!!!!! ايه ده !!

[X_MM_X]

دلوقتي في نقطه استوقفتني اللي هيه اشمعنى الأذن على افتراض انه كل الكلام ده صحيح كانوا قتلوه او جلدوه . بس الأذن دي غريبه ودليل ان القصه لو كانت حصلت يبقى مش كده خالص

[Tarek Gen 2]

الخبر من الشروق

هما كلهم ناقلينه بنفس الصيغة بس انا مش مصدق برده حاسس ان فى انة فى الموضوع
بس انا واحد صاحبى قاللى انه هو زى ما اتحكى كدة !!

بس انا لو مكانه مكنتش اتصالحت اصلا دى ودن يا جدعااااان :)
بس المهم ان هما كاتبين الاسامى و الصور و الراجل و الشهود الاسامى الرباعية
معقول يكون مفبركين كل ده !! بس الجرايد التعبيرية دى محدش يستبعد حاجة منها

[Tarek Gen 2]

و الله اتمني من الاخ طارق ناقل الموضوع ان يطلب حذفه
لما يمثل من احداث حالة احتقان بدون اي ذنب للاسلام
فنحن الان مشينا وراء الموضوع و كأن ما ذكره الصحفي صحيح
احتمال انها كانت خناقة و حادث ضرب ادي الي اصابة في الاذن
ثم هوه لو علاقة و الكلام الفاضي ده هيقطعو له اذنه ليه؟؟؟
ثانيا لو صحيح الخبر فعلا فليس كل صاحب ذقن انسان سوي يعني
فأرجو اعادة النظر في المصلحة العامة و مقارنة المفاسد التي ممكن ان تحدث من نشر مثل هذه الاخبار الفردية اثناء مرور البلد بهذه الفترة من الغليان

م.حاتم السباعي

تمام يا بش مهندس انا بس افضل ان احنا منحطش راسنا فى الرمال و نواجه مشاكلنا بدل ما ييجى حد اخ مسيحى خبر زى ده يعصبه و ييجى بتحيز و تقوم خناقة فكان غرضى احنا نناقشه بنفسنا
بس اذا كان ده مطلبي جماعى انا مستعد اطالب بحزفه

[human]

هما قطعوا ودنه ليه؟
مش فاهمها
يعنى هو متهم بمصاحبه الست اللى قالوا عليها مثلا ويقطعوا ودنه؟؟؟
و الصعيد كمان

كلام لا يستوى

[Dr_Mido]

لو فى الصعيد وقضيه شرف صدقنى مش هيقطعو ودنه هيقطعو رقبته

وليه متكنش خناقه بلطجه واحد مسلم وواحد مسيحى بيتخانقو على قرش حشيش مثلا واحد قطع ودن التانى مكله وارد ياجدعان وواحد ابن حلال قله تعال وقول ان اللى عورك بدقن متتفرجو على افلام اكشن شويه يارجاله

[م. حاتم السباعي]

اشكرك يا استاذ طارق لاهتمامك
و انا فقط بنصح بسبب ما يحدث حاليا
و ان كان الهدف من نشر الموضوع اظهار ما به من عيوب كان به الا ان العجيب انك تجد احيانا تصديق او محاولة تصديق للفكرة اللي نفسهم يروجو لها

م.حاتم السباعي

[SkyBird]

واضح من التأم الجرح خصوصا جرح الاذن ان هذا الحادث من حقبة مبارك او من فترة طويلة
خصوصا عدم ذكر تاريخ الحادث وتعمد اخفاءه
السؤال
لماذا تم استدعاء الخبر اليوم

المخطط يسير بهدوء وثبات
لكن
لن يمروا

[kono]

يمكن ده قرص الودن عندهم ياجماعه
مش متطرفين
الراجل بياجر الشقه لبنات مش كويسه
جم يشدوله ودنه عشان ميعملش كده تاني طلعت في ايديهم
:) :)

الخبر ده فكرني بنكته
بيقولك مره واحد راح يحلق عند حلاق مجنون
الراجل دخل قعد عالكرسي
الحلاق مسك المقص وقال للراجل عاوز ودنك دي
الراجل بصل له باستغراب كده وقال له لا طبعا
راح قاطعها وراميها في الشارع
الراجل قعد يصوت ويصرخ ياغبي ايه اللي انتا عملته ده
راح الحلاق قعده ومسك ودنه التانيه وقال له
ها عاوز ودنك دي
الراجل قال له ايوه ايوه عاوزها
راح قاطعها ومديهاله في ايده
:) :) :)

والله الواحد لاهو عارف يزعل عالخبر ولا يضحك من غباء اللي كاتبينه
وياتري جلسه الصلح كانت علي ايه بقي
مش حنقطعله ودنه التانيه بس يبطل ولا ايه

[Tarek Gen 2]

اليوم السابع | المجنى عليه فى حادث قطع الأذن بقنا يتنازل عن بلاغه

تنازل أيمن أنور ديمترى، المجنى عليه، فى حادث قطع الأذن بقنا عن البلاغ المقدم ضد 8 متهمين لقيامهم بقطع أذنه وإحراق مسكنه، الذى يقوم بتأجيره وتم تحرير محضر صلح بين المتهمين والمجنى عليه.

