعات علشان متقعش اول ما يحب يقلعها بربري يشيلها ويمسكها في ايده

...
انا متابع الموضوع بس عشان اعرف معنات الكلام .... وايه البولازريد دي كمان ؟؟؟
هو انت بقى كلامك غريب كدة ليه ؟؟؟
انا حاسس اني سافرت بآلة الزمن

تصدق وانا معاك
احنا اخرنا البيبرسول والريبا والكاريرا وجبرت

[aif]

تصدق وانا معاك
احنا اخرنا البيبرسول والريبا والكاريرا وجبرت

عاوزين ترجمة لو سمحت يا كريم
ع الاقل لما حد يقول الكلام ده قدامنا .... نقدر نقاوح يعني
قولها تاني كدة
هو انت اللي قولتها ... ولا هي اللي اتقالت
قولها بس ... انا عارفها بس انت قولها
مش انت اللي بتقول الكلام للناس اللي جاية من برا ....