جاء ذلك على خلفية الصلح، الذى عقد بين المجنى عليه والمتهمين مساء أمس الأول فى حضور عدد من القساوسة والمشايخ بقنا منهم الشيخ محمد خليل، رئيس جمعية أنصار السنة المحمدية والقس موسى والقس هدرا فى حضور الحاكم العسكرى بقنا.

كانت مدينه قنا قد شهدت واقعة مأساوية إثر قيام بعض المتطرفين بإحراق مسكن ملك قبطى يدعى أيمن أنور ديمترى 42 سنة يقوم بتأجيره وذلك على خلفية إشاعات تم ترديديها بوجود علاقه مشبوهة بين صاحب الشقة والفتاة، التى تسكنها، فقام مجموعة من الأشخاص بإحراق المسكن وقطع أذن المجنى عليه، وتم تحرير محضر بالواقعة وتولت النيابة التحقيقات برئاسة أحمد صقر مدير النيابة

مع انى ضد المصالحة دى و مع حبس البهايم اللى بيشوهوا الاسلام بتاعنا بس يالا الصلح خير

[mertahgedan]

أنا أصب جام غضبي علي المدعو أسامة سرايا وأقول له حسبي الله ونعم الوكيل . أنا لم اطلع علي نية كاتب الخبر لكن كل لبيب بالاشارة يفهم. ألم يتحفنا هذا الشخص في بوابة الأهرام منذ فترة بخبر حدوث سرقة بهائم من أحد قري الجيزة ويصور الأمر انه حدث بسبب الانفلات الأمني ويتضح انه من قبل الثورة بمدة طويلة

[Tarek Gen 2]

اليوم السابع | مفتى الجمهورية: حادثة قطع أذن مواطن قبطى بقنا "جريمة كبرى".. ورئيس لجنة الفتوى السابق: قطع الأذن ليس حدا فى الإسلام.. وآمنة نصير: ما فعله السلف بقنا يهدد بفوضى فى المجتمع

[عمرو عمارة]

اليوم السابع | مفتى الجمهورية: حادثة قطع أذن مواطن قبطى بقنا "جريمة كبرى".. ورئيس لجنة الفتوى السابق: قطع الأذن ليس حدا فى الإسلام.. وآمنة نصير: ما فعله السلف بقنا يهدد بفوضى فى المجتمع

وهو ده هدف نشر الخبر........هل نحن سذج لهذه الدرجة !!!؟؟؟

إستوقفتي بعض التعليقات التي توحي بسذاجة كاتبها سواء من المسلمين أو النصارى والتي أيضاً من أجلها كان الهدف من نشر الخبر

لوكان هذا هو الاسلام بما رأيناة من قطع اعضاء الناس دون محاكمة فالبوذية والكفر ارحم من الاسلام
جاية على الطبطاب دي للعلماني صاحب الجريدة !!

كيف نقضي علي السلفية : علينا التخلص من الحرمان و الفقر وتعديل المناهج التعليمية و أن نعطي العلم في حياتنا وزن و قيمة أعلي مما نعطيها له الأن
السلفية لا تتفق مع المنهج العلمي في التفكير و لا تنتشر الا في ظلمات الفقر والجهل والحرمان

لكن الحمد لله جاءت معظم التعليقات دفاعاً عن الإسلام والسلف وأحبطت محاولة الجريدة القذرة لتشويه صورة الإسلام

[Tarek Gen 2]

السلفيون ينفون علاقتهم بقطع أذن المواطن المسيحى ويقولون أنه ليس من الإسلام وتم الزج بإسمنا لأسباب سياسيه ، والمجنى عليه يتنازل عن البلاغ ، وجيرانه هم من قاموا بالإعتداء عليه لسوء سلوكه كما ثبت فى البلاغ أن قطع اذنه حدث خطئا نتيجة إلقائه بزجاجه من أحد الجيران وليس كنتيجة إقامة الحد عليه كما حاول الإعلام تصويره

[ahmedbatoos]

يا جماعة الاعلام المصري الخاص بجرايدة ب قنواتة . . اخبار تشوية المسلمين والاسلام والتيار الاسلامي اكثر من اخبار الحكومة المصرية !!!

بجد مفيش غباء بعد كدة الاعلام وبعض التيارات فشلت فكريا تلجأ لاسلوب الحزب الواطي بلشكل دة !!! دة لو جابوا واحد اولي ابتدائي حرب نفسية مش هيبقي بلسذاجة دية